Mpela mwayiŵele m’yilambo yejinji, nombe Boma ja Sri Lanka jitamilikasisye malamusi gakulekasya kwendajenda mwachisawawa kuti aŵambale kuwanda kwa ulwele wa Kolonafayilasi. Pakusaka kupikanila malamusiga, abale ni alongo ŵetu ŵali m’magulu ga chiŵecheto chayala akukamulichisya masengo yipangiso yamakono pakwalalichila ŵandu ŵangapikana soni ŵakusalajilila kupikana.

Mlongo jwine jwakutenda upayiniya lina lyakwe Vihanga Fernando, akusalalichila mwakulemba yikalata. Ligongo lyakuti ŵandu ŵajinji ŵangapikana akusalajilila kuŵalanga, mlongoju akusajambulaga yipikicha yakulondesya maloŵe ga m’Baibulo.

Mlongo Rosie Chithravelautham jwayiwonaga kuti nganaŵa akombwele kutendesya majiganyo ga Baibulo kupitila pa fidiyo. Jwalakwe jwatite, “Munyumamu panajimbile ŵandu ŵane ŵangapikana netiweki jasawusyaga mwamti ŵane nganakombolaga kupikanichisya yanaŵechetaga pakamulichisya masengo chiŵecheto chayala. Nambo mlongoju jwasakaga kupitilisya utumiki wakwe mundaŵi ja mliliwu. Jwalakwe jwalinganyisye yakulinjililasoni. Kutandila ndaŵi jelejo akusakombola kutendesya majiganyo ga Baibulo gatatu, soni ŵakulijiganyawo akusakombola kutenda nawo misongano kupitila pa fidiyo.

Mlongo jwine jwangapikana lina lyakwe Nirosha Shiranthi, jwaŵabatisidwe mu Malichi 2020, jwamalene ni woga wakulalichila kupitila pa foni. Jwalakwe jwamsalile Yehofa ya nganiji. Panyuma pakwe jwawuchisye upayiniya wakamuchisya mundaŵi ja Chikumbuchilo. Ŵandu ŵajinji ŵangapikana ŵakundile kuŵechetana ni Nirosha, mwanti ŵajinji ŵasakaga kumanyilila yejinji yakwamba yimanyilo ya m’masiku gakumalisya. Mlongoju jwakombwele kutandisya majiganyo gane ga Baibulo gakwana 7. Jwalakwe jwatite, “Pangombwele kulalichila ngusasangalala mnope. Atamose kuti tukwamba kutama pamlango, nambope mpaka tukombole kulalichila. Ndaŵi syosope Yehofa akusakwanilisya yakulinga yakwe.” Mlongo Nirosha jwalinganyisye yakuti apitilisye kutenda upayiniya wakamuchisya.

Yili yakusangalasya kupikana yindu yakulimbikasyayi kutyochela ku Sri Lanka. Yeleyi yili yakuyichisya yambone yayipali ligongo lyakulipeleka kwa abale ni alongo ŵangapikana soni ŵakusalajilila kupikana pakulichimbichisya lina lya Yehofa.—Salimo 113:1.