Tamy 14 Marsy 2015 natao firasan̈a diplomy tamy Fianaran̈a Baiboly ta Gileada Kilasy Faha-138, tamy foibeny fampianarany Vavolombelon̈o Jehovah ta Patterson, New York. Taminio, nisy olo mandeha 14 000 nan̈aton̈o izio, ke sasany tamindro io nan̈araka programo io tamy video. Ke alohany fandaharan̈a hanomboko, nisy lamoziky vaovao efatra, mbala an̈isany hiran’ilay Fanjakana nalefa. Izikoa fa nandeha fotoan̈a, iro nan̈aton̈o izio nan̈ano hira aby io. *

Geoffrey Jackson, an̈isany Filankevipitantan̈any Vavolombelon̈o Jehovah, pitaridraharaha tamy fandaharan̈a tao. Tamy kabaro fanokafan̈a nataony, izy nandrisiky iro pianatra aby io hampiasa raha nianarandro han̈ampian̈a olo fa tsy hatity fahaizan̈a.—2 Timoty 2:2.

Izy baka tio nikoran̈a mikasiky modely nambelany Mosesy. Nisy fotoan̈a, tamy faha Israely taloha tan̈y, tran̈olainy Mosesy natao foibeny fanompoan̈a Zan̈ahary. Kanefa, izikoa fa nandefa fotoan̈a, nanjary tabernakely ndraiky foibeny fanompoan̈a Zan̈ahary. Nanomboko tio, Mosesy tsy afaka niditry tamy toeran̈a Farany Masin̈y tamy tabernakely tao, fotony olo pisoron̈obe zaraiky fo nambela niditry tao. Ke Arona voatendry ho pisoron̈obe tamy zen̈y. Mosesy tsy nitarain̈y mikasiky fan̈ovoan̈a natao zen̈y, fa izy nifen̈y fo tsy hivadiky tamy Zan̈ahary ndreky nanohan̈a Arona taminy andraikitry vaovao namian̈a izy io. (Eksodosy 33:7-11; 40:34, 35) Ino raha ianarantsika baka amy zen̈y? Karaha ty nambarany Rahalahy Jackson: “Mahaiza mankasitraka tombontsoa namian̈a anao, kanefa aza tanàn̈a ninao fo tombontsoa zen̈y.”

“Aza Mavozo Feony Ravindraha Afikofikony Tsiko!” Zen̈y fotokevitry kabaro nazavainy Kenneth Flodin, pan̈ampy amy Komitiny Fampianaran̈a amy Filankevipitantan̈ana. Nikoran̈a izy fa mety ho tojy raha mampavozo iro pianatra aby io. Ohatra, mety hiova andraikitry han̈irahan̈a iro na mety ho hisy olo hanohitry. Nampiasa volan̈a baka tamy Levitikosy 26:36 izy. Nivolan̈a izy fa izikoa fa misy raha karaha zen̈y mandalo, iro tsy tokony hieritreritry lany hevitry foeky, fa tokony hampitovisindro amy ravindraha maiky latsaka raha zen̈y. Rahalahy Flodin amy zay nikoran̈a momba apostoly Paoly. Nivolan̈a izy fa nahavita niaritry raha maro Paoly fotony izy natoky Jehovah.—2 Korintianina 1:8, 10.

“Ino Raha Tadiavinaro?” Mark Sanderson, an̈isany Filankevipitantan̈ana, nan̈azava izio. An̈isany raha nazavainy tamy zen̈y toro lalan̈a aminy Ohabolana 13:12, mivolan̈a karaha ty: “Raha iambesan̈a koa tsy tanteraka mamparary fo.” Ke maro olo diso fan̈antinan̈a, fotony iro man̈iry tihanandraha ndreky halaza, kanefa tsy tanteraka fan̈irian̈andro zen̈y.

Tamy faha Jesosy, maro olo diso fan̈antinan̈a momba Jaona Pan̈ano Batisa. (Lioka 7:24-28) Iro nan̈anten̈a fa Jaona Pan̈ano Batisa zen̈y hitovy amy filozofy, han̈azava raha sarotro takarin̈y amindro. Tsy zen̈y ndraiky raha nisy fa izy nan̈azava fahamarin̈ana tamy fomba tsotra. Sasany ndraiky nan̈anten̈a izy lelahy araiky misikiny lamba mihaja. Kanefa, Jaona nisikiny lamba mitovy aminolo mijaly. Fa zay olo nan̈anten̈a hahita paminan̈y ndraiky tsy diso fan̈antinan̈a, fotony Jaona tsy raha paminan̈y fo fa izy koa nitariky lalan̈a nimboany Mesia!—Jaona 1:29.

Ino raha tiany Rahalahy Sanderson hianarandro pianatra aby io? Tokony hifen̈y fo iro hanan̈a toetsain̈y tsara, ke hampiasa fiofan̈ana nataondro io han̈ampian̈a olo fa tsy hitady laza na voninahitry amy tany han̈irahan̈a iro. Amy fomba karakory? Iro tokony hirasa raha nianarandro ta Gileada han̈ampian̈a piaramanompo amindro hankafatra finoan̈andro, ndreky ho tia iro mare. Rahalahy Sanderson nivolan̈a: “Mifen̈a fo hanetry ten̈a ke hanompo iro piaramanompo aminaro, baka io ataova zay vitanaro amy fan̈anovan̈a sitrapony Jehovah. Izikoa anaro man̈ano zen̈y, anaro tsy ho diso fan̈antinan̈a.”

“Amia Hanin̈y Olo Mosary.” Io fotokevitry kabaro nataony James Cauthon, papianatra amy Sampandraharahany Fianaran̈a Baiboly a Patterson. Nan̈azava Rahalahy Cauthon fa olo jiaby mitady fitiavan̈a, man̈iry hitiavin̈y ndreky man̈iry hahazo dera. Ndray Jesosy mba nila zen̈y. Zen̈y nahavy Jehovah nan̈amia toky Jesosy taminy izy natao batisa.—Matio 3:16, 17.

Jehovah nan̈amia atsika angovo indesintsika mankahery olo amy volan̈a ataontsika. Ke izy man̈anten̈a atsika han̈ano zen̈y. (Ohabolana 3:27) Rahalahy Cauthon nivolan̈a: “Ataova raha hahavy anao hahita raha tsara aminolo, baka io mahaiza midera iro amy raha tsara vitandro.” Izikoa atsika mazoto midera piaramanompo amintsika, ho hitandro fa tsy very boriny ezaka ataondro.

“Tsara Firaka amy Farany.” Mark Noumair, pan̈ampy amy Komitiny Fampianaran̈a, nan̈ano kabaro io. Ke modely nambelany apostoly Paoly nazavainy taminio. Rahalahy Noumair nivolan̈a tamindro pianatra aby io fa iro tsy tokony ho afapo amy raha hely vitandro. Izikoa iro mangala tahaka raha nataony Paoly, ke mitady fomba han̈ampian̈a olo fo, ho be haravoan̈andro.—Filipianina 2:17, 18.

Ndray maro raha sarotro nidiaviny Paoly, izy tsy kivy. Izy tsy nivadiky foeky firaka izy naty. Zen̈y nahavy izy nahavita nivolan̈a karaha ty: ‘Vitako firaka amy farany lomoay nataoko.’ (2 Timoty 4:6, 7) Rahalahy Noumair amy zay nandrisiky iro pianatra aby io hangala tahaka Paoly, ke tsy hivadiky ndreky han̈ano raha jiaby han̈irahan̈a iro, misy ifandraisany aminy asany Fanjakan̈any Zan̈ahary.

Fitantaran̈a: Michael Burnett, papianatra hafa amy fianaran̈a a Gileada, nan̈ano anjara io. Tan̈atiny iro pianatra aby io nidoko ta Patterson, iro nahavita nitory, ke sasany tamindro nirahin̈y han̈aboaka raha hitandro tamy fitorian̈a, taminolo jiaby nan̈aton̈o fotoan̈a io.

Ny raha hita matetiky, iro pianatra aby io koa fa mifen̈y mampiasa “volan̈anolo” itoriandro, iro mahita vokatra tsara. Nisy pianatra araiky izioty nahita fa maro aminolo amy faritany nitoriandro mivolan̈a espaniola, ke talohany izy handeha hitory, izy nianatra volan̈a espaniola vitsivitsy tamy JW Language app. Taminandra io amy zay, izy nifanojy tandalan̈a tamy lelahy araiky man̈ano volan̈a espaniola. Izy koa fa nifen̈y nampiasa volan̈a espaniola hainy in̈y, nanjary nahavita nikoran̈a raha amy Baiboly tamy lelahy io izy, ke tsy lelahy io zaraiky fo nanjary nianatra Baiboly fa olo efatra tamy fianakavian̈anany koa.

Fan̈adikadin̈ana: William Turner, pan̈ampy amy Komitiny Fanompoan̈a amy Filankevipitantan̈ana, nan̈adikadin̈y pianatra efatra. Nan̈ontaniany iro: Karakory nataondro talohany iro navy ta Gileada, baka io karakory iro izio efa nahazo fiofan̈ana io?

Iro pianatra efatra aby io amy zay nitantara raha nankahery iro tamy fiofan̈ana nataondro io. Ohatra izio, nisy pianatra araiky nitantara raha nianarany baka tamy Lioka Toko 10. Iro pianatra 70 nirahiny Jesosy nitory aby io koa fa baka nitory, iro ravoravo mare. Jesosy koa ravoravo, fa ndray izy man̈ano zen̈y, izy nivolan̈a fa tsy tokony baka amy vokatra hitandro tamy fanompoan̈a fo mahavy iro ho ravoravo fa tokony baka amy fahaizandro fa Jehovah mankasitraka raha ataondro. Raha zen̈y mampatsiaro atsika fa haravoan̈antsika io tsy tokony miankiny amy raha misy atsika na anan̈antsika, fa amy fahaizantsika fa ankasitrahiny Jehovah raha ataontsika.

Rahalahy Turner amy zay nampiasa Filipianina 1:6 nindesiny nankahery iro pianatra aby io. Izy nan̈amia toky iro fa Jehovah efa “nanomboko asa tsara” tamindro, ke Jehovah hanohan̈a iro fo.

“Jehovah Fo Zahava.” Samuel Herd, an̈isany Filankevipitantan̈ana, nan̈azava kabaro fototro io. Nivolan̈a izy fa atsika tsy afaka mahita maso Jehovah. Ke karakory fo basy hataontsika hahita izy?

Voanalohany, ahita Jehovah atsika izikoa atsika mandiniky raha niasainy. Sady Jehovah lasitio efa ‘nan̈ano raha hampazava masony fontsika.’ (Efesianina 1:18) Arakaraka ny hamakiantsika Baiboly ahaizantsika Jehovah. Ke arakaraka ny ahaizantsika Jehovah ndraiky hahavy atsika harikitry izy fo.

Tokony handiniky raha volan̈iny Filazantsara koa atsika, fotony amizio ao ahitantsika raha nikoran̈iny Jesosy ndreky raha nataony. Ke fahaizantsika raha aby zen̈y han̈ampy atsika hahay Jehovah tsarabe, fotony mitovy fo toetriny Jehovah ndreky Jesosy. Zen̈y nahavy Jesosy nivolan̈a: “Zay olo nahita zaho mira nahita Baba andan̈itry an̈y.”—Jaona 14:9.

Ke Rahalahy Herd amy zay nandrisiky pan̈atriky hangala tahaka raha hitandro tamy raha nataony Jesosy, fa tsy raha hitady hizaha Jehovah baka tamy raha nataony Jesosy fo. Ohatra izio, Jesosy nan̈amia hanin̈y olo maro. Karaha zen̈y koa, atsika tokony hifen̈y mare hirasa hanin̈y arapan̈ahy nazontsika.

Han̈ano akory hiafarantsika izikoa atsika mizaha Jehovah fo? Atsika hanjary hatoky Jehovah mare, karaha nataony panoratra Salamo. Izy nivolan̈a karaha ty: “Nataoko talohako tio fo Jehovah. Zaho tsy mety hangozohozo, fotony izy ankavanan̈anaka.”—Salamo 16:8.

Famaran̈ana: Iro pianatra aby io koa fa samy nahazo diplomindro, nisy araiky tamindro namaky taratasy fankasitrahan̈a baka amy fo, baka tamindro pianatra aby io. Izikoa fa vita zen̈y, Rahalahy Jackson nampatsiaro iro fa iro tsy tokony hieritreritry raha nianarandro jiaby zay ho vaovao na sarotro. Fa raha ny marin̈y, raha efa hainy piaramanompo amindro fo nianarandro ke hampatsiarovindro iro. Nivolan̈a koa izy fa tokony hanetry ten̈a iro, ke tsy hisariky sain̈inolo amindro na amy fiofan̈ana ta Gileada vitandro, fa hisariky sain̈inolo amy Baiboly ndreky boky naboakany fandaminan̈a. Iro koa tsy tokony han̈ano raha hampakivy olo mety tsy ho afaka han̈ano fiofan̈ana io foeky. Iro tokony han̈ampy namandro han̈araraotro zay fandaharan̈a arapan̈ahy mety ho vitandro. Ravoravo iro jiaby nan̈aton̈o fandaharan̈a io sady nahatsiaro nahazo angovo, ke iro izio tapakevitry hanompo rahalahindro ndreky anabavindro.