1, 2. Ana jwalijose jwetuwe akusosekwa kusimicisya ya cici? (Alole ciwulili cacili penanipa.)

MPELA mwatuyiwonele mungani jipite jila, Satana akusaŵeceta mwakusisya kuti Yehofa ngakusalamulila cenene soni kuti ŵandu mpaka asangalaleje pakulilamulila acimsyenepe. Ana yakusaŵeceta Satanayi yili yisyene? Awanicisye kuti ŵandu ŵakusasagula kulilamulila acimsyene akutama ni umi kwangamala. Ana yindu mpaka yajendeleje cenene jemanjaji pali pangali ulamusi wa Mlungu? Ana wawojo akaŵele ŵakusangalala yikaŵe kuti akutama kwangamala ali mkulilamulila jika?

² Pangali jwampaka ŵajanjile yiwusyo yeleyi. Jwalijose akusosekwa kujiganicisya jika nganiji. Pakutenda yeleyi mpaka asimicisye kuti ulamusi wa Mlungu ni wawuli wakuŵajilwa soni wambone mnope. Tukusosekwa kukamucisya ulamusi welewu ni mtima wosope. Kwende tulole maumboni gane ga m’Baibulo gakututendekasya kulupilila kuti Yehofa jika ni jwali jwakuŵajilwa kulamulila.

3. Ligongo cici Yehofa jika ni jwakuŵajilwa kulamulila yakupanganyikwa yosope?

³ Yehofa ni jwali jwakuŵajilwa kulamulila yakupanganyikwa yosope ligongo lyakuti jwalakwe ali Mlungu jwamaciligose soni  Mkupanganya. (1 Mbiri 29:11; Mase. 4:24) Pa Ciunukuko 4:11, pakusasala ya mesomkulola gakulosya ŵa 144,000 ali mkuŵeceta kuti, “Ali ŵakuŵajilwa wawo Yehofa Mlungu jwetu kupocela lumbili ni ucimbicimbi soni macili, ligongo ŵapanganyisye yosope, soni ligongo lyakusaka kwawo yapali soni ŵayipanganyisye.” Yisyene, ligongo lyakuti Yehofa ŵapanganyisye yindu yosope, jwalakwe akwete ufulu wosope wakwalamulila ŵandu soni yakupanganyikwa yausimu.

4. Ligongo cici kwimucila ulamusi wa Mlungu kuli kamulicisya masengo ufulu mwakulemweceka?

⁴ Satana nganapanganya cilicose. M’yoyo, jwalakwe nganakola ufulu wakusisya ulamusi wa Mlungu. Yaŵatesile Satana soni liŵasa lyandanda pakwimucila ulamusi wekulungwa wa Mlungu, yalosisye kuti jemanjaji ŵaliji ŵakulikwesya. (Yer. 10:23) Yili yisyene kuti jemanjaji ŵakwete ufulu wakusagula. Nambo ana ŵasosekwaga kuwukamulicisya masengo ufuluwo pakwimucila ulamusi wa Mlungu? Iyayi. Kola ufulu wakusagula kukusakamucisya ŵandu kuti akomboleje kusagula yindu yejinji yakuŵajilwa. Nambope, ufuluwu ngawukusapa upile wakuti amjimucile Mkupanganya jwawo soni Jwakwapa umi. Kusala yisyene, kumjimucila Yehofa kuli kukamulicisya masengo ufulu mwakulemweceka. Mpela ŵandu, tukusosekwa kuŵa pasi pa ulamusi wakulungama wa Yehofa.

5. Ligongo cici mpaka tuŵe ŵakusimicisya kuti yakusasagula Mlungu yili yakuŵajilwa?

⁵ Panasoni ligongo line lyakumtendekasya Yehofa kuŵa jwakuŵajilwa kulamulila. Jwalakwe akusalamulila mwacilungamo. Jwalakwe ŵasasile kuti, ‘Une ndili Yehofa, jwangusalosya cinonyelo cangamala, kupeleka camuko soni kutenda yacilungamo pacilambo capasi, pakuŵa ngusasangalala ni yindu yeleyi.’ (Yer. 9:24) Yehofa ngakusajendela malamusi gaŵapanganyisye ŵandu kuti amanyilile yayili yakuŵajilwa. Jwalakwe ali msyene cilungamo, soni ligongo lya cilungamo cakweco ŵapelece malamusi gakulembedwa kwa ŵandu. “Cilungamo soni camuko yili cilimbilimbi ca citengu [cakwe] ca ucimwene,” m’yoyo mpaka tuŵe ŵakusimicisya kuti malamusi gakwe, soni yakusasagula yili yakuŵajilwa. (Sal. 89:14; 119:128) Mwakulekangana ni yeleyi, Satana, atamose kuti akusasisya kuti ulamusi wa Yehofa uli wakuŵajilwa, nambo alepele kutendekasya kuti pacilambopa paŵeje cilungamo ndaŵi syosope.

6. Ligongo cici Yehofa ali jwakuŵajilwa kulamulila yakupanganyikwa yosope.

⁶ Yehofa alisoni jwakuŵajilwa kulamulila ligongo lyakuti akwete umanyilisi soni lunda lwakusamalilila yakupanganyikwa yosope. Mwambone, agambe ganisya yaŵatesile Mlungu pakumpa Mwanagwe macili gakuposya yilwele yele madokotala nganigakombolaga kuyiposya. (Mat. 4:23, 24; Maliko 5:25-29) Kwa Yehofa, yeleyi nganiyiŵa yakusimonjesya. Jwalakwe akusamanyilila cenene mwacikusakamulila masengo cilu soni mpaka akombole kulinganya yiliyose yayijonasice. Jwalakwe akwetesoni macili gakwimusya ŵawe soni kulekasya ngosi syacipago.

7. Ana lunda lwa Yehofa luli lwakulekangana camtuli ni lunda lwa m’cilambo ca Satanaci?

⁷ Cilambo cakulongoleledwa ni Satanaci cikulingalinga kupata matala gakumacisya maukangani pacilambopa nambo ngacikukombola. Yehofape ni jwakwete lunda lwakuyikasya mtendele pacilambo cosope. (Yes. 2:3, 4; 54:13) Patukulijiganya ya umanyilisi soni lunda lwa Yehofa, tukusapikana mumtima mpela muŵapikanile ndumetume Paulo juŵalembile kuti, ‘Yisyene, majali gakusapeleka Mlungu gali gejinji, soni lunda ni umanyilisi wakwe yili yakusokoka! Pangali jwampaka amanyilile camuko cakwe soni kopocela matala gakwe.’—Alo. 11:33.

8. Ana akusapikana wuli mumtima pakumanyilila yakusatenda Yehofa pakulamulila?

⁸ Baibulo ngajikusagamba kusala kuti Yehofa ni jwali jwakuŵajilwa kulamulila. Nambo jikusasalasoni  ligongo lyakwe ulamusi wakwe uli wapenani mnope kulekangana ni wa ŵane. Ligongo limo lili lyakuti jwalakwe akusalamulila mwacinonyelo. Kusala yisyene, mitima jetu jikusaŵa jakusangalala mnope kumanyilila yakusati pakukamulicisya masengo ulamusi wakwe. Jwalakwe ali “jwacanasa, jwangatumbila citema soni jwacinonyelo cisyesyene soni jwa usyesyene.” (Eks. 34:6) Mlungu akusatenda yindu ni ŵakutumicila ŵakwe mwakuwusimana mtima soni mwaucimbicimbi. Jwalakwe akusatusamalila mnope kulekangana ni mwampaka tulisamalilile acimsyewe. Mwakulekangana ni yakusasala Satana, Yehofa ngakusiŵajima ŵakutumicila ŵakwe ŵakulupicika yindu yambone. Jwalakwe ŵayikene pakupeleka Mwanace jwakwe jumopejo kuti ŵandu akole cembeceyo cakutama ni umi wangamala.—Aŵalanje Salimo 84:11; Aloma 8:32.

9. Ana tukumanyilila camtuli kuti Mlungu akusalosya lung’wanu kwa jwalijose pajika?

⁹ Yehofa akusiŵanonyela ŵandu wosope mpela likuga. Nambo jwalakwe akusalosyasoni lung’wanu kwa jwalijose pajika. Aganicisye yayatendekwe pandaŵi jele Yehofa ŵakamulicisyaga masengo ŵakulamula kuti alongoleleje mtundu wa Ayisalayeli soni kwagomeka acimmagongo wawo. Mkati mwa ndaŵi ja yakusawusyaji, jwalakwe ŵatesile lung’wanu mnope ni mundu jwine jwanganaŵa Myisalayeli, lina lyakwe Lute. Jwalakwe ŵalesile yindu yosope yene ligongo lyakusaka kulambila Mlungu jwakuwona. Yehofa ŵamjaliwe jwalakwe mwakumpa jwamlume soni mwanace. Konjecesya pelepa, Lute pacacijimuka ku ŵawe, cacimanyilila kuti mwanace jwakwe jwaliji mu msele wele Mesiya ŵapagwile. Agambe ganicisyasoni mwacacisangalalila Lute kumanyilila kuti mbili jakwe jalembedwe m’buku ja m’Baibulo jakolanjikwa ni lina lyakwe!—Rute 4:13; Mat. 1:5, 16.

10. Ligongo cici mpaka tujile kuti ulamusi wa Yehofa nganiwuŵa wangalwe?

¹⁰ Ulamusi wa Yehofa nganiwuŵa wangalwe. Jwalakwe akusiŵapa ŵandu ufulu soni cisangalalo. (2 Akoli. 3:17) Daudi ŵasasile ya Yehofa kuti, “Lumbili ni ucimwene yili ni jwalakwe [Mlungu]. Macili soni cisangalalo yili pakutama pakwe.” (1 Mbiri 16:7, 27) Jwamalumbo Etani ŵalembilesoni kuti, “Ŵakusangalala ali ŵandu ŵakusagumila mwakusangalala. Akusajenda m’kuŵala kwa pameso pawo, wawo Yehofa. Akusasangalala m’lina lyawo lisiku lyosope, soni cilungamo cawo cikusakwesya.”—Sal. 89:15, 16.

11. Ana mpaka tusimicisye camtuli kuti ulamusi wa Yehofa uli wambone mnope?

¹¹ Patukuganicisya ndaŵi ni katema ya umbone wa Yehofa, tukusasimicisya mnope kuti ulamusi wakwe uli wambone mnope. Tukusayikana pakupikana mumtima mpela muŵapikanile jwamalumbo juŵasasile kuti, “Kutama lisiku limo m’nyumba jawo kuli kwambone mnope kupunda kutama masiku 1,000 kulikose!” (Sal. 84:10) Ligongo cici yili m’yoyo? Mpela Mkupanganya jwacinonyelo, Yehofa akusamanyilila yatukusasosecela kuti tuŵeje ŵakusangalala yisyesyene, soni akusatupa yatukusasosecelayo mwakoloŵa magasa. Yiliyose yakusatusalila Yehofa kuti tutende yikusaŵa yakutukamucisya soni yikusatuyikacisya cisangalalalo, atamose yiŵe yakuti citusosekwe kulijima yineyakwe.—Aŵalanje Yesaya 48:17.

12. Ana cici cacikusatulimbikasya kuti tukamucisyeje ulamusi wekulungwa wa Yehofa?

¹² Baibulo jikusalosya kuti panyuma pa yaka 1,000 ya ulamusi wa Klistu, ŵandu ŵane cacisagula kwimucila ulamusi wekulungwa wa Yehofa. (Ciu. 20:7, 8) Ana cici cacicatendekasya? Pakuŵa pandaŵiji Satana caciŵa ali amgopwele ku ukayidi wakwe, jwalakwe cacilingalingasoni kwasokonasya ŵandu, mpela mwaŵele ali mkutendela. Jwalakwe cacilinga kwatendekasya ŵandu kulupilila kuti mpaka akombole kutama ni umi kwangamala mwangampikanila Yehofa. Nambo yeleyi ngaŵa yisyene. Ni, ana  tucikunda kulupilila unami wakwewo? Naga tukusamnonyela Yehofa soni kumtumicila ligongo lya umbone wakwe, soni naga tukusasimicisya kuti jwalakwe ali jwakuŵajilwa kulamulila yakupanganyikwa yosope, nikuti ngasitujiticisya amta panandi unami welewo. Tucisacilila kutama ni umi pasi pa ulamusi wa Yehofa, jwakusalamulila mwacinonyelo.

13. Ana kutenda yindu mwakamulana ni yakusasaka Mlungu kukusalosya camtuli kuti tukukamucisya ulamusi wakwe?

¹³ Kusala yisyene, tukusosekwa kukamucisya ulamusi wekulungwa wa Yehofa ni mtima wosope. Mpela mwatuyiwonele, jwalakwe ali jwakuŵajilwa kulamulila, soni ulamusi wakwe uli wambone mnope. Mpaka tukamucisye ulamusi wekulungwa wa Yehofa mwakwendelecela kumtumicila jwalakwe mwakulupicika. Ana mpaka tukamucisyesoni ulamusiwu camtuli? Mwakutenda yindu mwakamulana ni yakusasaka Yehofa. Patukutenda yeleyi, tukusalosya kuti tukusamnonyela jwalakwe soni tukukamucisya ulamusi wakwe.—Aŵalanje Aefeso 5:1, 2.

14. Ana mitwe ja maŵasa soni acakulungwa ŵa mumpingo mpaka amsyasye camtuli Yehofa?

¹⁴ Tukusalijiganya m’Baibulo kuti Yehofa akusakamulicisya masengo ulamusi wakwe mwacinonyelo. Mwakamulana ni yeleyi, mitwe ja maŵasa soni acakulungwa ŵa mumpingo ŵakusanonyela ulamusi wa Mlungu ngasatenda yindu mwangalwe kapena kutenda ulamusi pa ŵane. Mmalo mwakwe cacimsyasya Yehofa. Ndumetume Paulo ŵalinjilile mwamtawu kumsyasya Mlungu soni Yesu. (1 Akoli. 11:1) Paulo nganiŵatesyaga sooni ŵane kapena kwakanganicisya kuti atende yakuŵajilwa. Nambo jwalakwe ŵasalilaga mwakwacondelela. (Alo. 12:1; Aef. 4:1; Fil. 8-10) Pakutenda m’yoyo, jwalakwe ŵaliji ali mkumsyasya Yehofa. Sonitu wosope ŵakusanonyela soni kukamucisya ulamusi wa Yehofa akusosekwa kutendaga yeleyi.

15. Ana kucimbicisya ŵakusatulongolela kukusalosya camtuli kuti tukusanonyela ulamusi wa Yehofa?

¹⁵ Litala line lyakukamucisya ulamusi wekulungwa  wa Yehofa lili kamulana ni ŵandu ŵakusatulongolela soni kwacimbicisya. Atamose yili yakuti ngatukupikanicisya yasagwile kapena ngatukukamulana nayo, tukusosekwape kamucisya. Yeleyi yili yakulekangana mnope ni yayikusatendekwa kucilamboku, nambo ni yakusasosekwa kutenda wosope ŵali pasi pa ulamusi wa Yehofa. (Aef. 5:22, 23; 6:1-3; Ahe. 13:17) Patukutenda yeleyi, tukusapata maumbone gejinji, pakuŵa Mlungu akusatusosela yambone.

16. Ana yakusagula yetu mpaka yilosye camtuli kuti tukusakamucisya ulamusi wa Mlungu?

¹⁶ Mpaka tulosyesoni kuti tukusakamucisya ulamusi wekulungwa wa Mlungu kupitila mu yakusagula yetu. Yehofa ngakusapeleka malamusi pa cilicose. Nambo akusagamba kutusalila nganisyo syakwe pakusaka kutulongolela. Mwambone, jwalakwe ngakusasala mtundu wa yakuwala yayili yakuŵajilwa kwa Aklistu. Nambo akusagamba kutusalila kuti tuwaleje soni kulisalalisya mwakuŵajilwa mpela Aklistu. (1 Tim. 2:9, 10) Jwalakwe akusasakasoni kuti tukasagulaga yindu yakwakuŵasya ŵane. (1 Akoli. 10:31-33) M’yoyo naga tukusagula yindu, ngaŵape pakuya yakusaka yetu, nambo mwakamulana ni nganisyo sya Yehofa, tukusalosya kuti tukusanonyela soni kamucisya ulamusi wakwe.

17, 18. Ana Aklistu ŵalombane mpaka akamucisye ulamusi wa Yehofa m’matala gapi?

¹⁷ Aganicisye ya mbali jine jele Aklistu ŵalombane mpaka akamucisye ulamusi wa Yehofa. Tuwanicisye kuti liŵasa ngalikwenda cenene mpela muŵaganicisyaga, soni mwine akusimana ni yakusawusya yekulungwa. Naga yili m’yoyo, mpaka atende cenene kuganicisya mwele Yehofa ŵatendelaga yindu ni mtundu wa Ayisalayeli. Jwalakwe ŵawuwonaga mtunduwu mpela ŵamkwakwe. (Yes. 54:5; 62:4) Ulombela welewu waliji wakusawusya mnope. Tukusala m’yoyo ligongo lyakuti mtunduwu wamlemwecesyaga ndaŵi ni katema. Nambo Yehofa nganajasa mtima mwacitema. Jwalakwe ŵaŵele ali mkuwukululucila mtunduwu mwakuwilisyawilisya soni kusunga cilanga caŵatesile kwa jemanjaji.—Aŵalanje Salimo 106:43-45.

¹⁸ Aklistu ŵalombane ŵakusamnonyela Yehofa akusalingalinga kujigalila cisyasyo cakwe. Jemanjaji ngakusapata matala gangakamulana ni malemba gakumacisya ulombela wawo. Akusamanyilila kuti Yehofa ŵalumbikenye pampepe soni akusasaka kuti jemanjaji akalekangana. Malemba gakusamkunda jwine kumasya ulombela ni kuŵa jwagopoka kulombana ni jwine naga mjakwe jwa mu ulombela atesile cikululu. (Mat. 19:5, 6, 9) Naga Aklistu ŵalombane akutenda yosope yampaka akombole kuti ulombela wawo ujendeje cenene, akusaŵa ali mkukamucisya ulamusi wakulungama wa Yehofa.

19. Ana tukusosekwa kutenda cici patulemwisye?

¹⁹ Pakuŵa tuli ŵangali umlama, ndaŵi sine tukusamlemwecesya Yehofa. Jwalakwe akusamanyilila yeleyi, soni ni ligongo lyakwe ŵapelece ciwombolo ca Klistu. M’yoyo, patulemwisye, tukusosekwa kum’ŵendaga Yehofa kuti atukululucile. (1 Yoh. 2:1, 2) Mmalo mwakwendelecela kulipikana kuti tuli ŵakulemwa, tukusosekwa kulingalinga kulijiganya kutyocela pa yakulemwa yetuyo. Tukusosekwa kum’ŵandicila Yehofa, jwampaka atukululucile soni kutukamucisya kupola mwausimu ni kwendelecela kumtumicila jwalakwe.—Sal. 103:3.

20. Ligongo cici tukusosekwa kukamucisya ulamusi wa Yehofa apanopano?

²⁰ M’cilambo casambano, jwalijose caciŵa pasi pa ulamusi wekulungwa wa Yehofa soni cacilijiganya matala gakwe gakulungama. (Yes. 11:9) Nambope, atamose apano tukusalijiganya yejinji yakwamba matala ga Yehofaga. Soni ngani jakwamba ulamusi wa Yehofa nganijiŵe kumala. M’yoyo ajino jili ndaŵi jakamucisya ulamusi wekulungwa wa Mlungu mwakwendelecela kumpikanila jwalakwe, kumtumicila mwakulupicika, soni kulingalinga kumsyasya jwalakwe mu yosope yatukusatenda.