Loso mahay tsarabe olo araiky atsika arakarakany hahaizantsika toetrinany. Ke zen̈y mahavy izy mahaitiantsika fo. Karaha zen̈y koa, arakarakany hahaizantsika toetriny Jehovah, mahaimaro fo koa raha haintsika momba izy, avio atsika manjary tihikamarady aminany. Iro efatra ty toetriny Zan̈ahary ten̈a miavaka: Angovo, fahendrena, fitiavan̈a rariny, avio fitiavan̈a.

“A Jehovah Tompo Farany An̈abo! Anao niasa lan̈itry ndreky tany taminy angovonao mahery.”​—JEREMIA 32:17.

Hita amy raha niforon̈iny Zan̈ahary fa izy ten̈a matanjaka ankitin̈y. Iritrireta hely baka hafanan̈any masoandra. Karakory zioty tsapanao izikoa anao mitapy masoandra? Manjary mafana hoditrinao. Fa karakory marin̈y ma hafanan̈any masoandra io? Kadiriny 15 000 000 degre iô hafanan̈a an̈atiny masoandra ao. Isaka segondy, masoandra io man̈aboaka angovo mitovy aminy angovony bomby atomiky anjatony tapitrisa miaraka mipoaka in̈y.

Masoandra io madiniky hely izikoa hampiran̈iny amindro lakintan̈a mandeha antapitrisa tapitrisa. Siantifiky aby io mieritreritry fa UY Scuti an̈arany lakintan̈a araiky an̈isany farany maventy. Kadiriny in-1 700 ny masoandra diametaranizio. Izikoa izio natao tamy pilasiny masoandra, saron̈o edy planety Mercure, Vénus, Tany, ndreky Mars, ke izio ho avy firaka amy planety Jupiter an̈y foeky. Haintsika tsarabe aminjay zioty nan̈ino Jeremia nivolan̈a fa taminy angovonany matanjaka be io niasany Jehovah raha jiaby, na amy lan̈itry an̈y na ambony tany eto.

Ino hatsaran̈a azontsika baka aminy angovony Zan̈ahary? Fiain̈ananolombelon̈o miankiny amy raha aby niforon̈iny Zan̈ahary, karaha ataony masoandra ndreky raha maro hafa ten̈a tsara ambony tany eto. Mbala mampiasa angovonany koa Zan̈ahary han̈ampian̈a olo tsiaraikiaraiky. Amy karakory? Tamy taonjato voanalohany, Zan̈ahary nan̈amia angovo Jesosy baka nahavitany nan̈ano fahagagan̈a. Karaha ty volan̈iny Baiboly: ‘Olo gila nanjary nahita, ny malemy vity nahavita nandeha, olo boka nanjary nadio, ny maren̈iny loso naharen̈y, olo maty nimpody velon̈o.’ (Matio 11:5) Karakory fo amy zioty? Volan̈iny Baiboly fa “amiany angovo lan̈iany olo kajo”, baka io “hahazo angovo ndraiky lan̈ianolo man̈anten̈a Jehovah.” (Isaia 40:29, 31) Hahavita hiatriky fitsapan̈a ndreky raha manahiran̈a hafa koa atsika fotony Zan̈ahary afaka man̈amia atsika “angovo fan̈ampiny.” (2 Korintianina 4:7) Ten̈a tia atsika Jehovah matoa izy mampiasa angovonany han̈ampian̈a atsika. Tsy mba tianao hifandray marikitry amy Zan̈ahary karaha zen̈y?

“Ten̈a maro ankitin̈y raha niasainao Jehovah! Tamy fahendrena nan̈anaovanao iro jiaby io.”​—SALAMO 104:24.

Izikoa atsika mifen̈y mandiniky raha niforon̈iny Zan̈ahary, zen̈y hahavy atsika han̈eky fa ten̈a hendry ankitin̈y izy. Ohatra zioty, zavaboary aby niforon̈iny Jehovah io ianarany siantifiky aby io raha. Ke izikoa iro fa man̈amboatra fitaovan̈a vaovao, karaha ataony kamera na avion, alaindro tahaka raha hitandro baka tamy zavaboary aby io.

Ten̈a ahitan̈a fahendrenany Jehovah fomba nan̈amboarany vatan̈antsika. Diniha baka zioty fomba fitombosany tsaiky an̈aty kibo. Amy voanalohany, izio mbala selily araiky fo, salakady efa an̈atinizio ao toromariky jiaby ilain̈y baka hampisy vatan̈a io. Baka io selily io mizarazara manjary selily maromaro sady miramiran̈a aby iro jiaby. Koa fa mandeha fotoan̈a, manjary misy karazan̈a selily kadiriny 200, karaha ataony seliliny lio, seliliny rafipitatitry, na seliliny taolan̈a. Teteky amy zay, manomboko miforon̈o taova, avio iro manomboko miasa. Izikoa fa tapitry sivy fanjava, selily araiky tamy voanalohany in̈y manjary loso zazamena misy selily andrivony tapitrisa. Hita baka amy zen̈y fa ten̈a hendry salakady misain̈y mare Araiky niasa atsika io, ke atsika loso tihivolan̈a karaha pan̈ano salamo ty: “Zaho hidera anao, fotony mahagaga ndreky maharikian̈a fomba nan̈amboaranao zaho.”​—Salamo 139:14.

Ino hatsaran̈a azontsika baka amy fahendrenany Zan̈ahary? Hainy Zan̈ahary raha mampasambatra atsika, fotony izy niasa atsika. Izy ten̈a mahay raha mare, ke vitany man̈amia atsika torohevitry mety tsara baka amy Volan̈anany ao, tsy ino zen̈y fa Baiboly. Izio ohatra mandrisiky atsika karaha ty: “Mahaiza mifan̈ambela hadisovan̈a amy fô jiaby.” (Kolosianina 3:13) Karakory fahitanao torohevitry io? Feno fahendrena, tsy zen̈y? Dokotera aby io mivolan̈a fa olo araiky koa tia man̈ambela hadisovan̈anolo, loso mahita toro tsarabe, avio tsy an̈abo tansionany. Izio koa misakan̈a olo tsy ho kivy mare ndreky tsy ho azony karazan̈a aretin̈y hafa. Zan̈ahary io mira naman̈a araiky hendry salakady be fitiavan̈a, ke izy tsy ho kajo foeky han̈amia atsika torohevitry mahomby ndreky mahatsara atsika. (2 Timoty 3:16, 17) Tsy mba tianao hahazo naman̈a karaha zen̈y?

“Jehovah tia rariny.”​—SALAMO 37:28.

Zan̈ahary man̈ano ny rarin̈y fo. Joba 34:10 mivolan̈a: “San̈atria araiky ten̈a Zan̈ahary io han̈ano ny ratsy. San̈atria izy Farany Mahery io han̈ano raha tsy marin̈y.” Amy rariny fo fitsaran̈a ataony Jehovah, karaha efa nivolan̈iny pan̈ano salamo ty: “Erakany rariny hitsaranao vahoaka aby io.” (Salamo 67:4) ‘Jehovah mahita raha an̈aty fô’, ke izy tsy avoafitakanolo mihatsaravelatsihy. Hainy Jehovah fo raha ten̈a marin̈y, ke amy rariny fo fitsaran̈a ataony. (1 Samoela 16:7) Salakady hitany Zan̈ahary aby raha tsy rariny ndreky raha ratsy ataonolo. Ke izy nampan̈anten̈a fa tsy ho ela ‘olo ratsy fan̈ahy hadoso tsisy eky ambony tany.’​—Ohabolana 2:22.

Fa ndray izy man̈ano zen̈y, Zan̈ahary io tsy pitsara mekimeky handeha han̈asazy olo fo. Izy von̈ono hamindra fô. Karaha ty volan̈iny Baiboly: “Jehovah mamindra fô ndreky tsara fan̈ahy.” Firaka aminolo ratsy fan̈ahy mbala hamindrany fô fo izikoa iro mibebaka ankitin̈y. Man̈ano ny rariny ankitin̈y Zan̈ahary, tsy zen̈y?​—Salamo 103:8; 2 Petera 3:9.

Ino hatsaran̈a azontsika baka amy fan̈anaovany Zan̈ahary ny rariny? Karaha ty nivolan̈iny apostoly Petera: “Zan̈ahary tsy man̈avakavaka, fa amy firenena jiaby, lan̈iany olo mavozo izy ndreky man̈ano ny marin̈y fo ankasitrahiny.” (Asan’ny Apostoly 10:34, 35) Zan̈ahary man̈ano ny rariny ke izy tsy man̈avakavaka. Raha zen̈y ten̈a mitondra hatsaran̈a amintsika fotony ikeny hanompo izy aby atsika jiaby, ndray ino ndray ino karazan̈antsika, na aia na aia tany faviantsika, avio na karakory na karakory fomba nitaizan̈a atsika.

Tiany Zan̈ahary ho haintsika ino dikany rariny zen̈y, avio tiany koa atsika han̈ano ny rariny mira izy. Zen̈y nahavy atsika io nataony mahay mandiniky raha. Baiboly mivolan̈a amy Romanina 2:15 fa fahaizan̈a mandiniky io mira lalàn̈a araiky ‘nisoratin̈y tan̈aty fontsika tao’, ke izio ‘vavolombelon̈o’ mivolan̈a amintsika na mety na tsy mety raha ataontsika. Akory hazahoantsika hatsaran̈a baka amizio? Mila ampiofan̈intsika tsarabe eritreritrintsika io, fotony izikoa atsika man̈ano zen̈y, izio hisakan̈a atsika tsy han̈ano raha ratsy. Izikoa atsika tafan̈ano hadisovan̈a, izio afaka handrisiky atsika hibebaka ndreky hiova. Hitantsika fa fahaizan̈a fa Jehovah tia rariny io ten̈a man̈ampy atsika salakady mahavy atsika harikitry izy!

“Zan̈ahary io fitiavan̈a.”​—1 JAONA 4:8.

Zan̈ahary manan̈a angovo, fahendrena, avio izy man̈ano ny rariny. Fa ndray zen̈y, Baiboly tsy mivolan̈a fa Zan̈ahary io angovo, fahendrena, na rariny. Fa Baiboly mivolan̈a fa Zan̈ahary io fitiavan̈a. Nan̈ino? Haintsika fa baka aminy angovony Zan̈ahary hahavitany man̈ano raha. Fitiavany ny rariny ndreky fahendrenanany koa mitariky fomba han̈anaovany raha. Fa fitiavan̈anany io ndraiky mahavy izy man̈ano raha. Fitiavan̈a io misy vokany amy raha jiaby ataony.

Tsisy raha tsy anan̈any Jehovah, fa ndray zen̈y, fitiavan̈anany io nandrisiky izy hamoron̈o zavaboary manantsain̈y, andan̈itry an̈y ndreky ambony tany atỳ. Iro io ho afaka hankafy ndreky hahazo hatsaran̈a baka amy fitiavan̈any Jehovah ndreky fikarakaran̈anany. Zan̈ahary tsy tia ten̈a foeky, fotony efa namboariny tsarabe tany baka hipitrahanolombelon̈o. Mbala man̈aboaka fitiavan̈a aminy olombelon̈o jiaby fo koa izy fotony “masoandranany apiriakany aminolo ratsy fan̈ahy ndreky tsara fan̈ahy, baka io izy mandatsaka mahalen̈y aminolo marin̈y ndreky tsy marin̈y.”​—Matio 5:45.

“Jehovah ten̈a be fitiavan̈a sady mamindra fô” koa. (Jakoba 5:11) Tiany Jehovah mare koa lan̈iany olo ten̈a tihahay raha momba izy ndreky tihan̈aton̈o izy. “Tsy lavitry atsika tsiaraikiaraiky” izy.​—Asan’ny Apostoly 17:27.

Ino hatsaran̈a azontsika baka amy fitiavany Zan̈ahary? Tiantsika mare mahita hatsaran̈any masoandra milentiky arivariva in̈y. Mamparavoravo atsika koa mahita zazamena mitokiky, avio ravoravo koa atsika izikoa tiany havantsika. Marin̈y fa raha aby io tsy ten̈a raha maventy, kanefa iro io mahavy atsika manjary mankafy fiain̈ana.

Vavaka koa an̈isany fomba araiky han̈aboahany Zan̈ahary fitiavany atsika. Izio ten̈a mitondra hatsaran̈a amintsika. Baiboly mandrisiky atsika karaha ty: “Aza miasaloha anaro, na aminino zen̈y na aminino, fa amy raha jiaby, koran̈a amy Zan̈ahary fo raha tianaro hangatahin̈y, amy vavaka ndreky fangatahan̈a mare ndreky fankasitrahan̈a izy.” Mira ataony baba araiky be fitiavan̈a fo ataony Jehovah. Tiany izikoa atsika mba mangataka fan̈ampian̈a aminany momba raha ten̈a mampiasaloha atsika. Jehovah io Zan̈ahary tsy tia ten̈a, ke izy mampan̈anten̈a han̈amia atsika ‘fiadanan̈anany, bebeny eritreritry jiaby.’​—Filipianina 4:6, 7.

Atsika tio nikoran̈a iro toetry efatra maventy anan̈any Zan̈ahary: Angovo, fahendrena, fitiavan̈a ny rariny, ndreky fitiavan̈a. Asa izin̈y nan̈ampy anao hahazoazo antsain̈y karakarakory Zan̈ahary zen̈y? Koa tianao hankasitraka Zan̈ahary fo, mandrisiky anao zahay hianatra momba raha vitany Zan̈ahary taminao ndreky raha mbala hataony aminao.