Yikusaŵa yakusawusya mnope kwa ŵalombane naga ŵanace wosope akusile ni kutyoka pamlango. Payitendekwe yeleyi acinangolowo akusalipikana mpela ali mlendo kwa jwine ni mjakwe. Mundu jwine jwamlijiganye pangani sya maŵasa lina lyakwe M. Gary Neuman jwatite, “Ngusinakamucisya ŵandu ŵajinji ŵalombane kuti atande kunonyelanasoni. Ŵanace wosope patyosile pamlango [acinangolo] ngakusanonyela kunguluka yimpepe, kapena kuŵecetana yakulukosi.” *

Ana mwelemu ni mwayiŵelele yindu mu ulombela wawo? Naga yili m’yoyo akadandawula, yili yakomboleka kutandilasoni kunonyelana. Candanda kwende tulole ligongo lyakwe yeleyi yikusatendekwa.

Kulongosya yakusosecela ya ŵanace. Acinangolo ŵajinji akusakola nganisyo syambone pakulingalinga kupata yakusosecela ya ŵanace ŵawo, nambope kulongosya mnope yakusosecela ya ŵanace kupunda ya mu ulombela wawo nganikuŵa kwambone. Yeleyi yikusatendekasya acinangolowo kuti akanonyelanaga ligongo akusaŵika nganisyo syawo syosope pakusamalila ŵanace. Kundanda yeleyi yangawonecela, nambo yikusawonecela cenene ŵanacewo pakusile ni kutyoka pamlango. Jwamkongwe jwine jwali paulombela jwatite, “Ŵanace ŵetu paŵaliji pamlango wosope twalinjililaga kutendela yindu yimpepe.” Nambo ŵanacewo paŵakusile ni kutyoka pamlango jwatite, “Jwalijose jwakwete yakulinga yakwe.” Ndaŵi jine jwalakwe jwayikene pakwasalila ŵamkwakwe kuti, “Jwalijose atendeje yakwe.”

Kulepela kulikosecelesya mkanipaŵe. Buku jakolanjikwa kuti Empty Nesting jatite, “Ŵanace wosope patyosile pamlango ŵandu ŵajinji ŵalombane akusalipikana mpela agambile kulombana kwene.” Ligongo lyakuyiwona kuti ali ŵakulekangana pa yindu yejinji jwalijose akusatenda yakwe. Akusatenda yindu mpela ŵandu ŵakutama nyumba jimo ŵanganaŵasoni paulombela.

Nambo ngani jakusangalasya jili jakuti mpaka yikombolece kumasya yakusawusya yeleyi ni kutandilasoni kunonyelana pandaŵi jele ŵanace ŵawo atyosile pamlango. Baibulo mpaka jakamucisye kutenda yeleyi. Kwende tulole.

Ajiticisyeje yindu payicenjile. Baibulo pakusala ya ŵanace ŵakusile jikusati, “Jwamlume cacaleka baba ni mama ŵakwe.” (Genesis 2:24) Acinangolo akusosekwa kumanyilila kuti ukumu wawo wuli kwajiganya ŵanace ŵawo pali ŵacinondipile yindu yakuti ciyakamucisye msogolo pakusile. Naga acinangolo akusaganisya mwamti m’yoyo, ngasadanduwula ŵanacewo pakusile ni kutyoka pamlango.—Lilemba lyakamucisya: Maliko 10:7.

Atamose kuti ŵanace pakusile ni kutyoka pamlango mpaka ajendelecele kwakamucisya, nambope ngakusosekwa kwalamulilaga pacilicose mpela mwenye. Kucengaku mpaka kwapeje upile wekulungwa wakusamalila yakusosecela ya ŵamkwawo, kwineku ali mkwendelecela kwakamucisya ŵanace ŵawo. *—Lilemba lyakamucisya: Matayo 19:6.

Aŵecetaneje mwagopoka. Aŵeje ŵagopoka kutagulilana ni ŵamkwawo mwakutite pakwakwaya kutyoka kwa ŵanacewo pamlango. Aŵeje ŵakulitimalika soni ŵakoseka kumpikanicisya mjawojo mwakupikanila. Mpaka yijigale ndaŵi kuti atandilesoni kunonyelana mpela mwaŵatendelaga pandanda, nambope kutenda mtawu mpaka kukole yakuyicisya yambone.—Lilemba lyakamucisya: 1 Akolinto 13:4.

Atagulilaneje yalumo yakusaka kwanilisya. Mpaka atagulilane yakulinga yakusosekwa kwanilisya yalumo kapena yindu yasambano yakusosekwa kuyimanyilila. Pakuŵa aŵele ali mkulela ŵanace ŵawo kwa yaka yejinji, wuli ngakamulicisya masengo yalijiganyisye pandaŵiji pakwakamucisya ŵane?—Lilemba lyakamucisya: Yobu 12:12.

Aŵeje ŵakusimicisya kunonyelanasoni mpela pandanda. Mpaka atende cenene kuganicisya ndamo syambone syasyatendekasisye kuti aŵe paulombela ni ŵamkwawo. Aganicisyesoni yalumo yindu yakusangalasya yaŵatendaga soni yakusawusya yaŵakombwele kumalana nayo. Pambesi pakwe yiciŵa yangasawusya kutendelasoni yindu yimpepe, ŵanace ŵawo patyosile pamlango. Kusala yisyene, naga wosope akusatenda mtawu pakusaka kuti yindu yitandesoni kwenda cenene, yiciŵa yangasawusya kutanda kunonyelana mpela mwayaŵelele ali alombene kwene.