Mahaivitsy fo olo tsy tia man̈ano ny tsara amy ziôty.Ohatra, olo marary lôso masiasiaka ndreky rômodrômotro amy dokotera. Olo mihina amin’ny hotely ndraiky man̈ambanimbany mpiasa ao. Olo mpandeha avion koa tsy tiandrô volombolan̈iny ke mamopoko olo mikarakara irô foeky. Tsaiky ndraiky maditry, mankadala olo, aviô mandrahon̈o olo, baka iô koa mampijaly mpampianatra. Sasany amindrô mpan̈ano politiky aby io ndraiky man̈ano raha mampamen̈atra mare, aviô sasany mihatsaravelatsihy, ke mipoerapoera fa izy ten̈a man̈ano raha tsara.

 Karakôry tsarabe ma man̈ano ny tsara zen̈y? Baiboly mikoran̈a momba zen̈y, aviô torohevitry amezan’izio ao mety arehan̈a tsara. Izio koa man̈azava nan̈ino olo tsy man̈ano ny tsara eky amy ziôty.

 Man̈ano ny tsara olo araiky izikoa izy tsara toetry ndreky tsara fitondran-ten̈a. Kanefa lôso mahaivitsy fo olo karaha zen̈y eran-tany.

•   Nisy fan̈adikadin̈ana natao, ohatra, vo tsy ela ta Etazonỳ tan̈y. Maro olo resy lahatra fa mahairatsy fo toetrin’olo ndreky fitondra-ten̈an’olo amy ziôty, izikoa ampiran̈iny tamy 22 taon̈o lôso zay.

•   Nisy olo kadiriny 32 000 koa nadikadin̈iny tamy firenena 28. Olo 65 isan-jato tamindrô io nivolan̈a fa rango zay, irô mbala tsiary nahita olo man̈ano raha ratsy, karaha hitantsika amy ziôty.

 Baiboly efa nivolan̈a tsialohaloha fa ho karaha zen̈y toetrin’olo amy ziôty.

•   “Amy farany an̈y, ho hisy andra sarotro; fa olo tia ten̈a, ho tia vola, han̈ambony ten̈a, mpiavonkavon̈o, mpanihitihy, tsy han̈aja raimandreny, tsy hahay han̈ano mersy, ..., tsy ho tia havany, ...[aviô], masiaka mare.”​—2 Timoty 3:1-3, Fandikan-teny Katolika.

 Izikoa tianao hahay tsarabe karakôry mampatanteraka faminanian̈a io, vakia lahatsoratra “Efa Voalazan’ny Baiboly Mialoha ve ny Toe-tsain’ny Olona Amin’izao Andro Izao sy ny Zavatra Ataony?”

 Maro olo tsy man̈ano ny tsara eky amy ziôty. Ndray zen̈y, olo an-tapitrisa mahita fa man̈ampy izy hahavita hanan̈a toetry tsara torohevitrin’ny Baiboly. “Azo atokisan̈a fo” torohevitry ao “amy ziôty firaka mandrakizay.” (Salamo 111:8) Atsika handiniky ohatra vitsivitsy:

•   Raha koran̈in’ny Baiboly: “Ke zay raha tianarô hataon’olo aminarô, mba ataova amindrô koa.”​—Matio 7:12.

   Ino ma dikan’izen̈y? Tôkony ho tsara fan̈ahy ndreky han̈aja olo atsika, karaha fomba tiantsika hitondrasandrô atsika in̈y fo.

•   Raha koran̈in’ny Baiboly: “Samia mivolan̈a ny marin̈y amy namanarô, fôtony vandy io efa narianarô.”​—Efesianina 4:25.

   Ino ma dikan’izen̈y? Tôkony hivolan̈a ny marin̈y ndreky han̈ano ny marin̈y fo atsika.

 Izikoa tianao hahay tsarabe momba zen̈y, azafady vakia:

•   Tilikambo Fiambesan̈a “Ny Mety sy ny Tsy Mety: Tari-dalana Azonao Itokisana.”

•   Lahatsoratra “Baiboly Mahavita Man̈ampy Atsika Handefitry.”