Abale ni Alongo Ŵalosisye Chinonyelo
YOMARA ni achalumbugwe ŵali Marcelo soni Hiver akusatama m’kamusi kamwana ku Guatemala. Yomara jwatandite kulijiganya Baibulo ni ŵa Mboni sya Yehofa, kaneko mwangakaŵilisya nombenawo achalumbugwe ŵatandite kulijiganya. Nambope papali chakusawusya. Ŵandu wosopeŵa ŵaliji ŵangalola, soni nganamanyililaga kuŵalanga mabuku ga ŵandu ŵangalola. Myoyo pakusaka kwakamuchisya mundu juŵajiganyaga jwaŵalanjilaga ndime soni malemba.
Yalijisoni yakusawusya kwa jemanjaji kuti akasimanikweje kumisongano ja mpingo. Yaliji yakusawusya kuti ajende jika lutando lwa maminisi 40 kuti akayiche ku Nyumba ja Uchimwene. Nambo chakusangalasya chaliji chakuti abale ŵalinganyisye yakuti akajigaleje kwawula kumisongano. Paŵatandite kwapa mbali pamisongano ja mkati mwa wiki, abale ŵakamuchisyaga jemanjaji kwinjisya pa mtima yachakaŵechete pakutenda chisyasyo chawo.
Mu Meyi 2019 misongano ja mpingo jatandite kutendechela m’musi mwawo. Pandaŵiji yaliji yakuti liŵasa line lyalyatendaga upayiniya wakutamilichika lyatandite kutama m’musi mwawomu. Atamose kuti liŵasali nganilimanyililaga kulemba soni kuŵalanga mabuku ga ŵandu ŵangalola, nambope lyakwete chakulinga chakwakamuchisya ŵandu ŵatatuŵa kuŵalanga soni kulemba. Mwamti liŵasali lyajawulaga kulayibulale kuti akalijiganye mabuku ga ŵandu ŵangalola soni yampaka atende pakwajiganya ŵanduŵa.
Marcelo akupeleka ndemanga pa misongano ja mpingo
Pali pamasile miyesi jamnono ŵandu ŵatatu ŵala ŵatandite kuŵalanga mabuku ga ŵandu ŵangalola mwangasawusya, yeleyi yakamuchisye kuti alimbisye unasi wawo ni Yehofa. Apano Yomara, Marcelo, soni Hiver akutenda upayiniya wakutamilichika. Nambosoni Marcelo ali jwakutumichila jwakamuchisya. Wiki jilijose jemanjaji akusatenda yejinji pakumtumichila Yehofa. Kulipeleka kwawo pakumtumichila Yehofa kukusikwakamuchisya ŵane kuti nombenawo atande kulipeleka.
Ŵandu ŵatatuŵa ali ŵakusangalala mnope ni yakusatenda abale ni alongo pakwakamuchisya mwachinonyelo. Yomara ŵasasile kuti, “Kutandila palisiku lyatwasimene ni ŵa Mboni sya Yehofa, jemanjaji aŵele ali mkutunonyela yisyesyene.” Marcelo jwasasilesoni kuti, “Tukwete achimjetu ŵambone ku mpingo watukusasongana, nambosoni tuli m’liŵasa lyakamulana lya pachilambo chosope chapasi.” Yomara ni achalumbugweŵa akwembecheya mwachidwi lisiku lyele chachichiwona chilambochi chili paladaiso.—Sal. 37:10, 11; Yes. 35:5.
