RAHA maventy tamy kolontsain̈indrô Israelita aby io lamoziky. Baiboly matetiky mikoran̈a momba olo misoma lamoziky ndreky mihira. Ampahafolon’ny Baiboly io hira. Ohatra amy zen̈y, bokin’ny Salamo, Tononkiran’i Solomona ndreky Fitomaniana. Mivolan̈a boky araiky momba fiain̈ana tamin’ny andran’ny Baiboly tan̈y fa nampiasa lamoziky irô Israelita aby io, tamy raha maro fataondrô andavanandra.

Lamoziky tamy fiain̈ana andavanandra. Nampiasa lamoziky irô Israelita aby io nan̈aboahan̈a fihetseham-pôndrô. (Isaia 30:29) Irô man̈angy aby io namely ampongatapaka ndreky nan̈ano hira mamparavoravo, aviô nitsinjaka izikoa fa nisy mpanjaka vaovao napetraka tamy plasiny, izikoa fa nisy maramila naharesy tamin’ny ady, aviô izikoa fa nankalaza fety momba fivavahan̈a. (Mpits. 11:34; 1 Sam. 18:6, 7; 1 Mpanj. 1:39, 40) Nihira koa irô Israelita aby io nan̈aboahan̈a alahelondrô izikoa fa nisy olo naty. (2 Tan. 35:25) Mazava baka amy zen̈y fa irô Israelita aby io ten̈a olon’ny lamoziky amin’ny ankitin̈y.

Lamoziky tamy lapan’ny mpanjaka tao. Irô mpanjakan’Israely aby io tia nitandren̈y lamoziky. Mpanjaka Saoly nikaiky Davida handeha tamy lapanany tao hitendry harpa. (1 Sam. 16:18, 23) Tafara tatỳ, Davida koa fa lôso mpanjaka, izy namôron̈o fitaovan̈a fan̈anaovan̈a lamoziky, namôron̈o hira tsara, aviô nandamin̈y mpihira tamy tempolin’i Jehovah tao. (2 Tan. 7:6; Amosa 6:5) Nanan̈a lelahy ndreky man̈angy mpihira koa Mpanjaka Solomona tamy lapanany tao.​—Mpito. 2:8.

Lamoziky nampiasain̈a tamy fanompoan̈a. Ny ten̈a maventy, Israelita aby io nampiasa lamoziky izikoa fa nanompo Jehovah. Nisy 4 000 lahy mpitendry raha man̈ena tamy tempoly ta Jerosalema. (1 Tan. 23:5) Irô nampan̈ena kipantsona ndreky raha man̈ena fitindren̈a, harpa ndreky trompety. (2 Tan. 5:12) Fa tsy irô olo mahay lamoziky aby io fo nampiasa lamoziky izikoa fa nanompo Jehovah. Naro Israelita nihira tamy lalan̈a, tamin’irô nandeha nan̈ano fety ta Jerosalema. Hira Fiakaran̈a an̈aran’ny hira nataondrô io. (Sal. 120-134) Misy asa soratra jiosy mivolan̈a fa irô Israelita aby io nihira Salamo sasany (Hallel) a tamy vanim-potoan̈an’ny Pasky.

Mbala raha maventy amy vahoakan’i Jehovah amy ziôty koa hira. (Jak. 5:13) Izio an̈isan’ny fanompoantsika Jehovah. (Efes. 5:19) Mahatsapa mahaimarikitry irô rahalahy ndreky ranabavy aby io atsika, izikoa fa man̈ano hira fideran̈a Jehovah miaraka amindrô. (Kol. 3:16) Izio koa man̈amia angôvo atsika hahavitan̈a miaritry raha sarotro. (Asa. 16:25) Lamoziky io fomba araiky tsara han̈aboahantsika fa atsika mino ndreky tia Jehovah.