„ბეთელი“ ებრაულ სიტყვა რე დო ნიშნენს „ღორონთიშ ჸუდეს“ (დაბადება 28:17, 19). თე სიტყვა არძაშ უმოსო ოსადაგუ იეჰოვაშ მოწმეეფიშ ფილიალეფს მთელ მსოფლიოს. ზუსტას თე ფილიალეფი ხენჯღვერანა დო ხუჯის უკინენა ქადაგებაშ საქმეს. ხემანჯღვერე საბჭოშ წევრეფი რენა მსოფლიო მთავარ სამმართველოს ნიუ-იორკიშ შტატის (აშშ) დო თევრეშე ხენჯღვერანა ფილიალეფიშ საქმეს მთელ მსოფლიოს. თინეფ, მით ფილიალეფს მსახურენა, ბეთელიშ ოჯახიშ წევრეფი რენა; ართ ოჯახცალო ცხოვრენა, მუშენა დო გენიხილენა ბიბლიას (ფსალმუნი 133:1).

ბეთელი განსაკუთრებულ ადგილ რე, სოდეთ ოჯახიშ თითოულ წევრის დუდ ვაზოგუ. თითოულ ფილიალს ქრისტიანი და დო ჯიმალეფს დუდ აფნა გინოდვალირ ღორონთიშ ნებაშ შეიოსრულებერო დო სრულ დროთ მსახურენა, ნამდა წიმი მიდართას სამეფოშ საქმექ (მათე 6:33). ნამთინს ვერზიებუ ხელფას, მარა უღნა ოცხოვრებელ ადგილი დო ოჭკომალ; თეშ გარდა აუცილებერ ხარჯეფიშ ოფორალო ერზიებნა ფინანსურ შემწეობა. ბეთელს არძას მუშ-უშ საქმე უღუ. მინ ოფისიშ საქმეს ორთუ, მინ ხოლო ოჭკომალს აკეთენს. შხვეფი სტამბას ვარდა კინძუაშ განყოფილებას მუშენა; ნამთინე ოთახეფს ონწყუნს, ნამთინე ხოლო ნახუნს, მინ ტექნიკურ მომსახურებაშ განყოფილებას ვარდა შხვადო მუშენს.

ბეთელს ირფელ ქადაგებაშ საქმეშ ხუჯიშ დაკინებელო იკეთებაფუაფ. თითოულ ბეთელიშ მთავარ მიზან რე, მუთ შილებე ბრელ ხალხიქ ქიმირჩქილუას ბიბლიურ ჭეშმარიტება. თე ბროშურა თეშ ართ-ართ დასტურ რე. თე ბროშურაქ ხემანჯღვერე საბჭოშ ხენჯღვერუათ იჸუ მოხაზირებულქ, თიშ ელექტრონულ ვერსია ოშობით მათარგმნალეფიშ ჯგუფის უჯღონეს მთელ მსოფლიოს, ბეთელიშ სტამბეფს მაღალსიჩქარეშ ობეშტალ დაზგეფს ბეშტეს დო 115 000-შე მეტ კრებაქ მიღუ თინა. თე ირფელიშ უკახალე ბეთელი გერე. ზუსტას თინეფს მიშუძნა წილ თე მნიშვნელოვან საქმეშა, სახიოლო ამბეშ გავრცელებაშა (მარკოზი 13:10).

• მი მსახურენს ბეთელს დო მუ პირობეფი უღნა თინეფს?

• მუ მნიშვნელოვან საქმეს უკინენს ხუჯის ბეთელი?