Nisy lelahy Israelita araiky zay, Elkana an̈arany, nanan̈a vady aroe. Hana ndreky Penina an̈arandro. Hana ndraiky ten̈a tiany Elkana. Isanandra Penina nankadala Hana fo, fotony Hana tsy niteraka foeky. Penina ndraiky niteraka maro. Isaka taon̈o, Elkana nitondra fianakavian̈anany tamy tran̈olay masin̈y ta Silo tan̈y. Tandraraiky, iro koa fa navy tan̈y, hitany Elkana nalahelo mare Hana vadiny. Izy nivolan̈a: ‘Anao aza mitomoan̈y eky. Zaho mbala eto. Anao kony tiako mare.’

Niala tio amy zay Hana nandeha nivavaka. Tsy voly izy nitomoan̈y nangataka tamy Jehovah han̈ampy izy. Hoizy: ‘A Jehovah e, zaho koa miteraka lelahy, hamiako hanompo anao izy firaka izy maty.’

Hitany Ely Pisoron̈obe, Hana nitomoan̈y io, ke izy nieritreritry fa mamo Hana. Hana nivolan̈a: ‘Azafady tompoko anao, zaho tsy mamo. Fa maventy problemonaka, ke zaho mikoran̈a zen̈y amy Jehovah.’ Diso hevitry Ely, ke izy nivolan̈a taminany: ‘Zahan̈ary foeky han̈amia anao raha tadiavinao.’ Nahazo ain̈y amy zay Hana, baka io izy nandeha. Taon̈o  araiky latsaka hely, niteraka lelahy izy. Samoela nataony an̈arany tsaiky io. Misaora ravoravo mare Hana tamy zen̈y!

Tsy nadin̈any Hana volan̈anany tamy Jehovah in̈y. Koa fa nafaka nono tsaiky io, nateriny tamy tran̈olay masin̈y tan̈y, hanompo Jehovah. Hoizy taminy Ely: ‘Tsaiky ty valiny vavaka nataoko in̈y. Ke aminandra jiaby hiain̈any, izy hampindramiko Jehovah.’ Isaka taon̈o Elkana ndreky Hana namangy Samoela, ndreky nitondra lamba tsara tsisy tan̈any namian̈a izy. Namiany Jehovah zanaka lelahy telo koa Hana, avio man̈angy aroe.