Tsiary ndraiky nisy fanan’andra mare mandilatran’ny iziôty tambony tany teto, sady naro antambo baka tamizio. Zahava baka irô tatitry aby ty:

•   Efa nisy 174 taon̈o zay nangalan’olo meziran’ny hafanan̈an’ny tany fa izikoa mbala fanjava Ziain edy, tamy ty faran’ny nafana.​—13 Zie 2023, National Oceanic and Atmospheric Administration, U.S. Department of Commerce.

•   “Man̈afahafa fanan’andra an Italie, Espagne, France, Allemagne ndreky Pologne ke mety hahatatra 48°C hafanan̈an’ny tsiko amy nosy Sisily ndreky Sardaigne. Io andra faran’ny nafana tan Eropy teto.”​—13 Zie 2023, European Space Agency.

•   Arakarakan’ny hanongan’ny hafanan̈an’ny tany, ampoizin̈y tsarabe hisian’ny mahalen̈y be sady matetiky, ke havian’ny tondra-drano be tsarabe.​—17 Zie 2023, Stefan Uhlenbrook, direkteran’ny World Meteorological Organization.

 Asa anao mba miasaloha amy fanongan’ny hafanan̈a amy tany maro koran̈in’ny tatitry aby io? Zahava baka raha koran̈in’ny Baiboly momba zen̈y.

 Ia. Hafanan̈an’ny tany ndreky andra miova mare io mifan̈araka tsarabe amy raha koran̈in’ny Baiboly rango efa ela fa hiboaka amin’ny andra iziôty. Ohatra, Jesosy naminan̈y fa atsika hahita “raha maro mampavozo.” (Lioka 21:11) Maro olo manjary mavozo amy fanan’andra mare be io, tsao ndraiky tsy ho mety hipitrahan̈a eky tany ty.

 Aha. Tamy Zan̈ahary niasa tany ty, izio nataony hipitrahan’olo mandrakizay. Tsisy olo himboan’ny Zan̈ahary handravan̈a izy ty. (Salamo 115:16; Mpitoriteny 1:4) Izy lastiô efa nampan̈anten̈a fa ‘haripany lan̈iany olo mandrobaka tany ty.’​—Apokalypsy 11:18.

 Baiboly mivolan̈a fa Zan̈ahary mahavita miaro tany ty sady zen̈y foeky raha handeha hataony, ke tsy ho hisy eky antambo baka amin’ny haratsian̈an’ny tontolo iain̈ana.

•   “Izy mampijanon̈o tsiko maresaka be in̈y, ke tsy mitopatopa eky daroban-dranomasin̈y.” (Salamo 107:29) Angôvon’ny Zan̈ahary mahavita mifehy angôvon’ny natira. Fandrobatan’olo tontolo iain̈ana mahavy olo maro mijaly amy ziôty. Fa kanefa, Zan̈ahary mahavita mamaha prôblemo zen̈y.

•   ‘Mikarakara tany anao, ke ataonao mahavokatra be ndreky van̈ono raha atsabo izio.’ (Salamo 65:9) Hanjary Paradisa tany jiaby amy zen̈y, fôtony Zan̈ahary hitahy atsika.

 Baiboly mivolan̈a fa mbala hilamin̈y tontolo iain̈ana. Izikoa tianao hahita fan̈ampin’ny fan̈azavan̈a momba zen̈y, zahava lahatsoratra “Iza no Hahavita Hanavotra ny Tany?”