Mu Pag Jehovah ni Nge Ayuwegem Nge Puf Rogom

“En nra [fal’eg i yaliy] ir nga fithik’ fare motochiyel nrib yal’uw ni ir e ma pithig e girdi’ ko kireb.”​—JAS. 1:25.

RAYOG NI NGAM WELIY?

Mang motochiyel e ma pow’iyey ko bin riyul’ e puf rogon, ma mini’ e ra fel’ rogorad riy?

Mang e n’en ni ngad rin’ed ya nge yog ni nge puf rogodad?

Mang puf rogon e yira pi’ ngak e piin ni yad be fol u kanawoen e yafas?

1, 2. (a) Mang e be buch ko puf rogon ni bay ko girdi’ e ngiyal’ ney? Mang fan? (b) Mang puf rogon e yira pi’ ko pi tapigpig rok Jehovah boch nga m’on?

 GAD be par u ba ngiyal’ ni be yoor i yan e girdi’ nib chogow, ma darur ted fan e motochiyel, ma yad ma cham. (2 Tim. 3:1-5) Aram fan ni ma ngongliy e am boor e motochiyel, ma yad be ayuweg e pi polis rorad ya nge yog ni ngar rin’ed e maruwel rorad nib fel’ rogon, ma yad ma fanay e camera ni ngar nanged ko mang e be rin’ e girdi’. U boch e nam, ma girdi’ riy e yad ma tay boch ban’en nga lan e naun rorad ni nge yib e moro’ro’ ma yad ra nang, maku yad ma tay bokum e lok ko naun rorad ma yad ma fal’eg e yoror ni bay e gamig riy. Boor e girdi’ ndubrad ni nga ranod nga wen ara dubrad ni nge un e bitir rorad ko fafel u wen ndariy be’ ni be matanagiyrad ni rran ara nnep’. Ba tamilang ni gathi ri ka be puf rogon e girdi’ i yan, ma be gel i yan e re magawon ney.

² U lan fare milay’ nu Eden, me yog Satan nrayog ni nge puf rogon e girdi’ ni faanra dab ra folgad ko motochiyel rok Jehovah. De riyul’ e n’en ni ke yog! Bin riyul’ riy, e girdi’ ni ma darifannag e motochiyel rok Got e ra gafgow. Ma pi tapigpig rok Jehovah e ku yad ra gafgow ya be gel i yan e kireb ko fayleng. Machane, bay e athap rodad boch nga m’on ndakuriy e girdi’ ni ta denen nge girdi’ nib sasalap, ma rayog ni ngad uned ko n’en ni be yog e Bible ni gad ra “un ko flaab rok pi fak Got.” (Rom. 8:21) Bin riyul’ riy, e ke tabab Jehovah ni nge fal’eg rogon e ngiyal’ ney ya nge yog ni nge un e pi tapigpig rok ko re flaab ney. Uw rogon?

3. Mang motochiyel e ke pi’ Jehovah ngak pi gachalpen Kristus? Mang boch e deer ni gad ra weliy?

³ Fulweg riy e bay rogon ko n’en ni be yog James ni fare “motochiyel nrib yal’uw ni ir e ma pithig e girdi’ ko kireb.” (Mu beeg e James 1:25.) Ba ga’ ni girdi’ e yad ma puthuy e motochiyel ko pi n’en ni ka nog ndab nrin’. Ere mang fare  “motochiyel nrib yal’uw ni ir e ma pithig e girdi’ ko kireb”? Ma uw rogon ni nge pithigdad e re motochiyel ney ko kireb?

FARE MOTOCHIYEL NI MA PITHIG E GIRDI’ KO KIREB

4. Mang fare “motochiyel nrib yal’uw ni ir e ma pithig e girdi’ ko kireb,” ma chon mini’ e ke fel’ rogorad riy?

⁴ Fare “motochiyel nrib yal’uw ni ir e ma pithig e girdi’ ko kireb” e gathi aram fare Motochiyel ni kan pi’ ngak Moses. Ya fare motochiyel ni pi’ Jehovah ngak piyu Israel e nge dag ngorad ni ka yad bogi tadenen ma gubin ban’en riy ni yib i riyul’ u daken Kristus. (Matt. 5:17; Gal. 3:19) Ere mang motochiyel e ke yog James murung’agen? I lemnag fare “motochiyel ni pi’ Kristus” maku yima yog ni fare motochiyel ni bay rogon ko ‘michan’’ rodad ngak Kristus, nge fare “motochiyel ni ir e ma chuweg e girdi’ ko kireb.” (Gal. 6:2; Rom. 3:27; Jas. 2:12) Ere “fare motochiyel nrib yal’uw” e ba muun ngay urngin ban’en ni ke yog Jehovah ni ngad rin’ed. Pi Kristiano ni kan dugliyrad nge “yugu boch e saf” e ke fel’ rogorad riy.​—John 10:16.

5. Mang fan ni fare motochiyel ni ma pithig e girdi’ ko kireb e gathi mo’maw’ ni ngan fol riy?

⁵ “Fare motochiyel nrib yal’uw” e ba thil ko motochiyel ko pi nam, ya re motochiyel ney e ba mom ni ngan nang fan mab mom ni ngan fol riy. (1 John 5:3) I yog Jesus ni gaar: “Re mat’ ni gu ra pi’ ngomed e mmom, ma tomalngin e re n’en ni gu ra tay nga pomed e bbaud.” (Matt. 11:29, 30) Maku, def ko “fare motochiyel nrib yal’uw” e t’ufeg ma de yoor e motochiyel ni bay riy ma kan yoloy nga laniyan’ e girdi’, ma dan yoloy nga daken e malang.​—Mu beeg e Hebrews 8:6, 10.

ROGON NI NGE PITHIGDAD “FARE MOTOCHIYEL NRIB YAL’UW” KO KIREB

6, 7. Mang e rayog ni nga dogned u murung’agen e motochiyel rok Jehovah? Fare motochiyel ni be pithig e girdi’ ko kireb e be ayuwegdad ni ngad rin’ed e mang?

⁶ Fapi motochiyel ni ke pi’ Jehovah ngak e girdi’ e ra fel’ rogorad riy maku ra yororiyrad. Bod ni fare n’en ni ka nog e physical laws ngay ni bod e gravity e der yog e girdi’ ni ke gafgownagrad e pi n’em, ya kar felfelan’gad ya yad manang ni ma ayuwegrad. Maku arrogon e pi motochiyel rok Jehovah ni bay ko “fare motochiyel nrib yal’uw” ni aram fare motochiyel rok Kristus nra fel’ rogon e girdi’ riy.

⁷ Fare motochiyel ni ma pithig e girdi’ ko kireb e be yororiydad, maku be ayuwegdad ni ngad fanayed mat’awdad ndab da kirebnaged mat’awun boch e girdi’ nge puf rogon ni kan pi’ ngorad. Ere ke puf rogodad ni ngad rin’ed e tin gad baadag ni ngad rin’ed ni kemus nfaanra ba fel’ e n’en ni gad be lemnag ni ngad rin’ed. Re n’ey e be yip’ fan ni thingar da nameged ni ngad rin’ed e tin baadag Jehovah nge pi n’en ni ke yog nib t’uf ni ngad rin’ed. Thingar da filed rogon ni ngad t’ufeged e pi n’en nib t’uf rok Jehovah ma ngad fanenikayed e pi n’en ni ma fanenikay. Fare motochiyel ni ma pithig e girdi’ ko kireb e ra ayuwegdad ni ngad rin’ed ni aram rogon.​—Amos 5:15.

8, 9. Mang angin nra yib ngak e piin ma fol ko fare motochiyel ni ma pithig e girdi’ ko kireb? Mu weliy.

⁸ Bochan ni dawor da flontgad ma aram fan nrib mo’maw’ ni ngad gagiyegniged e ar’ar rodad nib kireb. Machane, faanra gad be fol ko fare motochiyel ni ma pithig e girdi’ ko kireb u fithik’ e yul’yul’, ma rayog ni nge ayuwegdad e ngiyal’ ney. Bod rogon Jay ni kafin ni tabab i fil e Bible, e ke mecham ngak ni nga i thoy e tamagow. Nap’an ni ke nang ni dabun Jehovah e re ngongol nem, mab t’uf ni nge turguy ban’en. Gur, ke ulul i thoy e tamagow fa ke fol ko motochiyel rok Jehovah? Ke turguy ni nge pigpig ngak Jehovah ni yugu aram rogon nrib mo’maw’ ni nge tal ko tamagow. Mang e ke thamiy u tomuren ni ke tal? Ke yog ni “kari felfelan’ ma kari puf rogon.”

⁹ Puf rogon ni bay ko girdi’ nu fayleng e ma pi’ e tin ni yad be ar’arnag. Machane, ke nang Jay ni girdi’ ni yad ma un ngay e yad ra mang  sib ko denen. Piin ma fol ko motochiyel rok Got ni ma pithig e girdi’ ko kireb, e gelngin Got nib thothup e be gagiyegnagrad, ere kan pithigrad ko kireb ma ra yog ngorad e “yafos nge gapas.” (Rom. 8:5, 6) Uw e fek Jay gelngin riy ya nge yog rok ni nge pag e re ngongol nem? Gathi ir e ke yib rok ya ke yib rok Got. Ke fil e Bible ni gubin ngiyal’, ma ma yibilay gelngin Got nib thothup, ma ke fanay e ayuw ni ke pi’ e pi walag u lan e ulung. Maku ireray e pi n’en nra ayuwegdad ni nge puf rogodad. Ngad guyed ko uw rogon.

MU FAL’EG I YALIY E THIN ROK GOT

10. Mang e be yip’ fan ni ngan “fal’eg i yaliy” e motochiyel rok Got?

¹⁰ Bang ko James 1:25 e rayog ni ngad beeged ni gaar: “En nra fal’eg i yaliy ir nga fithik’ fare motochiyel nrib yal’uw ni ir e ma pithig e girdi’ ko kireb, me tiyan’ ngay . . . ni aram rogon e Got e ra ayuweg ko tin ni be rin’.” Fare thin ni Greek ni kan pilyeg ni “fal’eg i yaliy” e be yip’ fan ni “nge lumel be’ nga but’ ya nge yog ni nge guy ban’en nib fel’ rogon,” ni be yip’ fan ni be tiyan’ nga ban’en. Arrogon, faanra gad baadag ni fare motochiyel ni ma pithig e girdi’ ko kireb e nge gagiyegnag lanin’dad, ma thingar da filed e Bible nib fel’ rogon ma ngad fal’eged i lemnag e pi n’en ni kad beeged.​—1 Tim. 4:15.

11, 12. (a) Uw rogon ni tamilangnag Jesus nib t’uf ni tin riyul’ e nge mang kanawoen e yafas rodad? (b) Rogon ni kan weliy er nga lang, ma mang magawon e thingari siyeg e piin fel’ yangaren?

¹¹ Maku, thingar da ‘tedan’dad ngay,’ ara ngaud folgad ko Thin rok Got ni gubin ngiyal’ ma aram e gad be tay ni tin riyul’ e ke mang kanawoen e yafas rodad. Ireray e n’en ni ke yog  Jesus u nap’an ni be non ngak boch e girdi’ ni ke mich u wan’rad ni gaar: “Faan gimed ra fol ko thin ni gu be machibnag ngomed ma aram e kari mudugil ni kam manged pi gachalpeg; ma bay mu nanged e tin riyul’, ma tin riyul’ e ir e bayi ayuwegmed nge dab kum pired ni gimed e sib.” (John 8:31, 32) Reb e babyor e be yog ni fare bugithin ni ‘nang’ u roy e be yip’ fan e “ngan fol, min nang nib fel’ rogon.” Ere gad ra ‘nang’ e tin riyul’ nib fel’ rogon ni faanra ir e ke mang kanawoen e yafas rodad. Ma aram e rayog ni nga dogned ni fare “thin rok Got” e “be maruwel” u fithik’dad, ma be ayuwegdad ni nge m’ug e ngongol rok e Chitamangidad u tharmiy rodad.​—1 Thess. 2:13.

¹² Mu fithem ni nge lungum, ‘Riyul’ ni gu manang e tin riyul’, fa? Ma ireray e n’en ni ke mang kanawoen e yafas rog? Ara ka gu be ar’arnag boch e “puf rogon” ara ngongol nu fayleng?’ Reb e walag ni ppin ni gallabthir rok e yow be pigpig ngak Jehovah e ke yoloy ni gaar: “Faanra kam ilal ni ga bay ko tin riyul’ ma rayog ni nga dogned nib chuchugur Jehovah ngom. Machane gag, e da gu nang Jehovah. Da gu fanenikay e pi n’en ni ma fanenikay. De mich u wan’ug nib ga’ fan u wan’ e n’en ni gu ma rin’. Ma da gu ning e ayuw ngak u nap’an ni ke yib e magawon ngog. Ma pagan’ug ko tin gu manang, ma kug nang e chiney nrib kireb ni aram rogon ya dariy ban’en ni gu manang.” Gadad ba felfelan’, ya re walag nem e ke nang nrib kireb e n’en ni ke rin’ ma aram e kari thilyeg e lem nge ngongol rok ma ke un ko regular pioneer.

GELNGIN GOT NIB THOTHUP E RAYOG NI NGE PITHIGDAD KO KIREB

13. Uw rogon ni ma ayuwegdad gelngin Got nib thothup ni nge puf rogodad?

¹³ Be yog e 2 Korinth 3:17 (NW) ni gaar: “Gin ni bay gelngin Got nib thothup riy e bay e puf rogon riy.” Uw rogon nra ayuwegdad gelngin Got nib thothup ni nge puf rogodad? Reb riy e ra yognag e pi fel’ngin ngodad nra ayuwegdad ni nge puf rogodad ni bod e: “t’ufeg, nge felfelan’, nge gapas laniyan’, nge gum’an’, nge gol, nge fel’ ngak e girdi’, nge yul’yul’, nge sobut’an’, nge t’ar laniyan’.” (Gal. 5:22, 23) Faanra dariy e pi fel’ngin ney ko girdi’ ni bod e t’ufeg ma dabiyog ni nge puf rogorad, mab tamilang ni ireray e magawon ko girdi’ nu fayleng e ngiyal’ ney. Ma tomuren ni ke yoloy apostal Paul wom’engin gelngin Got nib thothup me ulul ngay ni gaar: “Dariy ba motochiyel nib togopluw ko pi n’ey.” Mang fan e n’en ni ke yog Paul? Dariy e motochiyel nrayog ni nge taleg wom’engin gelngin Got nib thothup. (Gal. 5:18) Baadag Jehovah ni ngaud athamgilgad ni nge m’ug e pi fel’ngin ney ko ngongol rodad ndariy n’umngin nap’an.

14. Uw rogon ma lem nu fayleng e be gagiyegnag e girdi’?

¹⁴ Piin ni lem nu fayleng e be gagiyegnagrad e yad be lemnag ni ke puf rogorad, ya yad ma rin’ e tin be ar’arnag dowrad. (Mu beeg e 2 Peter 2:18, 19.) Machane, dar nanged ni kar manged sib ko denen. Thingari ngongliy e pi am boor e motochiyel ni nge gagiyegnag e ngongol nge ar’ar nib kireb ko girdi’. Maku be yog Paul ni kan ngongliy e motochiyel ni “gathi fan ngak e girdi’ nib fel’, ya fan ngak e piin ni yad ma th’ab e motochiyel nge piin ni yad ma togopluw ko motochiyel.” (1 Tim. 1:9, 10) Maku kar manged sib ko denen ya yad ‘be rin’ e pi n’en ni ir e mm’agan’ dowrad nge lanin’rad ngay,’ ma dowrad e ke mang masta rorad nib kireb. (Efe. 2:1-3) Bod e chachangeg ni be yan nga ba plet ni bay e tay e ngul riy mi yad kay fare tay e ngul mi yad aw ko wup. Pi girdi’ ney e yad be fol ko ar’ar rorad nib kireb mi yad mang sib ko denen.​—Jas. 1:14, 15.

PUF ROGON NI BAY ROM U LAN E ULUNG

15, 16. Mang angin ni ke yib ngodad ni ka nap’an ni kad manged bang ko ulung ko Kristiano? Uw rogon ni ke puf rogodad u lan e ulung rodad?

¹⁵ Nap’an ni kam chag ko ulung ko  Kristiano, ma dam fal’eg e babyor ni bod e n’en ni yima rin’ ko ulung ko girdi’, ya Jehovah e ke pow’iyem ko ulung rok. (John 6:44) Mang ni ke mel’egem? Ke guyem ni gur be’ ni gab mat’aw ma bay madgun Got u wan’um? Sana ga ra fulweg ni “danga’!” Ere mang e n’en ni ke guy Got? Ke guy nib m’agan’um ngay ni ngam fol ko motochiyel rok ma ga fol u rogon nra pow’iyem. Nap’an ni kam mang bang ko ulung rok Jehovah me fil e thin rok ngom. Ke ayuwegem ni ngam chuw ko machib nge yat ni googsur miki fil ngom rogon ni ngam folwok rok Kristus. (Mu beeg e Efesus 4:22-24.) Ma aram e kam tow’ath e chiney, ya ga be chag ngak e girdi’ ni goo yad e rayog ni nga nog ni ‘kan chuwegrad ko kireb.’​—Jas. 2:12.

¹⁶ Mu lemnag e re n’ey: Ga ma rus ni faanra ga be chag ngak e girdi’ ni riyul’ nib t’uf Jehovah rorad, fa? Nap’an ni ga be non ngak e pi walag u lan e Kingdom Hall ma ra magafan’um ni bay e girdi’ nra iring e chugum rom? Danga’! Ya ri ga be pagan’um ngorad. Machane, rayog ni nge pagan’um nfaanra ga be chag ngak e girdi’ ni yugu demtrug? Danga’! Machane, puf rogon ni bay rom e chiney u lan e ulung rok Jehovah e kemus nrib achichig nfaanra ngan taareb rogonnag ko puf rogon ni yira pi’ ngom boch nga m’on.

“MI YAD UN KO FLAAB ROK PI FAK GOT”

17. Uw rogon nib l’ag e puf rogon ni bay ko girdi’ ko “flaab rok pi fak Got”?

¹⁷ I yoloy Paul murung’agen e puf rogon nra pi’ Jehovah ngak e girdi’ rok u roy u fayleng ni gaar: “Urngin e pi n’en ni sunumiy Got e ri yad be sonnag e chirofen ni bayi flaabnag Got pi fak.” Me ulul ngay ni gaar: “Reb e rran e bay ra pired ni gathi yad e sib rok e wod, mi yad un ko flaab rok pi fak Got.” (Rom. 8:19-21) “Pi n’en ni sunumiy Got” e be yip’ fan e girdi’ ni bay e athap rorad ni ngar pared u roy u fayleng, ma ra fel’ rogorad u nap’an ni yad ra “un ko flaab rok pi fak Got” ni kan dugliyrad. Re flaab ney e ra tabab u nap’an ni yira faseg “pi fak Got” nga ranod nga tharmiy, mi yad un ngak Jesus ngar chuweged e tin nib kireb u fayleng mar ayuweged e girdi’ ni “pire’ ni pire’” nga ranod nga lan fa bin nib beech e m’ag. ​—Rev. 7:9, 14.

18. Uw rogon ni ngari puf rogon e girdi’ nib mat’aw? Mang puf rogon e yira pi’ ngak e girdi’?

¹⁸ Ngiyal’ nem ma kari puf rogon e girdi’ ya dabkiyog ni nge magawonnagrad Satan nge pi moonyan’ rok. (Rev. 20:1-3) Rib gel e felfelan’ riy! Fare 144,000 e girdi’ ni yad ra un ngak Jesus ma yad ra mang pilung nge prist e bay ra ululgad i ayuweg e girdi’ ya ngar fanayed fel’ngin e biyul ni ke pi’ Jesus nge mada’ ko ngiyal’ ni kari flont urngin e girdi’. (Rev. 5:9, 10) Tomuren ni kan skengnag e michan’ rok e girdi’ nib mat’aw, ma ra pi’ Jehovah e puf rogon ngorad ni ireray e n’en ni baadag ni nge pi’ ngak e girdi’ ko som’on ni ka nog e pi “flaab rok pi fak Got” ngay. Mu lemnag e re n’ey! Dabki mo’maw’ ni ngam rin’ e n’en nra yog Got ni ngam rin’ ya dowam nge lanin’um e ra flont, ma rayog ni nge m’ug e pi fel’ngin Got ko ngongol rom nib fel’ rogon.

19. Mang e thingar da ululgad i rin’ nfaanra gad baadag ni ngad uned “ko flaab rok pi fak Got”?

¹⁹ Gur, ga baadag ni ngam un “ko flaab rok pi fak Got”? Faanra aram rogon, ma aram e ngam fol ko “fare motochiyel nrib yal’uw ni ir e ma pithig e girdi’ ko kireb.” Arrogon, ngam fil e Bible nrib fel’ rogon. Mu pag e tin riyul’ ni ir e nge gagiyegnag e yafas rom. Mu yibilay gelngin Got nib thothup. Ngam chag ko ulung ko Kristiano ma ngaum fil e thin rok Jehovah nib fel’ rogon. Ma dab mu pag Satan ni nge bannagem nge tay nga lanin’um nib mo’maw’ ni ngam fol ko motochiyel rok Got ni bod e n’en ni rin’ ngak Efa. Yugu aram rogon ni fare Moonyan’ e ba llowan’ ko sabanban, machane, rayog ni ngam gel ngak ya gadad “manang e tin ni be lemnag ngodad.”​—2 Kor. 2:11.

[Study Questions]

[Pictures on page 14]

Ka gu be ar’arnag e “puf rogon” ara ngongol nu fayleng, fa?

[Pictures on page 14]

Gu be pag e tin riyul’ ni nge gagiyegnag e yafas rog, fa?