KENGGIN E RE KE BABYOR NEY | ROGON NI NGAD ATHAMGILGAD U FITHIK’E MAGAFAN’ RODAD

Magafan’ Ko Tabinaw

I yog Janet ni gaar: “De n’uw nap’an nga tomuren ni yim’ e chitamag, me yog e pumoon rog ngog ni bay yugu reb e ppin ni be un ngak. De n’uw nap’an nga tomuren, me kunuy gubin e chugum rok nge chuw u tabinaw me digeymad l’agruw i bitir ni fakmow ndariy ban’en ni yog ngomad.” Boch nga tomuren me pirieg Janet e maruwel, machane rib sobut’ puluwon ko re maruwel rok nem. Ere, daki yag ni ngar pared ko naun rorad. Gathi kemus ni yigoo magawon ko salpiy e ir e i mada’nag. Ya ki yog ni gaar: “Kari aw parowog nga urngin ban’en ni bay nib milfan ngog nthingar gu rin’. I kireban’ug ni bochan e dabiyog ni nggu pi’ urngin ban’en nib t’uf rok gal fakag ni bod rogon ni be rin’ boch e gallabthir. Ki mada’ ko chiney ma ma magafan’ug nga rogon ni ma lemnageg boch e girdi’ nge rogon ni ku yad ma lemnag e gal bitir rog ney. Gur, yad ma lemnag ni faan gomanga gu athamgil u rogon nrayog rog ma dabi wer e mabgol rog?”

Meybil e aram e n’en ni ma ayuweg Janet ni nge gapas laniyan’ me yag ni nge par nib fel’ e tha’ u thilrow Got. Ki yog ni gaar, “Nap’an nra nep’ ko ngiyal’ ndakir yan lingan ban’en ma aram e ngiyal’ nri ma magafan’ug nrib gel. Machane, meybil nge beeg Bible ni gu ma tay e aram e n’en ni ma ayuwegeg nge yag ni nggu mol. Ri gu baadag fare thin ni bay ko Filippi 4:6, 7 ni faan be gaar: ‘Dariy ban’en ni nge magafan’med ngay, machane faan gimed ra meybil ngak Got mi gimed ning ngak e tin ni nge yog ngomed, ma gubin ngiyal’ ni nguum ninged ngak ni gimed be pining e magar ngak u lanin’med. Ma gapas rok Got ndabi chuchugur ni nge nang e girdi’ fan e ra yororiy gum’ircha’med nge tafinay romed.’ Boor e nep’ ni gu ma par ni yug gu ma meybil ma kug guy ni ke gapaseg Jehovah lanin’ug.”

Fapi thin ni weliy Jesus u nap’an fare Welthin rok u Daken e Burey u nap’an ni be weliy murung’agen e meybil e bay rogon nga urngin mit e magafan’ ni gad ma tay. I yog ni gaar: “Chitamangimed e manang e n’en nthingari yog ngomed u m’on ndawor mu ninged ngak.” (Matthew 6:8) Machane, ba t’uf ni ngad ninged e pi n’ey ngak. Ma meybil e aram e bin nth’abi fel’ e kanawo’ nrayog ni ngad ‘chugurgad riy ngak Got.’ Ma mang angin nra yib ngodad? Ra ‘chugur ngodad.’​—James 4:8.

Arrogon, nap’an ni gad ra meybil nda weliyed e pi magafan’ rodad ngak Got, ma gathi kemus ni ma fel’ lanin’dad. Ya Jehovah ni ir e en ni ma “fulweg taban e meybil,” e ku ma rin’ boch ban’en ni fan ngak e piin ni yad ma gay u daken e michan’ rorad ngak. (Psalm 65:2) Aram fan ni fil  Jesus ngak pi gachalpen ni “nguur meybilgad [ni gubin ngiyal’] ma ri dabi ngochngochan’rad.” (Luke 18:1) Ere, thingar ud meybilgad ngak Got ma gad wenig ngak ni nge pow’iydad me ayuwegdad, ya ba pagan’dad nra tow’athnagdad. Dariy e ngiyal’ ni nge maruwar Got u wan’dad nge rogon ni ma rin’ boch ban’en ni fan ngodad. Faanra ud meybilgad ni aray rogon ni “gubin ngiyal’,” ma aram e ra m’ug riy nriyul’ nrib gel e michan’ rodad.​—1 Thessalonika 5:17.

N’EN NI BE YIP’ FAN NI NGE YAG E MICHAN’ NGODAD

Machane, mang e michan’? Ra nge michan’dad mab muun ngay ni ngad ‘nanged’ Got nrib fel’ rogon. (John 17:3) Rogon ni ngad rin’ed e re n’ey e aram e ngad guyed rogon ni ngad nanged laniyan’ Got u daken e fol Bible ni gad ma tay. Gad ra rin’ ni aray rogon ma aram e gad ra nang ni ma yaliydad ni be’ nge be’ ma baadag ni nge ayuwegdad. Machane, bin riyul’ e michan’ e gathi kemus ni ngam nang boch ban’en u murung’agen Got. Ya kub muun ngay ni nge fel’ e tha’ u thilmew. Ma re tha’ ney e dabiyog ni nga yigi sum nib tomgin. Ya ku bod rogon ni ga be guy rogon ni ngam m’ag fager ngak be’ ndabiyog ni nga yigi fel’ thilmew nib tomgin. Faanra ud filed boor ban’en u murung’agen Got, ma gad be “rin’ e tin nib m’agan’ ngay,” maku gad be guy rogon ni be ayuwegdad, ma aram e ra ‘ilal e michan’ rodad’ i yan. (2 Korinth 10:15; John 8:29) Ireray e re miti michan’ ni ayuweg Janet ni nge dabki magafan’ nib pag rogon.

I yog Janet ni gaar: “Bochan ni kug guy rogon ni ke ayuwegmad Jehovah u gubin ban’en, ma aram e n’en ni kari gelnag e michan’ rog. Bay yu ngiyal’ ni yima rin’ boch ban’en ngomad nde mat’aw, ma pi magawon nem e gowa dabiyog ni nggu athamgilgad u fithik’. Machane, bochan e meybil nib gel ni gu ma tay, ma gubin ngiyal’ ni ma ayuwegmad Jehovah u boch e kanawo’ ni faan gomanga gag rog e nggu lemnag rogon ma dabiyog ni nggu rin’. Nap’an ni gu ra pining e magar ngak, ma ma yib ngan’ug urngin ban’en ni ke rin’ ni fan ngog. Gubin ngiyal’ ni ma ayuwegmad ko ngiyal’ nib puluw ni nge ayuwegmad riy. Ki pi’ boch e fager nrib fel’ ngog ni yad boch e pumoon nge ppin ni Kristiano. Ra t’uf e ayuw romad gal fakag ma yad bay ni ngar ayuweged gamad maku yad ma dag e kanawo’ nib fel’ ni ngar folwokgow riy. *

“Ka fin gu nang fan ni ke yog Jehovah u Malaki 2:16 ni ‘dabun e mabgol ni ma wer.’ Ya arorow fa wu’ i mabgol nde kireb e rok e rib gel e amith nra tay laniyan’ ko n’en ni kan rin’ ngak. Ke yoor e duw ni ke n’ageg e pumoon rog, machane ka bay yu ngiyal’ ni ma kireban’ug ni bochan e yigoo gag ma kug ma lemnag ndariy fag. Machane, nap’an ni gu ra lem ni aram rogon, mug gay rogon ni nggu rin’ ban’en ni nggu ayuweg be’. Ma rib gel e ayuw ni ma pi’ e re n’ey ngog.” Bochan ni ke fol Janet ko fare kenggin e motochiyel u Bible ni be yog ndabi palognag ir ko girdi’ nga orel, ma aram e n’en ni ke ayuweg ni nge war e magafan’ rok. *​—Proverbs 18:1.

“I yog Janet ni gaar: “Bochan ni gu manang ni Got e ir e ‘ma ayuweg e piin ka nim’ rorad ma ma yoror rok e piin ke yim’ figirngirad,’ ma aram reb e ban’en nri ma pi’ e athamgil nga lanin’ug. Dabi n’ageg Got ni bod ni ke n’ageg e pumoon rog.” (Psalm 68:5, BT) Manang Janet nder ma k’aring Got boch “ban’en nib kireb” ni nge buch rodad ni bochan e nge skengnagdad. Ya ma “pi’” e gonop ngak urngin e girdi’ nge ‘gelngin ni ir e ba th’abi gel’ ni nge ayuwegdad ni nge dabki magafan’dad nib pag rogon.​—James 1:5, 13; 2 Korinth 4:7.

Machane, uw rogon ni faanra be magafan’dad ni bochan e ke par e yafas rodad nga thatharen e riya’?

[Boch e thin nra tamilangnag murung’agen]

[Blurb ko page 7]

Got e ir e “ma ayuweg e piin ka nim’ rorad ma ma yoror rok e piin ke yim’ figirngirad.”​—Psalm 68:5, BT