UNDUMETUME wetu uli wakusosekwa mnope. Nambope ngaŵa ŵandu wosope ŵatukusalalicila ŵakusapikanicisya yeleyi. Atamose kuti ŵandu ŵane akusakola lung’wanu ni utenga wa m’Baibulo, nambo ngakusakuwona kusosekwa kwakuti alijiganyeje nawe Baibulo.

Kwende tulole cisyasyo ca Gavin. Jwalakwe ŵatandite kusimanikwa pa misongano nambo ŵakanaga kulijiganya Baibulo. Jwalakwe ŵatite, “Nganimanyililaga yejinji yakwamba Baibulo, nambo nganisakaga kuti ŵandu amanyilile yeleyi. Nganisakaga kwinjila dini jilijose ligongo najogopaga kuti calambusye.” Ana akuganisya wuli? Ana Gavin ngamkanakunda kuti alijiganyeje Baibulo? Iyayi. Aganicisye ya umbone wampaka mundu apate naga akulijiganya Baibulo. Yehofa ŵasalile ŵandu ŵakwe ŵakala kuti, “Maloŵe gangu gacituluka mpela mangame, mpela wula jakuwasya pa manyasi.” (Deut. 31:19, 30; 32:2) Yindu yine yakwayana ni mangame yikusalosya yampaka tutende kuti twakamucisye mwakwayika pamtima ŵandu ŵamitundu josope mu undumetume.—1 Tim. 2:3, 4.

Mangame gakusatuluka panandipanandi. Mangame gakusapaganyikwa panandipanandi pandaŵi jele cinyesi cacili mu mbepo cikusacenga nikuŵa tudondo twa mesi. Maloŵe ga Yehofa ‘gatulukaga mpela mangame’ m’litala lyakuti ŵaŵecetaga kwa ŵandu ŵakwe mwakulitimalika soni mwakwaganicisya. Mpaka tujigalile cisyasyo ca Yehofa naga tukucimbicisya yakusakulupilila ŵane. Tukusalimbikasya ŵandu kuti aganicisyeje yatukwasalila ni kusagula jika yakutenda. Patukutenda yeleyi, ŵandu caciwupocela cenene utenga wetu soni undumetume wetu ucijawula pasogolo.

Mangame gakusajoloŵesya. Patukuganicisya matala gakulekanganalekangana gakwakamucisya ŵandu kuti alijiganye usyesyene, undumetume wetu ukusakamucisya ŵandu kuti ajoloŵe mitima jawo. Mwambone, Gavin jwatumsasile kundanda kula nganamkanganicisya kuti atande kulijiganya Baibulo. M’malo mwakwe, m’bale juŵamsalile ulendo wandanda kuti alijiganyeje najo Baibulo, lina lyakwe Chris ŵapatile matala gakulekanganalekangana gakumkamucisya Gavin kuti akole lung’wanu lwakulijiganya Baibulo. Chris ŵamsalile Gavin kuti Baibulo jikwete utenga wakusosekwa mnope, soni kuumanyilila utengawo mpaka kumkamucisye kupikanicisya yatukusalijiganya kumisongano. Kaneko, Chris ŵamsalilesoni Gavin kuti yakulocesya ya m’Baibulo ni yayamkamucisye jwalakwe kulupilila kuti yajikusasala Baibulo yili yisyesyene. Yeleyi yakamucisye kuti jemanjaji atande kutagulilana yejinji yakwamba yakulocesya ya m’Baibulo. Yaŵatagulilanagayi yajoloŵesye mtima wa Gavin mwati ŵakundile kulijiganya Baibulo.

Mangame gakusakamucisya kuti yakumela yikawa. Pandaŵi jele wula nganijigwaga m’cilambo ca Yisalayeli, mesi gajumulaga soni kwatendaga citukuta mnope. Yikaŵe kuti nganikutendaga mangame gagapelekaga cinyesi ku yakumela, nikuti yosope yikawile. Yehofa ŵasasile mkanipaŵe kuti moŵa agano cikusoŵeje mesi gausimu mwati ŵandu cakoleje njota jakusaka “kupikana maloŵe ga Yehofa.” (Amosi 8:11) Yehofa ŵasasilesoni kuti Aklistu ŵasagulwe caciŵa “mpela mangame gakutyocela kwa Yehofa” pakulalicila utenga wa Ucimwene pampepe ni ‘ŵangondolo sine.’ (Mika 5:7; Yoh. 10:16) Ana tukusawuwona utenga watukusalalicila mpela mangame gausimu gakutyocela kwa Yehofa?

Mangame gali majali gakutyocela kwa Yehofa. (Deut. 33:13) Undumetume wetu mpaka uŵe majali kwa ŵandu ŵane. Gavin ŵapocele majali gelega. Paŵalijiganyaga Baibulo, jwalakwe ŵapatile kwanga kwa yiwusyo yakwe yosope. Jwalakwe ŵajawile pasogolo mpaka ŵabatiswe. Apano Gavin pampepe ni ŵamkwakwe lina lyakwe Joyce akusangalala kamula masengo gakulalicila yimpepe.

Kuganicisya mwagakusaŵela mangame mpaka kutulimbikasye kuti tuyiwoneje yatukusatenda mu undumetume kuŵa yakusosekwa mnope. Ligongo cici? Kadondo kamo ka mesi nganikaŵa kakamucisye mnope, nambo pakawanganyicilene ni madondo gejinji ga mesi gakusakamucisya kuti pasi paŵe cinyesi. Mwakulandana ni yeleyi, yakusatenda mundu pajika mu undumetume mpaka yiwonece kuŵa yangakwanila. Nambope, yakusatenda ŵakutumicila ŵa Yehofa wosope pamo yikusakamucisya kuti twayicile “ŵandu ŵamitundu josope” ni utenga wambone. (Mat. 24:14) Ana undumetume wetu uciŵa majali kwa ŵandu ŵane? Elo, naga utenga watukusalalicila ukuŵaga mpela mangame.