“Ngaŵa kuti Ŵamboniwo ŵagambaga kwasangalalila ŵandupe, nambo ŵatusangalalilagasoni tupwa twangu. Lisiku line jumo mwa achakongwe ŵaŵajimi mwakuŵandikana ni shelefu lina lyakwe Elaine, ŵatupele yakulya tupwa twangu tula. Kaneko panapitagapitaga chiŵandika Ŵamboni ŵala, tupwa twangu tula twasakaga kwawula papaliji Ŵamboniwo kuti akatupesoni yakulya yila.

“Papitile miyesi jejinji. Tupwa twangu twasangalele ni yakulya yila, unesoni nasangalele mnope ni yindu yatwakambilene ni Ŵamboniwo. Nambo nganisakaga kuti mbechetaneje ni jemanjajo yindu yejinji. Pandawi jelejo naliji ndili ngwete yaka yakupunda 70 , soni nganimanyililaga yakusakulupilila Ŵamboniwo. Ligongo lyakuti naliji ndili ndengwiche ni yagakusatenda machalichi gejinji, nalinganyisye yakuti nalijiganye Baibulo jika.

“Pandaŵi jelejo, mmalo gejinji mtawunimo nawonaga Ŵamboni ŵajinji ali ajimi chiŵandika shelefu jawo ja mabuku. Nombe jemanjajo ŵawonekaga ŵakusangalala. Jemanjaji ŵajangaga yiwusyo ya m’Baibulo mwakupikanika chenene. Yeleyi yandendekasisye kuti nakulupilileje ŵandu ŵeleŵa.

“Lisiku line, Elaine jwambusisye kuti, ‘Ana akusakulupilila kuti yinyama yili mtuka wakutyochela kwa Mlungu?’ Ni najanjile kuti, ‘Kwabasi, ngusakulupilila yeleyo.’ Kaneko Elaine jwambalanjile Yesaya 11:6-9. Yasangalesye mnope, atamose kuti pandaŵijo nganingundaga kupochela mabuku.

“Kaneko, natandite kusangalala ni ngani syatwakambilanaga ni Elaine yalumo ni ŵamkwakwe lina lyawo Brent. Jemanjaji ŵambendile kuti mbalanje Baibulo kutandila buku ja Mateyu mpaka Masengo kuti manyilile yayikusagopolela kuŵa Mklistu jusyesyene. Mwamti naŵalasile. Mkanipapite ndaŵi, najitichisye kuti jemanjaji anjiganyeje Baibulo. Mwaliji mkatikati mwa chaka cha 2016.

“Kaneko natandite kuliwona kuchelewa lisiku lyakulijiganya Baibulo wiki jilijose soni lyakwawula ku misongano ja mpingo. Natandite kusangalala soni kuyiwona kuti ngwete upile ligongo lyakulijiganya yisyesyene yajikusasala Baibulo. Pali papitile chaka nabatisidwe. Apano ngwete yaka 79, soni ngusayiwona kuti ngumtumichila Mlungu m’litala lyakusalijitichisya. Yehofa ambele upile wekulungwa mwakungunda kuŵa m’liŵasa lyakwe lya ŵandu ŵaŵalipeleche kwa jwalakwejo.”