“BAY ban’en nri gu be athapeg ni nge buch.” Wugem e duw ni ke yan ko rofen ni August 28, 1963, me yog Martin Luther King, Jr., e pi thin ney ni bang ko welthin rok. Rogon ni non e be m’ug riy ni bay e athap rok, nra yan i reb e rran ma gubin e girdi’ ni yad ra felfelan’ ya dakuriy e laniyan’. Yugu aram rogon nre welthin rok nem e pi’ u Meriken, machane boor e girdi’ u ga’ngin yang e fayleng ni ga’ fan u wan’rad.

Tomuren dalip e pul ni pi’ e re welthin nem ko November 20, ko duw ni 1963, ma boor ko 100 e nam nu fayleng nra fanayed fare motochiyel ko United Nations Declaration on the Elimination of All Forms of Racial Discrimination. Maku bay boch e motochiyel nib beech ni kun fanay. Ere, yugu aram rogon ni boor ban’en ni kan rin’ ni ngan chuweg e laniyan’, machane mang angin ni ke yib?

Nap’an e March 21, ko duw ni 2012, ma be’ nib pumoon ni Ban Ki-moon fithingan ni ir e Secretary-General ko U.N. e yog ni gaar: “Ri boor mit e motochiyel nge boch ban’en ni kan ngongliy ni fan e ngan chuweg e biney e magawon. Machane laniyan’ e ku be gafgownag bokum milyon e girdi’ u ga’ngin yang u fayleng.”

Ku bay boch e nam ni kar mon’oggad u rogon ni ngan taleg e re lem ney, machane ku bay e deer nib t’uf ni ngan pi’ e fulweg riy ni aram e: Pi n’ey ni kan fal’eg rogon ni ngan chuweg e re miti lem ney, riyul’ ni ke yib angin, fa? Boch e girdi’ e yad be lemnag ni re n’ey e rayog ni nge sagaalnag e laniyan’, machane dabiyog ni nge chuweg. Mang fan? Bochan nrayog ni ngan gechignag e piin ni yad ma laniyan’ ngak yugu boch e girdi’ machane miti ney e lem e bay rogon ko tafinay ko girdi’, ni yu ngiyal’ e ba mo’maw’ ni ngan nang ko mang e be lemnag be’.

Ere, faanra ngan chuweg e laniyan’, mab t’uf ni nge thilyeg be’ rogon ni be lemnag rarogon boch e girdi’. Gur, rayog ni ngan rin’ e re n’ey? Faanra rayog, ma uw rogon? Gad ra weliy boch ban’en ni ke buch rok boch e girdi’, ma rayog ni nge ayuwegdad ni ngad guyed nrayog ni nge thil e girdi’ nge n’en nra ayuwegrad ni ngar rin’ed e re ne’y.

Linda: Ni gargelegeg ko fare nam nu South Africa. Gu ma fanenikay e girdi’ ko re nam nem nde wechwech dowrad, gu ma sap ngorad ni gowa dariy e skul rorad, ma dabiyog ni ngan pagan’uy ngorad, ma yad e ngar pigpiggad ngak e girdi’ nib wechwech dowrad. Bay e magawon rog ni aram e gu ma laniyan’, ma da ug nang. Machane, munmun me thil rarogon e tafinay rog u nap’an ni gu tabab ni nggu fil e Bible. Ya kug fil ni “gubin e girdi’ ma taareb rogorad u wan’ Got”, mab ga’ fan e n’en ni bay u gum’irchaen e girdi’ ko raen dowey ara thin rorad. (Acts 10:34, 35; Proverbs 17:3) Fare thin ni bay ko Filippi 2:3 e ke ayuwegeg ni nggu nang nfaanra ra gu lemnag ni gubin e girdi’ ma yad ba tolang ngog, ma rayog ni nggu pag e laniyan’. Bochan ni kug fol ko pi kenggin e Motochiyel nu Bible, ma ke ayuwegeg ni gu nang nib ga’ fan e girdi’ ni yugu demtrug raen dowrad.

Michael: Gu ilal u bang ni ba ga’ ni boor e girdi’ nu Australia riy nib wechwech dowrad, me munmun ma gu ma laniyan’ ngak e girdi’ nu Asia, nib ga’ ni Chinese. Ma nap’an ni gu ra yan u karrow ni kug guy be’ ni bod yaan reb e girdi’ nu Asia, mug  bing e winda ko karrow rog nggu tolul ni gu be yog boch ban’en nib kireb ngak ni gu be gaar, “Mu sul nga tafnam, gur e binir e girdi’ nu Asia!” Ma nap’an ni gu fil e Bible, mug nang ni Got e ba t’uf e girdi’ rok ni yugu demtrug e re nam ni be’ riy ara yaan. Ke taw e re t’ufeg ney nga gum’irchaeg ma ke t’uf rog e piin ni ug fanenikayrad. Rib gel e felfelan’ ni kug tay ni bochan ni ke yag ni nggu thil. Ngiyal’ ney ma kug felfelan’ ni ke yag ni nggu chaggad bokum e girdi’ nib thilthil e nam rorad nge yalen rorad nga taabang. Ma re n’ey e ke ayuwegeg ni nggu nang boor ban’en u murung’agen e yafas ma ke yibnag e felfelan’ ngog nib gel.

Sandra: Nina rog e be’ u Umunede ni bay u Delta State, Nigeria. Machane, girdi’ ko chitamag e yad e girdi’ nu Edo State, ma thin rorad e Esan. Ma bochan e re n’ey ma yad ma laniyan’ ngak e nina rog nge yan i mada’ ko ngiyal’ ni yim’ riy. Ere, kug dugliy u wan’ug ni dab gu non ngak be’ ni thin rok e Esan, maku dab gu figirngiy be’ nu Edo State. Machane nap’an ni gu tabab ni nggu fil e Bible, ma ke yoor ban’en ni ke thil u lanin’ug. Bochan ni bay e thin nu Bible ni be tamilangnag ni gubin e girdi’ ma taareb rogorad u wan’ Got, ma en nra fol ko pi motochiyel rok e ra fel’ u wan, ere mang fan ni nggu fanenikay e girdi’ ni bochan e gin ni yad be’ riy ara thin rorad? Ma Bochan ni kug guy rogon ni nggu fol ko pi kenggin e motochiyel nu Bible ma ke yag ni nggu pirieg e felfelan’, ma ke gapas lanin’ug. Ma ke yag ni nge ayuwegeg ni nge fel’ e tha’ u thilmad yugu boch e girdi’, ni yugu demtrug e yalen rorad, ara gin ni yad be’ riy, nge thin rorad. Ma en ni kug figirngiy e be’ nu Edo, ma thin rok e Esan.

Mang fan ni thin ko Bible e ke ayuweg e pi girdi’ ney nge ku boch e girdi’ ni ngar paged e fanenikay nge laniyan’? Ya bochan ni Bible e Thin rok Got. Ma bay gelngin ni nge thilyeg rarogon e lem rok be’ ngak yugu boch e girdi’. Maku be tamilangnag e Bible ko mang e kub t’uf ni nge chuw e laniyan’.

Riyul’ ni thin ko Bible e rayog ni nge ayuwegey me chuweg e lem nde puluw, maku bay l’agruw i ban’en nib t’uf ni ngan rin’ u m’on ni nge chuw e laniyan’. Som’on e bay e denen maku bay e girdi’ ndawor ra flontgad. Be tamilangnag e thin ko Bible ni be gaar: “Dariy taabe’ ni der denen.” (1 Kings 8:46) Ere, demtrug rogon e athamgil ni gad be tay, ma gad urngin ni gad bod apostal Paul u nap’an ni gaar: “Faanra gub adag ni nggu rin’ e tin nib fel’, ma ke mus ni tin nib kireb e rayog ni gu rin’.”(Roma 7:21) Ere, rayog ni nge munmun me sum e “lem nib kireb” nrayog ni nge k’aring be’ ni nge laniyan’.​—Mark 7:21.

Bin migid e ba gel gelngin Satan ni Moonyan’. Be tamilangnag e Bible ni ma “thang e fan rok e girdi’” maku “ir faanem ni bannag e girdi’ nu fayleng ni polo’.” (John 8:44; Revelation 12:9) Ireray fan ni ke garer e laniyan’ nge fan nib mo’maw’ ko girdi’ ni ngar ayuweged yad u nap’an nra laniyan’ boch e girdi’ ngorad ma kub mom ni ngan thang mit ba ulung i girdi’, nge ku boch e magawon ni bay rogon ko teliw, nge yalen.

Ere, faanra nge chuw e laniyan’, mab t’uf ni ngan chuweg e denen, nge ngongol ko girdi’ nde flont, ma kub t’uf ni ngan taleg gelngin Satan ni Moonyan’ ni be gay rogon ni nge k’aring e girdi’ ni ngar ngongliy e kireb. Be tamilangnag e Bible ni kemus ni Gil’ilungun Got e rayog ni nge lebguy e re n’ey.

Ke fil Jesus Kristus ngak e piin ni yad ma folwok rok rogon ni ngar meybilgad ni gaar: “Ma ga par ni gur e ga be gagiyegnagmad, min rin’ e tin nib m’agan’um ngay u roy u but’ ni bod rogon ni yibe rin’ u tharmiy.” (Matthew 6:10) U daken Gil’ilungun Got e yira chuweg urngin mit e ngongol nib kireb riy, nib muun e laniyan’ ngay.

Nap’an nra gagiyegnag Gil’ilungun Got e re fayleng ney, ma Satan e yira ‘m’ag ngan tay’ ya nge “dabkiyog ni nge bannag girdien e pi nam.” (Revelation 20:2, 3) Ma aram e bayi sum e “bin nib beech e fayleng, ni aram e tin nib mat’aw e ngongol e bay i par riy.” *​—2 Peter 3:13.

Piin ni yad ra magey e ngiyal’ nem e ra munmun mi yad ra flont, ma dabkur manged sib ko denen. (Roma 8:21) Bochan ni yad girdien Gil’ilungun Got ma yad ra par ndariy e “kireb” ni yad ra ngongliy. Mang fan? Ya “bayi tamilangan’rad u murung’agen Somol.” (Isaiah 11:9) Ma ra taw ko ngiyal’ nem ma urngin mit e girdi’ ni yad ra fil murung’agen Jehovah mi yad folwok rok. Ma re n’ey e be yip’ fan ni dakuriy e laniyan’ ya “Got e taareb rogon e ngongol ni ma tay ngak urngin e girdi’.”​—Roma 2:11.