Ino ma direkty avy an̈aty jerinao, anao koa fa maharen̈y “apokalypsy” zen̈y? Mety antambo be araiky mandalo erantany, ke hamono raha manampahin̈ana jiaby ambony tany. Olo sasany mino fa ho hisy raha karaha zen̈y hiboaka tsy ho ela. Mino zen̈y iro, intsaka eky izikoa fa maharen̈y vaovao karaha ty:

•   “Na kinian̈a na tsy kinian̈a, efa ampoizin̈y hisiany ady nikleaira. Mety baka amy tsy fifankazahoankevitry koa hipoahanizio”.​—Bulletin of the Atomic Scientists.

•   “Tan̈atiny folo taon̈o loso zay, ten̈a maro mare isany sikilony maresaka nandravan̈a raha maro, atiala nirehitry, maintany, harandranomasin̈y mahaimipoko kolera, hafanan̈a mandoro, ndreky toeran̈a dobondrano.”​—National Geographic.

•   “Iro kijeja an Afriky an̈y koa mahaimaro fo salakady mahaimandravan̈a raha maromarony tan̈aty taon̈o maro loso zay.”​—The Associated Press.

 Ho potiky ma tany ty? Karakory volan̈iny Baiboly?

 Ehe. Baiboly, Volan̈a Zan̈ahary io man̈amia toky fa tany ty haharitry mandrakizay. (Mpitoriteny 1:4) Zan̈ahary niasa tany ty, ke izy ty tsy handeha ravan̈iny, fa ‘haripany ndraiky lan̈iany olo mandrobaka tany ty.’​—Apokalypsy 11:18.

 Izikoa Baiboly zahan̈a, ho avy ankitin̈y faranandra. Fa izio farany andrany olo tsy man̈araka raha volan̈iny Zan̈ahary, fa man̈ano raha tiandro fo. Karaha efa nataony taminy andrany Noa in̈y, hifaran̈any Zan̈ahary lan̈iany olo tsy mavozo izy.​—2 Petera 2:5; 3:7.

 Karaha ty volan̈iny 1 Jaona 2:17 ao: “Donia ty ndreky fan̈irian̈anany ty mandalo fo.” Hitantsika aminy andininy io fa tsy tany arabakiteny handeha hiravan̈iny Zan̈ahary io, fa olo man̈ano raha ratsy.

 Tsy koran̈iny Baiboly ombian̈a daty haviany farany. (Matio 24:36) Fa ambarany amintsika ndraiky fa izio efa marikitry. Karaha ty baka raha efa nambarany Baiboly tsialohaloha:

•   Ho hisy ady, mosary, valanaretin̈y mahafaty, baka io horohorontany matanjaka “amy tany maro.”​—Matio 24:3, 7, 14; Lioka 21:10, 11; Apokalypsy 6:1-8.

•   Ho tia ten̈a mare olo. Iro koa “ho tia vola”, “tsy hahay han̈ano mersy”, baka io “tsy hahafehy ten̈a.”​—2 Timoty 3:1-5.

 Maro olo man̈eky fa raha mandalo rango tamy taon̈o 1914 ten̈a mifan̈araka tsarabe amy raha efa nivolan̈iny Baiboly ahaizan̈a fa efa marikitry farany andra. Izikoa anao tihahita fan̈ampiny fan̈azavan̈a, zahava lahatsoratra aby ty: “Inona no Asehon’ny Fanisan-taonan’ny Baiboly Momba ny Taona 1914?” ndreky “Inona avy ny Famantarana ny ‘Andro Farany’?”

 Dikany volan̈a griky “apokalypsy” amy Baiboly ao, “man̈ambara” na “man̈aboely.” Matetiky volan̈a io mikoran̈a momba fan̈azavan̈a aby nasitriky taloha kanefa naboely. Baiboly koa mikoran̈a momba “fan̈ambaran̈a [apokalypsiny] Jesosy Tompo.” Hita amy Baiboly ao volan̈a aby io, lera izy man̈ambara fa Jesosy araiky manan̈a angovo han̈adosoan̈a raha ratsy jiaby ambony tany ndreky han̈amia hatsaran̈a panompony Zan̈ahary.​—2 Tesalonianina 1:6, 7; 1 Petera 1:7, 13.

 Boky farany amy Baiboly ao kahian̈a A·po·kaʹly·psis, na Apokalypsy, fotony izio mikoran̈a raha mbala ho avy. (Apokalypsy 1:1) Amy boky io ao mikoran̈a vaovao tsara ndreky hafatra man̈amia fan̈antinan̈a. (Apokalypsy 1:3) Ambarany ao fa Zan̈ahary han̈afoan̈a raha tsy rariny jiaby ndreky han̈ova tany hanjary Paradisa. Ke amy zen̈y, olombelon̈o efa tsy hijaly eky, tsy harary, tsy hofoaty.​—Apokalypsy 21:3, 4.

 Tianao ma hahay raha maromaro momba fampan̈antinan̈a maro tsara amy Baiboly zen̈y? Vavolombelon̈o Jehovah mampianatra Baiboly olo maimaimpoan̈a. Aza misalasala mikoran̈a amindro.