ნიკოლას დო სელინქ შხვანერ სირთულეს შეხვადეს. დეკვირით, მუჭო იშინანა თინეფ თი პერიოდის, მუჟამსით საფრანგეთიშ ფილიალქ შხვა კრებას დანიშნჷ. თინეფ იჩიებუნა: „დუდშე მანგარო მოხიოლუდეს ახალ კრებაშა გინულა, მარა უკულ მანგარო ქიმმენატრეს ჩქინ მეგობრეფქ. ახალ კრებაშ და დო ჯიმალეფწკუმა დიო ვა მიღუდეს იცალ დაახლოება“. სირთულეეფიშ უმკუჯინუო, მუჭო შეილებუნა ახალ კრებაშა გინულაშ დროს, ვადინუათ ხიოლ დო გეგმადირთათ კრებას? მუშ კეთება შეულებუნა შხვეფს, ნამდა ქიმეხვარან თეცალ და დო ჯიმალეფს? მუ კურთხევეფ შილებე მოიღან ახალ კრებაშა გინულაქ? მუჭო შეილებუნა თქვა ხოლო ქიჸუათ კურთხევაქ თექიან და დო ჯიმალეფშო?

ᲝᲗᲮ ᲞᲠᲘᲜᲪᲘᲞ, ᲜᲐᲛᲣᲗ ᲐᲮᲐᲚ ᲙᲠᲔᲑᲐᲨ ᲛᲔᲠᲩᲥᲕᲐᲜᲐᲡ ᲛᲘᲒᲔᲮᲕᲐᲠᲔᲑᲣᲜᲐ

1) მიენდით იეჰოვას (ფსალმ. 37:5). მუჟამსით ჩქინ იაპონელ დაშ, კაზუმიშ ქომონჯ სამსახურქ შხვადო გეგნიჸუნ, კაზუმის გინაულარქ აჸუ თი კრებაშე, სოდეთ 20 წანას მსახურენდჷ. მუჭო „მიანდჷ თიქ იეჰოვას მუშ შარა“? თე და იჩიებ: „ირიათო ბლოცულენდჷ დო იეჰოვას ურაგადუდ, მუჭო გენიფცადენდჷ თე ამბეს. ირ ლოცვაშ უკულ ბგინაფლენდჷ, ნამდა იეჰოვა ძალას მარზენდჷ“.

მუ მიგეხვარებუნა, უმოსო მიენდათ იეჰოვას? მუჭოთ მცენარეს ორდალო წყარ დო საკვებ ნივთიერებეფ ოსაჭირ, თეშ ჩქინ რწმენას ხოლო სიმბოლურ გაგებათ წყარ დო საკვებ ნივთიერებეფ ოსაჭირ, ნამდა მირდას. ჟიშე მოშინაფილ ნიკოლას ფიქრენდჷ აბრაამიშ, იესოშ დო პავლეშ მაგალითეფშე, მიდგაქ იეჰოვაშ ნებაშ შეიოსრულებერო მსხვერპლშა იდეს. თექ მეხვარ, გემანგარუკო თიშ რწმენა, ნამდა იეჰოვა ქელუდირთუდ. თქვა ხოლო ბიბლიას გეგმირკვიენთ დო ჯგირ პირად გურაფა ქუგაღვენუნან-და, ვა გაიჭირდუნა, ქუდაჸუნათ თქვან ცხოვრებას მოხვალამირ ცვლილებეფს დო,  თეწკუმა ართო, შეგალებენა გურშა ელუკინათ ახალ კრებაშ და დო ჯიმალეფს.

2) ვეშუდარათ ართიანს ჯვეშ დო ახალ კრება (ეკლ. 7:10). ჟიელს, მიდგაქ ბენინშე ამერიკაშა გინორთჷ ოცხოვრებშა, გვალო შხვანერ კულტურაშა აჸუ მიორჩქვანალქ. თინა იჩიებ: „თიცალ წარმოდგენა მიღუდ, ნამდა, მიდგას გეფჩინებაფუანდ, არძას დუდშე ბოლოშა ოკო ქივეჩიკო ჩქიმ გურშენ ირფელ“. ჟიელ თეცალ მუდგარენს ვა რდჷ მერჩქვანელ, ათეშენ, და დო ჯიმალეფწკუმა ურთიერთობას დუდის ურიდანდჷ. მარა თიშ უკულ, მუთ ჯგირო გეჩინებაფუ თანაქრისტიანეფ, დითირუ დამოკიდებულება. თინა იჩიებ: „ქიმეფხვად, ნამდა, სოდგა ვა ფცხოვრენდათინ, ადამიანეფ ართიანს ბგუთჷ. უბრალოთ შხვადოშხვანერო იფჩიებუთ დო იფქციებუთ, ათეშენ, მნიშვნელოვან რე, თიცალეფ მიბღათ ართმაჟია, მუნერეფით ვორეთ“. თაშ ნამდა, დუდ აურიდეთ ახალ კრებაშ ჯვეშ კრებაწკუმა შედარებას. თაშ ფიქრენს ართ პიონერ და ანი-ლიზე ხოლო. თინა იჩიებ: „შხვა კრებაშა თი იმენდით ვეგნომრთუმ, ნამდა თექ ირფელ თეშ დოფხვადუდ, მუჭოთ ჯვეშ კრებას რდჷ. თიშენ გინოფრთჷ, ნამდა მუდგაინ ახალ ქობძირიკო დო ქიდიბგურეკო“.

უხუცესეფქ ხოლო ოკო ვეშუდარან ახალ კრება ჯვეშის. ჯიმალეფ, რშუდან, ნამდა ახალ კრებას მუდგარენ შხვანერო იკეთებაფუაფუნ თენა ვა ნიშნენს, ნამდა თექიან უხუცესეფ არასწორო იქციებუნა. ათეშენ, ონდო მუდგაინიშ თირუას ელუჩანდათ, უმოს ქიგეგით ადგილობრივ სიტუაციეფშენ (ეკლ. 3:1, 7ბ). ვეცადათ, ახალ კრებაშ ჯიმალეფ თქვან აზრიშა ქიმიჸონათ, თეშ მანგიორო, უჯგუშ იჸუაფ, თქვან მაგალითით ქუდაგურუათ თინეფს (2 კორ. 1:24).

3) რდათჷ აქტიურ (ფილ. 1:27). მართალ რე, ოცხოვრებშა შხვადო გინულა დო თექ გენწყუალა ბრელ დრო დო ენერგიას ითხინს, მარა მნიშვნელოვან რე, მუთ შილებე მალას ქიდიჭყათ ახალ კრებაშა ფიზიკურო დასწრება. ახალ კრებაშ და დო ჯიმალეფს შურო ვა უძირუთ ვარდა იშვიათო ქუგორწყენან-და, მუჭო შეიალებენა მიგეხვარან?! ჩქინ ართ და, ლუსინდა, მიდგაქ მუშ ჟირ ძღაბწკუმა ართო სამხრეთ აფრიკაშ დიდ ქალაქშა გინორთჷ ოცხოვრებშა, იშინანს: „მეგობრეფქ ელამჩეს, დევეახლოვიკო ახალ კრებაშ და დო ჯიმალეფს, მიდაფრთიკო მსახურებაშა თინეფწკუმა ართო დო კრებას კომენტარეფს ხოლო მიბღიკო მონაწილება. თეწკუმა ართო, ჯიმალეფს უწი, ნამდა შეულებუდეს სამქადაგებლო შეხვალამეფ ჩქიმ ჸუდეს ხოლო ჩატარესკო“.

კრებაშ საქმეეფს და დო ჯიმალეფწკუმა ართო ქიხანდენთ-და, თენა ქოთ თქვან დო ქოთ თინეფიშ რწმენაშ გამანგარებას შეუნწყუნს ხეს. ჟიშე მოშინაფილ ანი-ლიზეს უხუცესეფქ ელუჩეს, ნამდა ახალ კრებას არძაწკუმა მიდართუკო მსახურებაშა. თინა მირაგადუნა, მუქ მაჸუნ თეს შედეგო: „თენა არძაშ უჯგუშ საშვალება რე, ნამდა მუთ შილებე მალას ქიმიანწყუე ახალ კრებას“. თეწკუმა ართო, ჯგირ იჸუაფ, მონაწილება მიღათ დარბაზიშ დონწყუალაშ დო მიკოლუაფაშ საქმეს, მუდგათ და დო ჯიმალეფ ქოძირუნა, ნამდა ახალ კრებას უკვე დუდ უცხოთ ვემგორჩქუნა. კრებაშ საქმეეფს აქტიურ ქიჸით-და, და დო ჯიმალეფ მალას ქიმგარჩქვანუნა დო ახალ კრება თქვანო ახალ ოჯახო გინირთუ.

 4) დემეგობრით ახალ კრებაშ და დო ჯიმალეფს (2 კორ. 6:11—13). და დო ჯიმალეფიშ მიმართ პირად ინტერესიშ გიმორჩქინა მიგეხვარებუნა, დემეგობრათ თინეფს. ათეშენ, ეცადით, კრებაშ შეხვალამაშა ადრე ქიმერთათ დო თებაშ უკულ ჭიჭე ხანს ქუდოსქიდათ, ნამდა თინეფწკუმა ჩიებაშ დო უჯგუშო გაჩინებაფაშ საშვალებაქ ქუმგაჩან. თეწკუმა ართო, ქიდემახსოვრით თინეფიშ სახელეფ. მუჟამსით სახელით ქუდუძახუთ და დო ჯიმალეფს დო მეგობრულ იჸუაფუთ, უმოს სურვილ აღვენუნა, გაიჩინებაფუან დო დეგემეგობრან.

ზედმეტო ვეფიქრათ თიშე, ნამდა დუდ მუწონუათ ახალ კრებაშ და დო ჯიმალეფს. თეშ გინაწონს, რდათჷ თინა, მუთ სინამდვილეს რეთჷ. ჯგირ იჸუაფ, და დო ჯიმალეფს თქვანწკუმა ურთიერთობაშ საშვალება კრებაშ გალე ხოლო ქაღვენუნან-და. ათეშენ, თავისფალ დრო ხოლო გეგმურთით თინეფს. თაშ მიქცუ ლუსინდაქ ხოლო. თინა იჩიებ: „ამდღა ბრელ ხოლოშიან მეგობარ პჸუნან თენა თიშ ჭყოლოფა რე, ნამდა ახალ კრებაშა გეგნოფრთითინ, ჸუდეშა ვაპეჯენდით თექიან და დო ჯიმალეფს“.

ᲛᲗᲔᲚ ᲒᲣᲠᲘᲗ ᲛᲘᲦᲘᲗ ᲐᲠᲗᲘᲐᲜ

ნამთინეს შილებე მანგარო უჭირდას დარბაზშა მინულა, მუჟამსით თექ მითინს ვეჩინენს. მუჭო შეილებუნა მეხვარათ კრებაშა ახალგინულირეფს, ნამდა დუდ თავისფალო იგინან? პავლე მოციქულქ ელამჩეს: „მუჭოთ ქრისტექ მეიღეს მთელ გურით, თქვა ხოლო თეშ ოკო მიღათ ართიან“ (რომ. 15:7). თაშ ნამდა, უხუცესეფ, მიაჸუნით ქრისტეშ მაგალითის დო გემუანო შეხვადით კრებაშა ახალგინულირეფს (ქოძირით ჩარჩო  „მუშ კეთება რე საჭირო ახალ კრებაშა გინულაშ დროს?“). მარა, ხვალე უხუცესეფს ვარინ, კრებას არძას, თინეფ შქას ბაღანეფს ხოლო, შეულებუნა მეხვარან ახალგინულირეფს, დუდ თავისფალო იგინან.

მთელ გურით მეღებაშა მიშურს მუჭოთ ჸუდეშა დაპატიჟება, თეშ პრაქტიკულო მოხვარა ხოლო. მაგალთო, ართ დაქ დრო ვედენარღჷ კრებაშა ახალგინულირ თანაქრისტიანშო. თის მთელ ქალაქ მალებაფუ დო თინა ხოლო გეუნწყჷ, მუჭო შეულებუდ საზოგადოებრივ ტრანსპორტით მგზავრობა. თექ მანგარო იმოქმედ ჩქინ დაშა დო მეხვარ, უმოს ადვილო მიარჩქვანუკო ახალ გარემოს.

 ᲕᲔᲛᲘᲝᲢᲣᲐᲗ ᲡᲣᲚᲘᲔᲠᲝ ᲠᲓᲣᲐᲚᲐ

ჩიტიშ მართვეს დუდშე შილებე გუჭირდას ბუდეშ დოტებაქ დო ფურინუაქ. მარა ქუგაბედუ დო ფსუალეფს გოფაჩუნსინ, შეიალებე მაღალას გილაფურინას. თეშნერო, ახალ კრებაშა გინურთინ, შილებე გამჭირდან ურთიერთობაშ დოჭყაფაქ დო, თაშ ქოფთქუათინ, ჩქინ ბუდეს ვორდათ ინოკილერ. მარა შიშის ქიგვორჯგინანთინ, „ფსუალეფს გოფაფჩუნთ“ იეჰოვაშ მსახურებას. დაჭყაფუს მოშინაფილ ნიკოლას დო სელინ იჩიებუნა: „შხვადო გინულაქ ბრელ მუდგარენ დუმოგურუეს. ახალ ხალხშა დო გარემოშა მიორჩქვანალო, შხვადოშხვა თვისებეფიშ გავითარებაქ დემესაჭირეს“. ჟიშე მოშინაფილ ჟან-შარლი მირაგადუნა, მუ ჯგირობუა მოუღ თიშ ოჯახის შხვადო გინულაქ. თინა იჩიებ: „ახალ კრებაშა გინულაშ უკულ, ჩქინ სქუალეფ უმოს ჯგირო რენა სულიერო დო იეჰოვას ხოლო უმოსო დეახლოვეს. გინულაშე მუსხირენ თუთაშა ჩქინ ძღაბიქ შქა მარაშ შეხვალამეფს დავალებეფით გიშულა ქიდიჭყჷ დო ჩქინ ბოშიქ მოუნათლავ მაუწყებელო დენიშნჷ“.

მუშ კეთება შეილებუნა, მუჟამსით სიტუაცია ხეს ვაინწყუნა, შხვადო გეგნორთათ, მაგალთო თიცალ ტერიტორიაშა, სოდეთ მაქადაგებელეფიშ საჭიროება რე? შეილებუნა თე სტატიას მოჩამილ რჩევეფ ასე რეთინ თი კრებას გეგმირინუათ. მიენდით იეჰოვას, თქვან კრებას შხვადოშხვა თანაქრისტიანწკუმა მეუთ მსახურებაშა, გირჩქინით ახალ მეგობრეფ დო უმოსო დეახლოვით თინეფს, მიდგაწკუმა ასე მეგობრენთ. მიზანო გიღუდან, ქიმეხვარათ კრებაშა ახალ მოულირეფს ვარდა თინეფს, მიდგას მოხვარა ოსაჭირ. მუჟამსით თე ირფელს გაკეთენთ დო გეგმირჩქინანთ თიცალ ჸოროფას, ნამდგათ ნამდვილ ქრისტიანეფ გიშეგორუნა, უმოსო დეახლოვებუთ იეჰოვას (იოან. 13:35). რჯერდან, იეჰოვას „ოსიამოვნ თეცალ მსხვერპლ“ (ებრ. 13:16).

მუჭოთ ბძირით, სირთულეეფიშ უმკუჯინუო, ბრელ ჩქინ და დო ჯიმას შეიალებუ მიარჩქვანუკო ახალ კრებას დო ვადინუკო ხიოლ. თენა თქვა ხოლო შეგალებენა! ანი-ლიზე მირაგადუნა: „კრებაშ თირუაქ მიმეხვარ, უმოს და დო ჯიმას დევეახლოვიკო“. კაზუმი იჩიებ: „ახალ კრებაშა გინულაშ დროს იეჰოვაშე გვალო შხვანერ ალარნას გინაფლენქ“. ჟიშე მოშინაფილ ჟიელ მირაგადუნა: „ახალ და დო ჯიმალეფწკუმა დამეგობრებაქ მიმეხვარ, დუდ უცხოთ ვებგინიკო ახალ კრებას. თე კრებას თეშ ქიმვარჩქვან, ნამდა ალბათ ანწ მანგარო გამჭირდუ შხვადო გინულა“.