2015 წანაშ 14 მარტის პატერსონს (ნიუ-იორკი), იეჰოვაშ მოწმეეფიშ ოგურაფალ ცენტრის „საგუშაგო კოშკიშ‘‘ ბიბლიურ სკოლა „გალაადიშ‘‘ 138 კლასიშ თებაშ პოგრამაქ ჩეტარუ. თე პროგრამა გვალო 14 000-შე მეტ კოჩიქ მირჩქილუ, თინეფიშ უმენტაში თის შხვადოშხვა ადგილს პირდაპირ ტრანსლაციათ უჯინედ. პროგრამაქ ოთხი ახალ ობირეშიშ მუსიკათ დიჭყუ, ნამუთ ჭიჭე ხანიშ უკულ თაქ მოულირეფქ იბირეს. a

თე პროგრამა მეჸუნდ იეჰოვაშ მოწმეეფიშ ხემანჯღვერე საბჭოშ წევრის, ჯეფრი ჯექსონს. თიქ სტუდენტეფს უწუ, ნამდა სკოლას ნაგურეფ ხვალე მუნეფშო ვა უჩუალუდესკონ, თინა შხვეფიშ საჯგირობუოთ ხოლო გეგმურინუაფდესკონ ოკო (2 ტიმოთე 2:2).

ჯიმა ჯექსონქ მოსეშ მაგალით მიჸუნ; თიქ თქუ, ნამდა ღორონთშა თაყვანიშ ოცემებელ მთავარ ადგილ ისრაელ ერშო ქიანა ხანს მოსეშ კარავი რდუ, მარა ჭიჭე ხანიშ უკულ შხვა კარავი ქიგედგეს დო თიქ გინირთუ ჭეშმარიტ თაყვანიშცემაშ ცენტრო. ღორონთიშ სიტყვაშე ბგებულენთ, ნამდა თეშ უკულ მოსეს ვეშულებუდ შეხვალამაშ კარავიშ წმინდათაწმინდაშა მინულა, მუშენდა თეშ უფლება ხვალე მღვდელმთავარს უღუდ. მარა ბიბლიას სოთინ ვა ჭარუ, ნამდა მოსე ნაწყენ რდუ თეშ გურშენ. პირიქით, თინა ართგურო უკინენდ ხუჯის აარონიშ მღვდელმთავარო დორინაფას (გამოსვლა 33:7—11; 40:34, 35). მუს ბგურაფლენთ მოსეშ მაგალითშე? „მუდგას დუგავალენა, მთელ გურით დაფასით დო დღას ვა უფულათ თაქ ნაგურეფი შხვეფს!“.

„დუგოშკურინუანსო ჯაშ ფურცელიშ შარშალი?“. თეცალ მოხსენება აკეთუ კენეტ ფლოდინქ, ნამუთ ხემანჯღვერე საბჭოს გურაფაშ კომიტეტის ოხვარუ. თიქ თქუ, ნამდა სტუდენტეფს შხვადოშხვა სიტუაციაშ წოხოლე აჸინა გიორინალ — მინშა შილებე გასაქან ვემეჩან, ვარდა თიცალ ძნელ მუდგარენ ქიდავალან, ნამუთ დაშკურინუანდ თინეფს. უკულ ჯიმა ფლოდინქ ლევიანეფიშ 26:36-შე იჩუ დო სტუდენტეფი დაჯერუ, ნამდა პრობლემეფს თეშ ქუჯინედეს, მუჭოთ ჯაშ ფურცელიშ შარშალს-და, გვალო ადვილო გეგნარჯგინანდეს თის. თიქ პავლე მოციქულიშ მაგალითი მიჸუნ, ნამუსით ირიათო იეჰოვაშა უღუდ იმენდი დო ათეშგურშენ ირნერ პრობლემას ურზუდ (2 კორინთელები 1:8, 10).

მოხსენებათ „მუს გორუნთ?“ გიშართუ ხემანჯღვერე საბჭოშ წევრიქ, მარკ სანდერსონქ. თიქ აუდიტორიაშ წოხოლე იჩუ პრინციპიშ გურშენ, ნამუთ იგავეფიშ 13:12 ენოჭარუ: „ქიანა ხანს ჯინა გურს აჩიჩიენს“. გლახა რე, მარა ბრელ მთელ მუშ ცხოვრებას უიმენდოთ რე, მუშენდა თიცალ მიზნეფი უღუ, ნამუსით შილებე დღას ვემიოჭირინუას, მაგალთო, დღას ვაშუას ბრელ ფარაქ დო ჯგირ სახელქ.

იესოშ დროს იოანე მანათალშე გვალო შხვა მუდგარენს ელდეს (ლუკა 7:24—28). თინეფი შილებე ელდესკო, ნამდა თინა ფილოსოფოსი იჸუაფუდ დო ვეგიგებედუნ ფერ გურაფეფით გურს მოუჰამუანდ ხალხის. თენა მართალო თაშ ქორდუ-და, თინეფს გური გოუტირხუდეს, მუშენდა იოანე ადვილო გაგებელ ჭეშმარიტებას იჩიებუდ. შხვეფ შილებე ფიქრენდესკონ, ნამდა იოანეს თოლშამალაფარ მეჯინა აღვენუდ ვარდა ჯგირ მიკოქუნელ გილეშკონ იჸიდ. მარა იოანეს ღარიბეფცალო მიკაქუნდ. მუ ირაგადე თი ხალხშე, მით წინასწარმარაგადეს ელუდუ? თინეფს იმენდი ვა უდინუდეს, მუშენდა იოანე ხვალე წინასწარმარაგადე ვარინ, იესოშ აწმანჯღვერე ხოლო რდუ (იოანე 1:29).

ჟიშე მოჸუნაფილ მაგალითით ჯიმა სანდერსონქ სტუდენტეფს ელუჩ, ნამდა უგორუდესკონ თინა, მუთ ღორონთის მოწონს. თინეფქ სკოლას ნაგურეფი შხვეფიშ საჯგირობუოთ ოკო გიმირინუან, მუნეფიშ დუდი მანგარ მიდგარენო ოკო ვემირჩქინან დო მუნეფშა მენდებულ საქმეშ გურშენ შხვეფშე განსაკუთრებულ ყურადღებას ოკო ველდან. თეს ხვალე თიმ დროს ქიმიოჭირინუანა, მუჟამსით ქეცადებნა, ნაგურეფი და დო ჯიმალეფს გეგნოჩან, რწმენა გაუმანგარან დო ჸოროფიანო ქიმექცუან. ბოლოს ჯიმა სანდერსონქ სტუდენტეფს უწუ: „გორით არძანერ საშუალება, ნამდა თანდაბლურო ქიმემსახურათ და დო ჯიმალეფს. ირფელ გაკეთით იეჰოვაშ ნებაშ შეიოსრულებერო დო გურგოტახილო დღას ვა დოსკიდუთ!“.

ჯეიმზ კაუტონქ, ნამუთ თეოკრატიულ სკოლეფიშ განყოფილებას მსახუნეს, გიშართ მოხსენებათ „დადიარეთ შკირენულეფი!“. ჯიმა ჯეიმზიქ თქუ, ნამდა ამდღა ხალხის ჸოროფა დო პატიცემა ონატრუ. თე ირფელ იესოს ხოლო ოსაჭირუდ, ათეშგურშენ ნათუაშ დროს იეჰოვაქ თის გემუან სიტყვეფით დურაგადუ (მათე 3:16, 17).

იეჰოვა შხვეფიშ გასამანგარებელო ძალას მარზენა დო ელუ, ნამდა თე ძალას გეგმიბრინუანთ (იგავები 3:27). ჯგირ უგორით შხვეფს დო დღას ვედგეზარან, თინეფს ოცქვაფურ სიტყვეფი ქუწუათინ. შურ დო გურით ქაცქვანთ-და, და დო ჯიმალეფი ქიდეჯერენა, ნამდა ტყურათ ვა ხანდენა.

„რდათ ბოლოშა დუდგინოდვალირ!‘‘ თე მოხსენებათ გიშართ მარკ ნიუმარქ, ნამუთ გურაფაშ კომიტეტის ოხვარ. თიქ პავლეშ მაგალითშე იჩუ დო სტუდენტეფს უწუ, ჭიჭე მუდგარენს ვეგეჯერდესკონ, მუშენდა ნამდვილ ხიოლს თიმწკუმა იგინანდეს, მუჟამს პავლეცალო ბოლოშა იჸუაფდეს დუდგინოდვალირ შხვეფშო (ფილიპელები 2:17, 18).

პრობლემეფიშ დროს პავლე დუდს ვადვანდ დო წიმი მიშუ. თინა ბოლოშა დუდი გინოდვალირ რდუ; პავლე ღურადღაშახ უდუზოგებუო ორთუდ ღორონთიშ საქმეს. ათეშგურშენ, თის თამამას შეულებუდ თქუკონ: „ორულარ ბოლოშა მიდებრულ‘‘ (2 ტიმოთე 4:6, 7). ჯიმა ნიუმარქ სტუდენტეფს უწუ, ნამდა პავლეცალო ართგურო ქიდუკინებდესკო ხუჯი სამეფოშა დო მთელ გურით უკეთებდესკო მუნეფშა მენდებულ საქმე.

მაგალითეფი: პროგრამაშ თე ნაწილს, ნამუთ „გალაადიშ‘‘ ხოლო ართ მასწავლებელს, მაიკლ ბარნეტის მეჸუნდ, სტუდენტეფქ პატერსონს გურაფაშ დროს მსახურებას შეხვადესინ ფერ სიტუაციეფიშ ინსცენირება აკეთეს.

სტუდენტეფ ხეშე ვა უტენდეს ქადაგებაშ შანსის. თინეფ შხვეფს მუნეფიშ „გურიშ ნინაშა‘‘ უქადაგუდეს, ნამუსით ბრელ ჯგირობუაქ მაჸუნ. მაგალთო, ართ სტუდენტის უწუეს, ნამდა თი ტერიტორიას, სოდეთ თის ულამუდ ქადაგებან, ესპანურ ნინაშა რაგადანსინ ფერ ხალხი ცხოვრენდუ. ათეშგურშენ ართშა, მსახურებაშა იშუკონ თეიშახ, თიქ აპლიკაციათ JW ნინეფი მუსხირენ სიტყვა ქიდიგურუ ესპანურ ნინაშა. ზუსტას თე დღას თიქ შარას ქიშეხვადუ ესპანურ ნინაშა რაგადანდუ ფერ ქომოლკოჩის დო თის მუშ ნინაშა ქიდურაგადუ. თეშ უკულ თე კოჩიქ დო თიშ ოჯახიშ ოთხი წევრიქ ბიბლიაშ გურაფა ქიდიჭყუ.

ინტერვიუეფი. უილიამ ტერნერქ, ნამუთ ხემანჯღვერე საბჭოშ სამსახურებრივ კომიტეტის ოხვარ, ოთხი სტუდენტშე ინტერვიუ ეჭოფუ. თინეფქ იჩუეს მუ რჩქინა უღუდეს სკოლაშახ დო მუ დიგურუეს სკოლას.

სტუდენტეფქ ოგურაფალ პროგრამაშე მუსხირენ გურიშემაკინალ აზრი გიშენეს. ართ-ართი მოსწავლექ იჩუ, მუ დიგურუ ლუკაშ მა-10 დუდის ინოჭარილ შემთხვევაშე. თევრეშე იძირე, ნამდა იესოშ გოტებულ 70 მოწაფექ გახარებულქ დირთუ მსახურებაშე, მუშენდა თინეფქ ჯგირო იმსახურეს. მართალ რე, მოწაფეეფიშ წიმი ულა იესოს ხოლო ოხიოლუდ, მარა თინა ხოლო ქაძირუ, ნამდა ხიოლიშ სამანჯელი ხვალე ჯგირ მსახურება ოკო ვა რდუკონ. თინეფ გახარებულ თიშენ ოკო ჸოფედესკონ, ნამდა იეჰოვა აფასენდუ თინეფიშ დუდგინოდვალირ მსახურებას. თე სიტუაცია გუმოშინანა, ნამდა ნანდულ ხიოლი გერსხილ ოკო რდას თიშა, ქუმოწონს დო ვარ იეჰოვას ჩქინ მსახურება.

ჯიმა ტერნერქ ფილიპელეფიშ 1:6-ის ინოჭარილ სიტყვეფით დაჯერუ სტუდენტეფი, ნამდა იეჰოვაქ „ჯგირ საქმე მიწიჭყუ“ თინეფიშით დო თინა ირიათო თინეფწკუმა იჸუაფუ.

მთავარ მოხსენებათ „იეჰოვას უჯინედას თქვან თოლეფი!“ გიშართუ ხემანჯღვერე საბჭოშ წევრიქ, ჯიმა სამუელ ჰერდიქ. თიქ თქუ, ნამდა ჩქი ვეშემლებნა პირდაპირ გაგებათ იეჰოვაშ ძირაფა. აბა, მუჭო შემლებნა უჯინათ თის?

იეჰოვაშ გუნაჭყეფუშ ჯინა მიმეხვარებუნა ქობძირათ იეჰოვა. თეშ გარდა, მუჭოთ ბიბლიაშე პკითხულენთინ, იეჰოვაქ გომინჯეს „გურიშ თოლეფი“ (ეფესოელები 1:18). ბიბლიას ირდღას წეპკითხენთ-და, უმოსის დიბგურუანთ იეჰოვაშ გურშენ; დო მუთ უმოსის დიბგურუანთინ, თით უმოს ხოლოს იპჸუაფუთ თიწკუმა.

მოკონა, არძაშ უმოსო სახარებეფს ქიგნვოჯინათ, სოდეთ იესოშ სიტყვეფი დო საქმეეფი რე მოჩამილ, ნამუთ მოძირანა მუნერ რე იეჰოვა. იესო თიცალო გუდ იეჰოვას, ნამდა შეულებუდ უთქუალუდკონ: „მიდგაქ მა ბძირუნ, ჩქიმ მუმა ხოლო ძირუ“ (იოანე 14:9).

ჯიმა ჰერდიქ აუდიტორიას უწუ, ნამდა იესოშ ცხოვრებაშ დაკვირებათ ხვალე თინა ოკო ვა უძირუდესკონ მუნერ რე იეჰოვა, იესოშ ნოქურიშა ხოლო ოკო გეუჸუნალდესკონ. მუჭოთ იესოს ვაზოგუდ დუდი შხვეფიშ დადიარაფალო თეშ, ჩქი ხოლო ირნერო ოკო ვოცადუდათ, ნამდა სულიერ საზრდო, ნამუთ მუჩესინ, შხვეფს ხოლო ქიმეფჩათ.

იეჰოვაჸურე ქიჯინე ჩქინ თოლეფი-და, მუ მაჸუნუ თეს? ჩქი ხოლო შემლებუნა ფსალმუნმაბირეცალო ბჯერდან, ნამუქით ჭარუ: „ირიათო თოლშა ეწომრე იეჰოვა. ვაკვახაბარკუქ“ (ფსალმუნი 16:8).

ბოლო სიტყვეფი. დიპლომეფიშ მეჩამაშ უკულ კლასიშ სახელით ართ სკოლათებულ სტუდენტიქ სიმარდულიშ წერილ იკითხუ. ბოლოს ჯიმა ჯეფრიქ სკოლათებულეფს უწუ, ნამდა შხვეფშა ახალ მუდგარენ ვაჸიდეს დაგურაფალ. თინეფს და დო ჯიმალეფშა გაშინალ აჸიდეს თინა, მუთ უკვე ჯგირო უჩქუდეს. ჯიმა ჯეფრიქ თანდაბლობაშ გურშენ ხოლო იჩუ. სკოლათებულეფს არძაშ უმოსო ბიბლია დო ბიბლიაშა გერსხილ პუბლიკაციეფშე ოკო უფიქრებდესკონ დო ვართ ხოლო მუნეფიშ დუდშე ვარდა „გალაადის“ ნაგურეფიშ გურშენ. თეშნერო სკოლათებულეფი გალაადის ნაგურეფუს გეგნოჩანდეს თი და დო ჯიმალეფს, მიდგას შილებე დღას ვემიაჩას გალაადის“ გურაფაშ შანსიქ. პროგრამაქ არძას რწმენა გაუმანგარ დო თინეფ მზათ რდეს შურ დო გურით მემსახურესკონ და დო ჯიმალეფს.