FIANARAN̈A 7
Karakory ma Fanjakan̈any Zan̈ahary Zen̈y?
1. Karakory ma Fanjakan̈any Zan̈ahary Zen̈y?
Panjaka karakory ma Jesosy io?—MARKA 1:40-42.
Fanjakan̈any Zan̈ahary zen̈y fanjakan̈a andan̈itry an̈y. Izio zaraiky fo hitondra ndreky han̈ano sitrapony Zan̈ahary ambony tany eto, karaha andan̈itry an̈y. Maro tsara raha hataony Fanjakan̈any Zan̈ahary io. Tsy ho ela, izio han̈ano raha mahafapo atsika. Izio koa hampihavan̈a olo jiaby ambony tany eto.—Vakia Daniela 2:44; Matio 6:9, 10; 24:14.
Izikoa fa fanjakan̈a zen̈y, tsy maintsy misy panjaka. Jehovah nifidy Jesosy Kristy hatao Panjaka amy Fanjakan̈anany io.—Vakia Apokalypsy 11:15.
Zahava video Karakory ma Fanjakan̈any Zan̈ahary Zen̈y?
2. Panjaka karakory ma Jesosy io?
Jesosy Panjaka tsara, fotony izy tsara fan̈ahy, mentitry amy raha marin̈y ndreky von̈ono han̈ampy olonany. (Matio 11:28-30) Baka andan̈itry an̈y Jesosy manjaka amy tany ty. Nandeha tandan̈itry tan̈y baka izy, koa fa natsangan̈a Jehovah in̈y. Izy koa fa navy tan̈y, mbala tsendriky nanjaka fa mbala niambin̈y. (Hebreo 10:12, 13) Zan̈ahary amy zay nan̈iraka izy hanjaka.—Vakia Daniela 7:13, 14.
3. Azovy ma hiaraka manjaka aminany?
Misy lelahy ndreky man̈angy maro tsy mivadiky amy Zan̈ahary, hiaraka hanjaka amy Jesosy andan̈itry an̈y. “Olo masin̈y” ivolan̈any Baiboly iro io. (Daniela 7:27) Iro apostoly aby io voanalohany nifidiny hatao panjaka. Mbala misy olo hafa koa nifidiny Jehovah tafara taty. Iro io koa hanjary anjely mira Jesosy.—Vakia Jaona 14:1-3; 1 Korintianina 15:42-44.
Firy ma olo mandeha andan̈itry an̈y? “Ondry vitsy” nivolan̈any Jesosy iro io. (Lioka 12:32) Misy 144 000 iro andeha andan̈itry an̈y, hiaraka manjaka amy Jesosy.—Vakia Apokalypsy 14:1.
4. Niaraka Jesosy nanjaka, ino ma raha nataony?
Fanjakan̈any Zan̈ahary io efa nanjaka nanomboko tamy 1914. * Niaraka Jesosy nanjaka, izy nandroaka Satana ndreky demony aby io niala tandan̈itry tan̈y. Satana baka tan̈y romotro, ke izy mikorontan̈a tany jiaby. (Apokalypsy 12:7-10, 12) Nanomboko tamy zen̈y, olo nahainijaly fo. Raha ratsy jiaby mandalo io man̈ambara fa efa andra farany izioty.—Vakia Lioka 21:7, 10, 11, 31.
5. Ino ma raha hataony Fanjakan̈any Zan̈ahary?
Fanjakan̈any Zan̈ahary ambara olo jiaby ambony tany eto, ke maro olo man̈eky izio manjary mihavan̈a, nata tsy mira tany favian̈a. Iro io olony Fanjakan̈any Zan̈ahary, ke Jesosy Panjakandro. Lera Jesosy han̈adoso olo ratsy fan̈ahy ambony tany eto, iro io harovany, ke tsy hofoaty. Zay man̈iry hanjary olony Fanjakan̈any Zan̈ahary io mila mianatra man̈eky Jesosy.—Vakia Apokalypsy 7:9, 14, 16, 17.
Koa fa tapitry 1 000 taon̈o, tany jiaby efa paradisa karaha taloha. Jesosy amy zay han̈apody Fanjakan̈a io amy Jehovah. (1 Korintianina 15:24-26) Koran̈a amindry havanao raha tsara hataony Fanjakan̈any Zan̈ahary io.—Vakia Salamo 37:10, 11, 29.
^ feh. 6 Man̈azava daty 1914 io boky Inona Marina no Ampianarin’ny Baiboly? pazy 215-218.
