Vaovao Tsara Nisoratin’i Matio 12:1-50
-
Jesosy “Tômpon’ny Sabata” (1-8)
-
Jesosy nampajanga lelahy maty tan̈ana (9-14)
-
Mpanompo araiky tian’ny Zan̈ahary mare (15-21)
-
Jesosy nampiasa fan̈ahy masin̈y han̈aboahan̈a demony (22-30)
-
Fahotan̈a tsy azahoan̈a familan-keloko (31, 32)
-
Baka amy voany ahaizan̈a kakazo araiky (33-37)
-
Raha nandalo tamy Jonà (38-42)
-
Lera demony mimpody ndraiky (43-45)
-
Maman’i Jesosy ndreky irô rahalahiny aby io (46-50)
12 Tandraraiky, Jesosy ndreky mpianatranany nandalo tamy tanimbary. Andra tamy zen̈y Sabata. Mosary irô mpianatranany aby io ke irô nitsôngo tahom-bary* nihoanindrô.
2 Izikoa fa hitandrô Fariseo aby io raha zen̈y, ho irô taminany: “Zahava raha ataon’ny mpianatranao! Raha tsy fatao amin’ny andra sabata kony raha ataondrô io ay!”
3 Ho izy tamindrô: “Mbala tsiary nivakianarô tamy Soratra Masin̈y tao ma raha nataon’i Davida, tamin’izy ndreky irô olonany aby io silaon̈o?
4 Izy niditry tamy tran̈on’ny Zan̈ahary tao, baka iô irô nihinan̈a môfo atao fan̈atitry. Kanefa izy ndreky irô olo niaraka taminany aby io tsy nahazo nihinan̈a môfo aby io, fôtony mpisôron̈o zaraiky fo mety mihinan̈a irô io.
5 Mbala tsy nivakianarô tamy Lalàn̈a tao koa ma fa miasa fo irô mpisôron̈o aby amy tempoly ao ndray amin’ny andra sabata, kanefa irô tsy diso?
6 Zaho ndraiky mivolan̈a aminarô fa misy raha mbala beben’ny tempoly eto.
7 Izikoa mba hainarô edy dikan’ny: ‘Famindram-pô tiatiako tozay sôron̈o’, ôtrizay anarô tsy nivolan̈a fa diso irô olo tsy manan-tsin̈y aby io.
8 Mahavy zaho mivolan̈a zen̈y baka, Zanak’olo Tômpon’ny Sabata.”
9 Izy koa fa baka niala tiô, izy niditry tamy synagoga.
10 Nisy lelahy maty* tan̈ana zay tao. Nisy olo nitady antony hitorian̈a Jesosy, ke irô nan̈ontany izy karaha ty: “Mety ma mampahivan̈a olo amin’ny andra sabata?”
11 Ho izy tamindrô: “Izikoa ôndrikôndrikinarô araiky latsaka an̈atin’ny lavaka amin’ny andra sabata, sakinarô tsy hampanonga ôndrikôndriky io baka ao?
12 Kanefa olombelon̈o mbala valera mandilatra ôndrikôndriky. Dikan’izen̈y, mety man̈ano ny tsara amin’ny andra sabata.”
13 Ho izy baka tiô tamy lelahy io: “Vavara tan̈ananao.” Nivavarin’ny lelahy io tan̈ananany ke izio janga, baka iô nanjary karaha araiky ilany.
14 Fa irô Fariseo aby io lôso niboaka, baka iô irô nitady hevitry hamonoan̈a izy.
15 Izikoa fa hain’i Jesosy raha zen̈y, izy niala tiô. Marobe olo nan̈araka izy, ke lan̈iany narary, nitahany.
16 Fa irô nifeperiny mare tsy han̈ambara amin’olo raha momba izy,
17 amy zen̈y ho tanteraka raha nambaran’ny mpaminan̈y Isaia ty:
18 “Io mpanomponaka, araiky nifidiko sady tiako mare! Mamparavoravo zaho mare raha ataony. Amezako izy fan̈ahy masin̈inaka, ke hataony mazava tsarabe amindrô firenena aby io dikan’ny rariny zen̈y.
19 Izy tsy himalo amin’olo, na hiafatrafatra, aviô feonany tsy ho ren̈y amy lalabe foeky.
20 Izy tsy hanôrotôro bararata folaka, aviô ponjan’ny lalampon̈o* efa ho foaty tsy hivoneny, parapavian’ny fotoan̈a hampanjakany ny rariny.
21 Ke irô firenena aby io han̈apetraka fatokisan̈andrô aminany.”*
22 Nisy lelahy nisazaohan’ny demony nindesin’olo taminany. Lelahy io gila sady moa. Demony tamy lelahy io niroasin’i Jesosy, ke janga lelahy io sady nahavita nivolan̈a aviô nahita.
23 Lany fan̈ahy olo jiaby, ke ho irô: “Tsy ndraiky io Zanakan’i Davida zen̈y?”
24 Izikoa fa ren̈indrô Fariseo aby io raha zen̈y, karaha ty ho irô: “Angôvo baka amy Belzeboba* sefondrô demony aby io fo izy ahavitany man̈aboaka demony io!”
25 Hain’i Jesosy raha tan̈atin’ny jerindrô, ke ho izy tamindrô: “Ho rongana fanjakan̈a izikoa irô samby irô ao miady, aviô ho ravan̈a koa tanàna na fianakavian̈a izikoa irô samby irô miady.
26 Karaha zen̈y koa, izikoa Satana fo man̈aboaka Satana, miady* amin’ny ain̈inany tômpiny edy izy. Ke izikoa zen̈y, akôry hampaharitry fanjakan̈anany?
27 Ke izikoa baka amy Belzeboba an̈aboahako demony, baka amin-jôvy eky han̈aboahan’ny mpianatranarô* demony? Ke irô fo hitsara anarô.
28 Fa izikoa ndraiky baka amy fan̈ahy masin̈in’ny Zan̈ahary an̈aboahako demony, dikan’izen̈y, efa navy Fanjakan̈an’ny Zan̈ahary fa tsy azonarô onon̈o fo.*
29 Karakôry ma hataon’olo araiky hamaky tran̈on’ny* lelahy fatatra mare sady hangalatra fanan̈ananany ao? Tsy maintsy fiheziny antsendriky lelahy io, zay izy vo afaka mangala zay raha tiany halain̈a ao.
30 Lan̈iany tsy milan̈y aminaka, manohitry zaho; aviô zay olo tsy miaraka mamory aminaka, man̈aparitaka.
31 “Zen̈y mahavy zaho mivolan̈a aminarô fa, na ino na ino fahotan̈a vitan’olo araiky, ary ndray izy tsy man̈isy fôtiny raha masin̈y, izy mbala mety hahazo familan-keloko fo. Fa izikoa ndraiky izy tsy man̈isy fôtiny fan̈ahy masin̈y, tsisy andra hazahoany familan-keloko.
32 Ohatra iziô, izikoa olo araiky tsy man̈isy fôtiny Zanak’olo, izy mbala mety hahazo familan-keloko. Fa izikoa ndraiky izy tsy man̈isy fôtiny fan̈ahy masin̈y, izy tsy hahazo familan-keloko foeky, na amy donia ty* na amin’ny araiky ho avy.
33 “Izikoa tsara kakazo natsabonarô, ho tsara koa voany; fa izikoa ndraiky ratsy kakazo natsabonarô, ho ratsy koa voany. Baka amy voan’ny kakazo araiky ahaizan̈a izikoa kakazo io tsara na ratsy.
34 Taranakan’ny bibilava misy poazon aby ty! Akôry ma ataonarô hivolan̈a raha tsara kanefa anarô olo ratsy fan̈ahy? Zay raha mameno fôn’olo fo volan̈in’ny vavanany.
35 Olo tsara fan̈ahy zen̈y mivolan̈a raha tsara, fôtony fônany feno raha tsara.* Fa olo ratsy fan̈ahy ndraiky mivolan̈a raha ratsy, fôtony fônany feno raha ratsy.*
36 Zaho man̈ambara anarô fa amin’ny Andra Fitsaran̈a, kila olo hitsarain̈a amy volan̈a tsisy dikany jiaby nivolan̈iny;
37 fôtony baka amy volan̈anao han̈ambaran̈a na anao olo marin̈y na anao diso.”
38 Ke nisy mpanoratra lalàn̈a ndreky Fariseo nivolan̈a taminany: “A Mpampianatra, zahay mba tihahita fahagagan̈a ataonao.”
39 Fa ho Jesosy tamindrô: “Taranaka ratsy fan̈ahy salakady mivadiky amy Zan̈ahary* raha miasa mitady fahagagan̈a fo, kanefa tsisy fahagagan̈a amezan̈a irô foeky izikoa tsy araiky nandalo tamy mpaminan̈y Jonà in̈y fo.
40 Karaha nataon’i Jonà nidôko telo andra ndreky telo alin̈y tan̈atin’ny kibony laoko befatiarin̈y in̈y, Zanak’olo koa hidôko telo andra ndreky telo alin̈y ambanin’ny tany.
41 Amin’ny Andra Fitsaran̈a, hatsangana* miaraka amy taranaka ty olo nipetraka ta Ninive ke irô han̈amia tsin̈y taranaka ty, fôtony Jonà koa fa nitory tamindrô, irô nibebaka. Fa hitanarô, eto misy olo mbala be mandilatra Jonà.
42 Amin’ny Andra Fitsaran̈a, hatsangana miaraka amy taranaka ty mpanjakavavin’ny atsimo. Izy han̈amia tsin̈y taranaka ty, fôtony ndray izy nipetraka tamy tany farany lavitry, izy mbala navy fo handeha hitandren̈y fahendrenan’i Solomona. Kanefa, eto misy olo mbala be mandilatra Solomona.
43 “Nisy fan̈ahy maloto* niboaka baka tamy lelahy araiky, ke demony io nandeha tamy tany paiky nitsakaraka tany hangalan̈a kajo, fa izy fo tsy nahita.
44 Ke ho izy baka tiô: ‘Zaho handeha himpody amy tran̈o nialako an̈y.’ Izy koa fa navy tan̈y, zahavany tran̈o io tsisy olo mipetraka salakady madio, aviô feno sanjin’ny tran̈o.
45 Ke lôso izy nitsakaraka demony* fito hafa mbala ratsy jery mandilatra izy, nindesiny niditry ndreky nipetraka tamy tran̈o io tao. Ke mbala ratsiratsin’ny raha navoa lelahy io tamy voanalohany, raha havoa izy amy farany. Karaha zen̈y koa hiafaran’ny taranaka ratsy fan̈ahy ty.”
46 An̈atin’izy mbala nikoran̈a tamindrô olo aby io fo, navy mamany ndreky rahalahiny aby io nitsangana tan-tany tao, fôtony irô tihikoran̈a taminany.
47 Ke nisy olo nivolan̈a taminany: “An-tany ao mamanao ndreky irô rahalahinao aby io. Irô zen̈y tihikoran̈a aminao.”
48 Ho izy tamin’olo io: “Hainao ma azôvy mamako, aviô azôvy aby rahalahiko?”
49 Izy baka tiô nanôndro irô mpianatranany aby io sady nivolan̈a karaha ty: “Irô io mamako ndreky rahalahiko!
50 Fôtony lan̈iany olo man̈ano sitrapôn’ny Babako an-dan̈itry an̈y, izy rahalahiko ndreky anabaviko, baka iô mamako.”
Lamariky amy Pazy Ambany
^ Na: “tahom-barimbazaha.”
^ Na: “malemy.”
^ Na: “lamesin’ny jiro.”
^ Abt: “amin’ny an̈aran̈anany.”
^ Izio an̈aran̈a hafa ikahian̈a Satana.
^ Abt: “nisaratsaraka.”
^ Abt: “zanakanarô.”
^ Abt: “anarô efa tatran’ny Fanjakan̈an’ny Zan̈ahary.”
^ Na: “hiditry an-tran̈on’ny.”
^ Na: “zen̈y man̈aboaka raha tsara nikajiany an̈atin’ny fônany.”
^ Na: “ndraiky man̈aboaka raha ratsy nikajiany an̈atin’ny fônany.”
^ Abt: “salakady mandiadia vady.”
^ Na: “hatsangana amy maty.”
^ Abt: “demony.”
^ Abt: “fan̈ahy.”
