1-2. a) Nan̈ino tsy mora aminolo maro matoky olo manan̈a fahifan̈a? b) Ino raha hidinihintsika ato?

AMINY andra zioty, sarotro aminolo maro matoky olo manan̈a fahifan̈a, fotony olo manandraha fo matetiky arovany fanjakan̈a ndreky pitsara, fa iro tsy ten̈a man̈ampy olo masikiny. Koran̈iny Baiboly fa ‘nifampitondra olombelon̈o, ke nijaly vahoaka.’ (Mpito. 8:9) Ratsy fitondranten̈a koa pitondra fivavahan̈a sasany, ke nanjary nihen̈y fatokisanolo Zan̈ahary. Akory ahitantsika zen̈y? Izikoa fa misy olo man̈eky hianatra Baiboly amintsika, tsy mora man̈ampy izy hatoky Jehovah ndreky solonten̈anany ambony tany eto.

² Tsy pianatra Baibolintsika fo mila mianatra matoky Jehovah ndreky fandaminan̈anany. Ndray efa taon̈o maro nanompoantsika Jehovah, mbala mila man̈ano raha fo atsika baka ho resy lahatra fa man̈ano ny rariny fo Jehovah. Ndraikindraiky, mety hisy raha hitsapa fatokisantsika Jehovah. Handiniky telo amy zen̈y atsika ato: 1) Lera misy andininteny tsy mazava amintsika, 2) lera atsika mahazo toromariky baka amy fandaminan̈a, avio 3) lera atsika handalo raha sarotro aminy hoavy.

3. Nan̈ino ma raha sasany tantarainy Baiboly ao mety hahavy atsika tsy hatoky Jehovah?

 ³ Misy fotoan̈a atsika koa fa mamaky Baiboly, mety ho lôso diniky atsika nan̈ino olo sasany nisazìny Jehovah, nefa sasany  tsy nisazìny. Mety tsy hazava amintsika foeky fanapahankevitry sasany nataony Jehovah. Ohatra iziô, tantarainy bokiny Nomery fa nisy lelahy israelita araiky nivoneny Jehovah, fotony olo io nangala hazomaty taminy andra Sabata. Taon̈o maro tafaranizen̈y ndraiky, tantarainy bokiny Samoela faharoe fa Panjaka Davida nijangajanga sady namono olo, kanefa nambelany Jehovah hadisovan̈anany. (Nom. 15:32, 35; 2 Sam. 12:9, 13) Mety lôso diniky atsika: ‘Nan̈ino ma nambelany Jehovah hadisovan̈any Davida ndray izy nijangajanga ndreky namono olo, kanefa lelahy israelita tsy nan̈ano fahotan̈a maventy in̈y ndraiky nivoneny?’ Alohany hamaliantsika fan̈ontanian̈a io, alô hidinihintsika antsendriky raha telo tsy mila adin̈antsika isaka atsika mamaky Baiboly.

4. Nan̈ino Genesisy 18:20, 21 ndreky Deoteronomia 10:17 io man̈ampy atsika hatoky fanapahankevitriny Jehovah?

⁴Ndraikindraiky tsy koran̈iny Baiboly tsipiriany jiaby momba tantara araiky. Ohatra, haintsika fa nanen̈iny angovo jiaby Davida tamy fahotan̈a vitany. (Sal. 51:2-4) Akory ndraiky lelahy nandika lalàn̈a momba Sabata in̈y? Nanen̈iny ma izy tamy raha nataony? Efa nisy lalàn̈a hafa koa ma tsy narehany talohanizen̈y? Va Jehovah efa nampitandrin̈y izy fa tsy nahoany? Tsy koran̈iny Baiboly valiny fan̈ontanian̈a aby zen̈y. Kanefa ty raha atokisantsika: Jehovah tsy mety ‘han̈ano raha tsy rariny.’ (Deot. 32:4) Fanapahankevitriny Jehovah tsy miankiny amy raha hita ambelan̈a, na raha volan̈inolo. Izy tsy olo ke ho diso hevitry. Matoa Jehovah manapakevitry, dikanizen̈y, efa hainy tsipiriany raha jiaby momba izio! (Vakia Genesisy 18:20, 21; Deoteronomia 10:17.) Arakarakany ahaizantsika Jehovah ndreky fitsipikinany, hahavy atsika hahaihatoky fo fa man̈ano ny rariny izy. Ke ndray tsy mazava amintsika antony nahavy izy nan̈ano raha sasany tantarainy Baiboly ao, raha haintsika momba izy efa ampy hamparesy lahatra atsika fa ‘rariny aby raha jiaby ataony.’​—Sal. 145:17.

5. Tsy lavorary atsika. Nan̈ino raha zen̈y mety hahavy atsika ho diso hevitry? (Zahava koa “ Mety ho Diso Hevitry Atsika Fotony Tsy Lavorary.”)

⁵Tsy lavorary atsika ke mety ho diso hevitry. Jehovah koa fa niasa atsika, atsika nataony mahavita man̈aboaka toetrinany. Ke zen̈y  mahavy atsika mahinakinaka izikoa fa misy olo avoa raha tsy rariny. (Gen. 1:26) Kanefa tsy lavorary atsika, ke mety ho diso fomba fizahavantsika raha, ndray mieritreritry atsika fa efa haintsika raha jiaby momba izio. Aleva onon̈o baka Jona. Nibebaka iro Ninivita aby io, ke namindrany Jehovah fô iro. Jona ndraiky neloko mare. (Jona 3:10–4:1) Kanefa Jehovah koa tsy namindra fô, mandilatra 120 000 Ninivita naty! Ke tsy Jehovah foeky diso, fa Jona nila nan̈itsy toetsain̈inany.

6. Nan̈ino ma Jehovah tsy voatery han̈azava amintsika antony an̈anaovany raha araiky?

⁶Jehovah tsy voatery han̈azava aminolombelon̈o antony mahavy izy man̈ano raha. Fa na izy man̈ano zen̈y, Jehovah ndray efa nanapakevitry, mbala nambelany han̈aboaka hevitrindro fo iro panomponany taloha tan̈y. (Gen. 18:25; Jona 4:2, 3) Ndraikindraiky Jehovah man̈azava antony an̈anaovany raha araiky. (Jona 4:10, 11). Kanefa, tsy voatery han̈azava amintsika fo izy, isaka misy raha tiany hatao. Jehovah niasa atsika, ke tsy voatery hirasa volan̈a amintsika foeky izy, na alohanizy han̈ano raha na lera izio vita.​—Isaia 40:13, 14; 55:9.

7. Ino raha mety tsy mora amintsika? Nan̈ino?

⁷ Matoky amy fô jiaby atsika fa man̈ano ny rariny fo Jehovah. Ndray zen̈y, tsy voatery ho mora amintsika hatoky iro olo ampiasainy hitariky atsika aby io. Mety hidaon̈o atsika ndraikindraiky tsao raha tiandro fo hataondro fa tsy raha mifan̈araka amy toromarikiny Jehovah aby. Nanan̈a toetsain̈y karaha zen̈y olo sasany taminy andrany Baiboly. Diniha baka ohatra nikoran̈iny  fehintsoratra faha-3 in̈y. Havany lelahy tsy nan̈aja Sabata in̈y iziô mety rôso diniky karaha ty: ‘Asa raha mba nan̈ontany hevitriny Jehovah edy Mosesy talohanizy nan̈aboaka didipitsaran̈a namonoan̈a havantsika in̈y?’ Avio kamaradiny Oria Hetita koa donko evandraha nihevitry fa nitôron̈o fahifan̈anany Panjaka Davida matoa izy tsy nivonen̈a, ndray izy nangalatra vadiny Oria. Ino raha ianarantsika baka amy zen̈y? Tsy matoky Jehovah atsika, izikoa atsika tsy matoky olo ampiasainy hisoloten̈a izy aby io, fotony iro io atokisany.

8. Ino raha mampiran̈a fiangonan̈a kristianin̈y tamy taonjato voanalohany amy fiangonan̈a kristianin̈y amy zioty? (Asan’ny Apostoly 16:4, 5)

⁸ Amy zioty, “panompo atokisan̈a ndreky mahadiniky raha” ampiasainy Jehovah hitariky vahoakanany. (Mat. 24:45) Karaha filankevipitantan̈ana tamy taonjato voanalohany, andraikitriny panompo atokisan̈a mitariky vahoakany Jehovah erantany ndreky man̈amia toromariky antipan̈ahy amy fiangonan̈a. (Vakia Asan’ny Apostoly 16:4, 5.) Anjarany antipan̈ahy amy zay baka io man̈ampy fiangonan̈a han̈araka toromariky io. Ke matoky Jehovah atsika izikoa man̈araka taridalan̈a amezany fandaminan̈a ndreky antipan̈ahy.

9. Lera karakory ma mety ho sarotro amintsika man̈eky fanapahankevitriny antipan̈ahy? Nan̈ino?

⁹ Ndraikindraiky, mety tsy ho mora amintsika man̈eky fanapahankevitriny antipan̈ahy. Ohatra iziô, tan̈atiny taon̈o faramparany tato, maromaro fiangonan̈a natambatra. Ke antipan̈ahy nan̈iraka pitory sasany hifindra fiangonan̈a, amy zen̈y misy olo aby sezy jiaby amy Tran̈o Fivorian̈a. Izikoa atsika an̈isany irahin̈y hifindra fiangonan̈a, mety ho sarotro amintsika hiala namantsika ndreky havantsika. Antipan̈ahy man̈iraka pitory hifindra fiangonan̈a io ma nahazo taridalan̈a mivantan̈a baka tamy Jehovah? Aha. Ke zen̈y mety hampasarotro fan̈arehantsika taridalan̈a amezandro. Kanefa, Jehovah matoky iro antipan̈ahy  nan̈ano fanapahankevitry io, ke atsika koa mila matoky iro. *

10. Izikoa zahan̈a Hebreo 13:17, nan̈ino atsika mila von̈ono hiaraka miasa aminy antipan̈ahy?

¹⁰ Nan̈ino atsika tokony han̈eky fanapahankevitrindro antipan̈ahy aby io, ndray tsy malamalaka amy jerintsika raha zen̈y? Fotony zen̈y hahavy vahoakany Jehovah hiray sain̈y. (Efes. 4:2, 3) Hatanjaka ndreky hifankatia fiangonan̈a, izikoa samby manetry ten̈a ndreky man̈eky fanapahankevitriny antipan̈ahy aby olo jiaby. (Vakia Hebreo 13:17.) Ty ny raha ten̈a maventy: Ho hitany Jehovah fa matoky izy ankitin̈y atsika izikoa miaraka miasa aminolo nirahiny hikarakara atsika.​—Asa 20:28.

11. Ino raha han̈ampy atsika hatoky tsarabe toromariky amezany antipan̈ahy?

¹¹ Hahaihatoky toromariky amezandro antipan̈ahy aby io fo atsika izikoa alaintsika onon̈o fa, mangataka fan̈ahy masin̈y antsendriky iro isaka iro handiniky raha momba fiangonan̈a. Ankoatranizen̈y, dinihindro marikitry koa toro lalan̈a jiaby koran̈iny Baiboly momba izio, avio zahavandro koa taridalan̈a amezany fandaminan̈any Jehovah. Iro antipan̈ahy aby io tihamparavoravo Jehovah sady tihikarakara farany mare piaramanompo. Haindro lelahy tsy mivadiky aby io fa mbala hitsarainy Jehovah iro amy fomba han̈atantirahindro andraikitrindro. (1 Pet. 5:2, 3) Diniha baka ty: Misaratsaraka mare olo amy donia ty fotony iro tsy mitovy karazan̈a, fivavahan̈a, ndreky antoko politiky; fa panompony Jehovah ndraiky miray hina tsarabe fotony iro manompo Zan̈ahary tokan̈a sady marin̈y. Tsy ho pôsibla foeky raha zen̈y izikoa Jehovah tsy mitahy fandaminan̈anazy!

12. Ino aby raha tsy maintsy dinihiny antipan̈ahy, beky ho azondro antoko fa nibebaka ankitin̈y olo araiky nan̈ano fahotan̈a maventy?

¹² Maventy andraikitry nankin̈iny Jehovah amindro antipan̈ahy aby io. Iro mila man̈ano raha hahavy fiangonan̈a hadio fo. Izikoa misy Kristianin̈y nan̈ano fahotan̈a maventy, iro antipan̈ahy aby io namezany Jehovah fahifan̈a hanapakevitry na hiroasin̈y na tsy roasin̈y an̈ivony fiangonan̈a olo io. Akory hahaizandro raha tokony hatao? Mila alaindro antoko tsarabe fa ten̈a nibebaka ndreky nanen̈iny ankitin̈y izy tamy raha ratsy vitany. Mety hivolan̈a baka izy fa nibebaka, kanefa zen̈y ma mivolan̈a fa halany ankitin̈y raha nataony io? Tapakevitry tsy han̈ampody fahotan̈a io eky ma izy? Izikoa baka tamy naman̈a ratsy nahavy izy nan̈ano raha tsy manjary io, vôn̈ono ma izy tsy hikamarady amindro io eky? Mivavaka iro antipan̈ahy aby io, baka io dinihindro tsarabe raha koran̈iny Baiboly ndreky raha jiaby mombamomba izio. Avio alaindro onon̈o koa karakory fihetsikinolo io amy raha ratsy vitany. Efa vita raha jiaby zen̈y, iô iro vo hanapakevitry izikoa mbala hiken̈a ho an̈isany fiangonan̈a olo io va tsy maintsy hiroasin̈y.​—1 Kor. 5:11-13.

13. Ino raha mety hampiasaloha atsika izikoa fa misy havantsika na namantsika voaroaka?

¹³ Ny raha misy, ndraikindraiky atsika karaha tsy matoky tsarabe iro antipan̈ahy aby io. Fotony mety ho mora amintsika man̈eky fanapahankevitriny antipan̈ahy izikoa olo voaroaka io tsy havantsika sady tsy kamaradintsika. Fa izikoa ndraiky havantsika na namantsika marikitry olo voaroaka io, mety havozo atsika tsao tsy ten̈a haindro antipan̈ahy aby io raha jiaby nandalo. Tsy zen̈y fo, mety ho lôso diniky aby atsika tsao tsy mifan̈araka amy fomba fihevitriny Jehovah fomba nitsaran̈a olo io. Ino raha han̈ampy atsika hanan̈a toetsain̈y tsara izikoa fa miboaka raha karaha zen̈y?

14. Ino raha han̈ampy atsika han̈eky fanapahankevitriny antipan̈ahy izikoa fa misy havantsika na kamaradintsika voaroaka?

 ¹⁴ Aza adin̈a fa fandroasan̈a io lamin̈y baka amy Jehovah, avio izio mahatsara fiangonan̈a ndreky olo nan̈ano fahotan̈a. Izikoa adôko amy fiangonan̈a ao fo olo araiky tsy mibebaka, mety hahavy olo hafa hanota koa raha zen̈y. (Gal. 5:9) Avio mety tsy ho tontohitry foeky izy fa ratsy marin̈y raha nataony, ke tsy ho vôn̈ono han̈ova toetsain̈inany ndreky fitondranten̈anany izy; kanefa izikoa izy tsy miova, izy tsy mety hahazo sitraka amy Jehovah. (Mpito. 8:11) Mety matoky atsika fa efa nandiniky tsarabe iro antipan̈ahy aby io, alohany iro hanapakevitry handroaka olo araiky. Haindro tsara fa miran̈a pitsara taminy andrany Israely taloha tan̈y iro, fotony iro ‘koa fa mitsara, iro misoloten̈a Jehovah fa tsy misoloten̈a olombelon̈o.’​—2 Tan. 19:6, 7.

15. Nan̈ino rango iziô atsika efa mila matoky taridalan̈any Jehovah?

¹⁵ Zioty atsika ny ten̈a mila matoky fa Jehovah tsy maintsy man̈ano ny rariny fo, fotony efa marikitry ankitin̈y farany donia ty. Fahorian̈a be koa fa avy, mety ho hitantsika karaha hafahafa na karaha sarotro harehan̈a toromariky ho azontsika. Mazava ho azy fa Jehovah tsy hikoran̈a amintsika mivantan̈a. Ke tsy maintsy baka amindro olo ampiasainy hitariky atsika aby io fo han̈amezany toromariky atsika. Efa tsy fotoan̈a tokony hampisalasala atsika momba toromariky amezany fandaminan̈a eky amy zen̈y. Tsy tokony hieritreritry karaha ty koa atsika: ‘Baka amy Jehovah marin̈y ndraiky izity? Tsao mba hevitrindro rahalahy aby io fo izio ay?’ Amy fotoan̈anizen̈y, mbala hatoky Jehovah ndreky fandaminan̈anazy ma anao? Miankiny amy fiheveranao toromariky amezandro olo ampiasainy Jehovah hitariky atsika ahaizanao valiny fan̈ontanian̈a io. Izikoa rango iziô anao efa matoky toromariky amezandro sady mavitriky man̈araka izio, ho karaha zen̈y koa hataonao lera fahorian̈a be avy.​—Lioka 16:10.

16. Ino raha mety mbala hitsapa fatokisantsika Jehovah tsy ho ela?

¹⁶ Ty koa raha tsara dinihintsika: Han̈ano akory atsika lera Jehovah hitsara donia ratsy ty? Man̈anten̈a baka atsika fa alohany haviany farany, mety mbala hanompo Jehovah fo iro olo marobe tsy manompo izy aby io, an̈isanizen̈y havantsika. Fa aminy Aramagedona, Jehovah hampiasa Jesosy hitsara olo tsiaraikiaraiky. (Mat. 25:31-33; 2 Tes. 1:7-9) Tsy anjarantsika mifidy azovy vain̈y hahazo famindrampôny Jehovah na azovy tsy vain̈y zen̈y. (Mat. 25:34, 41, 46) Ke asa mbala hatoky fanapahankevitriny  Jehovah fo atsika amy zen̈y? Sa atsika ho vôly hanompo izy fotony tsy ikentsika fanapahankevitrinany? Hitantsika baka amy zen̈y fa, mila mampitombo fatokisantsika Jehovah atsika rango zioty, baka ho moramora amintsika hatoky izy aminy amaray an̈y.

17. Nan̈ino mahatsara atsika fanapahankevitriny Jehovah handravan̈a donia ratsy ty?

¹⁷ Hahita hatsaran̈a baka amy fanapahankevitriny Jehovah atsika amy donia vaovao. Miniminia hely haravoan̈antsika amy zen̈y! Tsy ho hisy eky fivavahan̈a diso. Hiravan̈iny Jehovah koa karazan̈a varotro jiaby ndreky fitondrasan̈a jiaby, fotony iro io tia ten̈a sady mampijaly vahoaka. Tsy ho hisy aretin̈y ndreky hatoezan̈a. Amy zioty baka, isanandra atsika mahita na maharen̈y olo maty. Fa amy zen̈y, tsy ho hisy eky fahafatesan̈a. Satana ndreky iro demony aby io nanohitry Jehovah, ke zen̈y nahavy raha ratsy jiaby nikoran̈intsika tiô in̈y. Fa amy leranizen̈y, tsy ho hisy eky raha ratsy. Tsy hahavita hamitaka olombelon̈o eky iro, an̈atiny 1 000 taon̈o. (Apok. 20:2, 3) Hankasitraka Jehovah mare atsika amy zen̈y, fotony atsika natoky fa man̈ano ny rariny fo izy.

18. Ino raha ianarantsika baka amindro Israelita aby io? (Nomery 11:4-6; 21:5)

¹⁸ Mety hisy raha hitsapa fatokisantsika Jehovah ndreky taridalan̈anany ma amy donia vaovao? Diniha baka raha nandalo taloha heliniro Israelita aby io navotany Jehovah tsy ho andevo ta Ezipty. Sasany tamindro nitretre fotony iro ngoma hanin̈y ta Ezipty; avio tsy nasiandro fôtiny foeky mana, kanefa izio hanin̈y namezany Jehovah iro. (Vakia Nomery 11:4-6; 21:5.) Mety ho hisy olo hanan̈a toetsain̈y karaha zen̈y koa ma afarany fahorian̈a be? Tsy haintsika foeky mety ho karakory fotoan̈a ho lanintsika han̈adiovan̈a tany ty ndreky han̈ovoan̈a izity ho paradisa. Ny raha haintsika fo ho maro asa miambin̈y atsika, ke tsy ho mora amintsika han̈ano raha aby zen̈y amy voanalohany. Izikoa tsy arakany nantin̈ainao raha hataony Jehovah aminio, hin̈on̈on̈o ma anao? Ny raha azo antoko fo, izikoa rango zioty atsika efa mankasitraka raha jiaby ataony Jehovah, hitombo fankasitrahantsika raha ataony aminy hoavy.

19. Ino aby hevitry maventy nidinihintsika tato?

¹⁹ Jehovah tsy maintsy man̈ano ny rariny fo. Mila resy lahatra amy zen̈y atsika. Mila matoky olo atokisany Jehovah koa atsika, fotony iro io ampiasainy han̈amia toromariky atsika. Tsaraova fo raha nivolan̈iny Jehovah tamy paminan̈y Isaia ty: “Anaro matokisa avio aza taitaitry, fa baka amy zen̈y hazahoanaro angovo.”​—Isaia 30:15.