Uw Rogon e Muun Rrum U Wan’ Got?

EN NI Sunmiydad, ma baadag ni nge fel’ rogodad ko tin nib fel’ e der yog ndab da unumed ban’en ni yima chingaw ngay. Ke pi’ e wain ni nge pi’ e felfelan’ ko girdi’, nge ‘gapgep ko olive ni ngan felan’ ngay, nge flowa ni nge pi’ gelngiy.’ (Psalm 104:15) Immoy bayay ni un Jesus Kristus nga reb e madnom ko mabgol me pilyeg e ran nge “ngal’ ni wain.”​—John 2:3-10.

Ba puluw ni ngad lemnaged ni manang e En Tasunmiy e n’en nra rin’ e pi n’en ni yima chingaw ngay nga dowdad nge man’ey rodad. Baadag ni nge ‘fil ngodad e tin nib fel’,’ ma be ginangey u murung’agen e chingaw. (Isaiah 48:17) Mu tay fanam i yan ko pi fonow ni baaray:

Dab mu balyanggad ko wain, ya ra kirebnagmed; machane nge sugnagmed [“gelngin Got nib thothup,” NW].” (Efesus 5:18) “Piin ni . . . yad ma balyang ko rrum . . . [e] dariy bagayad e mit i girdi’ ney nrayog ngorad e gin nsuwon Got.” (1 Korinth 6:9-11) Be yog e Bible nib kireb e “balyang ko rrum,” nge “mur ni yibe wagagey u fithik’.”​—Galatia 5:19-21.

Ere chiney e ngad weliyed boch i riy’en e unum nib pag rogon.

Riy’en e Unum nib Pag Rogon

Pi n’en ni yima chingaw ngay e bay boch ban’en riy nib fel’, machane ku bay boch ban’en u fithik’ nib gel ni ma thilyeg rogon ni ma maruwel e man’ey nge dowef. Baaray boch e magawon nra sum ko unum nib pag rogon:

Unum nib pag rogon e ma balyangnagey nge ‘dabkiyog ni ngan lem’ nib fel’ rogon. (Proverbs 23:33) Allen ni kan weliy murung’agen faram e yog ni gaar: “Unum nib pag rogon e gathi kemus nra kirebnag dowey ya ku ra kirebnag e lem nge ngongol. Ga ra chingaw ma da ku mur lemnag laniyan’ boch e girdi’.”

Unum nib pag rogon e ma chuweg e tamra’. Be ginangey e Thin rok Got ni gaar: “Wain e be chuweg e gonop rok e girdi’ rog ma be balyangnagrad!” (Hosea 4:11) Uw rogon? Nap’an nra chingaw be’ ma pi n’en ni ma lemnag nge pi n’en ni baadag ni ma tay nib mith e goo ra weliy ni gubin me rin’, ma ki mo’maw’ ni nge rin’ e tin nib fel’. Maku reb e rayog ni nge k’aring ni nge rin’ ban’en nra kirebnag e tha’ u thilrow Got.

 John e ra chamgow e ppin rok me yan nga bar. Ka fini tabab ko unum ni nge pofeg lolugen me yib be’ nib pin ngak. De n’uw nap’an ni kar unumew me un John ngak fare pin nga ranow. Tomuren mi ri kalngan’ ko n’en ni ke rin’. Faan gomanga de chingaw ma dabi rin’ ban’en ni aram rogon.

Wenegan e unum nib pag rogon e dabkiyog ni ngan gagiyegnag e thin nge ngongol. Be yog e Bible ni gaar: “Mu dag ngog be’ ni ma muun rrum ni ba adag ni nge unum e rrum ni kan athukuy ban’en ngay ni nge fel’ lamen, mu gu dag ngom ni ir be’ ni be par nib gafgow ma be kireban’ ngak, ma gubin ngiyal’ ni be ngongliy e tin nib tagan ma gubin ngiyal’ ni be gun’gun’. Be par lan owchen nib row ma be maad’ad downgin, ni maad’ad nrayog ni ngan ayuwegey riy nge dabi yib.” (Proverbs 23:29, 30) Nap’an ni ga ra chingaw ma “gowa ga bay u p’ebugul e wulyang ko barkow ni be yin’ e day u rigur ni kam mislal.” (Proverbs 23:34) Be’ ni ke chingaw e ra od ma gowa kan ‘li’, machane da ki nang.’​—Proverbs 23:35.

Unum nib pag rogon e ra k’aring boor mit e m’ar. “Ra yan i reb e rran riy ni kadbul, ma ga be thamtham rom ni gowa k’adem ba porchoyog ni bay e yub u fithik’ e nguboch rok.” (Proverbs 23:32) Boor e togta ni kar micheged nriyul’ e re thin nu proverbs nem. Ba kireb e unum nib pag rogon ni bochan e rayog ni nge k’aring boor mit e cancer, nge hepatitis, nge m’ar ko ad, nge pancreatitis, me warnag e racha’ ko girdi’ nib m’ar ko suga, nge stroke, nge m’ar ko gum’ircha’ nge ku boch e m’ar nib kireb. Maku reb e rayog ni nge unum be’ nib pag rogon nge mada’ ko ngiyal’ ni ke aw me par ndaki nang ban’en fe yim’. Machane, bin th’abi gel e kireb riy e dariy rogon nga dow be’.

Wenegan Nth’abi Kireb. Ku ra damur unum ngam ching, ma rayog ni nge magawonnagem ko tirok Got ban’en. Ba tamilang ni be yog e Bible ni gaar: “Gafgow gimed! Gimed be od nri kakadbul ngam tababniged e unum, me blayal’ mi gimed parnag e chingnag nge n’uw e nep’!” Mang fan? I yog Isaiah fan ni gaar: “Dar tamilangan’med ko mang e be rin’ Somol.”​—Isaiah 5:11, 12.

Be yog e Bible ndab ud chaggad “ngak e girdi’ ni tamuun rrum.” (Proverbs 23:20) Maku kan fonownag e piin kar puwelwolgad “ndab ra manged sib ko wain.” (Titus 2:3) Mang fan? Som’on nra tabab be’ ko unum e buchuuw, ma ra munmun me yoor i yan nge mada’ ko ngiyal’ ni ke mo’maw’ ni nga i mol ya be gaar u wan’, “Thingar gu wan ngkug unum e rrum bayay.”  (Proverbs 23:35) Faanra ur ar’arnaged e unum ni kakadbul ni bochan e ra unumed nib pag rogon u reb e rran, ma aram e pow riy ni bay e magawon rorad.

Be yog e Bible ni piin ni yad ma balyang ko rrum, ma yad ma un ko madnom ni yima wagey riy, nge mur ni yima unum e rrum riy e “bayi taw nga ba ngiyal’ nra bagayad ma thingari weliy ngak Got urngin e ngongol ni i rin’.” (1 Peter 4:3, 5) Ki ginangey Jesus u murung’agen e ngiyal’ ney ni gad be par riy ni gaar: “Mu ayuwgad, ma dab mpaged gimed nguum pired ni ba ga’ ni mur ni ke pag rogon nge muun rrum e gimed be maruweliy, nge pi n’en ni ma magafan’uy ngay ko biney e tamilang, ya richey mi gimed da’da’ ko re Rran nem ni ke taw ngomed. Ya ra taw ngak urngin e girdi’ nu fayleng ni bod rogon ba wup ni pangthal.”​—Luke 21:34, 35.

Ere mang e rayog ni nge rin’ e girdi’ ni aray rogon nge dab kur pared ni goo ‘muun rrum e yad be maruweliy’?

[Picture on page 4]

Boor e magawon nrayog ni nge k’aring e unum nib pag rogon