ბრელ ხან რე იეჰოვაშ მოწმეეფი თეოკრატიულ განათლებას ღებულენა. თინეფ, მით სამეფოშ გურშენ სახიოლო ამბეს სრულ დროთ ქადაგენა სპეციალურ გურაფას მიკმულა, თიშო ნამდა ირნერო შეასრულან მუნეფიშ მსახურება (2 ტიმოთე 4:5).

პიონერულ მსახურებაშ სკოლა. პიონერეფს, მით ართ წანაშე უმოს რე სრულ დროთ მსახურენა, შეულებუნა ამშვდღიან სკოლაშ მიკულა, ნამუთ იტარებაფუაფ თინეფშო უხოლაშ სამეფო დარბაზის. თე სკოლაშ მიზან რე, მეხვარას პიონერეფს მსახურებაშ შხვადოშხვა სფეროს უმოსო გეუჯგუშან, დეახლოვან იეჰოვას დო გაგრძელან ართგურო მსახურება.

სამეფოშ მახარებელეფიშ სკოლა. თე ჟირ თუთიან სკოლას გურაფლენა გამოცდილ პიონერეფი, ნამუთ მზათ რენა ქიდიტუან მუნეფიშ ჸუდეეფი დო გეგნორთან თექ, სოდეთ მაუწყებელეფ რენა საჭირო. ფაქტიურო თინეფ იჩიებუნა: „მა ურქ! მა გომტე!“. თეშნერო თინეფ, არძაშ უმოს დიდ მაქადაგებელიშ, იესო ქრისტეშ მაგალითის მეჸუნა, ნამუთ ართ დროს დედამიწას ცხოვრენდუ (ესაია 6:8; იოანე 7:29). თეცალ მსახურება ითხინს ახალ დო უბრალო ცხოვრებაშ მერჩქვანას. თინეფს შილებე ახალ კულტურაშა, კლიმატშა დო ოჭკომალშა აჸუან მიორჩქვანაფალქ. შილებე ახალ ნინაშ გურაფაქ ხოლო დესაჭირან. თე სკოლა ოხვარ 23-შე 65 წანაშა დაოჯახებულ ვარენა ფერ და დო ჯიმალეფს ვარდა დაოჯახებულ რენა ფერ წყვილეფს, განავითარან სულიერ თვისებეფი დო უნარი, ნამუთ თინეფს მეხვარებ მუნეფიშ ახალ დანიშნულებას, მუთ შილებე ჯგირო ემსახურან იეჰოვას დო თიშ ორგანიზაციას.

„საგუშაგო კოშკიშ“ ბიბლიურ სკოლა „გალაადი“. ებრაული სიტყვა „გალაადი“ ნიშნენს „ბრელ მოწმობას“. 1943 წანაშე მოჸუნაფილ 8 000-შე მეტ მისიონერი, ნამუქით სკოლა „გალაადი“ მიკორთეს, წარმატებულო ქადაგენს „ქიანაშ ძგაშე-ძგაშა“ (საქმეები 13:47). მაგალთო, მუჟამსით მისიონერეფქ პირველო ენორთეს პერუშა, თექ ართ კრება ხოლო ვარდუ, მარა ასე 1 000-შე მეტ კრება რე. მუჟამს მისიონერეფქ იაპონიას დიჭყეს მსახურება, თექ ვით მოწმე ხოლო ვარდუ, ამდღა თინეფ 200 000-შე მეტ რენა. „გალაადიშ“ სკოლაშ ხუთ თუთიან კურსიშ მიკულაშ დროს სტუდენტეფი ტომბაშე გურაფლენა ღორონთიშ სიტყვას. თე სკოლაშა აპატიჟენა თინეფს, მით სპეციალურ პიონერო, მისიონერო, ბეთელელო ვარდა სარაიონო ზედამხედველო მსახურენა. სკოლაშ მიზან რე მსოფლიო ქადაგებაშ საქმეშ წიმი წიმოკინა.

• მუ რე პიონერულ მსახურებაშ სკოლაშ მიზანი?

• მის შეულებ სამეფოშ მახარებელეფიშ სკოლაშ მიკულა?