მთელ მსოფლიოს ტემპერატურაქ მანგარო მიძინ, მუდგას შხვა უბედრობეფქ ხოლო ქუმაჸუნ. ყურადღება ქიმიაქცით, მუს ჭარნა მუსხირენ ანგარიშის:

•   „ადამიანეფქ ამინდიშ ტემპერატურაშ ზიმუა 174 წანაშ წოხოლე დიჭყეს. თევრეშე მოჸუნაფილ, თე წანაშ ივანობას არძაშ უმოს მაღალ ტემპერატურა დაფიქსირეს“ („აშშ-შ ოკეანურ დო ატმოსფერულ კვლევეფიშ ეროვნულ ადმინისტრაცია“, კომერციაშ განყოფილება, 13 კვირკვე, 2023 წანა).

•   „იტალიას, ესპანეთის, საფრანგეთის, გერმანიას დო პოლონეთის ტემპერატურაქ მანგარო მიძინ დო ელნა, ნამდა თინა 48°C-შა ეკურს სიცილიაშ დო სარდინიაშ კუნძულეფს. შილებე, თენა არძაშ უმოს მაღალ ტემპერატურაქ ქიჸუას, მუთ აიშახ ევროპას ჸოფე“ („ევროპაშ კოსმოსურ სააგენტო“, 13 კვირკვე, 2023 წანა).

•   „პლანეტას ტემპერატურა იძინანს. შედეგო ველუთ, ნამდა მანგარ ჭვემეფ უმოს ხშირას იჸუაფ დო შილებე თეს დიდწყარალაქ ხოლო ქუმაჸუნას“ (სტეფან ულენბრუკ, „მსოფლიო მეტეოროლოგიურ ორგანიზაციაშ“ ჰიდროლოგიაშ, წყარიშ დო კრიოსფეროშ დირექტორ, 17 კვირკვე, 2023 წანა).

 თქვა ხოლო შეწუხებულ რეთო ტემპერატურაშ თეცალ მოძინათ? დეკვირით, მუს იჩიებ ბიბლია თე მნიშვნელოვან საკითხიშ გურშენ.

 მუშო ოკო რაგად, ქო. მუჭოთ ბიბლიას რე ნაწინასწარმეტყველებ, ჩქინ დროს მთელ მსოფლიოს ტემპერატურა მიძინანდჷ დო ამინდ რადიკალურო დითირუდ. მაგალთო, იესოქ იწინასწარმეტყველ, ნამდა ჩქინ თოლით ქობძირუნდით „ოშქურანჯ მოვლენეფს“ (ლუკა 21:11). მსოფლიოს ტემპერატურაშ მოძინა ბრელს ოფიქრებაფუანს, ნამდა ადამიანეფ დედამიწას ოცხოვრებელო ვეგმოდირთუნ ფერ პლანეტათ გინაშქვანა.

 მუშო ოკო რაგად, ვარ. ღორონთიშ ნება რე დედამიწაქ დღას ვა მისპას დო თინა ვემეჩანს ადამიანეფს თეშ კეთებაშ უფლებას (ფსალმუნი 115:16; ეკლესიასტე 1:4). თეს გეძინელ, ღორონთ პირობას დვანს, ნამდა „მოსპუნს დედამიწაშ მუმასპალეფს“ (გამოცხადება 11:18).

 ბიბლია იჩიებ, ნამდა ღორონთის შეულებ დოთხილუას ჩქინ პლანეტა დო ვართ ეკოლოგიურ კატასტროფას დუშვენს.

•   „[ღორონთ] არჩქალენს ქარბორიას დო იწყნარებუნა ზღვაშ ტალღეფ“ (ფსალმუნი 107:29). ღორონთიშ შეულებ ბუნებაშ მოვლენეფიშ გაკონტროლება. თის უღჷ ძალა, მაგვარას ეკოლოგიურ პრობლემეფ, ნამუთ ამინდიშ რადიკალურო თირუას მოუღ ჩქინდა.

•   „სი მიკმაჯინექ დედამიწას, ვარკენქ ხვე დო ბარაქას“ (ფსალმუნი 65:9). ღორონთიშ კურთხევათ, დედამიწა სამოთხეთ გინირთუ.

 თიშ გურშენ მეტიშ გაგებელო, მუს იჩიებ ბიბლია დედამიწაშ სამოთხეთ გინორთაშე, ქოძირით ართ-ართ სტატია ჩქინ ვებგვერდის („ვინ გადაარჩენს დედამიწას?“).