M’BALE jwine lina lyakwe Julian ŵatite, “Panapikene cimanyisyo cakuti mwanangu jwamlume amtyosisye mumpingo, nayiweni mpela cilambo cimalile. Jwalakwe ŵaliji mwanangu jwandanda, soni twanonyelanaga mnope. Twatendelagasoni yindu yejinji yimpepe. Pandanda, ŵaliji mwanace jwambone mnope, nambo kaneko ŵatandite kutenda yindu yangaŵajilwa. Kutyocela patwapikene cimanyisyoci, ŵamkwangu agambileje kulila, soni une yalemaga kuti cinatondoye catuli. Ndaŵi syosope twaliwusyaga naga twamlelite cenene.”

Sano, ligongo cici mpaka tujile kuti kumtyosya Mklistu mumpingo kuli kwakamucisya atamose kuti kuli kwakupweteka? Ana Malemba gakusasala yatuli panganiji? Soni ana mundu akusamtyosya mumpingo ligongo cici?

Jwa Mboni sya Yehofa akusamtyosya mumpingo pamagongo gaŵili. Ligongo lyandanda, naga jwa Mboni jwam’batiswe atesile cakulemweceka cekulungwa. Ligongo lyaŵili, naga ngakupitikuka mtima.

Yehofa ngakusajembeceya kuti tutendeje yindu yiliyose mwamlama. Nambope akusasaka kuti tutendeje yindu mwakamulana ni ndamo syakwe syambone. Mwambone, Yehofa akusasaka kuti tuŵambaleje yakulemweceka yekulungwakulungwa mpela cikululu, kulambila milungu jine, wiyi, kuwulaga ŵane, soni kutenda ya usaŵi.—1 Akoli. 6:9, 10; Ciu. 21:8.

Ana ngakwiticisya kuti ndamo syeswela sya Yehofa sili syambone, soni syakutucenjela? Ana ŵani ŵampaka aŵengane ni kutama ni ŵandu ŵamtendele, ŵambone, soni ŵakulupicika? Yosopeyi yikusasimanikwa pasikati pa abale ni alongo ŵetu ŵausimu. Tukusasangalala ligongo lyakuti twamsalile Mlungu pakulipeleka kwetu kuti citutendeje yindu mwakamulana ni malamusi ga m’Maloŵe gakwe.

Nambi wuli naga Mklistu jwam’batiswe atesile cakulemweceka cekulungwa ligongo lya kulopotoka kwakwe? Ŵakutumicila ŵakulupicika ŵa Yehofa ŵakala ŵatesilepo yakulemweceka yekulungwakulungwa, nambo paŵacenjile Mlungu ŵanonyele. Mwenye Daudi ali cisyasyo cakumanyika cenene panganiji. Daudi ŵatesile cikululu, soni ŵawuleje mundu, nambope, jwakulocesya Natani ŵamsalile kuti, ‘Yehofa ŵakululucile ŵalakwe ulemwa wawo.’—2 Sam. 12:13.

Yehofa ŵamkululucile Daudi ligongo lyakuti ŵapitikwice mtima yisyesyene. (Sal. 32:1-5) Lelo jinosoni, jwakutumicila jwa Yehofa mpaka amtyosye mumpingo naga ngakupitikuka mtima kapena naga akwendelecelape kutenda yakusakala. (Mase. 3:19; 26:20) Naga acakulungwa ŵa mumpingo ŵali mu komiti jakwelusya akum’wona mundujo kuti ngakulosya kupitikuka mtima yisyesyene, akusosekwa kumtyosya mumpingo.

Payitendekwe yeleyi, mwine mpaka tuganisyeje kuti kumtyosya mumpingo mundu jwatesile cakulemweceka kuli kumtendela ngalwe, mnopemnope  naga ali mlongo mjetu. Nambope, Maloŵe ga Yehofa gakusatupa magongo gakupikanika gakulosya kuti kutenda yeleyi kuli kwakamucisya.

Yesu ŵasasile kuti “lunda lwa Mlungu lukusawoneka kuti luli lwakuwona malinga ni yitendo yakwe.” (Mat. 11:19) Luli lunda kumtyosya mumpingo mundu jwangakupitikuka mtima ligongo yakuyicisya yakwe yikusaŵa yambone. Kwende tulole magongo gatatu.

Kukusacimbicisya lina lya Yehofa. Ligongo lyakuti tukusamanyika ni lina lya Yehofa, ndamo syetu sikusosekwa kuŵa syakamulana ni linalyo. (Yes. 43:10) Mwambone, ndamo sya mwanace mpaka sitendekasye kuti ŵandu ŵacimbicisyeje kapena kwanyosya acinangolo ŵakwe. M’yoyosoni, ŵandu mpaka amcimbicisye kapena kumnyosya Yehofa mwakamulana ni ndamo sya ŵandu ŵakumanyika ni lina lyakwe. Mu ndaŵi ja Esekiyele, ŵandu ŵamitundu jine ŵawonaga Ayuda kuti ŵamanyikaga ni lina lya Yehofa. (Ezek. 36:19-23) Lelo jinosoni, ŵandu akusiŵawona ŵa Mboni sya Yehofa kuti akusamanyika ni lina lya Yehofa. M’yoyo, naga tukupikanila malamusi ga Yehofa, ŵandu cacicimbicisya lina lyakwe.

Naga tukutenda yakusakala tucisakasya lina lya Yehofa. Ndumetume Petulo ŵasalile Aklistu kuti, “M’ŵeje ŵakumpikanila jwalakwejo, ngakuyaga yimwayikumbilaga pandaŵi jimwaliji ŵangamanyilila. Nambo m’ŵeje ŵaswela mtima mu yosope yimkusatenda mpela Mlungu jwenu juŵam’ŵilasile jemanja ali jwamswela. Paja yilembedwe m’Malemba kuti, ‘M’ŵeje ŵaswela mtima pakuti Une ndili jwamswela mtima.’” (1 Pet. 1:14-16) Yitendo yeswela yikusacimbicisya lina lya Mlungu.

Jwa Mboni sya Yehofa patesile cakulemweceka, acimjakwe, soni ŵandu ŵane komboleka kumanyilila yeleyo. Sano, kumtyosya mundu mumpingo kukusalosya kuti Yehofa akwete ŵandu ŵakusapikanila malamusi gakwe ga m’Malemba kuti ajendelecele kuŵa ŵaswela. Mwambone, m’cilambo ca Switzerland, jwamlume jwine ŵayice ku Nyumba ja Ucimwene ni ŵatite akusaka kuŵa jwa Mboni. Mlumbugwe jwaŵaliji jwa Mboni, ŵaliji ali amtyosisye mumpingo ligongo lyakutenda yakulemweceka. Munduju ŵasasile kuti ŵasakaga kwinjila mpingo “wangalecelela ŵandu ŵakwe kuti atendeje yakulemweceka.”

Kukusakamucisya kuti mpingo ujendelecele kuŵa weswela. Ndumetume Paulo ŵakalamwisye Aklistu ŵa ku Kolinto kogoya kwa kulecelela ŵandu ŵakutenda yakulemweceka mwamele mumpingo. Ŵalandanicisye yakulemweceka ya ŵanduwo ni cakusasaŵilisya cacikusatendesya kuti mtanda wosope usasaŵile. Jwalakwe ŵatite, “Cakusasaŵilisya mikate capanandi cikusasasaŵilisya mtanda wosope.” Kaneko ŵalamwile kuti ‘amtyosye mundu jwakusakalajo pasikati pawo.’—1 Akoli. 5:6, 11-13.

‘Mundu jwakusakala’ juŵamsasile Paulo palilemba lila ŵatesile cakulemweceka cekulungwa. Nambo ŵandu ŵane ŵa mumpingomo ŵatandite kuyiwona yaŵatesileyi mpela yangalemweceka. (1 Akoli. 5:1, 2) Yikaŵe kuti yeleyi ŵayilecelele, Aklistu ŵane akatandite kutenda yindu yakusakala yaŵatendaga ŵandu ŵajinji ŵa mumsindawu. Kulecelela yakulemweceka yamele kukusatendekasya ŵandu ŵane kuti akakuyaga ndamo sya Mlungu. (Mlal. 8:11) Nambosoni, jwatesile cakulemweceka jwangakupitikuka mtimajo mpaka aŵe mpela “maganga gakusisika pasi pa mesi” gampaka gakase cikulupi ca ŵane mumpingo.—Yuda 4, 12, NW.

Kukusamkamucisya jwakulemwajo kumanyilila kuti atesile cakulemweceka cekulungwa. Pandaŵi jine, Yesu ŵaŵecete ya mwanace juŵatyosile pamlango pa babagwe ni kuja kukonaga cipanje cakwe pakucikamulicisya masengo m’matala gakusakala. Mwanace jwamsokoneceleju ŵalijiganyisye m’litala lyakusawusya kuti kutama pamlango pa babagwe kwaliji kwambone. Mwanaceju piŵamanyilile kuti atesile yangalumbana, ŵapitikwice mtima, kaneko ŵayiweni kuti yili cenene kuwujila kwa babagwe. (Luk. 15:11-24) Cisyasyo ca Yesu ca mtati jwa cinonyelo juŵasangalele mwanagwe paŵapitikwice mtima, cikutukamucisya kupikanicisya mwakusapikanilasoni Yehofa. Yehofa akutusimicisya kuti, “Jwangasangalala ni ciwa ca mundu jwakulemwa. Tinjinonyelwa kuti alece kulemwako kuti aŵe ni umi.”—Ezek. 33:11.

Mundu jwamtyosisye mumpingo wa Ciklistu, wawuli liŵasa lyakwe lyausimu, mpaka amanyilile kuti unasi wakwe ni Yehofa, soni Aklistu acimjakwe ujonasice. Yakuyicisya yakusawusya ya kulemwa kwakweko, soni kumbucila ndaŵi jiŵasangalalaga ligongo lyakuŵa paunasi wambone ni Yehofa, soni ni Aklistu acimjakwe, mpaka yimkamucisye kumanyilila kuti ŵatesile cakulemweceka cekulungwa.

 Kuti mundu acenje pakusosekwa kutenda yindu mwacinonyelo, soni mwakusimicisya. Jwamalumbo Daudi ŵatite, “Mundu jwagoloka pambutile, nikuti anonyele mtima mnope. Soni naga anjamwice, yikusaŵa mpela andasile mawuta pamtwe.” (Sal. 141:5, NW) Yeleyi mpaka tuyiwanicisye m’yi: Mundu jwine alileje, ni kaneko nyama jimjimi palukosi, mwati akulepela kupumula cenene, kuŵeceta, soni macili gammalile. Naga mundu jwine ngakumkamucisya mwacitema komboleka kuwa. Kaneko mundu jwine akwisa ni kumputa kumgongo kuti nyamajo jikopoce. Kumputako mpaka kuŵe kwakupweteka, nambo mpaka kukulupusye umi wa mundujo. M’yoyosoni, Daudi ŵamanyilile kuti ŵasosekwaga camuko kutyocela kwa mundu jwagoloka kuti yindu yimjendeleje cenene, atamose cili cakupweteka.

Ndaŵi syejinji, kumtyosya mundu mumpingo kukusaŵa mpela camuko cakusosecela mundu jwatesile cakulemweceka. Pali papite yaka 10, mwanace jwamlume jwa Julian jwatumsasile kundanda jula, ŵacenjile ndamo syakwe, kaneko ŵam’wucisye mumpingo, mwati apano akutumicila mpela jwamkulungwa jwa mumpingo. Mwanagweju ŵatite, “Kundyosya mumpingo kwandendekasisye kuti simane ni yakuyicisya ya ndamo syangu. Nasosecelaga yisyene camuko campela celeci.”—Ahe. 12:7-11.

Kusala yisyene, mundu pamtyosisye mumpingo yikusaŵa yakupweteka mnope, nambo yeleyi ngayikulosya kuti mundujo asakele mnope mwati ngaŵa mkuwujilasoni. Wosopewe tukusosekwa kutenda yindu yakuti camuko campeleco cimkamucisye.

Acakulungwa ŵa mumpingo ŵakwete masengo gakusawusya gakwelusya kuti mundu jwine amtyosye mumpingo akusalinjilila kuya cinonyelo ca Yehofa. Mwacinonyelo, jemanjaji akusamsalila jwakulemwajo kuti amtyosisye mumpingo, soni akusamsalila mwakupikanika cenene yakusosekwa kutenda kuti cam’wucisye. Pakusaka kumkumbusya yeleyi, mkupita kwa ndaŵi acakulungwaŵa akusacingangana ni mundu jwakulosya kuti akucenga yitendo yakwe. *

Ŵamwiŵasa mpaka alosye kuwunonyela mpingo, soni jwakulemwajo pakucimbicisya yasagwile acakulungwa ŵa mumpingo yakumtyosya mundujo. Julian ŵatite, “Mwanangu jula paŵamtyosisye, ŵalijipe mwanangu. Nambo yitendo yakwe ni yayatulekangenye.”

Wosope mumpingo mpaka alosyesoni cinonyelo pakuya yagakusasala Malemba yakuti tuŵambaleje kunguluka, soni kuŵecetana ni jwamtyosyegwe. (1 Akoli. 5:11; 2 Yoh. 10, 11) Kutenda yeleyi kucikamucisya kuti camuko campele Yehofa kupitila kwa acakulungwa ŵa mumpingo ciŵe cakusosekwa. Konjecesya pelepa, mpaka alilosyeje cinonyelo cekulungwa liŵasa lya mundu jwamtyosyegwejo, soni kulikamucisya kuti likapikana mpela lilekangene ni ŵakulupilila acimjawo.—Alo. 12:13, 15.

Julian jula ŵamalisisye ni maloŵe gakuti, “Kumtyosya mundu mumpingo kuli kwakusosekwa, ligongo kukusatukamucisya kuti tutendeje yindu mwakamulana ni ndamo sya Yehofa. Atamose kuti kuli kwakupweteka, nambo yakuyicisya yakwe yikusaŵa yambone. Yikaŵe kuti nalecelelaga yitendo yakusakala ya mwanangujo, jwalakwe ngamkanacenga.”