FIANARAN̈A 8
Nan̈ino ma Tsy Adosony Zan̈ahary Jaly Ndreky Raha Ratsy Jiaby Io?
1. Baka aia ma naviany raha ratsy jiaby io?
Nambelany Zan̈ahary olo hitondra, baka hita fa tsisy fanjakan̈anolombelon̈o mahavita man̈adoso jaly jiaby
Baka amy Satana naviany raha ratsy jiaby io, taminizy navandy voanalohany. Satana io anjely tsara niasainy Zan̈ahary, fa izy fo nanjary ‘tsy nan̈ano ny marin̈y eky.’ (Jaona 8:44) Tiany olo hivavaka aminany fa tsy amy Zan̈ahary. Izy amy zay navandy tamy Eva, baka Eva tsy han̈araka volan̈a Zan̈ahary. Adama koa tsy nan̈araka volan̈a Zan̈ahary, mira Eva fo. Baka amy raha nataony Adama io nahavy olo mijaly ndreky maty.—Vakia Genesisy 3:1-6, 19.
Satana koa fa nandrisiky Eva tsy han̈araka volan̈a Zan̈ahary, hanohitry fitondrasan̈a Zan̈ahary raha ten̈a tiany hatao. Maro koa olo nazony Satana. Zen̈y nahavy Satana nanjary ‘mamehy donia ratsy ty.’—Vakia Jaona 14:30; 1 Jaona 5:19.
2. Zan̈ahary ma niasa raha ratsy?
Zan̈ahary tsy niasa raha ratsy. Tamy voanalohany tan̈y, raha jiaby niasainy nan̈araka volan̈anany. (Deoteronomia 32:4, 5) Zan̈ahary koa fa niasa olo, iro mahazo mifidy raha tiandro hatao. Atsika koa tia Zan̈ahary, mila mifidy han̈ano ny tsara.—Vakia Jakoba 1:13-15; 1 Jaona 5:3.
3. Nan̈ino ma jaly io tsy mety adosony Zan̈ahary?
Nan̈ino ma ambelany Jehovah fo olo tsy man̈araka volan̈anany? Amy zen̈y hita tsarabe fa, izikoa mbala olombelon̈o fo mitondra, atsika tsy ho sambatra. (Mpitoriteny 7:29; 8:9) Efa misy 6 000 taon̈o zay loso, kanefa mbala tsendriky nisy fanjakan̈anolombelon̈o nahavita nan̈adoso ady, pamono olo, pangalatra, olo man̈ano raha tsy marin̈y, ndreky aretin̈y.—Vakia Jeremia 10:23; Romanina 9:17.
Fanjakan̈any Zan̈ahary zaraiky fo mahavita mampiadan̈a olo. (Isaia 48:17, 18) Tsy ho ela, Jehovah han̈adoso fanjakan̈anolombelon̈o jiaby. Amy zen̈y, olo man̈eky fitondrasan̈anany fo tavela eto.—Isaia 11:9; Vakia Daniela 2:44.
Zahava video Nan̈ino Tsy Adosony Zan̈ahary Jaly Io?
4. Ino ma mahatsara Zan̈ahary mbala tsendriky mamono olo ratsy fan̈ahy?
Satana nivolan̈a fa tihahazo raha baka amy Zan̈ahary fo mahavy olo manompo izy. Baka amy Zan̈ahary maharidraha mahavy atsika mahavita man̈aboaka fa Satana mavandy.—Vakia Joba 1:8-12; Ohabolana 27:11.
5. Akory ahitan̈a fa atsika mifidy Zan̈ahary?
Baka amy raha ataontsika ahitan̈a fa atsika mifidy Zan̈ahary
Atsika mila mianatra raha momba Zan̈ahary an̈aty Baiboly ao, ndreky manompo izy. (Jaona 4:23) Karaha nataony Jesosy, atsika tsy mila man̈ano politiky ndreky miady.—Vakia Jaona 17:14.
Satana man̈ano raha hitiavanolo man̈ano raha ratsy. Atsika koa fa man̈ano ny marin̈y, namantsika ndreky havantsika mety tsy ho tia atsika. (1 Petera 4:3, 4) Dikanizen̈y, atsika mila mifidy. Izikoa olo tia Zan̈ahary fo ataontsika naman̈a, atsika man̈araka volan̈a Zan̈ahary, ho hita baka amy zen̈y fa Satana mavandy.—Vakia 1 Korintianina 6:9, 10; 15:33.
Atsika matoky fa Zan̈ahary han̈adoso jaly ndreky raha ratsy jiaby, fotony izy ten̈a tia atsika. Lan̈iany olo mino Zan̈ahary ndreky man̈araka volan̈anany fo ho velon̈o tsisy farany ambony tany eto.—Vakia Jaona 3:16.
