Hafa ndraiky koa raha sarotro hitan’i Nicolas ndreky Céline, irô koa fa nifindra tanàna. Irô baka nahazo fanendrena tamy sampan̈an’i France ke nifindra fiangonan̈a. Ho irô: “Ravoravo zahay tamy voanalohany, fa zahay baka tiô ngoma iry kamaradinay mare. Irô tamy fiangonan̈a nifindranay io baka mbala tsy zatra zahay.” a Ke akôry tôkony hataonao izikoa anao vo nifindra fiangonan̈a? Aviô akôry koa hataon’olo hafa han̈ampy anao? Ino hatsaran̈a ho azonao, aviô akôry hahavitanao hankahery fiangonan̈a io?

TOROLALAN̈A EFATRA HAN̈AMPY ANAO

1. Milampia amy Jehovah. (Sal. 37:5) Kazumi, ranabavy araiky a Japon an̈y, nifindra tanàna baka amin’ny asan’ny vadiny. Efa 20 taon̈o izy tamy fiangonan̈a nisy izy taloha. Karakôry ‘nan̈ankin̈any lalan̈anany tamy Jehovah’? Ho izy: “Nivolan̈iko tamy Jehovah raha jiaby nampavozo zaho, zaho nahatsiaro latsatokan̈a, ndreky zaho niasaloha mare. Isaka zaho nan̈ano zen̈y, zaho nahazo angôvo fo.”

Akôry ataonao hilampy tsarabe amy Jehovah? Karaha raha maniry mila rano ndreky zeziky baka mitombo, finoan̈a io koa mila ankafatarin̈y fo. Nicolas nikoran̈intsika taloha tiô in̈y nivolan̈a fa izy nangala onon̈o ohatran’i Abrahama, Jesosy, aviô Paoly. Irô io nan̈ano sôron̈o maro, baka nahavitan̈a nan̈ano sitrapôn’i Jehovah. Ke raha zen̈y nahavy Nicolas natoky tsarabe fa Jehovah ten̈a mahavita man̈ampy izy. Fan̈anaovan̈a fianaran̈a manokan̈a tsy tapaka koa ten̈a ilain̈a, fôtony izio han̈ampy anao hiatriky fiovoan̈a amy fiain̈ananao ndreky han̈ampy anao hahavita hankahery fiangonan̈a vo nifindranao io koa.

 2. Aza mampitaha. (Mpito. 7:10) Rahalahy Jules baka a Bénin nifindra ta Etazonỳ, nahita fa ten̈a hafa kolontsain̈in’olo tamy tany nifindrany io. Ho izy: “Zaho karaha hitako mila mivolan̈a tantaranaka amin’olo jiaby.” Tsy zatra izy nan̈ano zen̈y, ke nanjary nitokatokan̈a izy. Fa izikoa izy efa nahay tsarabe irô rahalahy ndreky ranabavy aby tan̈y, nanjary niova izy. Ho izy: “Hitako fa na aia na aia ambony tany eto, miran̈a fo olo jiaby. Fomba fivolan̈ana raha ndreky fan̈anaovan̈a raha fo hafa. Ten̈a ilain̈a mahay zen̈y.” Ke aza mampiran̈a fiangonan̈anao taloha ndreky iziôty. Misy ranabavy mpisava lalan̈a araiky zay, Anne-Lise nivolan̈a: “Antony nifindrako io tsy handeha hizaha raha jiaby nisy tamy fiangonan̈a nisy zaho taloha, fa hianatra raha vaovao amy tany vo nifindrako io.”

Anti-pan̈ahy aby io koa tsy tôkony hampiran̈a fiangonan̈a nisy irô taloha ndreky iziôty. Fomba fan̈anaovan̈a raha mety tsy hitovy, fa tsy voatery ho diso. Ke fahendrena mandiniky raha misy an-toeran̈a iô alohan’ny han̈amezan̈a sôso-kevitry. (Mpito. 3:1, 7b) Sintrany man̈amia ohatra tsara irô rahalahy aby io fa tsy hiforse irô han̈araka hevitrinao.​—2 Kor. 1:24.

3. Mifen̈a miaraka man̈ano raha amindrô. (Fil. 1:27) Marin̈y fa mandany fotoan̈a ndreky angôvo fifindran̈a io, fa kanefa, ten̈a ilain̈a mandeha mivory miaraka anao avy an̈y, mivory mivantan̈a izikoa mety. Irô rahalahy ndreky ranabavy amy fiangonan̈a vo nifindranao io koa mahalan̈a mahita anao, tsy ho haindrô akôry atao han̈ampy anao. Lucinda ndreky zanany aroe vavy, nifindra fiangonan̈a tamy tanàna maventy tan Afriky Atsimo tan̈y. Ho izy: “Irô namako aby io nandrisiky zaho hifankahazo tsara amindrô mpiara-manompo amy fiangonan̈a vo nifindrako io, aviô hiaraka hitory amindrô ndreky hamaly teny amy fivorian̈a. Namezanay hampiasain̈a han̈anaovan̈a fivorian̈a alohan’ny fanompoan̈a koa tran̈onay.”

Hahazo angôvo ndreky hahavita hankahery olo koa atsika izikoa mifen̈y “miaraka man̈ano raha” amindrô rahalahy ndreky ranabavy amy fiangonan̈a vo nifindrantsika io. Anne-Lise, araiky nikoran̈intsika tiô in̈y, nampirisihin’ny anti-pan̈ahy hiaraka amin’olo isan-karazany amy fiangonan̈a vo nifindrany izikoa fa mitory. Ino vokany? Ho izy: “Nanjary nalaky tamana zaho koa fa nan̈ano zen̈y.” Aviô, izikoa fa misy fan̈adiovan̈a ndreky fikobabian̈a Tran̈o Fivorian̈a, tsara anao mba mieritreritry fa anao mba an̈isan’ny fiangonan̈a io, ke anao mba mitahitahy koa. Arakaraka an̈anaovanao raha miaraka amindrô hahavy anao hifankazatra tsarabe amy fianakavian̈anao vaovao io.

4. Mitadiava naman̈a vaovao. (2 Kor. 6:11-13) Anao koa hitan’olo man̈aton̈o irô, ho mora aminao hanjary kamaradindrô. Ke izikoa fa fivorian̈a, tsara anao avy aloha, aviô midôkodôko hely lera ravan̈a, baka anao mba mikoran̈a amindrô ke mifankahay amindrô. An̈ontania an̈arandrô. Anao koa baka mahazo onon̈o an̈aran’olo ndreky mikamarady amindrô, manjary mora amindrô  mikoran̈a aminao ndreky tihahay anao, ke anarô hanjary ho kamarady mare.

Ke aza miasaloha tsao tsy hatôn̈in’olo fa mifen̈a man̈aton̈o olo. Man̈anaova karaha Lucinda. Ho izy: “Nahazo kamarady maro zahay, fôtony zahay tsy niambin̈y nikahin’olo, fa zahay nikaiky irô tan-tran̈o.”

“MIFANDRAISA TSARABE”

Man̈avia olo mare vo sambany miditry amy Tran̈o Fivorian̈a vaovao aminany. Ke akôry mety hataonao handraisan̈a olo karaha zen̈y? “Mifandraisa tsarabe” ho apostoly Paoly, “karaha nataon’i Kristy nandray anarô tsarabe in̈y.” (Rom. 15:7) Irô anti-pan̈ahy aby io koa mangala tahaka Kristy, irô hahavita hanampy olo vaovao hahatsiaro hiraisin̈y tsara. (Zahava efajoro “ Akôry Hahitan̈a Haravoan̈a Izikoa fa Mifindra Fiangonan̈a?”) Fa kanefa olo jiaby amy fiangonan̈a, na tsaiky na olobe, samy tôkony handray tsara olo vo nifindra fiangonan̈a.

Mandray tsara olo zen̈y tsy basin’ny mikaiky irô an-tran̈o fo fa man̈ampy koa amy raha ilandrô fan̈ampian̈a. Ohatra, misy ranabavy araiky ndray naro raha natao, izy nanokan̈a fotoan̈a nan̈ampian̈a ranabavy vo nifindra tan̈y. Nateriny izy nizaha tanàna, nazavainy taminany ino raha fitateran̈a olo misy an̈y, karaha ataon’ny taxi na train. Ke raha zen̈y ten̈a tian’olo nampiany io, fôtony nahavy izy ho zatra fiain̈ana vaovao.

FOMBA ARAIKY HAHAVITAN̈A MANDROSO

Karaha ataon’ny valala, matetiky miôfo antsendriky izy, vo mahavita mitilin̈y. Karaha zen̈y koa anao izikoa vo nifindra fiangonan̈a. Mila adosonao raha jiaby mety hahavy anao tsy handroso amy fanompoan̈a. Ho Nicolas ndreky Céline: “Fifindran̈a io an̈isan’ny fampiofan̈ana ten̈a tsara, fôtony anao manjary mifankazatra amin’olo maro, olo tsy miran̈a aminao, ke hahavy anao hanan̈a toetry maro tsara tsy nanan̈anao taloha.” Jean-Charles nikoran̈intsika taloha tarỳ in̈y ndraiky nivolan̈a fa ten̈a naro hatsran̈a nazon’ny fianakavian̈anany,  irô koa fa nifindra fiangonan̈a. Ho izy: “Zahay koa fa nifindra fiangonan̈a, nahainandroso irô zanakanay aby io. Ke tan̈atin’ny fanjava vitsivitsy fo zanakanay man̈angy nan̈ano fampiofan̈ana amy fivorian̈a andavanandra aviô zanakanay lelahy nanjary mpitory tsy vita batisa.”

Karakôry fo izikoa anao iziôty mbala tsy afaka man̈itatra faritany? Mety arehanao amy fiangonan̈a misy anao ao fo irô sôso-kevitry hitanao tato, baka hahaitsara fo fifandraisanao amin’olo fiangonan̈a araiky aminao. Milampia amy Jehovah, ke miarasa amin’olo isan-karazany izikoa fa manompo. Mitadiava naman̈a vaovao aviô ankamafisa fikamaradiananao amy namanao iziôty. Mifen̈a man̈ampy olo vaovao ndreky olo sahiran̈a. Fitiavan̈a io toetry araiky hahaizan̈a olo ten̈a Kristianin̈y. Ke izikoa anao man̈ampy olo, hahaimarikitry Jehovah fo anao. (Jaona 13:35) Matokisa fa “sôron̈o karaha zen̈y ten̈a mamparavoravo Zan̈ahary.”​—Heb. 13:16.

Ndray tiô raha sarotro maro, Kristianin̈y maro nahatsiaro ravoravo ndreky nahômby fo tamy fiangonan̈a nifindrandrô. Matokisa fa anao koa mbala ho karaha zen̈y! Karaha ty ho Anne-Lise: “Nan̈ampy zaho hahaihalalaka fo fifindran̈a fiangonan̈a io.” Kazumi koa iziô man̈eky fa “fifindran̈a fiangonan̈a io hahavy anao hahita tsara fa Jehovah man̈ampy anao amy fomba tsy ampoizinao foeky.” Karakôry fo Jules? Ho izy: “Nahazo naman̈a maro zaho iziôty ke tamana mare. Zaho nahainifandray mare amy fiangonan̈a vaovao misy zaho, ke hitako sarotro aminaka koa hiala ao.”