ქო. ღორონთ ზრუნენს მუშ ართგურ მსახურეფშე, მით გლახათ რე. თინეფიშ გურშენ ბიბლია იჩიებ: „იეჰოვა ქელუდირთუ თის ლახალაშ დროს“ (ფსალმუნი 41:3). ქრონიკულ ლახალა ქოიღუნ-და, თუდო მოჩამილ სუმ ნაბიჯ მიგეხვარებ, ქუგურზე თე ირფელს:

1.   ქილოც, ნამდა ქეშქალებუას მოთვენაქ. თეშნერო, მიღენთ „ღორონთიშ მშვიდობას, ნამდგას კოჩიშ გონება ვენანჭუ“, თის შეულებ ეიქექუან თქვან ოწუხებელ დო გურჭუა (ფილიპელები 4:6, 7).

2.   გიღდას დადებით განწყობა. „ხიოლით ეფშა გურ მკურნალცალო რე, დამწუხრებულ გურ ძვალეფს გიმოფიტუნს“ (იგავები 17:22). ვადინუათ იუმორიშ გრძნობა, მუთ მიგეხვარებნა, ნამდა გეგნიღათ თე ლახალა დო თეწკუმა ართო შინარჩუნათ ჯამრთელობა.

3.   ვადინუათ მომავალიშ იმენდ. მომავალიშ იმენდ მიგეხვარებნა, ვადინუათ ხიოლ, თიშ უმკუჯინუო, ნამდა შილებე ქრონიკულ ლახალა გიღნა (რომაელები 12:12). ბიბლია წინასწარმეტყველენს თი დროს, მუჟამსით „ნამთინ მახორუ ვა თქუანს გლახათ ვორექია“ (ესაია 33:24). ღორონთ განკურნენს არძა ქრონიკულ ლახალას, ნამდგაშ განკურნება ამდღა მედიცინას ვეშულებ. ბიბლია იჩიებ, ნამდა ხანშამიშულირეფ გეახალგაზრდავებნა დო ჯამრთელობა დართუნა: „გეახალას თის ხორციქ ახალობას რდუნ თიშე უმოსო დო დართას ახალგაზრდულ ძალეფქ“ (იობი 33:25).

 ყურადღება ქიმიაქცით: თიშ უმკუჯინუო, ნამდა იეჰოვაშ მოწმეეფ ღორონთშე მოხვარას ღებულენა, თინეფ ვარიას ვეჩიებნა სამედიცინო მკურნალობაშე, მუჟამსით ქრონიკულ ლახალა უღნა (მარკოზი 2:17). მარა ჩქი რეკომენდაციას ვებრზენთ მკურნალობაშ შხვადოშხვა მეთოდეფშე. ჩქი ჯგირო მარჩქილენა, ნამდა თითოულ პიროვნებაქ პირადო ოკო გინოჭყვიდას მკურნალობაწკუმა დაკავშირებულ საკითხეფ.