Buku ja Ngani Syambone sya Luka jikusasala ya Yesu ali mkuwugula mpukutu wa Yesaya. Jwalakwe ŵawuŵalasile, kaneko ŵawuwugele. Nombe najo Yohane, cakumbesi kwa buku ja Ngani Syambone sya Yohane, ŵalembile kuti nganakombola kulemba mu mpukutu yosope yaŵatesile Yesu.—Luka 4:16-20; Yohane 20:30; 21:25.

Ana mipukutuji ŵajipanganyaga mwatuli? Ŵalumbikanyaga mapende kapena yindu yine yati mpela mlulu ni kupanganya kaguwo kakomboleka kulembapo. Kaguwoka ŵakakulungaga pa katela mwati mbali jelembejo jaŵaga mkati. Mkatimo ŵagaŵaga tumbali twamwanamwana ni kulemba maloŵe. Naga mpukutu wuli welewu ŵawuŵicilaga tutela tuŵili mumbesi mwakwe. Pakusaka kupata pakuti aŵalanje, ŵakakulungaga kaguwoka mbali jimo ja katelako ni gopolanyaga mbali jineji mpaka ali apapatile pakupasakapo.

Buku jine jagopolela maloŵe ga m’Baibulo jikusati, “Mipukutu jine jaŵaga jelewu kwana mikono likumi pajitambasukwile mwati buku jimo ja m’Baibulo jakombolekaga kwana pa mpukutu umo.” Mwambone, mpukutu wa buku ja Ngani Syambone ja Luka pawutambasukwile komboleka kuti wakwanaga mikono 9 ni litika. Mipukutu jine, ŵajikatilaga cenenepe mumbali mwakwemu ni kujikulukuta kaneko ŵajisalalisyaga.

Kutandila pandaŵi jele mtundu wa Ayisalayeli watandite kuŵa ni ŵambopesi, mundu jumope ni juŵaŵaga pa ukumu wa jwambopesi jwamkulungwa. Jwalakwe ŵatumicilaga kwa umi wakwe wosope. (Numeri 35:25) Aloni ni juŵaliji jwandanda kutumicila pa ukumu welewu. Kaneko, ukumuwu wapelecedwaga kwa mwanace jwamlume jwamkulungwa. (Eksodo 29:9) Ŵajinji mwa ŵanace ŵacalume ŵa Aloni ŵatumicile mpela ŵambopesi, nambo ŵamnono ni ŵaŵatumicile mpela ŵambopesi ŵacakulungwa.

Nambo, naga mtundu wa Ayisalayeli ujigalidwe ukapolo, ŵakwalamulilawo ni ŵaŵasagulaga ŵambopesi ŵacakulungwa kapena kwatyosya. Yikuwoneka kuti ndaŵi syejinji ŵambopesi ŵacakulungwa ŵasagulidwaga m’maŵasa gakuŵalanjikape, mnopemnope ŵakutyocela mu msela wa Aloni. Papalisoni “acakulungwa ŵambopesi” ŵaŵalolelaga ŵambopesi wosope. M’likuga lya acakulungwa ŵambopesi ŵapwatikagamo acakulungwa ŵaŵalongolelaga makuga 24 ga ŵambopesi. Ŵapwatikagasoni ŵandu ŵakumanyika ŵakutyocela m’maŵasa ga ŵambopesi, soni ŵambopesi ŵacakulungwa ŵaŵatyosyegwe pa ukumuwu, mwambone Anasi.—1 Mbiri 24:1-19; Matayo 2:4; Maliko 8:31; Masengo 4:6.