ართ აზიელ იეჰოვაშ მოწმე იან-მეიქ შარას გინულას მეხვარ თოლს ვარწყენ ფერ ოსურს სახელო მინჯგეს. a მინჯგექ თე დას უწუ: „მადლობა, ღორონთის დუხვამუდა!“. იან-მეიქ მინჯგეს შეთავაზ, სურვილ ქუღუდ-და, შხვა დროს ქეშეხვადუდეს ართიანს დო ბიბლიურ საკითხეფშე ქიჩიებდეს. უმოს გვიანო მინჯგექ უწუ, თინა ირ დღას ლოცულენდჷ, ნამდა ღორონთიშ ნამდვილ მსახურეფს ქეშეხვადკო. მუშენ თხინდჷ თინა ღორონთის თეცალ მუდგარენს?

 მინჯგექ თქუ, ნამდა 2008 წანას მუშ მეგობარქ, ნამუთ თოლს ვარწყე შეთავაზ, ულინუდკო თი ეკლესიაშა, ნამუთ შეზღუდულ შესაძლებლობეფ უღნან ფერ კათაშო რე. მუჟამსით თიქ თექიან ქადაგება მირჩქილუ, მღვდელს კითხჷ, ნამ წიგნშე კითხულენდჷ. თიქ უწუ, ნამდა თენა რდუ ღორონთიშ სიტყვა, ბიბლია. მინჯგეს მანგარ სურვილქ გურჩქინდჷ, თე წიგნ წეკითხკო; თიქ ქიშუ ბიბლია ჩინურ ბრაილიშ შრიფტით, ნამუთ 32 ტომშე შითომდირთუდ დო ამშვ თუთაშა წეკითხჷ. მინჯგექ გაგრძელ ბიბლიაშ კითხირ დო ქიმეხვად, ნამდა სამებაშ გურაფა, ნამდგას თი ეკლესიას ოგურუანდეს, სოდეთ მუ ოსწრუდ, ტყურა გურაფა რდუ; თეწკუმა ართო ქიგეგ, ნამდა ღორონთის უღჷ სახელ, იეჰოვა.

 დროშ მიკულაწკუმა ართო მინჯგეს გურქ გეუოლ თი ეკლესიაშა; თიქ ქიმეხვად, ნამდა თი მრევლ ვა ცხოვრენდჷ ბიბლიურ პრინციპეფით. მაგალთო, ეკლესიას თოლ ვარწყედესინ თინეფს მუნასკილედ ოჭკუმალს არზენდეს, მუჟამსით შხვა მრევლის ახალ ოჭკუმალს ურიგენდეს. თეცალ უსამართლობაშ მიმაჯინუ მინჯგეს მანგარო გუტირხჷ გურქ დო უხოლაშ ტერიტორიას ეკლესიაშ გორუა ქიდიჭყჷ. ზუსტას ათეშენ ლოცულენდჷ მინჯგე, ნამდა ღორონთიქ ქიმეხვარკო, დოგორკო ჭეშმარიტ რელიგია.

 იან-მეიშ გიმორჩქინელ სიკეთექ მინჯგეწკუმა მანგარო იმოქმედ დო გინაჭყვიდირაფუ ბიბლიაშ გურაფაშ დოჭყაფა. უმოს გვიანო მინჯგექ პირველო დესწრჷ იეჰოვაშ მოწმეეფიშ შეხვალამას. თინა იშინანს: „დღას ვაგმოჭყორდუ თი დღა, მუჟამსით პირველო მეფრთჷ კრებაშა. და დო ჯიმალეფქ მთელ გურით შეფხვადეს, მუდგაქ ჩქიმ გურს მანგარო შეხუ. თიშ უმკუჯინუო, ნამდა თოლს ვა ვორწყექ, ქიბგინ ნამდა თინეფქ ნამდვილ ჸოროფა გიმირჩქინეს“.

 მინჯგექ სულიერო წიმი მიდართჷ დო რეგულარულო ქიდიჭყჷ კრებაშ შეხვალამეფშა გილულა. თის მანგარო ოსიამოვნუდ სამეფოშ ობირეშეფიშ ბირა, მარა მინშა უჭირდჷ, გეიაჸუნკო შხვეფს, მუშენდა ობირეშეფიშ წიგნ ვარდჷ ბრაილიშ შრიფტით. კრებაშ მოხვარათ მინჯგექ მუშით აკანწყუ ობირეშეფიშ წიგნ. თის 22 საათიქ დესაჭირ, ნამდა 151 ობირეშ ბრაილიშ შრიფტით გეგნოჭარკო. 2018 წანაშ აპრილს მინჯგექ ქიდიჭყჷ სამქადაგებლო საქმიანობას მონაწილებაშ მეღება დო ირ თუთას ქადაგებას 30 საათის გუმურთუნდჷ.

 მინჯგექ ონათალო მიმზადკონ თიშენ, იან-მეიქ გიმირინუ წიგნიშ, „ორგანიზებულეფ ვორეთ იეჰოვაშ ნებაშ შეიოსრულებერო“ კითხვეფიშ დო ბიბლიურ მუხლეფიშ აუდიო ჩანაწერ. 2018 წანაშ კვირკვეს მინჯგექ დინათ. თინა იჩიებ: „ჩქიმ გურს მანგარო შეხუ თი ჸოროფაქ, ნამუთ და დო ჯიმალეფქ გიმირჩქინეს კონგრესის. თექ თეშ მახიოლ, ნამდა ნგარა ქიდიბჭყჷ. მუჭოთ იჸუნ ღორონთიშ ნამდვილ მსახურეფ შქას ქუმოფხვად“ (იოან. 13:34, 35). ასე მინჯგე მუ თვითონ გიმირჩქინანს თი ჸოროფას შხვეფწკუმა, ნამუთ მუშ დუდშა გიმოცად დო სრულ დროთ ომსახურ იეჰოვას.