1. მუსხით მნიშვნელოვან რდჷ ქობალ ბიბლიურ დროს?

 ᲥᲝᲑᲐᲚ ბიბლიურ დროს მანგარ მნიშვნელოვან ოჭკუმალ რდჷ, თისხით მნიშვნელოვან, ნამდა მინშა თის სიტყვა „ოჭკუმალიშ“ მანგიორო ხოლო ირინუანდეს (დაბ. 14:18; მათ. 6:11; ლუკ. 4:4). იესოქ ხოლო მუშ კეთებულ სასწაულეფშე ჟირს ზუსტას ქობალ გიმირინუ (მათ. 16:9, 10). ართ-ართ თეცალ შემთხვევა იოანეშ მა-6 დუდის რე ინოჭარილ. მორთ გუვარჩუათ თე ბიბლიურ მონაკვეთ დო ქობძირათ, მუშ გურაფა შემლებუნა თევრეშე.

 2. ნამ სიტუაციას იჸუ ოჭკუმალქ საჭიროქ ანთასობით კოჩშო?

² ოქადაგებშე დორთელ მოციქულეფ შულადირეფ რდესჷ, ათეშენ იესოქ გეგნოჭყვიდ, თინეფ მასვანჯებშა მიდეჸუნუკო თიცალ ადგილშა, სოდეთ მითინ ვეჸუაფუდ. თინეფქ ნავით გეგნოკვათეს გალილეაშ ზღვა დო ქალაქ ბეთსაიდაშა გენორთეს (მარ. 6:7, 30–32; ლუკ. 9:10). მარა, მუჟამსით გისიმ, ნამდა იესო თექ რდჷ, ანთასობით ადამიანქ ქიმერთ თი ადგილშა დო თინეფს ქუგაშაყარეს. იესოს ვა ჩუთხინუაფ თე ხალხ, თეშ მანგიორო, ღორონთიშ სამეფოშენ გურაფა ქუდუჭყჷ დო ლეხეფ დასქილიდუ. მოონჯუეს მოწაფეეფქ თიშე ქიდიჭყეს ფიქრ, თეზმა შქირენულ ხალხის მუ ოკო ჩესკო. თე ხალხშე ნამთინეს შილებე მოუღუდუკო მულაჭკუმაფალ, მარა უმენტაშის გოხოლუა სოფელეფშა აჸიდ ოულარ ოჭკუმალიშ ოჸიდირშა (მათ. 14:15; იოან. 6:4, 5). საინტერესო რე, მუჭო მიქციებ იესო.

ᲥᲝᲑᲐᲚᲔᲤᲘᲗ ᲙᲔᲗᲔᲑᲣᲚ ᲘᲔᲡᲝᲨ ᲡᲐᲡᲬᲐᲣᲚ

 3. მუ უწუ იესოქ მოციქულეფს, მუჟამსით ქოძირ, ნამდა ხალხის ოჭკუმალ ოსაჭირუდ? (ქოძირით სურათ).

³ იესოქ მოციქულეფს უწუ: „სოთინ ულა ვა რე საჭირო, თქვა ქიმეჩით ოჭკუმალ!“ (მათ. 14:16). თექ თე დროს 5 000 ქომოლკოჩ  რდჷ; ოსურკათას დო ბაღანეფს ხოლო ქიმვოკოროცხანთ-და, სოდგარენ 15 000 კოჩშა რდჷ ოჭკუმალ ოჩამალ. სოვრეშე ოკო მიღესკო თეზმა ოჭკუმალ მოციქულეფქ?! (მათ. 14:21). ანდრიაქ იესოს უწუ: „თაქ ართ ჭიჭე ბოშ რე, ნამდგას ხუთ ქერიშ ქობალ დო ჟირ ჭიჭე ჩხომ უღჷ, მარა ეზმა კოჩის თენა მუს უბაღ?!“ (იოან. 6:9). თიმ დროს ხალხ ქერიშ ქობალს დო ჭიჭე ჩხომეფს ჭკუმუნდჷ, ნამდგას ჯიმუს გარღვანდეს დო ოსქირუანდეს. მუჭოთ იძირენ, თე ბაღანას ხოლო თენა მოუღუდ, მარა თე ოჭკუმალ თეზმა ხალხის მუთუნს ვა უბაღუდ.

 4. მუშ გურაფა შემლებუნა იოანეშ 6:11–13-შე? (ქოძირით სურათეფ).

⁴ იესოს ოკო, სიკეთე გუკეთას თე ხალხის დო ოჭკუმალ ქოჩას. ათეშენ ურაგად, მინდორს ჯგუფეფო ქუდოზოჯან (მარ. 6:39, 40; წეკითხით იოანეშ 6:11–13). ბიბლიას პკითხულენთ, ნამდა უკულ თიქ მადლობა ქოუწუ ზეციერ მუმას ქობალშენ დო ჩხომშენ. თეშნერო, იესოქ ირკოჩის ქაძირუ, ნამდა სინამდვილეს ღორონთ არზენდჷ თინეფს ოჭკუმალს დო მუ ხოლო მთელ გურით აფუდ მარდულ თის თეშო. მართალო, მუ ჯგირ მაგალით რე ჩქინო, მუთ იესოქ აკეთ, ნამდა ირო ქიბლოცათ ჭკუმუაშახ, ხვალე იპჸითო დოვარ შხვეფწკუმა ართო. თეშ უკულ იესოქ ხალხის დურიგ ოჭკუმალ დო არძაქ თიზმა ოჭკუმ, მუზმათ ოკოდ. ოჭკუმალ თიზმა რდჷ, ნამდა ვეჭკუმ დო ბრელქ ქუდოსქიდ. იესოქ მოწაფეეფს უწუ, დოსქილადირ ნოტეხეფ გაკოშაყარუესკო; შილებე თიშენ, ნამდა უკულ გეგმადირთუდეს. თეშნერო, იესოქ თიშ მაგალით ხოლო ქომუჩეს, ნამდა ჭკვერულო გეგმიბრინუათ ირფელ, მუთ მიღუნა დო უგამაგეთ ვა ვახარჯათ. მშობლეფ, გარჩით თე მონაკვეთ თქვან ბაღანეფწკუმა ართო დო ქუდაგურეთ, მუსხით მნიშვნელოვან რე ჭკუმუაშახ ლოცვა, სტუმარიშ ჸოროფაშ გიმორჩქინა დო გურხვეობა.

 5. მუ მინდომ ხალხიქ იესოშ სასწაულეფიშ ძირაფაშ უკულ დო მუჭო მიქცუ თიქ?

 ⁵ ხალხ მანგარ გაკვირებულ რდჷ იესოშ გურაფეფით დო სასწაულეფით დო შილებე ფიქრენდესკო, ნამდა იესო რდჷ თი წინასწარმეტყველ, ნამდგაშ გურშენ მოსე იჩიებუდ, ნამდა ღორონთ ქუმაშქვანდ (კან. 18:15–18). თინეფ ალბათ ფიქრენდეს, ნამდა იესო არძაშ უჯგუშ მმართველ იჸუაფუდ, მიდგას შეიალებედ მთელ ისრაელს ქიმეჩუკო ოჭკუმალ, ათეშენ თიშ გამეფება მინდომეს (იოან. 6:14, 15). მარა იესო თინეფს თეშ კეთებაშ უფლებას ქიმეჩანდ-და, ფაქტობრივო, იუდეველეფიშ მხარეს ქიდეკინენდ, მით თიმ პერიოდის რომაელეფიშ მმართველობაშ თუდო რდესჷ. იესოს თენა ვა უკეთებ. ხალხშე ზეწოლაშ უმკუჯინუო, თის მუთუნით ვაკოდ, პოლიტიკაშა გემშართუკო, ათეშენ, მუჭოთ ბიბლიას პკითხულენთ, იესოქ „გვალაშა ეკილ, ნამდა ხვალე ქუდოსქიდუკო“. მუშმაჯგირა მაგალით რე თენა ჩქინო.

 6. მუჭო შემლებუნა ვოძირუათ, ნამდა მეპჸუნთ იესოშ მაგალითის? (ქოძირით სურათ).

⁶ ამდღა ჩქინდე მითინ ველჷ, ნამდა სასწაულებრივო ქიმეფჩანთ ოჭკუმალს ვარდა დუვოსქილიდუანთ ლახალაშე; ვართ ჩქინ გამეფებას დო მმართველობას მითხინს მითინ. მარა შილებე მოფთხუან, არჩევნეფს მიბღათ მონაწილება ვარდა ხუჯ ქუდუკინათ ნამდგაინ პოლიტიკურ ლიდერს, ნამდგაშეთ ფიქრენა, ნამდა უჯგუშობაშა დოთირანს სიტუაციას. იესოქ მუშ მაგალითით ჯგირო მოძირუეს, მუ ოკო ვაკეთათ თეცალ დროს. თინა მუთუნით ვემშეშ პოლიტიკაშა დო თეცალ მუდგარენ თქუ: „ჩქიმ სამეფო თე ქიანაშ ნაწილ ვა რე“  (იოან. 17:14; 18:36). ქრისტიანეფქ ქოთ ჩქინ აზროვნებათ დო ქოთ საქმეეფით ოკო ვოძირუათ, ნამდა იესოცალ დამოკიდებულება მიღუნა თე საკითხის. ჩქი ხვალე ღორონთიშ სამეფოს უკინენთ ხუჯის, თიშ გურშენ ვეჩიებუთ შხვეფს დო თე სამეფოშ მოულაშენ ბლოცულენთ (მათ. 6:10). მორთ ასე კინ დუვართათ იესოშ სასწაულს, ნამუთ ქობალეფით აკეთ, დო ქობძირათ, ხოლო მუშ გურაფა შემლებუნა თევრეშე.

ᲛᲣ ᲛᲜᲘᲨᲕᲜᲔᲚᲝᲑᲐ ᲣᲦᲣᲓ ᲥᲝᲑᲐᲚᲔᲤᲡ?

 7. მუ აკეთ იესოქ დო მუ რეაქცია უღუდეს მოციქულეფს? (იოან. 6:16–20).

⁷ თიშ უკულ, მუთ იესოქ სასწაულ აკეთ დო ანაყუ ხალხის ოჭკუმალ ქოჩჷ, მოწაფეეფ კინ კაპერნაუმშა გოუტუ ნავით დო მუქ გვალაშა გეკორთჷ, ნამდა დუდ აურიდუკო თი ხალხის, ნამდგას თიშ გამეფება ოკოდ (წეკითხით იოანეშ 6:16–20). მოწაფეეფ ზღვაპიჯშა დიო ხოლო ვა რდესჷ მეულირინ თეშ, მანგარ ბორიაქ გელალ, ზღვა პოპორანდჷ დო წყარ ნავს მიკახორცქუდ. უკულ „იესოქ ზღვას კუჩხით მიშუნ თეშ ქიმერთჷ თინეფშა“ დო პეტრეს ხოლო შეიოლებაფუ, თიქ ხოლო ქიგლართუკო წყარს (მათ. 14:22–31). იესოშ ნავშა ეშულა დო ბორიაშ დაწყნარება ართ რდჷ. მოწაფეეფქ თენა ქოძირესინ, გაკვირებულეფქ უწუეს: „სი მართალო ღორონთიშ სქუა რექჷ!“ a (მათ. 14:33). საინტერესო რე, ნამდა ჭიჭე ხანიშ წოხოლე მოწაფეეფქ მუნეფიშ თოლით ძირეს, მუჭო აკეთ იესოქ სასწაულ დო მუჭო მეჩჷ ოჭკუმალ ანთასობით კათას, მარა თიმწკუმა ვა უთქუალუნა თე სიტყვეფ. ზუსტას თენა თქუ მარკოზიქ ხოლო. თიქ ჭარჷ: „თეშ ძირაფაქ მოწაფეეფ მანგარო გაკვირ. თინეფს მუთუნქ ვა დაგურუეს თი სასწაულშე, ნამუთ იესოქ ქობალეფით აკეთ; გონება დიო ხოლო კილერ აფუდეს“ (მარ. 6:50–52). არგამა რე, მოწაფეეფს ვარჩქილედეს, ნამდა სასწაულეფიშ კეთებაშ თეშმადიდა ძალა იესოს იეჰოვაშე უღუდ. ჭიჭე ხანშა იესოქ კინ ქიგიშინ ქობალეფით კეთებულ სასწაულ დო ართ მნიშვნელოვან მუდგარენ ქუდმოგურუეს.

8, 9. მუშენ ეკოჸუნდჷ ხალხ იესოს? (იოან. 6:26, 27).

⁸ იესოქ ოჭკუმალ მეჩუნ თი ხალხ ხვალე ფიზიკურ საჭიროებეფშე ფიქრენდჷ. სოვრეშე იძირ თექ? მაჟია დღას, მუჟამსით ხალხიქ ქოძირ, ნამდა იესო დო თიშ მოწაფეეფ ულირეფ რდესჷ, ტიბერიადაშე მოულირ ნავეფშა ენილეს დო იესოშ ოგორშა კაპერნაუმშა მიდართეს (იოან. 6:22–24). სამეფოშ გურშენ უმოსიშ გაგება ოკოდესინ თიშენ გორუნდესო თინეფ იესოს? ვარ, თინეფიშ მთავარ ოფიქრებელ ოჭკუმალ რდჷ. მუშენ იფჩიებუთ თეს?

⁹ ხალხიქ იესოს კაპერნაუმწკუმა ხოლოს ქიმიოგორუ. იესოქ პირდაპირ უწუ თინეფს, ნამდა კინ ოჭკუმალ ოკოდესინ თიშენ გორუნდეს თის დო გეუჸუნუ, ნამდა, მართალ რე, მუქ მეჩუნ თი ოჭკუმალით დირძღეს, მარა თენა გილმელებუნ ფერ ოჭკუმალ რდჷ. ათეშენ ელუჩ, თიცალ ოჭკუმალშო იხანდესკო, ნამუთ ულიებ სიცოცხლეს მოუღანდ (წეკითხით იოანეშ 6:26, 27). თიქ უწუ, ნამდა თინეფს თეცალ ოჭკუმალს მუამუშ ქიმეჩანდ. ალბათ თე ხალხის მანგარო გუკვირდუდ, მუჟამსით ქიმირჩქილუანდეს, ნამდა არსებენდჷ თიცალ ოჭკუმალ, ნამუთ ულიებ სიცოცხლეს ქუმუღანდ. მუ რდჷ თე ოჭკუმალ დო მუჭო შეულებუდ თე ხალხის თიშ მეღება?

10. მუ ოკო აკეთუკო ხალხიქ ულიებ სიცოცხლეშ მიოღებელო?

¹⁰ თე ხალხის ოინტერეს, მუ ოკო აკეთან, ნამდა მიღან ოჭკუმალ, ნამუთ ულიებ სიცოცხლეს ქუმუღანს. შილებე თინეფ ფიქრენა, ნამდა ღორონთიშ მოწონაშ მიოღებელო მოსეშ კანონს ოკო მიაჸუნან. მარა იესო ურაგად თინეფს: „ღორონთიშ მოწონა მიღათინ, ოკო ირწმუნათ თინა, მით თიქ მაშქვჷ“ (იოან. 6:28, 29). თე აზრ, ნამდა ხალხიქ ულიებ სიცოცხლეშ მიოღებელო ღორონთიშ რწმენა  ოკო გიმირჩქინას, იესოს თეიშახ ხოლო აფჷ ნარაგად დო უკულ ხოლო ქოთქუანს (იოან. 3:16–18, 36; იოან. 17:3).

11. სოვრეშე იძირ, ნამდა იესოშა მეულირ ხალხ კინ ხვალე ოჭკუმალშე ფიქრენდჷ? (ფსალმ. 78:24, 25).

¹¹ თე ხალხიქ ველერჩქილუ იესოშ ნარაგად, ნამდა ღორონთიშ მოწონაშ მიოღებელო, ოკო ირწმუნესკო ქრისტე. ფაქტობრივო, თინეფქ ხოლო ართშა მოთხის იესოს სასწაულიშ კეთება, მუჟამსით უწუეს: „მუ ნიშანს მოძირანთ, ნამდა გირწმუნათ?“ (იოან. 6:30). თინეფქ თქუეს, ნამდა მუნეფიშ ჯვეშეფ ზეცაშე მანანას ღებულენდეს, ნამუთ ქობალცალ რდჷ თინეფშო (ნეემ. 9:15; წეკითხით ფსალმუნიშ 78:24, 25). თავრეშე ქიძირ, ნამდა თე ხალხ კინ ხვალე ოჭკუმალშე ფიქრენდჷ. მუჟამსით იესოქ თინეფს უპასუხ, „ჩქიმ მუმა გარზენა ცაშე ნამდვილ ქობალსია“, შურო თიშ ენწყუმა ხოლო ვა თხუეს, მუს ნიშნენდჷ თიშ ნარაგად (იოან. 6:32). იესო ირნერო ოცადუდ, ქუგაგებაფუკო თინეფს, მუ ოკო აკეთესკო ულიებ სიცოცხლეშ მიოღებელო, მარა თე ხალხის ოჭკუმალშე ფიქრიქ თეშ დოუკილუ გონება, ნამდა შურო ვა ურჩქილედეს, მუს იჩიებუდ ქრისტე. მუშ გურაფა შემლებუნა ჩქი თე შემთხვევაშე?

ᲛᲣ ᲝᲙᲝ ᲠᲓᲐᲡᲷ ᲩᲥᲘᲜᲝ ᲘᲠᲤᲔᲚᲨᲔ ᲛᲜᲘᲨᲕᲜᲔᲚᲝᲕᲐᲜ?

12. მუჭო დუმოგურუეს იესოქ, მუ რე არძაშ უმოს მნიშვნელოვან?

¹² იოანეშ მა-6 დუდშე მნიშვნელოვან მუდგარენს ბგურაფლენთ – მთავარ ყურადღება სულიერ საჭიროებეფშა ოკო მაფუდან გინოღალირ. თენა იესოქ ჯგირო ქუმოძირუეს, მუჟამსით სატანაქ თიშ მეჩილითაფას ეცად. იესოქ თის უწუ: „კოჩიქ ხვალე ქობალით ვარინ, იეჰოვაშ ნარაგად ირ სიტყვათ ოკო იცოცხლას“ (მათ. 4:3, 4). გვალას ქადაგებაშ დროს რაგადებულ თიშ სიტყვეფშე ხოლო ბგურაფლენთ, მუსხით მნიშვნელოვან რე, მიღუდან ჯგირ ურთიერთობა ღორონთწკუმა (მათ. 5:3). თაშ ნამდა, ჩქინ დუდის ოკო ქოპკითხათ: ქირაგადენო ჩქიმდე, ნამდა მთელ ყურადღება სულიერ საჭიროებეფშა მაფჷ გინოღალირ დო ვართ ხოლო ფიზიკურშა?

13. ა) მუშენ ვა რე გლახა, იფსიამოვნათ ოჭკუმალით? ბ) მუ გაფრთხილება მეჩჷ პავლექ არძა ქრისტიანს? (1 კორ. 10:6, 7, 11).

¹³ მუშო ოკო რაგად, გლახა მუთუნ ვა რე, იბლოცათ ოჭკუმალშე დო იფსიამოვნათ თით (ლუკ. 11:3). ბიბლიას ხოლო ჭარჷ, ნამდა კოჩიქ ოკო „ჭკუმას, შვასჷ დო გემო ქოძირას მუშ ხანდას . . . თენა ხოლო ღორონთშე რე“ (ეკლ. 2:24; 8:15; იაკ. 1:17). მარა აუცილებერ რე, ფიზიკურ საჭიროებეფს მუშ ადგილ ქიმურჩქინათ დო პირველ ადგილს ვეგემირდან. თენა ჯგირო იძირე კორინთელ ქრისტიანეფშა მეჭარილ პავლეშ წერილშე. მოციქულქ თინეფს ქუგაშინ, მუ გლახათ იქციებუდეს ისრაელეფ უდაბნოს დო მუ აკეთეს სინაიშ გვალაშ გოხოლუას. პავლექ კორინთელ ქრისტიანეფ გაფრთხილ: „ჩქი ოკო ვემიპკორინუათ თი გლახა მუდგარენეფ, მუდგაშ კეთება თინეფქ მიკორინუეს“ (წეკითხით 1 კორინთელეფიშ 10:6, 7, 11). მუჭოთ მიჩქუნა, იეჰოვა მუშ ხალხის სასწაულებრივო არზენდჷ ოჭკუმალს უდაბნოს, მარა ეგვიპტეს უღუდესინ თი ოჭკუმალეფს თეშ მიანატრუდეს, ნამდა გეიაჸუნეს ეგოისტურ სურვილეფს დო, საბოლათ, გლახა ქიმიკინდუეს დუდშა (რიცხ. 11:4–6, 31–34). თინეფქ სინაიშ გვალაწკუმა ხოლოს ოქროშ გინიშ ქანდაკება გაკეთეს დო თიშ თაყვანიშცემა ქიდიჭყეს. მუჭოთ ბიბლიაშე ბგებულენთ, თინეფქ „ჭკუმეს, შვესჷ დო უკულ დროშ ოტარებშა გემწოდირთეს“ (გამ. 32:4–6). თავრეშე ქიძირ, ნამდა ისრაელეფშო იეჰოვაშ მორჩილებაშე უმოს მთავარ ოჭკუმალ რდჷ. პავლექ თე შემთხვევეფ კორინთელ ქრისტიანეფს თიშენ მოუჸუნ, ნამდა გაფრთხილუკო თინეფ, მუშენდა თი პერიოდის ცხოვრენდეს, მუჟამსით იუდაურ სისტემაშ ბოლო მონჭაფილ რდჷ. ამდღა თე ქვეყნიერებაშ მოსპუალა რე მონჭაფილ, ათეშენ ჩქინო მნიშვნელოვან რე, ქალებრჩქილუათ პავლეშ გაფრთხილება, ნამდა ვა მაღოლან თიქ, მუდგაქ ისრაელეფს აღოლეს.

14. მუნერ ცხოვრება მელუნა ახალ ქვეყნიერებას?

¹⁴ მუჟამსით იესოქ დუმოგურუეს, იბლოცითკო  „დასაბაღ ქობალშო“, თინა ხოლო მიწუეს, ნამდა იეჰოვას ქოფთხითკო, შისრულუკო თიშ ნებაქ, „მუჭოთ ცას რენ თეშ დედამიწას“ (მათ. 6:9–11). მუჭო გაფუნა წარმოდგენილ თი დრო, მუჟამსით იეჰოვაშ ნება შისრულებ? მუჭოთ ბიბლიაშე ბგებულენთ თიმწკუმა ხვეიანო იჸუაფ დედამიწას ოჭკუმალ. მაგალთო, ესაიაშ 25:6–8-ს ინოჭარილ სიტყვეფს ვორწყეთ, ნამდა ღორონთიშ სამეფოშ მმართველობაშ დროს იფსიამოვნენთ ანდანერ გემუან ოჭკუმალით. ფსალმუნიშ 72:16 ხოლო იჩიებ: „ხვეიანო იჸუაფ მარცვლეულ დედამიწას, გვალაშ წვანდეფს ხოლო ხვეიანო იჸუაფ“. ალბათ მიახიოლანთ ახალ ქვეყნიერებას, მუჟამსით არძაშ უმოსო გიჸორან ფერ ოჭკუმალეფს გაკეთენთ დო ახალ რეცეპტეფს ხოლო გამორსენთ. თეწკუმა ართო, ოჭკუმუნთ თქვან ბინეხიშ მიკნაღელ ჸურძენს დო ჯგირ ღვინს ხოლო ქუდოდგუნთ (ეს. 65:21, 22). თე კურთხევეფით ხვალე თქვა ვარინ, მთელ დედამიწას მახორუ ადამიანეფ გეხარენა.

15. მუს დიგურუანა გათელებურეფ ახალ ქვეყნიერებას? (იოან. 6:35).

¹⁵ წეკითხით იოანეშ 6:35. მუ ელჷ თი ხალხის, მიდგას იესოქ ქობალ დო ჩხომ მეჩჷ? შილებე თინეფშე ბრელს ვეგმურჩქინუ რწმენა თიშ მიმართ, მარა თეშ უმკუჯინუო, თე ხალხშე ნამთინექ შილებე გეთელას დო ახალ ქვეყნიერებას ქეშეფხვადათ (იოან. 5:28, 29). თეცალეფს დაგურაფალ აჸინა, მუს ნიშნენდჷ იესოშ სიტყვეფ, ნამუთ ართ დროს მირჩქილუეს: „მა ვორექ სიცოცხლეშ ქობალ. მით ჩქიმდა მოურს, მეტო ვა მაშქირენე“. თინეფქ ოკო ქირწმუნან, ნამდა იესოშ მსხვერპლის გიშაჸიდირიშ ძალა უღჷ დო ზუსტას თე მსხვერპლიშ ჭყოლოფათ მიაჩეს სიცოცხლექ. ახალ ქვეყნიერებას იჸუაფ სულიერ საგანმანათლებლო პროგრამა ქოთ გათელებურეფშო დო ქოთ თინეფშო, მით თექ დებადებუნა. მუ სახიოლო რე, ნამდა ჩქი ხოლო მიბღენთ მონაწილებას შხვეფშა გურაფას. ადამიანეფშა იეჰოვაწკუმა დაახლოებას მოხვარა თიშე ბრელით უმოს დიდ სიამოვნებას ქუმომღანა, ვინემ არძაშ უმოს გემუან ოჭკუმალიშ ჭკუმუა.

16. მუს გუვარჩიენთ უკულიან სტატიას?

¹⁶ თე სტატიას იოანეშ სახარებაშ მა-6 დუდიშ ხვალე ჭიჭე ნაწილ გუვარჩით. მარა იესოქ მარადიულ სიცოცხლეშ გურშენ ბრელით უმოს თქუ. იესოშ ნარაგად მანგარ საყურადღებო რდჷ იუდეველეფშო დო ქოთ ჩქინო რე. თაშ ნამდა, იოანეშ მა-6 დუდიშ გარჩიებას უკულიან სტატიას ხოლო გუვაგრძელენთ.