Mlungu ŵapele upile ŵandu wakuti aŵecheteje najo yakulukosi kwawo kupitila mwipopelo. Jwakutumichila Daudi jwapopesile kuti, “Ŵalakwe ŵakupikana lipopelo, ŵandu wosope tachiyika kwa ŵalakwe.” (Salimo 65:2) Nambo ana mpaka tupopele chamtuli kuti Mlungu ajanjeje mapopelo getu?

Wawojo pakupopela kwa Yehofa ‘amsalileje yakusawusya yawo yosope’ soni mwakupikanila mumtima. (Salimo 62:8) Mlungu jwamachili mnope akusasangalala ni mapopelo gakutyochela pasi pamtima.

Atamose kuti Mlungu akwete mena gejinji ga udindo, nambo jwalakwe akwete lina lyakwe lisyesyene. Jwalakwe jwatite, “Une ndili [“Yehofa,” NWT], lina lyangu ni lyelelyo.” (Yesaya 42:8) Lina lyakuti Yehofa m’Maloŵe ga Mlungu likusasimanikwa ka 7,000. Ŵakutumichila ŵa Mlungu paŵapopelaga ŵakamulichisyaga masengo lina lyakuti Yehofa. Mwachisyasyo Abulahamu jwatite, “Chonde [“Yehofa,” NWT] mkasimundumbilila patimbechetesoni.” (Genesesi 18:30) M’wejisoni tukusosekwa tulikamulichisyeje masengo lina lya Mlungu lyakuti Yehofa patukupopela.

Mlungu akusapikana mapopelo ga yiŵecheto yosope. Maloŵe ga Mlungu gakusasimichisya kuti “Mlungu jwangali lusagu. Jwalijose jwakusamjogopa jwalakwe ni kutenda yindu yambone akusampochela mwangalolela kuti akutyochela mtundu wapi.”—Masengo 10:34, 35.

Nambope, kupwatika pakupopela panasoni yindu yine yatukusosekwa kutenda kuti Mlungu atunonyeleje. Mungani syakuyichisya chitulole yatukusosekwa kutendayi.