Olo tsy mora kivy zen̈y misy korazy fo ndray izy tojy problemo ndreky diso fan̈antinan̈a. Baka amy raha mandalo amy fiain̈ana ahitan̈a zen̈y. Karaha ataony tsaiky mianatra mandeha ke tsy maintsy lavo in̈y fo, izy tsy hianatra hahomby amy fiain̈ana izikoa tsy tojy raha sarotro.

Tsaiky sasany koa tsy mahomby amy raha ataony, na misy problemo, na volan̈inolo raha ataondro, iro dekorazy mare. Sasany rivan̈a tanteraka. Fa ty raha tsara haindro:

• Tsy raha jiaby ataonolo mahomby aby.​—Jakoba 3:2.

• Olo jiaby samy tojy raha sarotro amy fiain̈ana.​—Mpitoriteny 9:11.

• Izikoa misy raha ivolan̈anolo anao, mahatsara anao zen̈y.​—Ohabolana 9:9.

Fisiany problemo mandalo io mety han̈ampy zanakanao hahita fa ho vitandro fo miatriky izio.

Koa tsy mahomby raha ataony zanakanao.

TORO LALAN̈A BAIBOLY: “Mety ho lavo impito aby olo marin̈y, fa ho tafianko fo izy.”​—Ohabolana 24:16.

Ampianara zanakanao karakory ahaizan̈a problemo hely ndreky problemo maventy. Ohatra, karakory atao izikoa izy tsy afaka examen? Izy mety hivolan̈a: “Tsisy raha manjary raha ataoko!”

Baka izy tsy ho kivy, ampia izy baka ho hainy raha atao amy man̈araka. Anao koa man̈ano zen̈y, ho hainy mamaha problemonany, avio izy tsy ho dekorazy aminy ain̈inany.

Ndray izy man̈ano zen̈y, aza zatra mamaha problemony zanakanao, fa ampia izy hamaha izio. Mety an̈ontanianao izy: “Ino raha mety ataonao, baka hazava aminao tsarabe raha ianaranao?”

Lera misy raha ratsy mandalo.

TORO LALAN̈A BAIBOLY: ‘Tsy hainaro foeky raha handalo aminaro aminy amaray.’​—Jakoba 4:14.

Miovaova fiain̈ana. Olo pan̈arivo niany ty, mety ho veta amaray. Olo salama niany ty, mety harary amaray. “Ndray olo mahery milomoay tsy voatery handresy fo”, eraka koran̈iny Baiboly, “fotony olo jiaby samy mety ho voa raha amy fotoan̈a tsy ampoizin̈y.”​—Mpitoriteny 9:11.

Anaro raimandreny tokony han̈ano zay vitanaro hiarovan̈a zanakanaro baka iro tsy ho azondraha. Ndray zen̈y, tsy ho vitantsika hiaro iro amy zay raha ratsy mandalo.

Zanakanao ziô mety mbala tsy mahay problemony afakasa na problemo arabola zen̈y. Ndray zen̈y, anaro mety man̈ampy iro amy problemo hafa karaha ataony tsisy kamarady na misy havan̈a maty. a

Lera misy olo mankaratsy zanakanao

TORO LALAN̈A BAIBOLY: “Tandrin̈esa torohevitry, baka io man̈araha anatra, baka anao ho hisy jery aminy amaray an̈y.”​—Ohabolana 19:20

Fivolan̈ana olo araiky amy raha tsy mety zen̈y tsy midika tsy fitiavan̈a izy, fa mba hitaritan̈a izy hahavita raha tsara na han̈eky fa misy raha mila ivoany.

Anao koa mampianatra zanakanao han̈eky fan̈itsian̈a, anaro roe samby hahazo hatsaran̈a. Karaha ty nivolan̈iny John, babany tsaiky araiky zay: “Tsy mety hahavita hiatriky problemo zanakanao, izikoa isaka izy misy problemo tahitahinao fo, baka io anaro samy hijaly.”

Ino raha han̈ampy zanakanao, baka izy han̈eky volan̈iny? Izikoa zanakanao volan̈inolo a lekoly an̈y na antany hafa, aza iken̈a izy koa mivolan̈a fa tsy aminany raha ivolan̈anolo izy io. Fa an̈ontania karaha ty izy:

• “Fahitanao izy, ino ma antony nahavy izy nivolan̈a anao?”

• “Ino raha mety hankatsarainao?”

• “Ino raha handeha hataonao izikoa amy man̈araka, misy olo man̈itsy anao?”

Aleva onon̈o fa tsy iziô fo zanakanao hahita hatsaran̈a baka amy fan̈itsian̈a, fa firaka izy be an̈y.