Mora aminao ma man̈araka volan̈anolobenao?... Tsy mora zen̈y ndraikindraiky. Jesosy ma nan̈araka volan̈a Jehovah ndreky olobeny?... Anao koa man̈araka raha nataony Jesosy, anao han̈araka volan̈anolobenao fo. Atsika hizaha tantaranany.

Tandan̈itry tan̈y Jesosy, talohany naviany tambony tany teto. Izy tamy zen̈y niaraka tamy Papany, Jehovah an̈arany. Izy tambony tany teto koa nisy papa ndreky mama. Josefa an̈aran̈a papany, Maria an̈aran̈a mamany. Karakory eky nahavy Josefa ndreky Maria nanjary olobeny?...

Nisy raha mampagaga nataony Jehovah. Izy namindra fahin̈ana Jesosy tan̈aty kibony Maria. Jesosy amy zay nitombo tan̈aty kibony Maria tao. Izy koa fa feno sivy fanjava, izy teraka, mira zazamena jiaby fo. Josefa ndreky Maria nitarimy izy, ke nanjary papany ndreky mamany tambony tany teto.

Jesosy mbala 12 taon̈o fo, izy efa tia Jehovah mare. Iro nandeha ta Jerosalema nan̈ano fetiny Pasky. Josefa ndreky Maria koa fa tamy lalan̈a hody, iro tsy nahita Jesosy. Hainao ma taia izy tamy zen̈y?...

Sahiran̈a Josefa ndreky Maria nitady Jesosy. Iro nipody ta Jerosalema hizaha tany misy izy. Niasa loha mare iro tamy zen̈y. Koa fa telo andra iro nitady izy, hitandro izy tamy tempoly tao! Ino ma raha nataony tao?... Izy nianatra raha momba Jehovah, Papany araiky andan̈itry an̈y. Jesosy tia Jehovah, ke zen̈y nahavy izy tia nianatra raha momba Jehovah. Zen̈y koa nahavy izy nan̈araka volan̈a Jehovah fo, ndray tsy mora taminany nan̈ano zen̈y. Jesosy ma mba nan̈araka volan̈a Josefa ndreky Maria?... Ia, Baiboly mivolan̈a zen̈y.

Karakory han̈anovanao karaha Jesosy in̈y?... Anao mila man̈araka volan̈a mamanao ndreky papanao, ndray tsy mora aminao man̈ano zen̈y. Akory, pare anao?...