1. სოვრეშე იძირე, ნამდა იესო ხეგოფაჩილ რე?

 ᲘᲔᲡᲝᲪᲐᲚ ხეგოფაჩილ ადამიანს დიო დედამიწას ვა უცხოვრებ. თაქ ცხოვრენდუნ თიმწკუმა, თინა ხშირას ირინუანდჷ მუშ ძალას სასწაულეფიშ ოკეთებელო, ნამდა ადამიანეფს ქიმეხვარუკო (ლუკ. 9:12—17). თეწკუმა ართო, თიქ მუშ სიცოცხლე დათმჷ დო დოღურ ჩქინ გურშენ. თეშ უმოს დიდ საჩუქარ მუ ოკო რდასჷ?! (იოან. 15:13). იესო გათელებაშ უკულ ხოლო ვა თირე დო კინ თიცალ ხეგოფაჩილ რე. მუჭოთ სიტყვა მეჩჷ მუშ მიმაჸუნალეფს, იესო მუამუშის თხულენს წმინდა შურს ჩქინო, ნამუთ ფხელმძღვანელენა დო გურშა ემქექუანა (იოან. 14:16, 17; 16:13). თეს გეძინელ, კრებაშ შეხვალამეფიშ საშვალებათ, იესო ირიათო მოგურუანა, მუჭო მუვამზადათ მოწაფეეფ (მათ. 28:18—20).

2. მუჭოთ ეფესოელეფიშ 4:7, 8-შე ბგებულენთ, ხოლო მუ საჩუქარ მუჩეს იესოქ დო მი მიშულა თიშა?

² იესოს ხოლო ართ საჩუქარ აფჷ მოჩამილ ჩქინდა. მუჭოთ მოციქულ პავლექ ჭარჷ, იესოქ ზეცაშა გეკორთუნ, „ადამიანეფ ქომუჩეს ძღვინო“ (წეკითხით ეფესოელეფიშ 4:7, 8). მუჭოთ პავლე ენწყუნს, იესო თე ადამიანეფს შხვადოშხვა დავალებას არზენს, ნამდა ქრისტიანულ კრებას ქიმეხვარან (ეფეს. 1:22, 23; 4:11—13). ამდღა თე „ადამიანეფ ძღვინო“ რენა მომსახურეეფ, უხუცესეფ დო რაიონულ ზედამხედველეფ. a მუშო ოკო რაგად, თე ჯიმალეფ არასრულყოფილეფ რენა დო მინშა ჩირთუნა, მარა ოკო ფშუდან, ნამდა იესო ქრისტე თინეფს ჩქინ მახვარებელო ირინუანს (იაკ. 3:2). თაშ ნამდა, თე ქომოლკათა მართალო ჩქინდა მოჩამილ ძღვინ რე.

3. მუჭო შემლებუნა ხე შეუნწყუათ დანიშნულ ჯიმალეფს? ქიმიჸუნით მაგალით.

 ³ იესოქ დანიშნულ ჯიმალეფს კრებაშ გამანგარება დავალ (ეფეს. 4:12). მარა არძას შემლებუნა მივეხვარათ თინეფს თე მნიშვნელოვან პასუხიშმგებლობაშ შესრულებას. მაგალთო, მუჟამსით დარბაზიშ შენება მეურს, ნამთინე პირდაპირ მონაწილენს მშენებლობაშ საქმეს, მარა ნამთინე ხეს უნწყუნს მშენებლობას თით, ნამდა სადილს ამზადენს, მუდგარენეფიშ ტრანსპორტირებას ოხვარ ვარდა შხვა საქმეეფს ორთჷ. თეშნერო, არძას შემლებუნა ხე შეუნწყუათ მომსახურეეფს, უხუცესეფს დო რაიონულ ზედამხედველეფს ჩქინ სიტყვეფით დო საქმეეფით. ათეშენ მორთ გუვარჩუათ, მუს ორთუნა თე ჯიმალეფ ჩქინო დო მუჭო შემლებუნა ქუვოძირათ ქოთ თინეფს დო ქოთ იესოს, მიდგაქ მუჩეს „ადამიანეფ ძღვინო“, ნამდა მანგარო ვაფასენთ თე ჯიმალეფს.

ᲛᲝᲛᲡᲐᲮᲣᲠᲔᲔᲤ ᲙᲠᲔᲑᲐᲨ ᲛᲐᲮᲕᲐᲠᲔᲑᲔᲚᲝ ᲠᲔᲜᲐ ᲓᲐᲜᲘᲨᲜᲣᲚ

4. მუს შილებე ორთუდესკო მომსახურეეფ პირველ საუკუნეს შხვეფიშ მახვარებელო?

⁴ პირველ საუკუნეს ნამთინე ჯიმა კრებას მომსახურეთ რდჷ დანიშნულ (1 ტიმ. 3:8). მუჭოთ იძირენ, კორინთელეფშა მეჭარილ პირველ წერილს პავლექ ზუსტას თე ჯიმალეფშენ თქუ, ნამდა ოხვარუდეს შხვეფს (1 კორ. 12:28). მომსახურეეფ ბრელ მნიშვნელოვან საქმეს ორთუდეს, ნამდა უხუცესეფს უმოსო ქოჩოდუდესკო გურაფაშ დო ჭყიშუაშ საქმეშო. მაგალთო, შილებე თე ჯიმალეფ წმინდა წერილეფიშ ასლეფს ორთუდესკო ვარდა ჸიდულენდესკო საჭირო მასალეფს ასლეფიშ ოკეთებელო.

5. მუ საქმეეფს ორთუნა მომსახურეეფ ამდღარ ქრისტიანულ კრებას?

⁵ მუ საქმეეფს ორთუნა მომსახურეეფ ამდღარ ქრისტიანულ კრებას? (1 პეტ. 4:10). თე ჯიმალეფს შილებე ობარუდან კრებაშ ბუღალტერია, უბანეფ, ლიტერატურა, აუდიო-ვიდეო აპარატურა, მომწესრიგებელო მსახურენდან შეხვალამეფს ვარდა მონაწილენდან დარბაზიშ მიკოლუაფაშ საქმეს. გუმოკოროცხილ საქმეეფშე არძა მნიშვნელოვან რე, ნამდა შეხვალამეფ გემოშა ქიმიფრჩქილუათ დო კრებას ქადაგებაშ საქმე ორგანიზებულო მიშას (1 კორ. 14:40). თეწკუმა ართო, ნამთინე მომსახურეს შილებე დავალებეფ უღუდას შქა მარაშ შეხვალამას დო გიშეშას საჯარო მოხსენებეფით. შილებე მომსახურე სამქადაგებლო მსახურებაშ ჯგუფიშ ზედამხედველიშ დამხმარეთ ხოლო მსახურენდას. მინშა შესაფერის მომსახურე უხუცესის სამწყემსო მონახულებაშა ხოლო მეჸუნს.

6. მუ საქმეეფიშ გურშენ ვაფუთ მარდულ მომსახურეეფს?

⁶ დეკვირით, მუს იჩიებუნა ჩქინ თანაქრისტიანეფ მომსახურეეფიშ გურშენ. და ბიბერლი, b ნამუთ ბოლივიას ცხოვრენს, იჩიებ: „მომსახურეეფიშ ჭყოლოფათ კრებაშ შეხვალამეფს გემოშა ვოსწრუქ. თე ჯიმალეფიშ მოხვარათ შემლებ ქიბიბრე ობირეშეფ, გუვაკეთე კომენტარეფ, ქიმიბრჩქილუე მოხსენებეფ დო ქობძირე ვიდეოეფ დო სურათეფ. თინეფ შეხვალამეფიშ დროს უსაფრთხოებაშე ზრუნენა დო ოხვარუნა თი და დო ჯიმალეფს ხოლო, მით ვიდეოკონფერენციათ ოსწრუნა კრებას, მუშენდა დარბაზშა ვა მართენა. თინეფ ხელმძღვანელენა დარბაზიშ დონწყუალას, მიკაჯინენა ფინანსეფს დო მარზენა ლიტერატურას. დიდ მადლობა თე ჯიმალეფს!“. ლესლი, ნამუთ კოლუმბიას ცხოვრენს დო ნამდგაშ ქომონჯ უხუცეს რე, იჩიებ: „მომსახურეეფ ბრელ საქმეს ორთუნა დო თეშნერო მანგარო ოხვარუნა ჩქიმ ქომონჯის. თე ჯიმალეფ ვა რდანინ, თის ბრელით უმოს საქმე აღვენუდ. ათეშენ მარდულ ვაფუქ თინეფს მუნეფიშ მონდომაშენ დო ხანდაშენ“. ბჯერა, ნამდა თქვა ხოლო მანგარო აფასენთ მომსახურე ჯიმალეფს (1 ტიმ. 3:13).

7. მუჭო შემლებუნა მომსახურეეფიშ მიმართ სიმარდულიშ გიმოხანტუა? (ქოძირით სურათ).

 ⁷ შილებე გურს მანგარ მარდულ ვაფუდათ მომსახურეეფს, მარა ვაგმოჭყორდან, ბიბლია ელამჩანა: „გეგმოხანტით მარდულობა“ (კოლ. 3:15). ართ უხუცეს, კრისტოფერ, ნამუთ ფინეთის ცხოვრენს, მირაგადუნა, მუჭო გიმოხანტუნს მარდულობას: „მომსახურეეფს ჭიჭე ბარათის უჯღონანქ ვარდა ტელეფონით მეპჭარუნქ წერილს, სოდეთ მიჭარ ბიბლიურ მუხლ დო კონკრეტულ მხარე, მუდგაშ გურშენ მარდულ ვაფუქ თინეფს“. პასკალ დო ჟიელ, მით ახალ კალედონიას ცხოვრენა, კონკრეტულო ლოცულენა მომსახურეეფშო. პასკალ იჩიებ: „ბოლო ხანეფს ბრელს ბლოცულენთ მომსახურეეფშო, მადლობას ურაგადუთ იეჰოვას თინეფშო დო ფთხინთჷ, ქიმეხვარას თე ჯიმალეფს“. იეჰოვა პასუხენს თეცალ ლოცვეფს, მუდგას ჯგირობუა მოუღ მთელ კრებაშა, მუშენდა თე ჯიმალეფ მთელ კრებაშო ორთუნა საქმეს (2 კორ. 1:11).

ᲣᲮᲣᲪᲔᲡᲔᲤ „ᲑᲠᲔᲚᲡ ᲮᲐᲜᲓᲔᲜᲐ ᲗᲥᲕᲐᲜ ᲨᲥᲐᲡ“

8. მუშენ თქუ პავლე მოციქულქ, ნამდა პირველ საუკუნეს უხუცესეფ ბრელს ხანდენდეს? (1 თეს. 5:12, 13).

⁸ პირველ საუკუნეს უხუცესეფ ბრელს ხანდენდეს კრებაშო (წეკითხით 1 თესალონიკელეფიშ 5:12, 13; 1 ტიმ. 5:17). თინეფ ეწოჸუნდეს კრებას — ატარენდეს შეხვალამეფს დო მსახურენდეს უხუცესეფიშ საბჭოს, ნამუთ გადაწყვეტილებეფს ღებულენდჷ. თეწკუმა ართო, ჸოროფათ არზენდეს საჭირო რჩევეფს და დო ჯიმალეფს, ნამდა კრება დოთხილუესკო (1 თეს. 2:11, 12; 2 ტიმ. 4:2). მუშო ოკო რაგად, თე ირფელწკუმა ართო, უხუცესეფქ მუნეფიშ ოჯახეფ ხოლო ოკო ეიჯუმუესკო დო მუნეფიშ სულიერობას მიკაჯინესკო (1 ტიმ. 3:2, 4; ტიტ. 1:6—9).

9. მუ საქმეეფს ორთუნა უხუცესეფ ამდღა?

⁹ უხუცესეფ ამდღა ხოლო ბრელ საქმეს ორთუნა. თინეფ სახიოლო ამბეს ქადაგენა (2 ტიმ. 4:5). თე ჯიმალეფ ქოთ კრებაშ ტერიტორიას ქადაგებაშ საქმეს ხელმძღვანელენა დო ქოთ მუნეფ მსახურენა მთელ მონდომათ. თინეფ მოხვარუნა, უჯგუშ მაქადაგებელეფო დო მასწავლებერეფო გინიფრთათ. უხუცესეფს გასამართლება ხოლო ოვალუნა, მუდროსით მოჭყოლოფეეფ რენა დო გიშაკერძაფას ვეგმირჩქინანა. მუჟამსით ნამდგაინ ქრისტიან სერიოზულო აშენს, უხუცესეფ ოხვარუნა თის იეჰოვაწკუმა ურთიერთობაშ დორთინაფას, მარა თეწკუმა ართო, თე ჯიმალეფ კრებაშ სიწმინდეშ დაცვებაშე ხოლო ფიქრენა (1 კორ. 5:12, 13; გალ. 6:1). მუთ ირფელიშ უმოს მთავარ რე, უხუცესეფ ჭყიშეფ რენა (1 პეტ. 5:1—3). თინეფ გიშულა ჯგირო მომზადებულ ბიბლიაშა გერსხილ მოხსენებეფით, ირნერო ოცადუნა, კრებას არძა უჯგუშო გეჩინებაფუან დო ატარენა სამწყემსო მონახულებეფს. ნამთინე უხუცეს ოხვარ დარბაზეფიშ შენებაშ დო მიკოლუაფაშ საქმეს, მონაწილენს კონგრესეფიშ ორგანიზებას, მსახურენს საავადმყოფოეფწკუმა თანამშრომლობაშ კომიტეტის, პაციენტიშ მონახულებაშ ჯგუფის ვარდა შხვა საქმეეფს ორთჷ. უხუცესეფ მართალო ბრელს ხანდენა ჩქინო!

10. მუშ გურშენ ვაფუთ მარდულ უხუცესეფს?

¹⁰ იეჰოვაქ ბიბლიას ინაჭარაფუ წინასწარმეტყველება, ნამდა ქიგემრინუანდეს ჭყიშეფს, მით იზრუნენდეს ჩქინო დო თინეფიშ ხეს მუთუნშა ვა მაშქურინედეს (იერ. 23:4). ფინეთის მახორუ ართ დაქ, იოანაქ, მუშ დუდშა გიმოცად, მუჭო ისრულებ იეჰოვაშ თე სიტყვეფ, მუჟამსით დიამუშიქ მანგარო დელახ. თინა იჩიებ: „საერთოთ, მიჭირს ჩქიმ გრძნობეფიშ გურშენ შხვეფწკუმა ჩიება, მარა ართ უხუცესიქ, ნამდგას იშენდოიშენ ჯგირო ვეფჩინენდჷ, მოთვინებათ ქუმომდირთჷ, ქილოც ჩქიმწკუმა ართო დო ქუმოძირუ, ნამდა იეჰოვას უჸორდჷ. მართალ ქოფთქუენ, ვა ფშჷ, მუ მიწუ, მარა ფშჷ, ნამდა შიშიქ მემდინ. ბჯერსჷ, იეჰოვაქ გიმირინუ თე ჯიმა ჩქიმ მახვარებელო“. ქიგიშინით, თქვანდა მუჭო მუხვარებუნა უხუცესეფს.

11. მუჭო შემლებუნა გიმოფხანტათ სიმარდულ უხუცესეფიშ მიმართ? (ქოძირით სურათ).

 ¹¹ იეჰოვას ოკო, მთელ გურით გიმოფხანტათ სიმარდულ უხუცესეფიშ მიმართ „მუნეფიშ ხანდაშენ“ (1 თეს. 5:12, 13). და ჰენრიეტა, ნამუთ ფინეთშე რე, იჩიებ: «უხუცესეფ ირო მზათ რენა შხვეფიშ მახვარებელო, მარა თენა ვა ნიშნენს, ნამდა ჩოლამირეფ რენა ვარდა დღას ვა შურდუნა; ვართ თის, ნამდა დღას მუთუნ პრობლემა ვა უღუნა. ათეშენ მინშა თინეფს ურაგადუქ: „მანგარ ჯგირ უხუცეს რექჷ, მოკო, თენა გიჩქუდას!“». ართ და, სერა, ნამუთ თურქეთის ცხოვრენს, იჩიებ: «უხუცესეფს, თაშ ქოფთქუათინ, „ბენზინ“ ოსაჭირუნა, ნამდა გაგრძელან საქმეშ კეთება. თაშ ნამდა, შემლებუნა დოუჭარათ ჭიჭე წერილ, ქუდვაპატიჟათ ჸუდეშა ვარდა მსახურებაშა მიდაბრთათ თინეფწკუმა ართო». ხომ ვაგგაშინეს ნამდგაინ უხუცესიქ, ნამდგაშ ხანდას განსაკუთრებულო აფასენთ? თაშ ქორენ-და, ქაგინაფეთ თის, ნამდა მარდულ აფუთ (1 კორ. 16:18).

ᲠᲐᲘᲝᲜᲣᲚ ᲖᲔᲓᲐᲛᲮᲔᲓᲕᲔᲚᲔᲤ ᲐᲛᲐᲜᲒᲐᲠᲔᲜᲐ ᲙᲠᲔᲑᲔᲤᲡ

12. ხოლო მი დანიშნჷ იესოქ კრებეფიშ გამანგარებელო პირველ საუკუნეს? (1 თეს. 2:7, 8).

¹² კრებაშ დუდიქ, იესოქ, შხვა ჯიმალეფ ხოლო დანიშნჷ კრებაშ მახვარებელო. თიშ ხელმძღვანელობათ იერუსალიმს რდესინ თი უხუცესეფქ პავლე, ბარნაბა დო შხვა ჯიმალეფ გილმალ ზედამხედველეფო დანიშნეს (საქ. 11:22). მუ ოკო აკეთესკო თე ჯიმალეფქ? ზუსტას თინა, მუდგას მომსახურეეფ დო უხუცესეფ ორთუდეს: ოკო გამანგარესკო კრებეფ (საქ. 15:40, 41). თე ჯიმალეფ მსხვერპლშა მიშეს დო მინშა მუნეფიშ სიცოცხლეს ხოლო რისკენდეს, ნამდა გურშა ელუკინესკო დო ოგურუესკო და დო ჯიმალეფს (წეკითხით 1 თესალონიკელეფიშ 2:7, 8).

13. მუ საქმეეფს ორთუნა რაიონულ ზედამხედველეფ?

¹³ რაიონულ ზედამხედველეფს ირიათო გილაულარ აფუნა. ნამთინე ოშობით კილომეტრის მეურს ართ კრებაშე მაჟიაშახ. ირ მარას  თე ჯიმა გიშურს მუსხირენ მოხსენებათ, მეურს სამწყემსო მონახულებეფშა, ატარენს პიონერეფწკუმა შეხვალამას, უხუცესეფწკუმა შეხვალამას დო სამქადაგებლო მსახურებაშ შეხვალამეფს. თინა მოხსენებეფს ამზადენს რაიონულ დო რეგიონულ კონგრესეფშო დო ხელმძღვანელენს თინეფიშ ორგანიზებას. თე ჯიმა ოგურუანს პიონერულ სკოლას, აგეგმენს დო ატარენს სპეციალურ შეხვალამას მუშ რაიონიშ პიონერეფწკუმა დო ასრულენს ფილიალიშ შხვა დავალებეფს, ნამუთ მინშა სასწრაფოთ რე ოკეთებელ.

14. მუშენ ვაფუთ მარდულ მოხანდე რაიონულ ზედამხედველეფს?

¹⁴ მუ ჯგირობუა მოუღუნა კრებეფშა რაიონულ ზედამხედველეფს? თურქეთის მახორუ ართ ჯიმა რაიონულ ზედამხედველეფიშ მონახულებეფიშ გურშენ იჩიებ: „ირ მონახულება უმოს მონდომას მირჩქინანს, და დო ჯიმალეფს ქიმვეხვარენ. ბრელ რაიონულ ზედამხედველ მიძირ, მარა ნამთინს ვა უგინაფუაფ, ნამდა ბრელ საქმე უღუდ დო ჩქიმდა ვა ჩოდუდ“. იოანა, ნამუთ ჟიშე მიფშინეთ, რაიონულ ზედამხედველწკუმა ართო რდჷ მსახურებას, მარა ნამთინ ჸუდეს ვა დოხვადეს. თინა იჩიებ: „თე დღა იშენით დღას ვაგმოჭყორდუ. ჩქიმ დალეფ ახალ გინნაულა რდესჷ შხვადო, ათეშენ მანგარო მონატრუდ თინეფ. რაიონულ ზედამხედველქ გემუანო მეჩუ დო ქიმმეხვარ, ქობძირიკო, ნამდა იეჰოვაშ მსახურეფშო თეცალ დაშორება დროებით რე, მუშენდა ახალ ქვეყნიერებას მარადიულო მაღვენუნა საშვალება, ართო ვორდათ“. ბრელ რაიონულ ზედამხედველქ მიჸოროფუეს დუდ თეშნერო (საქ. 20:37—21:1).

15. ა) მუჭოთ 3 იოანეშ 5—8-ს ვორწყეთ, მუჭო შემლებუნა რაიონულ ზედამხედველეფიშ მიმართ სიმარდულიშ გიმოხანტუა? (ქოძირით სურათ). ბ) მუშენ ოკო დუვაფასათ დანიშნულ ჯიმალეფიშ მეუღლეეფ დო მუჭო შემლებუნა თეშ კეთება? (ქოძირით ჩარჩო  „ვაგგოჭყორდან თინეფიშ მეუღლეეფქ“).

¹⁵ მოციქულ იოანექ გაიუსის თხუ, პატი ქოცუკო სტუმარო მეულირ ჯიმალეფს დო თეშ  გეგნაზარუკო, მუჭოთ „ღორონთიშ თოლს [იჸუაფუდ] ღირსუან“ (წეკითხით 3 იოანეშ 5—8). მუჭო შემლებუნა ჩქი ხოლო ქიმვაჸუნათ მოციქულიშ რჩევას? შემლებუნა სადილშა ქუდვაპატიჟათ რაიონულ ზედამხედველ. თეს გეძინელ, შემლებუნა მონახულებაშ მარას სამქადაგებლოეფს ქიდვესწრათ დო ოქადაგებშა მიდაფრთათ. ჟიშე მოშინაფილ ლესლი სიმარდულს შხვანერო ხოლო გიმოხანტუნს. თინა იჩიებ: „ბლოცულენქ დო იეჰოვას ფთხულენქ, ქიზრუნას თინეფიშ საჭიროებეფშო. მა დო ჩქიმ ქომონჯ წერილეფს ხოლო პჭარუნთ თინეფს დო ურაგადუთ, ნამდა თინეფიშ მონახულებაქ მანგარო მიმეხვარეს“. ვაგგოჭყორდან, ნამდა რაიონულ ზედამხედველეფ ხოლო ჩქინცალ ადამიანეფ რენა დო შურდუნა. თინეფს ხოლო უღუნა პრობლემეფ, ილახებუნა, მუდგარენშე წუხენა დო გურ ხოლო უტირხუნა. შილებე თქვან გემუან სიტყვეფით ვარდა ჭიჭე საჩუქარით იეჰოვაქ თინეფიშ ლოცვას ქუპასუხას (იგავ. 12:25).

ᲣᲛᲝᲡ ᲞᲐᲡᲣᲮᲘᲨᲛᲒᲔᲑᲔᲚ ᲯᲘᲛᲐ ᲛᲝᲡᲐᲭᲘᲠᲣᲜᲐ

16. ნამ კითხვეფშე ოკო დეფიქრან ჯიმალეფქ? (იგავ. 3:27).

¹⁶ მთელ მსოფლიოს უმოს პასუხიშმგებელ ჯიმა რე საჭირო კრებეფს. ნათილ ჯიმა ქორექ-და, ქეშეილებუნო მოხვარა? (წეკითხით იგავეფიშ 3:27). ქოიღუნო მიზანო, მომსახურეთ დენიშნენ? მომსახურე ქორექ-და, ქაცადუქო, უხუცესიქ ქიჸუენ? c ხომ ვეშეილებ მუდგარენეფ დოთირუე, ნამდა შეგალებუას სამეფოშ მახარობელეფიშ სკოლაშ მიკულაქ? თე სკოლა ბრელს ქუდგოგურუანს დო ქიმგეხვარებ, უჯგუშო გეგმადირთე კრებაშ დუდის, იესოს. თე ირფელ ვეგშგალენ ქოფიქრენქ-და, ქილოც დო ქოთხი იეჰოვას წმინდა შურ, ნამდა ქიმგეხვარას თი დავალებეფიშ შესრულებას, ნამუთ ასე გიღჷ (ლუკ. 11:13; საქ. 20:28).

17. მუს ოძირანს დანიშნულ ჯიმალეფიშ ხანდა?

¹⁷ თი ჯიმალეფიშ ხანდა, მით იესოქ მუჩეს, მუჭოთ „ადამიანეფ ძღვინო“, ოძირანს, ნამდა მართალო თინა აწოპჸუნა თე ბოლო დღალეფს (მათ. 28:20). ქორეთო მარდულ ჩქინ მოჸოროფე, ხეგოფაჩილ დო ყურადღებიან მეფეშ, იესოშ, ნამდა თეცალ ჯიმალეფ გემრინუეს? თაშ ქორენ-და, ირო გეგმოხანტით სიმარდულ თე ჯიმალეფიშ მიმართ. ირიათო ქოუწით მადლობა იეჰოვას ხოლო, ნამუთ „ირნერ ჯგირ დო სრულყოფილ ძღვინს“ მარზენა (იაკ. 1:17).