KENGGIN E RE KE BABYOR NEY | ROGON NI NGAD ATHAMGILGAD U FITHIK’E MAGAFAN’ RODAD

Gubin Yang Ni Bay E Magafan’ Riy!

“Gu wan ni nggu chuw’iy e ggan ma yigoo okas e yibe pi’ nni chuway’, ni ku bogi okas ndabkiyog i chuw’iy ya kaygi tolang puluwon! Faani bin migid e rran ni gu wan ma dakuriy ban’en ni yibe pi’ nni chuway’ ko fare kantin ni ngan kay.”​—Paul, Zimbabwe.

“I piningeg e pumoon rog me yog ngog ni nggu dargow. Mang fan ni ke rin’ e biney e pa’ ngog? Mang e ra buch rok gal fakag?”​—Janet, Meriken.

“Nap’an ni yan lingan e yabul, mug mil nggu wan gu palpal nga but’, ma aram me tabab ni nge chub fapi donmach. Boch e awa nga tomuren, ma ka be da’da’ paag.”​—Alona, Israel.

Gad be par u ba ngiyal’ ni kari gel e magafan’ ni yibe tay riy ni bochan e kari “mo’maw’” e par. (2 Timothy 3:1) Boor e girdi’ ni kari magafan’rad ni bochan e magawon ko salpiy, nge tabinaw ni be wer, nge mahl, nge m’ar ni yibe yim’ riy, nge ku boch e magawon ni be buch ni bochan boch ban’en ni ke kirebnag e girdi’ ko re fayleng ney. Re n’ey e kub muun ngay boch ban’en ni ma magafan’ e girdi’ ngay ni bod rogon e pi n’en ni baaray: ‘Re n’ey ni ke thuthuw u dowag e bayi ngal’ ni cancer, fa?’ ‘Ba miti mang par e bayi ilal pi tungig riy?’

Gathi urngin mit e magafan’ nib kireb. Ba ga’ ni ma magafan’dad u m’on ni ngad feked reb e skeng, ara ngad rin’ed ban’en u p’eowchen e girdi’ ni yoor, ara nap’an ni yibe fith boch e deer ngodad u m’on ni ngad uned nga reb e maruwel. Maku reb e faanra ud rusgad nga boch ban’en ni bay e riya’ riy ma ra ayuwegdad ni ngad siyeged boch ban’en nrayog ni ngad maad’adgad riy. Machane, ba kireb e magafan’ nib pag rogon. Kan fithfith boch e deer nga boor ko 68,000 e girdi’, ma kan pirieg ni mus ko magafan’ nde gel nrayog ni nge k’aring be’ ni nge yim’ ndawori taw nga yangaren. Ba puluw e n’en ni fith Jesus ni faani gaar: “Mini’ e aromed nrayog ni ku ra mun in e rran ngak ko biney e tamilang ni faanra i magafan’ ngay?” Ere, magafan’ e ma ngochnag e yafas ko girdi’. Aram fan ni yog Jesus ni gaar: “Dabi magafan’med.” (Matthew 6:25, 27) Machane, uw rogon ni ngaud pared ndabi magafan’dad?

Fulweg ko re deer ney e ba muun ngay ni nge yag e gonop, nge bin riyul’ e michan’ ngodad, me l’agan’dad ko pi n’en ni ka bay nga m’on. Yugu aram rogon ni bay boch i gadad nder mada’nag boch e magawon nib ga’ e chiney, machane rayog ni nge mada’nag boch nga m’on. Ere, ngad guyed ko uw rogon ni ke yag ni nge war e magafan’ rok Paul, nge Janet, nge Alona ni bochan e kar folgad ko re fonow ney.