Anao koa nafaka asa, mety hisy vokany amy fidirambolanao raha zen̈y, ndreky misy vokany amy tokantran̈anao, ndreky amy fahasalaman̈any fonao ndreky sain̈inao. Fa diniha baka iro torohevitry aby koran̈iny Baiboly, boky tsy mahay lany daty io, fa ten̈a han̈ampy anao.

•   Koràn̈a aminolo raha an̈atiny fonao.

   Raha koran̈iny Baiboly: “Olo ten̈a naman̈a zen̈y tia amy fotoan̈a jiaby, sady ten̈a rahalahy von̈ono han̈ampy aminy andra sarotro.”​—Ohabolana 17:17.

   Anao koa nafakasa, mety halahelo anao, ho meloko, avio mety hikorontan̈a sain̈inao. Mety hahatsiaro karaha tsy tafaboaka foeky anao amy fiain̈ana. Fa izikoa raha mahazo anao io koran̈inao aminolo tran̈o araiky aminao na amy kamaradinao ten̈a marikitry anao, mety hampakirikiry alahelonao raha hambarandro anao. Iro koa mety han̈amia torohevitry tsara harehanao, amy zen̈y anao ho afaka hahita asa.

•   Tandrema tsao miasaloha dila loatra.

   Raha koran̈iny Baiboly: “Ke anaro aza miasaloha aminy amaray foeky, fa amaray koa mahita izy. Raha ratsy mandalo andra araiky in̈y, efa vita aminin̈y edy.”​—Matio 6:34.

   Baiboly mandrisiky atsika handiniky tsialohaloha raha hiritriretintsika hatao. (Ohabolana 21:5) Fa izio koa mivolan̈a amintsika fa atsika tsy tokony havozo ndreky hiasaloha mare momba ny amaray. Matetiky atsika miasaloha amy raha mety tsy hiboaka aby. Ke tsara izikoa ny niany fo zahavantsika.

   Mbala man̈amia torohevitry tsara momba akory atao izikoa misy raha mampikorontan̈a sain̈inao. Vakia lahatsoratra “Ahoana no Iatrehana ny Adin-tsaina.”

•   Mahaiza mitsitsy vola.

   Raha koran̈iny Baiboly: “Haiko karakory tsy manandraha zen̈y ... avio haiko koa karakory manandraha zen̈y.”​—Filipianina 4:12.

   Ampifan̈araha amy raha misy anao izioty fiain̈ananao. Tafiditry an̈atinizen̈y fomba hitantan̈anao volanao, baka anao tsy handany vola mandilatrany vola misy aminao. Izikoa mitrosa tsy aminy antony.​—Ohabolana 22:7.

   Izikoa anao tihahay karakory atao mitantambola, zahava lahatsoratra “Ahoana Raha Lasa Mihena ny Vola Miditra Aminao?”

•   Ampiasà tsara fotoan̈anao.

   Raha koran̈iny Baiboly: “Anao koa fa mifandray aminolo antany an̈y, aboaha fa anao olo misy jery, ke ampiasà tsara fotoan̈anao.”​—Kolosianina 4:5.

   Anao ndray mbala tsendriky manan̈a asa hatao, mizara man̈ano programony raha jiaby fataonao. Anao koa man̈ano ambaka zen̈y, hilamin̈y tsara fo fiain̈ananao, avio hahatsiaro mahivankivan̈a koa anao.

•   Mahaiza miain̈y amy zavamisy.

   Raha koran̈iny Baiboly: “Asa mare jiaby azahoan̈a tombony.”​—Ohabolana 14:23.

   Aza mifidifidy asa, fa ataova fo nata asa mbala tsiary nataonao taloha. Anao mety man̈ano asa madinidiniky na asa tsy be karama mandilatra karamanao taloha.

•   Aza mora kivy.

   Raha koran̈iny Baiboly: “Afafeza ambeonao koa fa maraindrain̈y, ke aza ampangalàn̈a kajo foeky tan̈ananao parpitsofaorany andra, fotony tsy hainao aia amindro io ho van̈ono.”​—Mpitoriteny 11:6.

   Aza kivy fa mitadiava asa fo. Mivolàn̈a aminolo maromaro fa anao mitady asa. Koràn̈a aminy havanao, jiraninao, olo niaraka niasa taminao taloha ndreky olo fankazatra aminao. Mitadiava tany mety misy afisy momba asa. Mizazahava amy tranonkala tsao misy asa mety aminao ao. Mandifasa demandy amy tany maromaro, na man̈aton̈a olo mitady piasa.