“Magawon rog nth’abi ga’ ni gu ma guy rogon ni nggu gel ngay e aram fare lem ndariy fag.” Ireray e n’en ni yog reb e ppin nib mo’maw’ rok ni nge mich u wan’ ni Jehovah e rayog ni nge lemnag rarogon. Ku aram rogon e lem rom? Faanra arrogon, ma sana ga be lemnag ko, ‘Riyul’ ni ma lemnag Jehovah e piin ni yad ma pigpig ngak ni be’ nge be’, fa?’ Fulweg riy e arrogon! Gad ra pirieg e mich riy ni ma lemnag Jehovah rarogon e girdi’ ko thin ni yog Jesus.​—Mu beeg e John 6:44.

Mang e ke yog Jesus ni ir e manang rarogon Jehovah nib fel’ rogon nge n’en nib m’agan’ ngay? (Luke 10:22) I weliy ni gaar: “Dariy be’ nrayog ni nge yib ngog ni faanra gathi en ni Chitamangiy e pow’iy nge yib ngog.” Ere dabiyog ni ngad manged pi gachalpen Kristus ma gad liyor ngak Jehovah ni ir e Chitamangidad u tharmiy nfaanra de pow’iydad ngak. (2 Thessalonika 2:13) Faanra gadad manang fan e n’en ni yog Jesus, ma gad ra guy e mich riy ko thin rok ni be lemnag Got rarogodad.

Mang e be yip’ fan nra pow’iydad Jehovah? Gur, fan e re n’em e be towasariydad Jehovah ni ngad pigpiggad ngak? Danga’. Ya ke pi’ e puf rogon ngodad, ere der ma towasariydad. (Deuteronomy 30:19, 20) Ma yaliy Jehovah gum’irchaen bokum bilyon e girdi’ ya be gay e girdi’ nib mat’aw rogon ni yad be lem. (1 Kronicles 28:9) Ma nap’an nra pirieg be’ ni aram rogon, ma ma ayuweg u fithik’ e runguy. Uw rogon?

Ma pow’iy Jehovah gum’irchaen e “piin ni ke mel’egrad” u fithik’ e sumunguy. (Acts 13:48) L’agruw e kanawo’ ni ma rin’ e re n’ey riy ni aram e daken e thin rok u Bible ni yima machibnag ngak be’ nge be’ nge daken gelngin Got nib thothup. Nap’an nra guy Jehovah be’ ni baadag e tin riyul’ u Bible, ma ma fanay gelngin nib thothup ni nge ayuweg faanem ni nge nang fan me fol ko thin riyul’. (1 Korinth 2:11, 12) Faanra dabi ayuwegdad Got, ma dabiyog ni ngad manged e tin riyul’ i gachalpen Jesus maku dabiyog ni ngad manged e pi tapigpig rok Jehovah nib yul’yul’.

Ere, mang e be fil fare thin rok Jesus ngodad u murung’agen Jehovah Got ni bay ko John 6:44? Ma pow’iy Jehovah e girdi’ ni nge yib ngak, ya be guy ban’en nib fel’ u gum’ircha’rad ma ma lemnag rarogorad ni be’ nge be’. Re thin riyul’ ney e ke fal’eg laniyan’ fare pin ni kan weliy murung’agen ko tabolngin. Ya yog ni gaar: “Ra mang be’ reb e tapigpig rok Jehovah ma aram e bin th’abi fel’ e tow’ath nra yag ngak. Ma faanra ke mel’egeg Jehovah ni nggu pigpig ngak ma dabisiy ni gub t’uf rok.” Ma uw rogon gur? Ra ga manang ni ma lemnag Jehovah rarogon e pi tapigpig rok ni be’ nge be’, ma gur, re n’ey e ra k’aringem ni ngam chugur ngak?