ROGON ni kad weliyed ko bin nib m’on e article, e bay fan e yafas rok Jesus. Ere faanra gad baadag ni nge yib fan e yafas rodad, ma thingar da folwokgad ko n’en ni ke rin’ nge fonow ni ke pi’.

Ireray e n’en ni ke fonownagdad Jehovah riy nrogon ni bay ko fare thin nu Bible ni bay nga lang. Ngaun folwok ko n’en ni rin’ Jesus e be yip’ fan ni ngad puluwniged e yafas rodad ni polo’ ko ngongol nge machib rok. Gad ra rin’ e re n’ey, ma ra ayuwegdad ni ngad fel’gad u wan’ Got ma ra yib fan e yafas rodad.

Machib ni tay Jesus e bay e pi kenggin e motochiyel riy nrayog ni nge ayuwegdad ni ngad folwokgad u kanawoen e yafas rok. Gad ra pirieg boch ko pi kenggin e motochiyel ney ko fare Machib ni tay Jesus u daken e Burey. Gad ra weliy boch e pi kenggin e motochiyel ney nge rogon ni ngad folgad riy.

ROGON NRA AYUWEGEY E RE KENGGIN E MOTOCHIYEL NEY NI NGE YIB FAN E YAFAS:

Ke weliy Jesus ni girdi’ e kan sunmiyrad ni yad ma nameg e tirok Got ban’en. Gad baadag ni ngad nanged e fulweg ko pi deer ni baaray: Mang fan ni gad bay? Mang fan ni kari yoor e gafgow u fayleng? Ma lemnagdad Got, fa? Ka bay reb e yafas nga bang u tomuren ni kad m’ad, fa? Ba t’uf ni ngad nanged e fulweg ko pi deer ney, ya nge yib fan e yafas rodad. Manang Jesus ni Thin rok Got e rayog ni nge pi’ e fulweg ko pi deer ney. Nap’an ni meybil Jesus ngak e Chitamangin me yog ni thin rom e ba “riyul’.” (John 17:17) Gur, riyul’ nrayog ni nge ayuwegdad e Thin rok Got ni nge yag e tin nib t’uf ko tirok Got ban’en ngodad?

N’EN NI KE BUCH ROK BE’:

Esa e be’ ni ma un ngak ba ulung i girdi’ ko tang, ba ga’ ni boor e girdi’ ni manangrad. Machane, ke nang Esa u wan’ nder felfelan’ nib gel. Ya yog ni gaar: “Yugu aram rogon ni kug felfelan’ ni ke yag ni nggu un ko re ulung nem, machane kug be athapeg ni ngki yib fan e yafas rog.” Me munmun, mar mada’gow reb e Pi Mich Rok Jehovah. Miki yog ni gaar: “Boor e deer ni gu fith ngak. Ma bochan ni pi’ e fulweg ngog u Bible nib puluw ko deer rog, ere kug adag ni nggu un ko fol Bible.” Ma n’en ni ke fil Esa u Bible e ke taw nga gum’irchaen ma ke adag ni nge ognag e yafas rok ngak Jehovah. Me yog ni gaar: “Kafram, e gu ma mada’nag e magawon ni gubin ngiyal’. Machane, chiney e riyul’ ni bay fan e yafas rog.”

ROGON NRA AYUWEGEY E RE KENGGIN E MOTOCHIYEL NEY NI NGE YIB FAN E YAFAS:

Runguy e ba muun ngay ni ngan gol ngak e girdi’. Ma runguy Jesus e piin nib gafgow. Bochan nri ma runguy e girdi’, ma ke ayuweg e piin ni kar gafgowgad. (Matthew 14:14; 20:30-34) Nap’an ni gad ra folwok rok Jesus u rogon ni ma runguy e girdi’, ma ra yib fan e yafas rodad, ya piin ni ma runguy e girdi’ e yad ba felfelan’. (Acts 20:35) Rayog ni ngad daged ni gad be runguy e girdi’ u daken e thin nge ngongol rodad nib fel’, ya ra fal’eg laniyan’ e piin nib t’uf e ayuw rorad. Faan gad ra dag e runguy ma ra yib e felfelan’ ngodad, fa?

N’EN NI KE BUCH ROK BE’:

Maria nge Carlos e ba wu’ i mabgol ni ur dagew e runguy. Chitamangin Maria e dakuriy e ppin rok, ma dawori n’uw nap’an ni ke aw nga but’, ndabkiyog ni nge yan. Kar fekew nga tabinaw rorow mar piew urngin ban’en nib t’uf rok. Boor e nep’ nder yag ni ngar molow nib fel’ rogon, maku yow ma milnag nga aspital u nap’an nra gel e m’ar rok ko suga. Ka rognew ni yu ngiyal’ e ma aw parorow. Machane yow ba felfelan’, ya yow manang ni yow be pi’ e tin nib t’uf rok e chitamangin Maria. Ma re felfelan’ rorow nem e ba puluw ko n’en ni yog Jesus.

ROGON NRA AYUWEGEY E RE KENGGIN E MOTOCHIYEL NEY NI NGE YIB FAN E YAFAS:

Uw rogon ni nge yib fan e yafas rok be’ ni be maruweliy ni nge aw e gapas u thilrad e girdi’? Reb e gad ba felfelan’ ni nge fel’ e tha’ u thildad e piin ni bay u toobdad. Thingar da folgad ko fare fonow u Bible ni gaar: “Mu rin’ed urngin e tin nrayog romed ngam pired ni ba aw e gapas u thilmed nge urngin e girdi’.” (Roma 12:18) “Urngin e girdi’” e ba muun chon e tabinaw rodad ngay nge yugu boch e girdi’ ni gathi yad bang ko ulung rodad. Gur, faanra gad be maruweliy ni nge aw e gapas u thildad “urngin e girdi’” ma riyul’ nra yib fan e yafas rodad?

N’EN NI KE BUCH ROK BE’:

Mu lemnag e n’en ni buch rok be’ nib pin ni Nair fithingan. Boor e duw ni ke mada’nag boor e magawon ni ke skengnag rogon nrayog ni nge awnag e gapas, nib ga’ u thilin girdien e tabinaw rok. Ke gaman 15 e duw ni ke chuw e pumoon rok, ma yigoo ir e ke chuguliy e bitir rok. Bay reb e bitir rok ni pumoon ni i fek e falay nib kireb, mab ga’ nder ma fol, ma yog ni nge rin’ boch ban’en nib kireb ngak e chitiningin nge walagen nib pin. Ma ke mich u wan’ Nair ni n’en ni ke fil u Bible e ke ayuweg ya yag ni nge maruweliy ni nge aw e gapas u thilrad e girdi’ nyugu aram rogon ni ke sum e magawon. Ma gay rogon ni nge dabi un ko maluagthin ara nge chamnag murung’agen boch ban’en. Ma athamgil ni nge gol ngak e girdi’, ma ngki athamgil ni nge nang lanin’rad. (Efesus 4:31, 32) Ma manang ni bochan ni ke fil rogon ni nge maruweliy e gapas u thilrad e girdi’ ma aram e ke fel’ e tha’ u thilrad chon e tabinaw rok nge yug girdi’.

Faanra ngad folgad ko fonow rok Jesus, ma ra yib e felfelan’ ngodad. Machane, kub t’uf ni ngad nanged ko mang e ra buch boch nga m’on nfaanra riyul’ ni nge yib fan e yafas rodad. Machane, uw rogon ni nge ga’ fan e yafas rodad nfaanra kemus ni n’en ni gad manang e ngad pilibthirgad, me yib e m’ar ngodad, me tomur mad m’ad? Machane, ireray rogon e yafas ko girdi’ ko re fayleng ney.

Machane bay e thin nib fel’! Bay e tow’ath ni ke tay Jehovah ni fan ngak e piin ni yad be athamgil ni ngaur ngongolgad ni “bod rogon ni i rin’ Jesus Kristus.” Ke micheg Jehovah ndab ki n’uw nap’an ma ra sunmiy e bin nib beech e fayleng ni ngongol nib mat’aw e bay riy, ya nge par e girdi’ nib yul’yul’ riy ni manemus, mab fel’ fithik’ i dowrad. Ya Thin Rok e be gaar: “Chiney e keb i par tafen Got nga fithik’ e girdi’! Bayi par rorad, ma bay ra manged girdien. Mi Got e bay i par rorad, mi ir e bayi mang Got rorad. Ma bayi n’ag urngin e lu’ u owcherad. Ma aram e dab ku unim’, ma dab ki i kireban’uy, ma dab ku un yor, ma dab ku un amith. Ya tin kakrom ban’en e ke chuw.”​—Revelation 21:3, 4. 

Maria ni ke gaman 84 e duw rok ni kan weliy ko fa bin som’on e article e ke felfelan’ ni be sonnag ni nge lebug e pi thin ney. Ma uw rogon gur? Ga baadag ni ngkum nang boch murung’agen e “yafos ni ir e bin riyul’ e yafos” u tan Gil’ilungun Got? (1 Timothy 6:19) Faanra arrogon, ma rayog ni nga mog ngak e Pi Mich Rok Jehovah ni yad bay ko binaw rom ara ngam yol ngak e piin ni kar ngongliyed e re magazine ney. *