Vaovao Tsara Nisoratin’i Jaona 16:1-33
16 “Nivolan̈a raha aby zen̈y taminarô zaho, amy zen̈y anarô tsy hiala amy finoan̈a.*
2 Anarô hitoravan̈a hiala amy synagoga. Ho avy fotoan̈a* hiritriretan’olo mamono anarô fa irô man̈ano fanompoan̈a masin̈y nin’ny Zan̈ahary, irô koa fa man̈ano zen̈y.
3 Han̈ano raha aby zen̈y irô, fôtony samby mbala tsy haindrô na Baba na zaho.
4 Kanefa, nivolan̈iko taminarô raha aby zen̈y, amy zen̈y izikoa fa avy lera hiboahandrô raha aby zen̈y, ho azonarô onon̈o fa irô io efa nivolan̈iko taminarô.
“Mbala tsy nivolan̈iko taminarô raha aby zen̈y tamy voanalohany, fôtony zaho mbala niaraka taminarô.
5 Fa zaho handeha amin’ny Araiky nan̈iraka zaho; kanefa tsisy aminarô man̈ontany zaho: ‘Han̈aia ma anao?’
6 Malahelo mare baka fônarô fôtony zaho nivolan̈a raha aby zen̈y taminarô.
7 Fa ndray zen̈y, ambarako anarô ny marin̈y: Mahatsara anarô zaho handeha io. Fôtony zaho koa tsy mandeha, mpan̈ampy io tsy ho avy aminarô atỳ; fa zaho ndraiky koa mandeha, halefako aminarô atỳ izy.
8 Lera izy avy, izy han̈amia donia ty porofo tsy mety famaran̈a momba fahotan̈a, baka iô momba fahamarin̈ana, aviô momba fitsaran̈a:
9 Momba fahotan̈a antsendriky, fôtony irô tsy mino zaho;
10 baka iô momba fahamarin̈ana, fôtony zaho handeha amy Baba ke anarô efa tsy hahita zaho eky;
11 aviô momba fitsaran̈a, fôtony mpitondra donia ty efa nitsarain̈a.
12 “Mbala maro raha tiako koran̈iny aminarô, fa mbala tsy tondranarô raha aby zen̈y ziôty.
13 Kanefa lera izy avy, tsy ino zen̈y fa fan̈ahin’ny fahamarin̈ana, izy hitariky anarô baka hazava aminarô tsarabe fahamarin̈ana jiaby. Izy baka tsy mivolan̈a hevitrinany tômpiny fa raha ren̈iny fo hambarany, baka iô hambarany anarô raha mbala ho avy.
14 Izy han̈amia voninahitry zaho, fôtony raha ren̈iny baka aminaka hazavainy aminarô.
15 Ninaka aby raha jiaby anan̈an’ny Baba. Zen̈y mahavy zaho mivolan̈a fa raha ren̈iny baka aminaka hazavainy aminarô.
16 Afaka fotoan̈a fôhiky anarô efa tsy hahita zaho eky, fa afaka fotoan̈a fôhiky ndraiky koa anarô hahita zaho.”
17 Ke sasany tamindrô mpianatranany aby io nifampikoran̈a karaha ty: “Ino ma raha tiany havian̈a tamin’izy nivolan̈a tamintsika: ‘Afaka fotoan̈a fôhiky anarô efa tsy hahita zaho eky, fa afaka fotoan̈a fôhiky ndraiky koa anarô hahita zaho’, ndreky: ‘Fôtony zaho handeha amy Baba’?”
18 Aviô ho irô: “Ino ma raha tiany koran̈iny amin’ny: ‘Afaka fotoan̈a fôhiky’ zen̈y? Tsy haintsika foeky raha tiany koran̈iny.”
19 Hain’i Jesosy fa irô tihan̈ontany izy, ke ho izy tamindrô: “Baka amy zaho nivolan̈a: ‘Afaka fotoan̈a fôhiky anarô efa tsy hahita zaho eky, fa afaka fotoan̈a fôhiky ndraiky koa anarô hahita zaho’ ma mahavy anarô mifan̈ontany?
20 Ankitikitin̈y, ambarako anarô marin̈y tsarabe fa, anarô hitomoan̈y ndreky hiafatrafatra, fa donia ty ndraiky ho ravoravo. Anarô halahelo, fa alahelonarô io hivadiky haravoan̈a.
21 Lera man̈angy araiky miteraka, miôry mare izy fôtony navy lera itirahany. Fa izikoa zanakanany efa teraka, tsy azony onon̈o eky jalinany in̈y, fôtony ravoravo izy fa misy tsaiky teraka amy donia ty.
22 Anarô koa ziôty mba malahelo. Fa anarô hahita zaho ndraiky ke fônarô ho ravoravo, aviô tsisy olo han̈adoso haravoan̈anarô zen̈y.
23 Amin’ny andra zen̈y, anarô efa tsy han̈ontany raha zaho eky. Ankitikitin̈y, ambarako anarô marin̈y tsarabe fa, zay raha angatahanarô amy Baba, izio hamezany anarô amin’ny an̈aran̈anaka.
24 Firaka iziô anarô mbala tsiary nisy raha nangatahanarô tamin’ny an̈aran̈anaka, ndray araiky. Ke mangataha fa anarô hahazo, amy zen̈y haravoan̈anarô ho feno.
25 “Zaho nampiasa fan̈oharan̈a tamy zaho nivolan̈a raha aby zen̈y taminarô. Fa ho avy lera, zaho efa tsy hampiasa fan̈oharan̈a eky izikoa fa mikoran̈a aminarô, fa hataoko mazava tsarabe raha koran̈iko aminarô momba Baba.
26 Amin’ny andra zen̈y, anarô hangataka raha amy Baba amin’ny an̈aran̈anaka; kanefa, tsy midika zaho mivolan̈a zen̈y ke zaho han̈ano fangatahan̈a ninarô.
27 Fa Baba lastiô baka mankatia anarô, fôtony anarô tia zaho sady nino fa zaho navy io solonten̈an’ny Zan̈ahary.
28 Zaho solonten̈an’ny Zan̈ahary, aviô zaho navy amy donia ty. Zaho iziô hiala amy donia ty ke handeha amy Baba.”
29 Ho irô mpianatranany aby io: “Hitanao! Iziô anao vo mikoran̈a mazava tsarabe sady tsy mampiasa fan̈oharan̈a.
30 Hainay eky iziô fa anao mahay raha jiaby, aviô anao tsy mila han̈ontanian̈a aby. Baka amy zen̈y inoanay fa anao baka amy Zan̈ahary.”
31 Ho Jesosy tamindrô: “Mino amizay anarô iziô?
32 Ho avy lera, ia, sady izio efa navy, anarô tsiaraikiaraiky hiparitaka hilefa an-tran̈onarô an̈y ke zaho hambelanarô manaokan̈a. Fa zaho fo tsy latsataokan̈a, fôtony Baba miaraka aminaka.
33 Nivolan̈a raha aby zen̈y taminarô zaho amy zen̈y baka aminaka hazahoanarô fiadanan̈a. Amy donia ty, anarô hahita fahorian̈a, fa korazy anarô! Zaho efa nandresy donia ty.”
