ბიბლიას მოჩამილ პრინციპეფ ოწინააღმდეგ ლივერიშ, თოფიშ დო ირნერ იარაღიშ გიმორნაფას კათაშე დუდიშ ოთხილარო. მორთ, გენიფხილათ თეშ მუსხირენ მხარე:

იეჰოვაშ თოლს სიცოცხლე, განსაკუთრებულო კოჩიშ სიცოცხლე, წმინდა რე. ფსალმუნმაბირე დავითის უჩქუდ, ნამდა იეჰოვა „სიცოცხლეშ გუმაჭყაფალ“ რე (ფსალმ. 36:9). თი დროს, მუჟამსით ქრისტიან გეგნოჭყვიდუნს, მუშ დუდი ვარდა ქონება დოთხილუასინ, თიქ ირფელ ოკო გაკეთას, ნამდა სიცოცხლე ვემდუღას კოც დო ბრალქ ვეგიადვას ზისხირიშ დობუნას (კან. 22:8; ფსალმ. 51:14).

შილებე იარაღიშ უმშო შხვა მუდგარენით ხოლო დოჸვილე კოჩი, მარა იარაღით უმოს ეფი რე, შემთხვევით ვარდა სპეციალურო გაკეთე თენა. * თე გეძინელ, უმოს უარეს ამბექ შილებე ქუმოხვადას, მუჟამსით გიმანთხაფალ იარაღამ კოც ორწყე.

მუჟამსით იესოქ მუშ მიმაჸუნალეფს უწუ, ნამდა ღურაშ წოხოლენ სერს ყამეფი ქუმაღალდესკონ, თინა შხვეფშე დუდიშ თხილუას ვა გულსხმენდ (ლუკ. 22:36, 38). იესოს თე მაგალითით ოკოდ ოძირუკო, ნამდა ძალა  თიმწკუმა ხოლო ვეგმირინესკო, მუჟამსით იარაღამ ხალხის ქაუხვადუდეს (ლუკ. 22:52). მუჟამსით პეტრექ ყამათ მღვდელმთავარიშ მონას ჸუჯ ქელათოლუნ, იესოქ უწუ: „დართინე ყამა მუშ ადგილს“. თეშ უკულ იესოქ მნიშვნელოვან ჭეშმარიტება თქუ, ნამუსით ამდღა ხოლო მეჸუნა ქრისტიანეფ: „არძა მით ყამას ეჭოფუნსინ, ყამათ დოღურუ“ (მათ. 26:51, 52).

მუჭოთ მიქაშ 4:3-ს ჭარ, ღორონთიშ ხალხი „მუნეფიშ ყამეფშე ოხონალ დო ოცხონტალ იარაღეფს გეგშაჭკადუნა“. ჭეშმარიტ ქრისტიანეფ მეჸუნა მითითებას, ნამუთ პავლექ ღორონთიშ შურით ჭარ: „მითინს ვეგნუგათ მანგიორ . . . თქვან მხარეშე ქორე შეიოლებერ-და, მშვიდობიანო რდათ არძაწკუმა“ (რომ. 12:17, 18). პავლექ ბრელ პრობლემას შეხვად, მაგალთო შილებედ ღამაკ ქუმუკინდესკო გიმარნაფალეფქ, მარა თის დღას ვეგნურთაფ ბიბლიურ პრინციპეფშა მუშ დუდიშ დაცვებელო (2 კორ. 11:26). თინა ონდუდ ღორონც დო თიშ სიტყვას მოჩამილ სიბრძნეს, ნამუთ არძანერ „ოჩხუპებელ იარაღიშ უჯგუშ რე“ (ეკლ. 9:18).

ქრისტიანეფშო კოჩიშ სიცოცხლე უმოს ძვირფას რე, ვინემ მატერიალურ ნივთეფი. „ქონება ვა მუღანს თის [კოც] სიცოცხლეს“ (ლუკ. 12:15). თაშ ნამდა, მუჟამსით იარაღამ კოჩი გემუან ნინათ ვეგიჩერებენ, გონიერ ქრისტიანეფ გიმირინუანა პრინციპის, ნამუთ იესოშ სიტყვეფშე რჩქუ: „ვეშვეწინააღმდეგათ უბადო კოც“. მუჭოთ იესოქ თქუნ, მინშა შილებე მიოჩამალქ მაჸუან ხვალე გინაქუნალქ ვარინ, მიკაქუნალქ ხოლო (მათ. 5:39, 40; ლუკ. 6:29). * მუშო ოკო რაგად, არძაშ უჯგუშ რე, დუდ ეუჩილითუათ თეცალ სიტუაციეფს. ვეფცქვანთ ქონებათ დო მშვიდობაშ მოჸოროფე კათათ ქომჩინენან-და, შემალებენა დუდ ეუჩილითუათ უბადო ხალხის (1 იოან. 2:16; იგავ. 18:10).

ქრისტიანეფ პატის ცენა შხვეფიშ სინდისის (რომ. 14:21). ნამთინე თანამორწმუნეს შილებე მანგარო გუკვირდას დო დებრკოლას, მუჟამსით ქიგეგენს, ნამდა კრებაშ წევრის დუდიშ ოთხილარო იარაღი უღუ ჸუდეს. ჸოროფა მოხვარნა შხვეფიშ ინტერესეფ ჩქინ დუდიშ წოხოლე ქიგვორინუათ, თიმწკუმა ხოლო მუჟამსით კანონ ვერღვიებ (1 კორ. 10:32, 33; 13:4, 5).

ქრისტიანეფ ოცადნა, შხვეფშო ჯგირ მაგალით რდან (2 კორ. 4:2; 1 პეტ. 5:2, 3). რჩევაშ მეჩამაშ უკულ ქრისტიანს დუდიშ დაცვებელო იარაღი იშენით ქოუღუნ-და, თინა შხვეფს ჯგირ მაგალითის ვარზენს. თეცალ პიროვნებას კრებას ვემიაჩამუ პასუხიშმგებლობეფი. თე პრინციპ ოხუ თი ქრისტიანს ხოლო, ნამუთ თიცალ სამუშას მუშენს, სოდეთ იარაღიშ გილაღალა ოვალ. თეცალ დროს უჯგუშ იჸუაფ შხვა სამუშაშ გორუა. *

მუჭოთ სამუშაშ გიშაგორუა რე პირად გინაჭყვიდირალინ თეშ, არძა ქრისტიანქ მუშით ოკო გინოჭყვიდას, მუნერო დეცვენს მუშ დუც, ოჯახის დო ქონებას. მარა ქრისტიანქ გეთვალისწინას ოკო ბიბლიურ პრინციპეფი, სოვრეშეთ ღორონთიშ სიბრძნე დო ჸოროფა იძირე. ათეშგურშენ მოწიფულ ქრისტიანეფს ვა უღნა იარაღი შხვეფშე დუდიშ ოთხილარო. თინეფს არჩქილენა, მუჟამსით მიენდებნა ღორონც დო ცხოვრებას ბიბლიურ პრინციპეფს გეგმირინუანან, მშვიდას იცხოვრენა (ფსალმ. 97:10; იგავ. 1:33; 2:6, 7).