1-2. Le mɛni ɓe kwa pɔri moi la a gɛɛ ku kelee kukaa yɛɛ nyaŋkpai ŋoo-ɣɛli-kpului 1 a lonoi e pilaŋ mai?

 IKILI-ŊA SIA e pilaŋ nyaŋkpa ta ma nyii gaa-ɓela dikaa a tɔɔ-ɓelai. Kɛɛ folo tɔnɔ keleŋ e pu a gaa-ɓela, di saa. Nyiŋi e nii too polu a ŋanaa. E tee nyiŋi ma, tuŋ nyɔmɔɔ tamaa kaa nii polu mɛni ma. E gaa a gɛɛ gaa-ɓela di diyeei kapa kelee kara, gɛ ni di kpa tamaa soŋ nyii gbɛɛ mɛni e lɛɛ mai. Ikili-ŋa sia e pilaŋ nyiŋi ma: A gɛɛ gaa-ɓela di ditɔɔ-laai lɛɛ a pɔɔ-sɛŋ mɛni ma, kpa kɛtɛ ɓe di nɛɛ polu, nyaŋ gba pili-ɓelai da ŋwɛlii a gɛɛ e dikpai tee a maa felaa. Gbai kɛtɛi mɛni ma, nyaŋ ve pai wɔlɔ pɔrii gbɛɛi.

² Ku kaa nɔ yɛɛ nyaŋkpai ti. Kukaa-ɓela Adaŋ da Ii dikɛ a dimaa waa, dikɛ ɓo paredai ɣeniɛ lɛlɛɛi su. (Zɛ. 1:27; 2:​7-9) Dii pɔri kɛi ɣele ma wɔlɔ-wɔlɔ da wɔlɔ-wɔlɔ lii-nɛ̃ɛ su. Kɛɛ Adaŋ da Ii di Ziova woo pili. Mɛni ma Ziova e di kpɛ Idɛŋ sui su, nyaŋ pere fe kɛ ni naa a gɛɛ dikɛ ɣele ma wɔlɔ-wɔlɔ da wɔlɔ-wɔlɔ. Le ɓe di nɛɛ polu dinĩa-pɛlɛɛi mɛni mai? Ŋala-kɔlɔi e mo nyɛɛi: “Nuu tɔnɔ ɓe pa a sɔnyɔŋ nɔii su, sɔnyɔŋ nyaŋ ɓe pa a saa. Mɛni ma saa aa taa-taa nuu kelee ma, kpɛni fei, nuu kelee aa sɔnyɔŋ kɛ.” (Lo. 5:12) Bɔɔ-sɛŋ Adaŋ e nɛɛ kumɛni mai ɓa sɔnyɔŋ nyii a pa a saa. Zɔnyɔŋ ŋi kaa yɛɛ kpa kɛtɛ nyii kufa pɔri gbɛɛi.—Ŋu. 49:8.

 3. Le mɛni ɓe kwa pɔri kusɔnyɔŋ-ŋai kɔɔni la “kpa” mai?

³ Ŋala-kɔlɔi e sɔnyɔŋ kɔɔŋ “kpa” ma. (Mf. 18:​32-35) Kwa sɔnyɔŋ kɛ, a kɛ nɔ yɛɛ kwa kpa soŋ Ziova ma, nyaŋ  maa nɛ̃ɛi ku gbai ti tee. Ziova eei wala mɛni-kpɛtɛɛ kɛ a gɛɛ e kusɔnyɔŋ su mɛni lɛɛ, mu-siɣe saa-yeei maa kili-kɛ-zu fei kɛ kuyeei.—Lo. 6:​7, 23.

 4. (a) Le ɓe kɛ pa kɛi a sɔnyɔŋ-ɓela kelee a kɛ Ɣala eei wala kpɔŋ maa tɛɛ kupɔ? (Ŋule-wooi 49:​7-9) (b) Ŋooi “sɔnyɔŋ” sukulai ɓa le Ŋala-kɔlɔi su? (Basii “ Sɔnyɔŋ” kaa.)

⁴ Kufa pɔri mɛni lɛlɛɛ-ŋai kelee Adaŋ da Ii di naŋ sɔlɔ ɓoi polu kukpɔɔi yee ma. (Ŋule-wooi 49:​7-9 lono.) Ziova eei wala kpɔŋ maa tɛɛ kupɔ, kili-kɛ-zu fei pa kɛi kuyeei mu-siɣe saa-yeei mɛni ma tinaa-tuɛ-pere. Kui kɛ nɔ yɛɛ zua-ŋai.—Ik. 3:19; 2 Pi. 2:12.

 5. Kuwɛli-kɛ-maa Naŋ aa kpɔŋ leŋ kua a gɛɛ e kuŋuŋ maa ɓo sɔnyɔŋ yeei? (Ya pɔri ŋɔnɔ votooi Nyeŋkeŋ mai kaai.)

⁵ Kwaa kukili-ŋa sia e pilaŋ nyaŋkpai ma ku lono e pilaŋ mai. Nii eei pa kɛi leŋ a kɛ tɔɔ naloŋ ta a mo ma a gɛɛ a pai ŋɔkpai kelee kpɛɛi? Tɔ̃ya ma, nyaŋkpai ŋi lii a pai kɛi a nɛ̃ɛ a gɛɛ e nyee see mɛlɛ-see lɛlɛɛi ŋi mu. Bere sii tɔnɔi ti su, kuwɛli-kɛ-maa Naŋ Ziova aa ɓɛlɛ-see lɛlɛɛ kɛ kuɛ a gɛɛ e gbai Adaŋ da Ii di nɛɛ kuai tee. Zisɛ e mo nyɛɛi: “Kpɛni fei, Ɣala e nɔii wɛli a ŋanaa, nya ɓe e Noŋ tɔnɔi tɛɛ, a gɛɛ nuui kelee a laa lai, ŋuŋ la fe pai pilii, kɛlɛ, ŋwɔlɔ-wɔlɔ fulu-laai kaa nyeei.” (Zɔŋ 3:16) E tee nyiti ma, mɛlɛ-see-sɛŋ lɛlɛɛi ŋi a nɛɛ naa a gɛɛ ku pɔri laoi-laa lɛlɛɛ kɛi a Ziova.

 6. Woo-ŋa kɛɛ leŋ ɓe kwa pai mɛni maa-kɔrii e pilaŋ dia zɛŋ-lɛɛi ŋi su, nyaŋ le mɛni ma?

⁶ Kwa pɔri mɛni lɛlɛɛ sɔlɔ ɓoi leŋ mɛlɛ-see-sɛŋ mɛni kpanaŋɔɔi ŋi sarai nyii pere laa ɓo a gɛɛ ku su-mɛni-lɛɛ sɔlɔ ɓoi? A gɛɛ ku mare-kɛɛ ŋi sukula, kwa pai lonoi e pilaŋ woo-ŋa taŋa dia nyii Ŋala-kɔlɔi e tii kɛ a dia. Ŋoo-ŋai ŋi taŋa ɓa laoi-laa kɛɛ a Ziova, sɔnyɔŋ maa sala kulaa, lii-see sala, maa-tee-sɛŋ, maa-tee, da ku toliɛ a tɔ̃ya-ɓela. Kwa pai ŋoo-ŋai ŋi sukulai kaai tɛitɛi zɛŋ-lɛɛi ŋi su. Nyiŋi kɛɛ a pai kuyee-see-mui su kpanani Ziova ŋɔsu-mɛni-lɛɛi mɛni ma.

MƐNII ZIOVA E KƐ ŊWƐLII: A ŊWƐLII KUKƐ A NAOI

 7. (a) Le ɓe Adaŋ da Ii di ŋɔnɔ naŋ? (b) Le ɓe maa nɛ̃ɛi kuai a Adaŋ da Ii nonii ku gɛi? (Lomaŋ 5:​10, 11)

⁷ E tee ŋwɔlɔ-wɔlɔ fulu-laai ma nyii Adaŋ da Ii di naŋ, di ŋɔnɔ dilaoi-laa lɛlɛɛi laŋ a Dinaŋ, Ziova. Gɔɔ pilani,  Adaŋ da Ii dikɛ a Ɣala ŋɔkaayɔɔi su-ɓela ta. (Luu 3:38) Kɛɛ tãi di Ziova woo pili lai, dife ŋɔnɔ kɛ ni a ŋɔkaayɔɔi su-ɓela ta. Naa polu ma, di pɛlɛ nĩa-pɛlɛɛ maa sɔlɔ ɓoi. (Zɛ. 3:​23, 24; 4:1) Ee kukaa a Adaŋ da Ii nonii, maa nɛ̃ɛi ku ŋɔnɔ kɛ a Ziova naoi. (Lomaŋ 5:​10, 11 lono.) Nyiŋi sukulai ɓa ku ŋɔnɔ pa polu Ɣala pɔ, ku laoi-laa lɛlɛɛ kɛ a nyaa. Kɔlɔ kɛtɛ tɔnɔ e mo a gɛɛ ŋooi “ku ŋɔnɔ kɛ a Ɣala naoi” sukulai a pɔri kɛi a “laoi-laa kɛɛ a ikpɔara-nuu” Gurii sii-wooi su. Kɛlɛ mɛni lɛlɛɛi ɓa, Ziova ɓe kɛ a nuui maa-ŋuŋ nyii naoi-laai ŋi kɛ a kua. A pere sii kɛɛ leŋ?

MƐNI-KPƐTƐƐI: SƆNYƆŊ MAA SALA KULAA

 8. Le ɓa (a) sɔnyɔŋ maa sala kulaa? (b) lii-see sala?

⁸ Sɔnyɔŋ maa sala kulaa kaa a mɛni-kpɛtɛɛi nyii Ziova Ɣala e gɛ a gɛɛ laoi-laa lɛlɛɛ e ŋɔnɔ kɛ nyaa da nuu-kpune loai. E mɛni-kpɛtɛɛ kɛ a gɛɛ ku zɛŋ Adaŋ da Ii di naŋ sɔlɔ ɓo polu a sɛŋ ta tɛɛ nyii mɛni kpanaŋ pere e kɛ nɔ yɛɛ nyii di naŋ. Gurii Ɣala-kɔlɔi e ŋɔnɔ berei lɛ Ziova e mɛni-kpɛtɛɛ kɛ la a gɛɛ nuu-kpune e pɔri laoi-laa lɛlɛɛ kɛi a nyaa.—Lo. 3:25.

 9. Mɛni-kpɛtɛɛ kɛɛ leŋ ɓe Ziova e gɛ a gɛɛ e Eezuɛ-ŋai disɔnyɔŋ-ŋai su mɛni lɛɛ?

⁹ A gɛɛ Eezuɛ-ŋai di pɔri laoi-laa lɛlɛɛ kɛi a Ziova, e mɛni-kpɛtɛɛ kɛ a gɛɛ e di su mɛni lɛɛ. Mɛni-kpɛtɛɛ ti ɓa Zɔnyɔŋ Maa Sala Kulaa Foloi nyii Eezuɛ-ŋai da kaa gula koraŋ ma tɔnɔi. Zala laa-soŋ-nuu kɛtɛi a kaa sala kula nuai mɛni ma a tii kɛɛ a taa sua-ŋa. Tɔ̃ya ma, sala kulaa a taa sua fa kaa pɔri Eezuɛ-ŋai disɔnyɔŋ kulai dia kpɛni fei taa sua da nuu-kpune dife pɔri ni. Kɛɛ tãi kelee Eezuɛ-ŋai da kaa dipolu tɔɔ la disɔnyɔŋ-ŋai dia di sala kula yɛɛ berei Ziova e mo lai, a kaa disɔnyɔŋ su mɛni lɛɛ. (Ib 10:​1-4) E tee nyiti ma, mɛni-kpɛtɛɛ ŋi e gɛ Eezuɛ-ŋai di gɔlɔŋ a gɛɛ dikaa a sɔnyɔŋ-ɓela, nyaŋ maa nɛ̃ɛi di ŋuŋ-maa-ɓo kpɔɔi sɔlɔ ɓo.

10. Le ɓe Ziova e gɛ a gɛɛ e nuu-kpune ŋɔsɔnyɔŋ su mɛni lɛɛ?

¹⁰ Le ɓe Ziova e gɛ a gɛɛ ku su-mɛni-lɛɛ kpɔɔi sɔlɔ ɓo? E mɛni-kpɛtɛɛ kɛ a gɛɛ ŋɔwɛli-kɛ-maa Loŋ e “gbiŋ tɛɛ nɔ zu tɔnɔ a gɛɛ e nuu tamaa disɔnyɔŋ siɣe.” (Ib. 9:28) Zisɛ e pa a gɛɛ e “ŋɔfulu-laai tɛɛ a nuu tamaa maa-tee-sɛŋ.” (Mf. 20:28) Le ɓa maa-tee-sɛŋ?

ZƐŊ ZIOVA E DƐƐI: MAA-TEE-SƐŊ

11. (a) Ŋooi maa-tee-sɛŋ sukulai ɓa le Ŋala-kɔlɔi su? (b) Gbɛɛ nɔ ɓe a pɔri kɛ maa-tee-sɛŋ kpɛɛi?

¹¹ Yɛɛ berei Ŋala-kɔlɔi e mo lai, maa-tee-sɛŋ ɓa zɛŋ Ziova e dɛɛ a gɛɛ e kusɔnyɔŋ su mɛni lɛɛ nyii pere laa ɓo a gɛɛ kukɛ a naoi. a Le ɓa maa-tee-sɛŋ nyii Ziova e gbɛɛ a gɛɛ ku zɛŋ Adaŋ e naŋ sɔlɔ ɓo polu? E lɛɛ kukili-ŋa a gɛɛ fulu-laa maa waa ɓe Adaŋ da Ii di naŋ. Mɛni ma fulu-laa maa waa nɔ ɓe a pɔri kɛ kumaa teei. (1 Te. 2:​6, NWT) Maa nɛ̃ɛi kɛ nuui kɛ pa maa-tee-sɛŋ kpɛɛi e kɛ a (1) maa waa-nuu; (2) nuu nyii a pɔri kɛ kɛi ɣele ma wɔlɔ-wɔlɔ da wɔlɔ-wɔlɔi; da (3) nuu nyii kɛ ŋwɛlii a gɛɛ e ŋɔfulu-laai tɛɛ a sala kumɛni mai. Bere sii ŋi nɔ ɓe kwa pɔri kɛ vulu-laai Adaŋ e naŋ sɔlɔ ɓoi la polu.

12. Le mɛni ɓe Zisɛ e pɔri maa-tee-sɛŋ kpɛɛi lai?

 ¹² Kwaa mɛni-ŋuŋ saaɓa kaa nyii berei lɛ Zisɛ e pɔri maa-tee-sɛŋ kpɛɛi lai. (1) E kɛ a maa waa, nyaŋ “ve sɔnyɔŋ kɛ ni.” (1 Pi. 2:22) (2) Zisɛ a pɔri kɛ kɛi ɣeniɛ wɔlɔ-wɔlɔ da wɔlɔ-wɔlɔ. (3) E kɛ a nĩa-mɛni a gɛɛ e ŋɔfulu-laai tɛɛ kumɛni ma. (Ib. 10:​9, 10) Zisɛ e kɛ a maa waa-nuu yɛɛ berei Adaŋ e kɛ la a maa waa-nuu e lɛɛ pai sɔnyɔŋ kɛi. (1 Kl. 15:45) Mɛni ma, Zisɛ ŋɔsaai e pɔri gɛi a gɛɛ ku zɛŋ Adaŋ e naŋ sɔlɔ ɓo polu. (Lo. 5:19) Nyiŋi ɓe Zisɛ kɛ a “Adaŋ gbɛɛ ŋai.” Mɛni ma, maa fe nɛ̃ɛ ni kɛ a gɛɛ maa waa-nuu takpɛni e ŋɔnɔ pa a gɛɛ e saa kumɛni ma. Zisɛ “e zalai kelee kula nɔ tɔnɔ.”—Ib. 7:27; 10:12.

13. Le ɓe sɔnyɔŋ maa sala kulaa kɛ a dakpɛni maa-tee-sɛŋ mai?

¹³ Le ɓe sɔnyɔŋ maa sala kulaa kɛ a dakpɛni maa-tee-sɛŋ mai? Sɔnyɔŋ maa sala kulaa ɓa mɛni-kpɛtɛɛ nyii Ɣala e gɛ a gɛɛ laoi-laa lɛlɛɛ e kɛ nyaa da nuu-kpune loai. Maa-tee-sɛŋ ɓa zɛŋ nyii Ziova e dɛɛ a gɛɛ laoi-laa lɛlɛɛ e kɛ nyaa da nuu-kpune loai, nyaŋ zɛŋ ti ɓa Zisɛ ŋãa maa waai nyii e dɛɛ kumɛni mai.—If. 1:7; Ib. 9:14.

MƐNI LƐLƐƐ-ŊAI E PA LAI: ZIOVA E KUŊUŊ MAA ƁO SƆNYƆŊ DA SAA YEEI, E KU TOLI A TƆ̃YA-ƁELA

14. Le ɓe kwa pai naa maa-kɔrii, nyaŋ le mɛni ma?

¹⁴ Mɛni lɛlɛɛ-ŋa kɛɛ leŋ ɓe kwa zɔlɔ ɓo mɛnii su Ziova e gɛ kuɛi? A gɛɛ ku mare-kɛɛ ti sukula, kwa pai lonoi e pilaŋ woo feerɛ sukulai ma nyii Ŋala-kɔlɔi e tii kɛ a dia. Nyiŋi kɛɛ a pai kpɔnii kua ku berei kaa kwa pɔri mɛni lɛlɛɛ sɔlɔ ɓoi la Ziova ŋɔsu-mɛni-lɛɛi sui.

15-16. (a) Ŋooi “maa-tee” sukulai ɓa le Ŋala-kɔlɔi su? (b) Nyiŋi a kulii kɛ leŋ?

¹⁵ Ŋala-kɔlɔi e nɛ a gɛɛ ŋooi maa-tee sukulai ɓa sɛŋ ta maa teɛɛ kpaa nuu ŋuŋ maa ɓoɔɔ a maa-tee-sɛŋ kpɛɛ. Zia-nuui Pitɛ e mo nyɛɛ: “Ka gɔlɔŋ a gɛɛ di kamaa tee mɛni kpɛni-kpɛni-ŋai su nyii-ŋai ka gula kanaŋ-ni yeei. Dife kamaa tee ni a zãai nyii-ŋai da tɛɛi, yɛɛ kane da goo. Kɛlɛ, Korai e kamaa tee a ŋɔŋãa-mɛni kpanaŋɔɔi yɛɛ ɓala-loŋ nyii pɔɔ kelee da fe kɛ ni mai.”—1 Pi. 1:​18, 19.

¹⁶ Maa-tee-sɛŋ sarai, kwa pɔri ŋuŋ-maa-ɓo sɔlɔ ɓoi sɔnyɔŋ da saa yeei. (Lo. 5:21) Kulii nɛ̃ɛi a ŋanaa mɛnii Ziova da Zisɛ daa gɛ kuɛi mɛni ma.—1 Kl. 15:22.

17-18. (a) Ku toliɛ a tɔ̃ya-ɓela sukulai ɓa le? (b) Nyiŋi a kulii kɛ leŋ?

¹⁷ Ku toliɛ a tɔ̃ya-ɓela sukulai ɓa Ziova a ku su mɛni lɛɛ, a nĩa kusɔnyɔŋ ma. Nyiŋi fe nɛi a gɛɛ Ziova a ŋɛi naɣiŋ ŋɔsãa-laai mɛi. Va ku siɣe a tɔ̃ya-ɓela kutii kpanaŋ kɛɛ mɛni ma kpaa e ŋɛi naɣiŋ kusɔnyɔŋ-ŋai mɛi. Kɛɛ Ziova a ku su mɛni lɛɛ kpɛni fei ku laai a maa-tee-sɛŋ nyii nyaa da Zisɛ di gbɛɛi.—Lo. 3:24; Ga. 2:16.

¹⁸ Mɛni lɛlɛɛ kɛɛ leŋ ɓe kwa zɔlɔ ɓo nyiŋi su? Ziova aa ziɣe-zu korai-ɓelai nyii-ŋai da Zisɛ-ni da pai tii kɛi ŋala-taa Kaloŋ-laai sui toli a tɔ̃ya-ɓela, nyaŋ dikaa naa a nonii. (Taitɔ 3:7; 1 Zɔŋ 3:1) Ziova aa disɔnyɔŋ-ŋai su mɛni lɛɛ. Gaa yɛɛ dife ta wɔlɔ sɔnyɔŋ kelee ta kɛ ni, nyaŋ da pɔri kɛi Galoŋ-laai su. (Lo. 8:​1, 2, 30) Nuai kpeli-ŋai nyii Ziova aa di siɣe a tɔ̃ya-ɓelai, da pai kɛi  ɣeniɛ wɔlɔ-wɔlɔ da wɔlɔ-wɔlɔ. Ziova aa disɔnyɔŋ-ŋai su mɛni lɛɛ, nyaŋ dikaa a naoi-ni. (Zĩ. 2:​21-23) Gbɔŋ kɛtɛi su-ɓelai nyii-ŋai pai ɓaloi Amagidɔŋ kɔi sui, da pai kɛi ɣele ma wɔlɔ-wɔlɔ da wɔlɔ-wɔlɔ. (Zɔŋ 11:26) “Dɔ̃ya-ɓelai da diai dife a tɔ̃ya-ɓelai” nyii-ŋai daa saai, da pai dimu siɣei saa yeei. (Dikɛ-mɛni-ŋai 24:15; Zɔŋ 5:​28, 29) Naa polu ma, Ziova fɛli-ɓela kelee nyii-ŋai ŋoo mɛnii nɔii ma ɓɛi, da pai kɛi a ‘Ɣala nonii.’ (Lo. 8:21) Tɔ̃ya ma, kuŋɛi kaa tãi perei kwa pai ŋɔnɔ kɛi la a Kunaŋ nonii maa waa-ŋa!

19. Mɛni maa aa faleŋ leŋ a nɛlɛɛ kumɛni ma? (Ya pɔri ŋɔnɔ basii “ Mɛni Lɛlɛɛ-ŋai Kwa Zɔlɔ Ɓo Zui” kaai.)

¹⁹ Tɔ̃ya ma, kukɛ nɔ yɛɛ nyaŋkpai nyii ku lono e pilaŋ mai nyii gaa-ɓela di diyeei sãa kelee laŋ, gɛ ni di kpa kɛtɛ lɛɛ ma nyii ve kɛ ni wɔlɔ pai pɔrii gbɛɛi. Kɛlɛ Ziova e kpɔŋ maa tɛɛ kupɔ. Zisɛ ŋɔmaa-tee-sɛŋ sarai, Ziova e pere laa ɓo a gɛɛ ku su-mɛni-lɛɛ sɔlɔ ɓo. Kulaa-lai Zisɛ Korai kponoi a kpɔŋ kua a gɛɛ ku ŋuŋ-maa-ɓo sɔlɔ ɓo sɔnyɔŋ da saa yeei. Ziova a kusɔnyɔŋ-ŋai su mɛni lɛɛ, a kɛ nɔ yɛɛ kufe ta wɔlɔ sɔnyɔŋ kɛ ni. Mɛni lɛlɛɛi ɓa, kwa pɔri naa laoi-laa lɛlɛɛ ŋaa-nɛ̃ɛi kulai a kuɣala-taa Naŋ, Ziova.

20. Le ɓe kwa pai maa-kɔrii zɛŋ-lɛɛi ŋi nɛɛ polui su?

²⁰ Kwa kukili-ŋa sia e pilaŋ mɛnii ma Ziova da Zisɛ daa gɛ kuɛi, a kuyee-see-mui maa tɛ dimɛni ma. (2 Kl. 5:15) A kɛ dii wala kpɔŋ maa tɛɛ kupɔ, kili-kɛ-zu kelee ta fei kɛ kuyeei! Kɛɛ mɛni lɛlɛɛ kɛɛ leŋ ɓe ku kelee kwa pɔri zɔlɔ ɓoi Ziova ŋɔsu-mɛni-lɛɛi su? Kwa pai mare-kɛɛ ŋi sukulai kaai zɛŋ-lɛɛi nɛɛ polui su.