Napagwile mumsinda wakusalala wa Ciudad Mante, wawuli mu upande wa Tamaulipas, ku Mexico. Ŵandu ŵajinji mumsindawu ali ŵambone mtima, soni ŵakoloŵa magasa. Nambope, pandaŵijo msindawu waliji wakogoya ligongo lya tumakuga twakwalagasya ŵandu.

Naliji jwaŵili kupangwa m’liŵasa lya ŵanace mcece ŵacalumepe. Acinangolo ŵetu ŵaliji ŵa Katolika mwati ndili mwanace, nabatiswe mu dini jeleji. Mkupita kwa ndaŵi, najinjile m’kakuga kakwimba nyimbo kucaliciko. Nasakaga kumsangalasya Mlungu ligongo lyakogopa mnope kuti tacinjimba magambo ni kumbonya kumoto kuti ngalajeje kwa umi wangu wosope.

Baba ŵetu ŵalesile ulombela mama ndili ni yaka msano. Yeleyi yambwetece mnope mumtima soni naliwonaga kuti jwangali mate. Wosope kunyumba twanonyelaga babawo mwati nganimbikanicisya ligongo lyakwe atesile yeleyi. Mama ŵakamulaga masengo kwa ndaŵi jelewu kuti akombole kutusamalila ŵanacewe.

Muyaŵelele yindu pandaŵiji, yambaga upile wakutila kusukulu ni kujaga kukunguluka ni acimjangu. Acimjanguwo ŵanjiganyisye kutukana, kwemba, kwiŵa, soni ndewo. Pakuŵa nasakaga kwapunda acimjangu pa cilicose nalijiganyisye mnope yandewo. Nalijiganyisyesoni kamulicisya masengo yida pakumenyana. Naliji mnyamata jwandewo mnope! Ndaŵi syejinji twamenyanaga pakamulicisya masengo wuti, mwati ndaŵi sine ŵandekaga ndili miyasimiyasipe. Mama papikene yeleyi, ŵanjigalaga ni kuwutucila kucipatala. Yeleyi yajonjecesyaga yipwetesi paumi wa mama ŵangu.

Ndili ni yaka 16, kunyumba kwayice Jorge, mjangu junang’andaga najo ndili mwanace. Jwalakwe jwatusalile kuti ali Jwamboni sya Yehofa, soni kuti akusaka kutusalila utenga wakusosekwa mnope. Pakamulicisya masengo Baibulo, jwatandite kusala yakusakulupilila. Naliji mkanimbalanjeje Baibulo. Nasangalele pinamanyilile lina lya Mlungu, soni kulijiganya yakulinga ya Mlungujo. Mjanguju jwatuŵendile wosope kumangwetu kuti tulijiganyeje Baibulo yimpepe, mwati twakundile.

Nasangalele mnope pinalijiganyisye yakuti Baibulo jangajiganya kuti ŵandu tacijawula kumoto. (Salimo 146:4; Mlaliki 9:5) Pinalijiganyisye yeleyi, nalesile kum’wona Mlungu mpela cindu cakogoya. Natandite kum’wona mpela  Mtati jwacinonyelo, jwakwasosela yambone ŵanace ŵakwe.

Pinajendelecelaga kulijiganya Baibulo, nayiweni kuti ngusosekwa kucenga umi wangu. Nasosekwaga kuŵa mundu jwakulinandiya, nambosoni kuleka ndewo. Maloŵe ga pa 1 Akolinto 15:33 gangamucisye mnope. Maloŵego gakusati, “Kusyoŵekana ni ŵandu ŵakusakala kukusajonanga ndamo syambone.” Nayiweni kuti nasosekwaga kuleka kunguluka ni ŵandu ŵandamo syakusakala kuti njenje umi wangu. Nalesile kunguluka ni acimjangu ŵakala ni kutanda kunguluka ni Aklistu ŵasyesyene, ŵandu ŵakusamasya kulekangana kwawo nganisyo, ngaŵaga ni yibagela, nambo pakamulicisya masengo maloŵe ga Mlungu.

Maloŵe gane gagangamucisye gakusimanikwa pa lilemba lya Aloma 12:17-19. Maloŵego gakusati, “Akawucisya cakusakala pa cakusakala. . . . Naga yili yakomboleka kwa wawojo, atameje mwamtendele ni ŵandu wosope. Akawucisya cakusakala, . . . pakuŵa Malemba gakusati, ‘“Kuwucisya kuli kwa une, une ni jwacinjiwucisya,” akuti m’yoyo Yehofa.’” Nayikene pakumanyilila kuti Yehofa tacityosya yakusakala yosope pandaŵi jakwe. Mwapanandipanandi, nakombwele kuleka yandewo yila.

Ngasindiŵalila yayatendekwe cilo cine ndili mkwawula kunyumba. Kakuga ka anyamata ŵaciswamba kangungumucile. Mlongola jwawo jwaliji jwa m’kakuga kane kandewo katwamenyanaga nako mnope kalakala. Munduju jwambutile kumgongo, ni kuŵeceta mwakunjogoya kuti, “M’wucisye tulole!” Ndaŵi jijojo napopesile kwa Yehofa camumtima, kum’ŵenda kuti angamucisye kupilila. Atamose kuti nasacililaga kuwucisya, nambo nakombwele kuwukamula mtima. Lisiku lyakuyicisya nam’weni mlongola jwa kakuga jula ali mkwika capakutalicila ali jikape. Natumbile mnope, mwati nasakaga kum’wucisya, nambo napopesilesoni camumtima, kum’ŵenda Yehofa kuti angamucisye kuwukamula mtima. Yasimonjesye mnope kumpikana mnyamatajo ali mkuŵeceta kuti, “Bwanawe, yinatesile cilo yila, conde mungululucile. Unetu ngusacilila kuŵa mpela m’mwejo, mwati ngusaka kulijiganya Baibulo.” Nasangalele mnope ligongo lyakuti nakombwele kuwukamula mtima! Kaneko, nombe najo jwatandite kulijiganya Baibulo.

Yaliji yakutengusya kuti pandaŵijo wosope ŵamwiŵasa mwetu ŵalesile kulijiganya Baibulo. Nambo kwa unepe, nasimicisye kwendelecela kulijiganyako, soni nginingunda kuti cilicose kapena mundu jwalijose andekasye. Natandite kuyiwona kuti kusongana ni ŵandu ŵakusamnonyela Mlungu mpaka kungamucisye ganicisya yindu yambone, soni yaliji mpela ndili mliŵasa lya ŵandu ŵakamulanicika. Najendelecele kulijiganya Baibulo, mwati mu 1991 nabatiswe ni kuŵa Jwamboni sya Yehofa.

Naliji jwakwanguya kupya mtima, jwakusacilila kwapunda ŵane pa cilicose, soni jwandewo. Nambo maloŵe ga Mlungu gacenjile mnope umi wangu. Masiku agano ngusalalicila utenga wa m’Baibulo kwa jwalijose jwakusaka kupikanila. Kwa yaka 23 yipiteyo namalilaga ndaŵi jejinji ndili mkulalicila.

Kwakandaŵi, nalipelece kamucisya masengo ku likulu lya Mboni sya Yehofa lya ku Mexico. Kweleko, nasimene ni Claudia, jwamkongwe Jwaciklistu jwakulipeleka, mwati twalombene mu 1999. Ngusam’yamicila Yehofa ligongo lyakumba jwamkongwe jwakulupicika!

Twatumicile yimpepe mu mpingo wa Ciŵeceto Camakono ca ku Mexico, kutwajiganyaga ŵandu ya Yehofa. Kaneko, ŵatutumisye ku cilambo ca Belize kuti tukajiganyeje ŵandu Baibulo. Atamose kuti apano nganitukola yindu yejinji, nambo tukusapata yindu yakutukamucisya kuti tusangalaleje.

Pali papite ndaŵi, mama ŵatandilesoni kulijiganya Baibulo kaneko ŵabatiswe. Nambosoni, akuluŵangu, ŵamkwawo soni ŵanace ŵawo ŵaŵili ali Ŵamboni sya Yehofa. Ŵane mwa acimjangu ŵanalijiganyaga nawo Baibulo nombe nawo apano akutumicila Yehofa.

Yili yakutesya canasa kuti ŵane mwa ŵamwiŵasa mwetu ŵawile ligongo nganacenga mtima wawo wandewo. Yikaŵe kuti nganindeka yandewoyi, none apano kukaliji kwangali. Nguyamicila Yehofa ligongo lyakungamucisya kuti nam’ŵandicile, soni kuti mbe paunasi ni ŵandu ŵakusamlambila jwalakwejo. Ŵanduŵa ŵanjiganyaga mwakuwusimana mtima soni mwacinonyelo kuti ngamulicisyeje masengo Maloŵe ga Mlungu paumi wangu.