Fahotan̈a io ivolan̈ana raha atao, fihetsehampo, na eritreritry jiaby tsy mifan̈araka amy fitsipikiny Zan̈ahary. Manota koa olo araiky izikoa mandika lalàn̈any Zan̈ahary, ke man̈ano raha efa volan̈iny fa ratsy na tsy marin̈y. (1 Jaona 3:4; 5:17) Koran̈iny Baiboly fa manota koa olo araiky, izikoa misy raha efa hainy fa tokony hataony, kanefa izio tsy nataony.​—Jakoba 4:17.

 Izikoa volan̈a nandikan̈a Baiboly tamy voanalohany tan̈y zahan̈a, dikany manota zen̈y “tsy mahavoa raha kindren̈y.” Karaha ataony maramila tan Israely taloha tan̈y, nisy tamindro ten̈a nahay nampiasa pilotro. Asiandro vato an̈atinizio, ke tsy maintsy nahavoa fo iro koa fa nandefa izio. Izikoa adika arabakiteny zen̈y, “tsy nanota” foeky ivolan̈ana izy. (Mpitsara 20:16) Tsisy nihafa amy zen̈y koa fitsipiky lavorary napetrakany Zan̈ahary. Manota atsika izikoa tsy mahavita man̈araka izio.

 Anjarany Zan̈ahary man̈apetraka fitsipiky aminy olombelon̈o, fotony izy niasa atsika. (Apokalypsy 4:11) Mbala hitsarainy atsika, erakany raha nataontsika.​—Romanina 14:12.

Mba misy olombelon̈o tsy manota zen̈y edy va?

 Aha, tsisy. Volan̈iny Baiboly ao fa “atsika jiaby io samy efa nanota aby.” (Romanina 3:23; 1 Mpanjaka 8:46; Mpitoriteny 7:20; 1 Jaona 1:8) Ino antony?

 Tsisy fahotan̈a iry Adama ndreky Eva tamy voanalohany, fotony iro lavorary. Jehovah koa fa niasa iro, iro nataony nanan̈a toetry nitovy taminany. (Genesisy 1:27) Fa iro baka tio tsy nan̈araka volan̈a Zan̈ahary, ke iro nanjary tsy lavorary eky. (Genesisy 3:5, 6, 17-19) Fahotan̈a ndreky tsy fahalavorarian̈a io manaranaka, ke iro koa fa niteraka, nanjary nifindra tamy zanakandro koa fahotan̈a io. (Romanina 5:12) Karaha ty raha nikoran̈iny Davida momba zen̈y: “Zaho koa fa teraka, efa voaheloko nan̈ano hadisovan̈a edy.”​—Salamo 51:5.

Marin̈y ma misy fahotan̈anolo sasany ratsiratsiny ninolo sasany?

 Ia. Ohatra, Baiboly mivolan̈a fa iro olo ta Sodoma tan̈y farandraha “ratsy fan̈ahy ndreky nanota mare.” ‘Ten̈a navesatra’ fahotan̈andro. (Genesisy 13:13; 18:20) Fa misy raha telo mila dinihin̈y ty, misy ahitantsika fa ten̈a ratsy ankitin̈y vokatrany fahotan̈a io.

1.   Karakory ma habezany fahotan̈a io? Baiboly mivolan̈a fa atsika tsy tokony han̈ano fahotan̈a maventy, an̈atinizen̈y pijangajanga, panompo sampy, pangalatra, mamolava, pandrava, pamono olo, ndreky pan̈ano aody. (1 Korintianina 6:9-11; Apokalypsy 21:8) Mazava tsarabe amy Baiboly ao fa olo araiky nan̈ano fahotan̈a maventy tsy mira aminolo araiky nanota tsinia na tsy nandiniky tsarabe ke nanota. Ohatra, mety misy olo mivolan̈a raha na man̈ano raha nampameloko olo, kanefa tsy kiniany aby raha io. (Ohabolana 12:18; Efesianina 4:31, 32) Ndray izy man̈ano zen̈y, Baiboly mivolan̈a fa tsisy fahotan̈a tsy tokony hijiren̈a. Olo araiky koa baka tsy mijerijery fahotan̈a hely nataony, mety ho avy amy fahotan̈a maventy fo izy amy farany.​—Matio 5:27, 28.

2.   Izio ma efa kinianolo io nan̈ano fahotan̈a io? Misy olo man̈ano fahotan̈a, fotony iro tsy mahay fitsipikiny Zan̈ahary. (Asan’ny Apostoly 17:30; 1 Timoty 1:13) Amy Baiboly ndraiky, tsy tsara raha ataonolo karaha zen̈y. Fa ndray izy man̈ano zen̈y, koran̈iny Baiboly fa fahotan̈a ataonolo tsy mahay fitsipikiny Zan̈ahary tsy mira fahotan̈a ataonolo kinia tsy man̈araka lalàn̈any Zan̈ahary. (Nomery 15:30, 31) Matoa olo araiky kinia manota, dikanizen̈y ‘ratsy fônany.’​—Jeremia 16:12.

3.   Izio ma efa matetiky izy nan̈ano izio? Amy Baiboly ao, olo araiky sendra nan̈ano fahotan̈a ndreky olo araiky efa impirimpiry nan̈ano fahotan̈a araiky tsy mitovy. (1 Jaona 3:4-8) Disoviny Zan̈ahary olo araiky, izikoa izy efa mahay tsarabe ny marin̈y, kanefa izy mbala ‘kinia manota.’​—Hebreo 10:26, 27.

 Olo araiky koa nan̈ano fahotan̈a maventy, mety tsy voly han̈enjiky izy eritreritrinany. Karaha zen̈y raha nahazo Davida. Ho izy karaha ty: ‘Efa mila tsy ho tondrany lohanaka hadisovan̈anaka. Mavesatra mare aminaka izio karaha entan̈a mavesatra be in̈y.’ (Salamo 38:4) Fa olo karaha zen̈y mbala afaka man̈anten̈a raha tsara fo. Karaha ty baka volan̈iny Baiboly: “Irarian̈a olo ratsy fan̈ahy hiala amy fomba ratsinany, avio olo pan̈ano ratsy tsy hieritreritry raha tsy manjary eky. Irarian̈a izy himpody amy Jehovah, baka izy hamindra fô aminany, ia, himpody amy Zan̈aharintsika, fotony izy ten̈a mamafa hadisovan̈a ankitin̈y.”​—Isaia 55:7.