KENGGIN E RE KE BABYOR NEY | ROGON NI NGAD ATHAMGILGAD U FITHIK’E MAGAFAN’ RODAD

Magafan’ Ko Salpiy

Paul ni ir reb i figirngiy, maku bay l’agruw i bitir ni fak e yog ni gaar: “Nap’an ni tolang puluwon e chugum ko nam romad, ma aram me tolang puluwon e ggan, miki lich. Bayi n’en mug uned ko line, mug pared u rom ni bokum e awa, ma nap’an ni gamad ra taw nga m’on ma dakuriy e ggan. Boor e girdi’ ni kar mayilyilgad ni bochan e mak’iy, maku boch i yad e i aw nga but’ u lan e kanawo’ nga gelngin e mak’iy. Mus ko pi n’en nib t’uf ko par ni yan puluwon nge yan i mada’ nga bokum milyon e dolla, me munmun me pag nge yan nga bokum bilyon e dolla. Tomur riy me yan i par e salpiy ko nam romad ndabkiyog ni ngan chuway’ ngay ya dakuriy angin. Ere, nning e account rog u bank, mug par ndakuriy e insurance rog, nge salpiy ni ma yib ngog ni yu pul.”

Manang Paul ni faanra ngar pared chon e tabinaw rok ni yad ba fos, ma thingari maruwel ko “gonop” rok. (Proverbs 3:21, BT) I yog ni gaar: “Maruwel rog e gu ma fal’eg e gamig, machane yugu demtrug e re maruwel ni kug pirieg mug un ngay ni yugu aram rogon nrib achig puluwon. Bay boch e girdi’ ni yad ma pi’ puluwog ni ggan ara boch ban’en ni ngan fanay u tabinaw. Faanra kan pi’ puluwog ni aningeg yang e soap, ma aram mug fanay l’agruw yang mug pi’ l’agruw yang riy ni chuway’. Munmun me yag ni nggu chuw’iy 40 e purok. Nap’an ni gu chuguliyrad ngar ga’gad, ma aram mug pi’rad ni chuway’, ngemu’ mu kug chuw’iy 300 e purok ni nggu fakay. Boch nga tomuren, ma aram mug thilyegew be’ 50 e nimen rog nga l’agruw tutuw e cornmeal, nra reb ma 110 e pound tomalngin. Ireram e gal tutuw i cornmeal ni gu wed chon e tabinaw rog nge ku in e tabinaw nib n’uw nap’an.”

Ku manang Paul ni n’en nth’abi fel’ ni nge rin’ be’ e aram e nge pagan’ ngak Got. Faan gad ra rin’ e n’en ni ke yog Got ni ngad rin’ed, ma ra ayuwegdad. I weliy Jesus murung’agen e pi n’en nib t’uf rodad ni gaar: “Dabi magafan’med . . . ya Chitamangimed e manang ndabi siy ni nge yog e pi n’ey ngomed.”​—Luke 12:29-31.

Machane, Satan ni ir e bin th’abi ga’ e toogor rok Got e ma bannag yooren e girdi’ ko re fayleng ney, ya ngaur pared ni yigoo chugum e ir e yad be lemnag. Yug ma par e girdi’ ni be magafan’rad ko tin nib t’uf rorad, ere yad ma athamgil u rogon nrayog rorad ni ngar yognaged  boch ban’en nde t’uf rorad. Boor i yad e ke par nga fithik’ e malfith. Ma ke yan i tamilang u wan’rad ni faan “ga ra man salpiy ni malfith ma ga ra mang sib ko en ni kam malfith ngak.”​—Proverbs 22:7, BT.

Bay boch e girdi’ ni yad ma dugliy ni ngar rin’ed boch ban’en me yib wenegan nib kireb ngorad ko tomur. I yog Paul ni gaar: “Boor e piin buguli yoror rog nra digeyed e tabinaw rorad nge pi tafager rorad ni bochan e yad be gay bang ni kab fel’ boch e par riy. Bay boch i yad ni ka ranod nga lan boch e binaw ndariy babyorrad ma aram e de yag ni ngar uned ko maruwel. Boor i yad e i mith ko polis ma be mol u kanawo’ i yan. Dar paged Got ni nge ayuwegrad. Machane, gamad e tabinaw rog e gu dugliyed ni nggu paged Got ni nge ayuwegmad ko magawon romad.”

MU FOL KO FONOW ROK JESUS

Ki yog Paul ni gaar: “I gaar Jesus faram: ‘Dabi magafan’med nga rogomed gabul; ya ba gaman e tin nra magafan’uy ngay ni ba’ riy. Dariy fan ni ngku ni puthuy boch e magafan’ ko magafan’ ni be fek e yu rran i yib.’ Ere, gu ma meybil ngak Got ni nge ‘pi’ ngomad e ggan ni nggu wed’ ko re rran nem ya nge dab gu m’ad. Ma rriyul’ ni ke ayuwegmad ni bod rogon ni ke micheg Jesus. Gathi gubin ngiyal’ ni i yag ngomad e tin ni gamad baadag. Immoy bayay ni gu wan gu un ko line ndag nang ko ba miti mang ggan e yibe pi’ ni chuway’. Ere, nap’an ni gu taw ko gin ni yibe pi’ e ggan riy ni chuway’, ma yogurt e ir e yibe pi’ ni chuway’. Ma dabug e yogurt. Machane, rayog ni ngan kay, ere aram e n’en ni gu wed e re nep’ i n’em. Gu be pining e magar ngak Got ni bochan e dariy borran ni gu molod chon e tabinaw rog nda gu abichgad. *

“Chiney e ke puf e biney e magawon romad ko salpiy. Machane, bochan e n’en ni buch romad ma kug filed nnap’an nra magafan’ be’ nga ban’en, ma n’en nth’abi fel’ ni nge rin’ e aram e nge pagan’ ngak Got. Faan gad ra m’oneg e tin nib m’agan’ Jehovah * ngay ma gubin ngiyal’ nra i ayuwegdad. Kug guyed ni ke riyul’ fare thin ni bay ko Psalm 34:8 ni be gaar: ‘Mpagan’um ngak Somol, ma ga pirieg feni manigil! Ba felan’ e cha’ ni be naf nga tan pa’ Somol!’ Bochan e re n’ey ma dakir magafan’mad ko pi magawon ni gamad ra mada’nag boch nga m’on.

“Chiney e ka fini tamilang u wan’mad ni ggan e ir e ba t’uf ko girdi’, gathi maruwel ara salpiy. Gamad be sonnag e ngiyal’ nra lebguy Got e n’en ni ke micheg ni ke gaar: ‘Me par e nam nib sug ko grain.’ Machane, chiney e ‘faanra bay e ggan romad nge mad ni nggon’ed, ma susun e ke gaman e tin ni nge yog ngomad.’ Be pi’ fapi thin nu Bible e athamgil nga lanin’mad ni faan be gaar: ‘Dabi m’on e salpiy u lanin’med, ma ngam pired ni nge fel’ u wan’med e tin ni ba’ romed ban’en. Ya ke yog Got ni ke gaar, ‘Ri dab gu pagem; ma ri dab gu n’igem.’ Ere, dab kud tamdaggad ma nge lungudad, “I Somol e ir e be ayuwegeg, ere dab gu tamdag!”’” *

Faanra ngad pared ni gad ba ‘fel’ u wan’ Got’ ni bod rogon Paul nge chon e tabinaw rok, ma thingari yag e bin riyul’ e michan’ ngodad. (Genesis 6:9, 10) Demtrug ko gad be mada’nag e magawon ko salpiy e chiney ara bay fin nda mada’naged boch nga m’on, ma rayog ni ngad filed ban’en ko n’en ni rin’ Paul ni aram e i par nib gel e michan’ rok me maruwel ko gonop rok.

Machane, uw rogon ni faanra magawon u tabinaw e aram tapgin e magafan’ rodad?

[Boch e thin nra tamilangnag murung’agen]

[Blurb ko page 5]

Ke micheg Got ni ke gaar: “Ri dab gu pagem; ma ri dab gu n’igem.”​—Hebrews 13:5