NGANI JA PANDANDA | ANA ŴA MBONI SYA YEHOFA ALI ŴANI?
Ana ŵa Mboni sya Yehofa Ali Ŵandu Ŵatuli?
Tuli likuga lya dini lyakwima pajika lya pacilambo cosope. Atamose kuti likulungwa lyetu lili ku United States, nambo pana ŵa Mboni sya Yehofa ŵajinji ŵakusatama m’yilambo yakulekanganalekangana. Mwambone, pana ŵa Mboni sya Yehofa ŵakupunda 8,000,000 ŵakwiganya ŵandu Baibulo m’yilambo yakupunda 230. Tukusatenda yeleyi pakuya maloŵe ga Yesu gakuti, “Utenga awu wambone wakwamba ya Ucimwene tiwucilalicikwa pacilambo cosope capasi, kuti uŵe umboni kwa ŵandu ŵa mitundu josope.”
Kulikose kwatukusatama, tukusapikanila malamusi ga boma, nambo tukusalingalinga kuti tukajinjililaga mu yandale. Tukusatenda yeleyi pakuya yaŵatulamwile Yesu kuti tukaŵa “mbali ja cilamboci.” M’yoyo ngatukusajigala nawo mbali mu yandale kapena ngondo. (Yohane 15:19; 17:16) Mwambone, pajatendekwaga ngondo jaŵili ja pacilambo cosope, ŵa Mboni sya Yehofa ŵane ŵataŵile, kwalagasya, soni atamose kwawulaga ligongo lyakuti nganasakaga kwinjilila nawo. Mundu jwine juŵaliji bishopu ku German ŵalembile kuti, “Yili yakupikanika kwa jemanjaji kusala kuti ngakusajigala nawo mbali mu yandale kapena ngondo, ligongo lyakuti mu ulamusi wa Hitler jemanjaji ŵakanile kwinjilila mu ngondo soni yandale.”
“[Ŵa Mboni sya Yehofa] akwete ndamo syambone mnope. Ŵandu ŵangalinonyelaŵa mpaka aŵajilwe kwapa maukumu gapenani m’boma. Nambope nganaŵa akundile kutenda yeleyi. . . Jemanjaji akusacimbicisya ulamusi wa boma nambo akusakulupilila kuti Ucimwene wa Mlungupe ni wampaka ukombole kumasya yakusawusya ya ŵandu.”
Nambope, ngatukusalilekanganya ni ŵandu ŵane. Yesu ŵapopesile kwa Mlungu pakwamba ŵakumkuya ŵakwe kuti, “Nganguŵenda kuti ŵatyosye m’cilambo.” (Yohane 17:15) Ni ligongo lyakwe akusatuwona tuli mkamula masengo, kusuma yindu soni kulijiganya sukulu ni ŵandu ŵakulekanganalekangana.
