Girdi’ nib ga’ ni yad ma beeg e Bible e yad manang murung’agen Pontius Pilate ni bochan e ir e un i pufthinnag Jesus u m’on nni li’ nge yim’. (Matt. 27:1, 2, 24-26) Machane, ku bay yu ken e babyor ni ke yoloy yugu boch e girdi’ ni murung’agen chepin e girdi’ ni ku bay murung’agen e cha’ney riy. Bay ba ken e babyor ni kenggin e The Anchor Bible Dictionary, ni be yog ni pi n’en ni kan yoloy u murung’agen Pontius Pilate nga lan yu ken e babyor ko chep e “ka boor ma kab tamilang nga rogon ni yima weliy murung’agen boch e governor nu Roma ni ur gagiyeggad u Judea.”

Boor yay ni kan tay fithingan Pilate nga lan yu ken e babyor ni i yoloy reb e Jew ni ka nog Josephus ngak ni ir be’ ni ma yoloy chepin e girdi’. Dalip e magawon ni yoloy murung’agen ko yu ke babyor rok ney ni mada’nag Pilate u nap’an ni be gagiyegnag yu Judea. Ma bin aningeg e yoloy be’ ni ka nog Philo ngak ni ku ir reb e Jew ni ku ma yoloy chepin e girdi’. Tacitus ni ku ir reb e tayol nu Roma ni ma yoloy murung’agen boch e girdi’ ni ur manged pilung ko re nam nem e ke micheg ni Pontius Pilate e ir e yog ni ngan li’ Jesus nge yim’ u nap’an ni Tiberius e ir e be gagiyeg.

Nap’an e duw ni 1961, ma immoy boch e girdi’ ni yad ma gay murung’agen e girdi’ ni ur moyed kakrom nra pirieged fithingan Pilate ni kan yoloy ko thin ni Latin nga daken bangi malang u nap’an ni yad be gay murung’agen boch ban’en u bangi ban’en ni ma muulung piyu Roma ngay kakrom ni bay u Caesarea u Israel. Pi yol ni baaray ko (re sasing ni baaray) e ke samathmath, machane baaray e n’en ni yibe lemnag ni be yog: “Ke pi’ e (cha’ney) i Tiberieum Pontius Pilate ni ir reb e Tayugang’ nu Judaea ni fan ngak e pi got nib tolang.” Re naun nem ni un weliy murung’agen e sana reb e tempel nni ngongliy ni fan ngak fare Pilung nu Roma ni ka nog Tiberius ngak.

Immoy reb e article ni kenggin e “Deer ko Piin Ma Beeg” nni tay ko Fare Wulyang ko Damit ko July 15, 2002 ko thin ni Meriken ni be yog ni faanra ke yan reb e walag nib pin ni nge fil e Bible ngak be’ ma bay reb e pumoon u lan e ulung ni ke un ngak, ma thingari upunguy lolugen ndemtrug ko ba taufe fare pumoon fa danga’. Machane, kan fal’eg i gay murung’agen e re n’ey, ma ke m’ug nib t’uf ni ngan tamilangnag boch ban’en riy.

Faanra ba taufe fare pumoon ni ke un ko fare pin ko Bible study rok, ma aram e thingari upunguy fare pin lolugen. Ya ra rin’ ni aray rogon ma aram e be dag ni be tayfan e yaram rok Jehovah u lan e ulung ni Kristiano ni aram e piin pumoon e yad lolugen e ppin. Maku reb, e re n’ey ni be rin’ ni aram e be fil ban’en ku be’ e ba maruwel nib milfan ko piin pumoon u lan e ulung. (1 Kor. 11:​5, 6, 10) Ere, ku rayog ni nge yog ngak fare walag ni ke un ngak ni nge mang ir e yarmiy fare study ni faanra rayog rok ni nge rin’.

Machane, faanra fare pumoon ni ke un ngak fare walag nib pin ko Bible study rok e dawori un ko taufe maku gathi yow ba mabgol, ma de t’uf ni nge upunguy fare pin lolugen. Machane, sana bay boch e walag nra yog lanin’rad ngorad nthingar ra upunguyed lolugrad.