Ngani jajipite jila, tuyiweni yindu yiŵasasile Yesu. Yindu yiŵasasileyi yikupeleka umboni wamachili wakuti Uchimwene wa Mlungu ŵawutamilikasisye kwinani, soni Mwenye jwakwe ali Yesu Klistu.

Baibulo jasasile kuti Yesu paŵatandite kulamulila ŵamtyosisye Satana pampepe ni yiŵanda yakwe kwinani. Yitendo ya Satana yitendekasisye kuti ŵandu alajeje soni yindu yiŵele mkusakala mnope kutandila mu 1914.—Chiwunukuko 12:7, 9.

Atamose kuti yindu yisakele mnope, Yesu jwali Mwenye jwa Uchimwene wa Mlungu atesile yindu yakwakamuchisya ŵandu pachilambopa. Masengo gakwiganya Baibulo pachilambo chosope gaŵasasile Yesu, gakwakamuchisya ŵandu kumanyilila yajikusasala Baibulo soni mwampaka akamulichisye masengo yiwundo ya m’Baibulo pa umi wawo. (Yesaya 2:2-4) Ŵandu ŵajinji, alijiganyisye kola ndamo syambone, kola liŵasa lyakusangalala soni kuti ajikutileje ni yindu yakwete. Ŵanduŵa akulijiganya mwampaka achenjele umi wawo apano soni akutenda yakuti aŵajilwe mu Uchimwene wa Mlungu.

Atamose kuti Yesu akulamulila kwinani, maboma ga ŵandu gakulamulilape pachilambo chapasi. Nambope, Mlungu ŵamsalile Yesu kuti, “Mlamulile pasikati pa amagongo ŵenu.” (Salimo 110:2) Yesu chiŵajonanje ŵakusisya wosope ni kwatendela yambone ŵandu ŵakusampikanila Mlungu.

Pachangakaŵapa Uchimwene wa Mlungu chiwutende yakuyichisyayi:

• Uchimasya madini gaunami. Madini gagakusajiganya yaunami yakwamba Mlungu soni kutendekasya kuti umi wa ŵandu uŵeje wakusawusya chachigatyosya. Baibulo jikusawanichisya dini jaunami ni liwule. Konanjidwa kwakwe kuchasimonjesya mnope ŵandu ŵajinji.—Chiwunukuko 17:15, 16.

• Uchimasya ulamusi wa ŵandu. Uchimwene wa Mlungu uchimasya maulamusi gosope ga ŵandu.—Chiwunukuko 19:15, 17, 18.

• Uchityosya ŵandu ŵakusakala. Ana ŵandu ŵakusatenda yakusakala soni ŵakusakana kumpikanila Mlungu yichamalila wuli? Baibulo jikusasala kuti, “Ŵandu ŵangalumbana, Mlungu tachasinga kwatyosya pachilambo chapasi.”—Misyungu 2:22.

• Uchimasya machili ga Satana soni yiŵanda. Satana soni yiŵanda yakwe, chachaponya mwisimbo soni ngasakombola ‘kulambusyasoni mitundu ja ŵandu.’—Chiwunukuko 20:3, 10.

Ana yeleyi yichakwaya chamtuli ŵandu ŵakusawujitichisya Uchimwene wa Mlungu kuti walamulileje?

Yesu jwakulamulila kwinani mpela Mwenye, chachikwanilisya yejinji kupunda yagaŵele mkutenda maulamusi ga ŵandu. Jwalakwe chachikamusyangana kulamulila yimpepe ni ŵa 144,000 ŵasagulidwe pachilambo chapasi. (Chiwunukuko 5:9, 10; 14:1, 3) Chachilolechesyasoni kuti chakulinga cha Mlungu chitendekwe pachilambo chapasi. Ana Uchimwene wa Mlungu uchatendela chichi ŵandu ŵachachitamaga pachilambo chapasi?

• Uchimasya yilwele ni chiwa. “Pangali atamose jumo mchilambomo jutachiŵecheta kuti, ‘une ngulwala,’” soni “ngasipapagwa chiwa.”—Yesaya 33:24; Chiwunukuko 21:4.

• Uchiyikasya mtendele usyesyene soni chiteteyo. “Jwalijose tachitama mu mtendele pasikati pa mgunda wakwe wa mipeleya ni nguju, soni pangali jutachajogoya.”—Yesaya 54:13; Mika 4:4.

• Uchapa ŵandu masengo gambone. “Ŵandu ŵangu ŵakusagulidwa tachisangalalila masengo ga makono gawo kwa ndaŵi jajilewu. Ngasakamula masengo pachabe.”—Yesaya 65:22, 23.

• Uchimasya yakusawusya ya chilambo. “Chipululu ni chilambo changali mesi yichisangalala, chilambo chejumu chichisengwa kapena kuti kusangalala ni maluŵa.”—Yesaya 35:1.

• Uchajiganya ŵandu yampaka atende kuti atame ni umi mpaka kalakala. “Umi wangamala ugopolela kuti ŵandu ŵamanyilile ŵalakwe ŵali Mlungu jikape ŵakuwona nipo soni am’manyilile Yesu Klistu juŵamtumile wawojo.”—Yohane 17:3.

Mlungu akusaka kuti wawojo chasangalale ni majali gelega. (Yesaya 48:18) Ngani jakuyichisya, chijisale yampaka atende apano kuti chasangalale ni yindu yayikwika msogolo.