PANDAŴI jele matumbela galimbanaga ni sitima pa nyasa ja Atlantic pakwawula ku Europe, jumo mwa ŵandu ŵaŵakwesile mwelemu, George Young, jwaganicisyaga yakuyicisya yambone pa masengo ga Ucimwene gaŵatesile ku Brazil. * Nambope, pajwajendelecelaga ulendo wakwewu, M’bale Young jwatandite ganicisya ya undumetume wakwe wasambano wakuja kulalicila ku mikuli ja ku Spain soni Portugal. Mikuliji jaliji jekulungwa soni jangalalicidwa citandilile. Ali ayice kumaloku, jwalakwe jwakosecelaga kwika kwa M’bale J. F. Rutherford kukuŵeceta ngani sya m’Baibulo soni ya masengo gagaŵila tupepala twakwana 300,000.

Ali ayice mu msinda wa Lisbon, mu 1925, M’bale Young jwasimene kuti mumsindamu yindu yaliji yili yisokonecele. Mu 1910, ŵandu ŵamasisye ulamusi wakola jwakulamulila jumo soni ŵasumwile ulamusi wa Calici ca Cikatolika. Sambano ŵandu ŵapatile ufulu. Nambope m’cilambomu mwapalipe ngondo.

Mpela muyaŵelele kuti M’bale Young jwakosecelaga kuti M’bale Rutherford cayice kukuŵeceta ngani, nombe nawo ŵa boma ŵaŵisile ulamusi wa asilikali pakogopa kuti ŵandu ŵane mpaka ayice ni kusumula bomajo. Mlembela jwa ciwanja ca British and Foreign Bible Society jwamsalile M’bale Young mwakumsimicisya kuti casimane ni ŵakusisya. Nambope M’baleju, jwapite kukuŵenda nyumba jine mwakusatendela mang’asi gakulimbisya cilu ku Sukulu ja Sekondale, mwamti ŵakundile.

Kaneko pa May 13, M’bale Rutherford jwaŵecete ngani jakwe. Ŵandu ŵajinji ŵayice kukupikanila nganiji. Papali yikalata yaŵakomile m’mapupa soni ŵalembile manyusipepala ya ngani jaŵaŵecete M’bale Rutherford ja mtwe wakuti, “Mwampaka Tuŵele ni Umi Pacilambo Capasi Mpaka Kalakala.” Mwacitema, ŵandu ŵakusisya ŵalembile ngani mu nyusipepala pakusaka kwakalamusya acimlongola ŵadini syawo kuti kuyice “ŵakulocesya ŵaunami.” Pamlango wakwinjilila m’nyumba jakuŵecetela ngani jila, ŵandu ŵakusisya ŵapelegenye tumapepala twawo twakusisya yijiganyo ya M’bale Rutherford.

Nambope atamose kuti papali yakulingalinga ya ŵandu ŵakusisyaŵa, ŵandu ciŵandika 2,000 ŵalepele kwinjila m’nyumbaji ligongo lyakusoŵa malo. M’nyumbaji, ŵandu ŵane ŵalung’wanu ŵakwelaga m’makwelelo. Ŵane ŵajimaga pa yisyano yakutendela mang’asi gakulimbisya cilu ligongo lya winji wa ŵandu. Nambope papali yakusawusya yine. Ŵandu ŵakusisya ŵagambaga kugumila soni gombanya mipando. Nambo M’bale Rutherford jwajendelecele kuŵeceta ngani jakwe mwamti mpaka jwakwesile pa tebulo kuti ŵandu ampikaneje. Ali amalisisye ngani jakwe, ciŵandika sikati cilo ŵandu ŵalung’wanu ŵakupunda 1,200 ŵapelece mena gawo soni ma adilesi gawo pakusaka kuti apocele mabuku gakutagulila ya Baibulo. Lisiku lyakuyicisya, nyusipepala jine ja O Século jawandisye ngani ja M’bale Rutherford.

Mu September 1925, Sanja ja Mlonda ja Cipwitikisi ŵatandite kujiwandisya m’cilambo ca Portugal. (Yeleyi  mkaniyitande, Magasiniji ŵajiwandisyaga ku Brazil.) Pandaŵiji, Jwakulijiganya Baibulo jwine, lina lyakwe Virgílio Ferguson, jwatandite kulinganya yakusamila ku Portugal kuti akakamucisye pamasengo ga Ucimwene. M’baleju mkanaŵe kusamila ku Portugal, jwaliji ali akamwile undumetume ni M’bale Young pa ofesi ja nyambi jine jakwe jamwana ja ku Brazil. Panyuma pakwe Virgílio jwanyakwice ni ŵamkwakwe, Lizzie, kumkuyasoni M’bale Young. Kwika kwa M’bale Ferguson kwaliji cikamucisyo capandaŵi jakwe, ligongo M’bale Young yaliji yakuti casamilesoni ku mikuli jine kukulalicila, kupwatikapo cilambo ca Soviet Union.

Pandaŵi jaŵalamulilaga asilikali m’cilambo ca Portugal, ŵandu ŵakulagasya ŵatupagasoni. M’bale Ferguson nganawujila panyuma mwamti jwatesile yakomboleka pakusaka kukacenjela kakuga kamwana ka Ŵakulijiganya Baibulo soni kukamucisya mnope pa masengo ga Ucimwene. Jwalakwe jwajile kukuŵenda kuti amkunde kukamulicisya masengo nyumba jakwe kutendela misongano. Mu October 1927, kuŵenda kula ŵakujiticisye.

M’caka candanda ca ulamusi wangalwewu, ŵandu ciŵandika 450 ŵa ku Portugal, ŵaŵalangaga magasini ga Sanja ja Mlonda. Konjecesya pelepa, kupitila m’tumapepala soni tumabuku, usyesyene wawandile mpaka kuja kwika ku Angola, Azores, Cape Verde, East Timor, Madeira, soni Mozambique.

Mu 1929, mundu jwine jwaciŵeceto ca Cipwitikisi juŵaliji namalima, lina lyakwe Manuel da Silva Jordão, jwayice ku Lisbon. Pandaŵi jaŵaliji ku Brazil, jwalakwe jwapikanile ngani jaŵaŵecete M’bale Young. Jwalakwe jwapikanicisye usyesyene mwamti jwaliji jwakoseka kumkamucisya M’bale Ferguson kwawusya pasogolo masengo gakulalicila. Kuti akombole kutenda yeleyi, jwalakwe jwatandite kutumicila mpela kopotala, lina lyaŵamanyikaga nalyo kala, nambo apano akusati mpayiniya. Ligongo lyakuti papali dongosolo jambone jakugaŵila mabuku gakutagulila ya Baibulo, mipingo jasambano ja mu Lisbon jakusile mwacitema.

Mu 1934, Mbale ni Mlongo Ferguson ŵasosekwe kuwujilasoni ku Brazil. Nambope mbeju sya usyesyene syaliji sili sipandidwe. Ku Europe mkatikati mwa ndaŵi jakusawusya, pa ndaŵi ja ngondo ja m’cilamboco soni ndaŵi ja Ngondo jaŵili ja pacilambo cosope, kakuga ka abale ni alongo ku Portugal kajendelecele kuŵa kakulupicika kwa Yehofa. Kwa kandaŵi kamnono kakugaka kawonekaga mpela cikamale, nambo mu 1947 m’mishonale jwandanda juŵatesile nawo Sukulu ja Gilead, lina lyakwe John Cooke, ali ayice m’cilamboci, kakugaka katanditesoni kwenda cenene. Kaneko ciŵalanjilo ca ŵakulalicila ya Ucimwene cajendelecele kutupa. Atamose kuti boma jalekasisye masengo ga Mboni sya Yehofa mu 1962, ciŵalanjiloci cajawulaga pasogolo. Mu December 1974, panyuma pakuti boma jijiticisye kuti Ŵamboni sya Yehofa atendeje yindu yawo mwagopoka, papali ŵakulalicila ŵakupunda 13,000 m’cilamboco.

Masiku agano, utenga wa Ucimwene wa Mlungu ukulalicidwa ni ŵandu ŵakupunda 50,000, m’cilambo ca Portugal soni mu yilumba yakulekanganalekangana kwakusaŵeceta Cipwitikisi, kupwatikapo cilumba ca Azores soni Madeira. Ŵane mwa ŵakulalicilaŵa ali mbagwilo jatatu ja ŵandu ŵaŵapikanile ngani jajaŵecetedwe ni M’bale Rutherford mu 1925.

Tukusayamicila Yehofa soni abale ni alongo ŵakulupicika ŵaŵalongolele mwakulimba mtima masengo ga Ucimwene mpela ‘ŵamasengo ŵa Klistu Yesu ŵakutumicila ŵandu ŵamitundu jine.’​—Alo. 15:15, 16.​—Nganiji jityocele ku Portugal.